Skip to main content
x

የኢትዮ ቴሌኮምን ሞኖፖል ሙሉ በሙሉ የሚያስቀር ረቂቅ አዋጅ ለፓርላማ ተላከ

የቴሌኮም ነባር ሕጎች በሙሉ ይሻራሉ

ለዓመታት በመንግሥት በሞኖፖል ተይዞ የቆየው የቴሌኮም ዘርፍ ለውድድር ክፍት እንደሚደረግ፣ ይህንንም የሚደነግግ ረቂቅ አዋጅ ለተወካዮች ምክር ቤት ተላከ፡፡ የኢትዮ ቴሌኮም የገበያ የበላይነትንና የሞኖፖል ድርሻን የሚያስቀር የገበያ ሥርዓት እንደሚፈጠር መንግሥት አስታውቋል፡፡

የሚኒስትሮች ምክር ቤት ሰኞ ጥር 27 ቀን 2011 ዓ.ም. ያካሄደውን አስቸኳይ የካቢኔ ስብሰባ ውሳኔዎችን ይፋ ያደረገው የጠቅላይ ሚኒስትር ጽሕፈት ቤት፣ በካቢኔው ውሳኔ ከተሰጠባቸው ጉዳዮች መካከል በቴሌኮሙዩኒኬሽን መስክ እስካሁን የነበረውን የሞኖፖል ሥርዓት በውድድር ላይ እንዲመሠረት መወሰኑን አስረድቷል፡፡ በውሳኔው መሠረትም የአገር ውስጥና የውጭ ባለሀብቶች በቴሌኮም መስክ ኢንቨስት ማድረግ የሚችሉበት ዕድል መሰጠቱን የሚደነግግ ረቂቅ አዋጅ ለሕዝብ ተወካዮች ምክር ቤት ተልኳል፡፡

በረቂቅ አዋጁ መሠረት መንግሥት የሚያቋቁመው የቴሌኮሙዩኒኬሽን አገልግሎት አቅራቢዎች ተቆጣጣሪ ባለሥልጣን፣ የቴሌኮም አገልግሎት ታሪፎችን ጨምሮ ለአገልግሎት አቅራቢዎቹ ፈቃድ በመስጠትና የኔትወርክ ዝርጋታዎችን በመሬትም ሆነ በሕንፃዎች ማካሄድ እንዲችሉ መብት ይሰጣቸዋል፡፡ ይህም ሆኖ የገበያ ውድድር የሚፃረሩ፣ የገበያ የበላይነትን ለመያዝ የሚደረጉ ሽርክናዎችና ትስስሮች የተከለከሉ ተግባራት እንደሆኑም በረቂቅ አዋጁ ውስጥ ሠፍሯል፡፡

የቴሌኮሙዩኒኬሽን አቅራቢ ኩባንያዎች በገበያው ውስጥ የበላይነት እንዳይዙ የታሪፍ ቁጥጥር እንደሚደረግ በረቂቅ ሕጉ ተካቶ፣ ሰፊ የገበያ ድርሻ ያላቸው ኩባንያዎችም የአገልግሎት ታሪፋቸውን ለሚቋቋመው ባለሥልጣን የማሳወቅ ግዴታ ይጣልባቸዋል ብሏል፡፡ ባለሥልጣኑ የአገልግሎት አቅራቢዎቹን ታሪፍ በየጊዜው የመከታተልና የመቆጣጠር ሥልጣን እንደሚኖረውም በረቂቅ አዋጁ ሠፍሯል፡፡ የሚወጣው ታሪፍ ለተጠቃሚዎች ትክክለኛ፣ ምክንያታዊና፣ በተጠቃሚዎች መካከል ልዩነት የማይፈጥር ዋጋ ተግባራዊ እንደሚደረግም በረቂቅ አዋጁ ተመልክቷል፡፡

በሚኒስትሮች ምክር ቤት ውሳኔ መሠረት የቴሌኮሙዩኒኬሽን ገበያ ሥርዓቱን እንደገና ለማደራጀትና በውድድር ላይ የተመሠረተ የቴሌኮሙዩኒኬሽን አገልግሎት አቅርቦት ይኖራል ተብሏል፡፡ መንግሥት የቴሌኮሙዩኒኬሽን ገበያውን እንደገና ለማዋቀርና በቴሌኮሙዩኒኬሽን ገበያ ውድድርን ለማስፈን ያስቀመጠውን የፖሊሲ አቅጣጫ ለማሳካት ተቆጣጣሪ ባለሥልጣን ማቋቋም ስላስፈለገ፣ በገንዘብ ሚኒስቴር የተዘጋጀው የኮሙዩኒኬሽን አገልግሎት ረቂቅ አዋጅ ለሚኒስትሮች ምክር ቤት ውሳኔ ቀርቦ ውይይት እንደተደረገበትና ማሻሻያዎች ታክለውበት ለሕዝብ ተወካዮች ምክር ቤት ውሳኔ መላኩም ተገልጿል፡፡

የቴሌኮሙዩኒኬሽን አገልግሎት በኢትዮጵያ ከ100 ዓመታት በላይ የቆየ ዘርፍ ነው፡፡ ይሁንና በአሁኑ ወቅት እየቀረበ የሚገኘው አገልግሎት፣ የሕዝቡ የቴሌኮም ዘርፎች ተጠቃሚነትና የአገልግሎት ታሪፍ ጉዳይ ቅሬታ የሚቀርብበት እንደሆነ ይታወቃል፡፡ ኢትዮ ቴሌኮም በአዲስ አስተዳደር ከተደራጀና የዋጋ ማስተካከያ ካደረገ በኋላ መጠነኛ ለውጥ ቢኖርም፣ አሁንም የአገልግሎት ጥራት ችግሮች በሰፊው ይስተዋላሉ፡፡

ኢትዮ ቴሌኮም ወደ ግል ይዞታ ከሚዛወሩ የመንግሥት የልማት ድርጅቶች ዝርዝር ውስጥ መሆኑ ቢታወቅም፣ በሚኒስትሮች ምክር ቤት የፀደቀው ረቂቅ አዋጅ ግን የኩባንያውን የገበያ የበላይነት ከማስቀረት በተጨማሪ እንደ አንድ ተወዳዳሪ ኩባንያ በገበያው ተዋናይ እንዲሆን ያስገድደዋል፡፡

የኢትዮ ቴሌኮምን የገበያ የበላይነትም ሆነ የሞኖፖል ድርሻ የሚያስቀረው አዲሱ ረቂቅ አዋጅ፣ ከዚህ ቀደም የቴሌኮሙዩኒኬሽን አገልግሎትን ለመደንገግ የወጡ አዋጆችንና ደንቦችን በሙሉ እንዲሻሩ ይጠይቃል፡፡ ፓርላማው ካፀደቀውም እስካሁን የነበሩ አሠራሮችና ሕጎች በሙሉ በአዲስ ይተካሉ፡፡

ከወራት በፊት የኢሕአዴግ ሥራ አስፈጻሚ ኮሚቴ ኢትዮ ቴሌኮምን ጨምሮ ዋና ዋናዎቹ የመንግሥት የልማት ድርጅቶች ሙሉ በሙሉና በከፊል ወደ ግል ይዞታ እንዲዘዋወሩ መወሰኑ አይዘነጋም፡፡