Skip to main content
x
የቀድሞው ሚኒስትር ወደ ማረሚያ ቤት ይደውላሉ

የቀድሞው ሚኒስትር ወደ ማረሚያ ቤት ይደውላሉ

[ለአንድ የቀድሞ ሚኒስትር አንድ ዳያስፖራ ስልክ ደወለላቸው]

  • እንዴት ነዎት ክቡር ሚኒስትር?
  • ኧረ በዚህ ስም አትጥራኝ፡፡
  • ምነው ክቡር ሚኒስትር?
  • ከሚኒስትርነት ካወረዱኝ ቆዩ እኮ፡፡
  • የቀድሞው ክቡር ሚኒስትር ልበል?
  • ተው እሱ ማዕረግ ምራቄን ያስውጠኛል፡፡
  • ምንም ነገር ቢውጡ መልሰው እንደሆነ አያገኙት፡፡
  • ይኸው አንተም ንቀኸኛል፡፡
  • ሲሾም ያልሠራ ሲሻር ይቆጨዋል ሲባል አልሰሙም?
  • ወይኔ ሥርዓቱ ብቻ ሳይሆን ተረቱም ተቀይሯል ነው የምትለኝ?
  • ምን ያልተቀየረ ነገር አለ?
  • በሥራም ቢሆን ግን መቼ እኔ እታማለሁ?
  • ምነው እየተዋወቅን ክቡር ሚኒስትር?
  • ምን ማለት ነው?
  • እርስዎ መቼ በሥራ ይታወቃሉ?
  • በምንድነው የምታወቀው ታዲያ?
  • እርስዎ ከሥራ ይልቅ የሚታወቁት በሌሎች ነገሮች ነው፡፡
  • እኮ በምን?
  • በሴራ፣ በአሻጥርና በክፋት ነው፡፡
  • እ…
  • ይባስ ሲል በሙስና፣ በሌብነትና በሕገወጥነት ነው፡፡
  • ምን አልከኝ?
  • የእርስዎ ሌጋሲዎች እነዚህ ናቸው፡፡
  • ወይ ጊዜ እኔም እንደዚህ የምዘረጠጥበት ጊዜ ይምጣ?
  • ሕዝቡን እንደዚያ ሲዘረጥጡና ሲያዋርዱ ነግ በእኔ መቼ ይሉ ነበር?
  • ምንም አይደል ይኼም ያልፋል፡፡
  • እስኪያልፍ ግን ያለፋል ይላል ተረቱ፡፡
  • እ…
  • ሰው የዘራውን እንደሚያጭድ አያውቁም ነበር?
  • እኔ እኮ የዘራሁት ልማትና ዴሞክራሲ ነበር፡፡
  • የሚሉሽን በሰማሽ ገበያ ባልወጣሽ አሉ፡፡
  • እንዴት?
  • ልማትና ዴሞክራሲ ነው የዘራሁት ሲሉ ትንሽ አያፍሩም?
  • ምን ያሳፍረኛል?
  • ይኸው ሕዝቡ ከጫፍ እስከ ጫፍ እንዲበላላ ያደረጋችሁት እናንተ አይደላችሁም እንዴ?
  • እኛማ ሕዝቡን ቀጥ ለጥ አድርገን አንቀጥቅጠን ነበር የገዛነው፡፡
  • ችግሩ እኮ እሱ ነው፡፡
  • እንዴት?
  • ለሕዝቡ ተንቀጥቅጣችሁ ማገልገል ሲኖርባችሁ፣ እያንቀጠቀጣችሁ ገዝታችሁ ይኸው አሁን ሕዝቡ በተራው እያንቀጠቀጣችሁ ነው፡፡
  • እሱ የጊዜ ጉዳይ ነው፡፡
  • አሁንም በጊዜ ብትደመሩ ይሻላችኋል፡፡
  • ተደመርን እኮ?
  • እንዴት ሆኖ?
  • አሁን አዋጪው መንገድ መደመር መሆኑ ገብቶናል፡፡
  • ይኼንን አላምንም፡፡
  • ጊዜው የፍቅርና የዕርቅ ነው ሲባል አልሰማህም?
  • እሱማ ልክ ነው፡፡
  • ስለዚህ እኛም ፍቅርና ዕርቅ ይሻለናል ብለናል፡፡
  • ይኼን የሚያወሩት እርስዎ ነዎት?
  • ይኸው ከመንግሥት ተምረን እኛም አቋቁመናል፡፡
  • ምንድነው ያቋቋማችሁት?
  • ክልላዊ የዕርቅ ኮሚሽን፡፡
  • ከመንግሥት ጋር ልትታረቁ?
  • ምን በወጣን፡፡
  • ማንን ነው የምትታረቁት ታዲያ?
  • የቀድሞ ታጋዮችን!

