Skip to main content
x
ንብ ባንክ አዲስ ፕሬዚዳንት ሾመ
አቶ ገነነው ሩጋ

ንብ ባንክ አዲስ ፕሬዚዳንት ሾመ

ነባር ኃላፊዎችን በጡረታ እያሰናበተ ነው

የንብ ኢንተርናሽናል ባንክ የዳይሬክተሮች ቦርድ የባንኩን ፕሬዚዳንት አቶ ክብሩ ፎንዠን ለመተካት ውሳኔ ማሳለፉ ታወቀ፡፡ ባንኩን በፕሬዚዳንትነት እንዲያገለግሉ የሰየማቸው አቶ ገነነው ሩጋ የተባሉትን ኃላፊ ነው፡፡

የዳይሬክተሮች ቦርድ የባንኩን ፕሬዚዳንት ለመተካት ዘለግ ላለ ጊዜ ሲመክር መቆየቱን የሪፖርተር ምንጮች ገልጸው፣ በቦርዱ ውሳኔ መሠረት አቶ ገነነው ፕሬዚዳንት እንደሚሆኑ ታውቋል፡፡ የአመራር ለውጥ የተደረገው ባንኩ እያካሄደ በሚገኘው መዋቅራዊ ማስተካከያ መሠረት አዲሱን ስትራቴጂ ሥራ ላይ ለማዋል የሚያስችል አዲስ የሠራተኞች ምደባ ማድረግ በመጀመሩ ነው ተብሏል፡፡

ከፕሬዚዳንቱ በተጨማሪ ሌሎች ኃላፊዎችም፣ በተለይ ዕድሜያቸው ለጡረታ የደረሱም በአዲስ ኃላፊዎች እየተተኩ እንደሆነ የምንጮች መረጃ ይጠቁማል፡፡

የንብ ባንክ አዲሱ ፕሬዚዳንት ለዚህ ኃላፊነት ከመታጨታቸው በፊት በባንኩ የኦፕሬሽን ምክትል ፕሬዚዳንት ሆነው ሲያገለግሉ ቆይተዋል፡፡ በባንክ ኢንዱስትሪው የረዥም ጊዜ ልምድ እንዳላቸው የተነገረላቸው አቶ ገነነው፣ ንብ ባንክን ከመቀላቀላቸው በፊትም በኢትዮጵያ ልማት ባንክ በተለያዩ ኃላፊነቶች እስከ ምክትል ፕሬዚዳንትነት  አገልግለዋል፡፡

የአዲሱን ተሿሚ ኃላፊነት የኢትዮጵያ ብሔራዊ ባንክ ማፅደቅ ስላለበት፣ ይኸው የባንኩ ዳይሬክተሮች ቦርድ እንዲያፀድቅለት ጥያቄውን አቅርቧል፡፡

ንብ ኢንተርናሽናል ባንክ 20 ዓመታት ካስቆጠሩ አምስት የግል ባንኮች አንዱ ሲሆን፣ በአሁኑ ወቅት ያካበተው አጠቃላይ የሀብት መጠን 26.7 ቢሊዮን ብር ስለመድረሱ መረጃዎች ያሳያሉ፡፡ ባንኩ በቅርቡ ባካሄደው ጠቅላላ ጉባዔ፣ ካፒታሉን ወደ አምስት ቢሊዮን ብር እንዳሳደገ ማስታወቁ ይታወሳል፡፡

ባለፈው ዓመት የባንኩ አጠቃላይ ተቀማጭ ገንዘብ መጠን ወደ 21.6 ቢሊዮን ብር ከፍ ማለቱ ሲታወቅ፣ የባንኩ ደንበኞች ቁጥርም ከ679 ሺሕ በላይ እንደደረሰ ታውቋል፡፡ ዓመታዊ ትርፉም 644 ሚሊዮን ብር ደርሷል፡፡