[የቀድሞው ሚኒስትር ከአማካሪያቸው ጋር እያወሩ ነው]

  • ሰሞኑን እንቅልፍ እምቢ ብሎኛል፡፡
  • ምነው ክቡር ሚኒስትር?
  • አንተ ሰውዬ ለምን እንደዚህ ትጠራኛለህ?
  • ምነው ክቡር ሚኒስትር?
  • ከሚኒስትርነት ከወረድኩ ቆየሁ አላልኩህም እንዴ?
  • እንዳይሳሳቱ ክቡር ሚኒስትር፡፡
  • እንዴት?
  • ለእኔ ሁሌም ክቡር ሚኒስትሬ ነዎት፡፡
  • ምነው ሁሉም እንዳንተ ቢቀበለኝ?
  • ለእኔ እኮ ከሚኒስትርም በላይ ነዎት፡፡
  • አንተ ደግሞ ዝም ብለህ ልቤን ታሞቀዋለህ፡፡
  • እውነቴን ነው ክቡር ሚኒስትር፡፡
  • ምን አደረግኩልህ ብለህ ነው?
  • ይኸው እርስዎ አይደል እንዴ ከአፈር ያነሱኝ፡፡
  • ምን አድርጌ?
  • ክቡር ሚኒስትር እርስዎ አይደሉ እንዴ ከአንድ አይሉ ሁለት ዲግሪዎች ያሰጡኝ፡፡
  • ለአንተ እሱ ያንስብሃል፡፡
  • ከእሱም በላይ ያን ሁሉ ሀብት እንዳፈራ ያስቻሉኝ እኮ እርስዎ ነዎት፡፡
  • ለእኔና ለሥርዓቱ ታማኝ ስለነበርክ ነዋ፡፡
  • ምን ያደርጋል? ያ ሁሉ ሀብት መና ቀረ እንጂ፡፡
  • ለምን መና ይቀራል?
  • ክቡር ሚኒስትር ሦስት ቤቶች እኮ አዲስ አበባ ነው የሠራሁት፡፡
  • የእኔስ አምስት ሕንፃዎች ያሉት እዚያ አይደል እንዴ?
  • እሱን እኮ ነው የምልዎት፡፡
  • እንዲሁማ ተበልተን አንቀርም፡፡
  • ክቡር ሚኒስትር ሰሞኑን ጥናት ስሠራ ነበር፡፡
  • የምን ጥናት?
  • እዚህ የመሸግነው ምን ያህል ሕንፃ እንደተበላን፡፡
  • ውጤቱ እንዴት ነው?
  • በጣም አስደንጋጭ ነው፡፡
  • እንዴት?
  • በነፍስ ወከፍ በአብዛኛው ከአምስት እስከ አሥር ሕንፃ ነው የተበላነው፡፡
  • አልቀናል በለኛ?
  • የሆነ መፍትሔ ማበጀት አለብን ክቡር ሚኒስትር፡፡
  • ምን ማድረግ እንችላለን?
  • እኔማ አንድ ሐሳብ መጥቶልኝ ነበር፡፡
  • ምን ዓይነት ሐሳብ?
  • ለምን አናቋቁምም?
  • ምንድነው የምናቋቁመው?
  • ኮሚቴ ነዋ፡፡
  • የምን ኮሚቴ?
  • ሕንፃ አስመላሽ ኮሚቴ!

[የቀድሞው ሚኒስትር ወደ ማረሚያ ቤት ይደውላሉ]

  • ሄሎ ማን ልበል?
  • የቀድሞ ክቡር ሚኒስትር ነኝ፡፡
  • ማንን ፈለጉ?
  • አንተን ማን ልበል?
  • አያውቁኝም እኔ አዲስ ነኝ፡፡
  • ወዳጆቻችን የት ገቡ?
  • ሚዲያ አይከታተሉም እንዴ?
  • ምን ሚዲያ አለ አሁን?
  • ኪኪኪ…
  • ምን ያስቅሃል?
  • ምን ሚዲያ አለ ሲሉ ነዋ፡፡
  • እውነቴን እኮ ነው፡፡
  • ምን ማለት ነው?
  • ይኸው ነፃነት ተብሎ ማንም እየተነሳ አይደል እንዴ የሚፈነጭብን፡፡
  • ዴሞክራሲ ማለት ይኼ ነው፡፡
  • እየረገጡ መግዛት ነው የሚያስፈልገው፡፡
  • እሱ በእናንተ ጊዜ ቀረ፡፡
  • አሁን ወዳጆቼን አገናኘኝ?
  • ሚዲያ አይከታተሉም ወይ ያልኩዎት እኮ ለዚህ ነው፡፡
  • እንዴት?
  • አብዛኞቹ እስር ቤት ገብተዋል፡፡
  • ሁሉም ታስረዋል?
  • ቀሪዎቹ ደግሞ ከእናንተ ጋር መሽገዋል፡፡
  • ማን ነው የሚረዳን ታዲያ?
  • ምን ፈለጉ?
  • ይኸው መንግሥት ስማችንን እያጠፋው ነው፡፡
  • ምን ብሎ?
  • ራሳቸውን በራሳቸው አስሯል ብሎ ነዋ፡፡
  • ታዲያ እውነት አይደል እንዴ?
  • እኛ እኮ እዚህ ተቸግረን ነው ያለነው፡፡
  • ለምን?
  • ሆቴሉ የሚሰጠን አገልግሎት ከጊዜ ወደ ጊዜ እየቀነሰብን ነው፡፡
  • ምን ሆነ?
  • ይኸው እንደበፊቱ የፈለግነውን ምግብ አዘን መብላት አልቻልንም፡፡
  • እንዴ ለምን?
  • የእስካሁኑን ሒሳብ አልከፈልንማ፡፡
  • ያሳዝናል፡፡
  • አንሶላችን እንኳን ከታጠበ ቆይቷል፡፡
  • ለምን ለሆቴሉ አይናገሩም ታዲያ?
  • ሒሳብ ክፈሉ እያለን ነዋ፡፡
  • ምን ተሻለ ታዲያ?
  • እኔማ እናንተ እንድትረዱን አስቤ ነበር፡፡
  • በምን እንርዳዎት?
  • ስማችንን ማጥፋት ብቻ ሳይሆን ጥያቄያችንንም መልሱ፡፡
  • የትኛውን ጥያቄ?
  • የሆቴል ወጪያችንን ክፈሉልን፡፡
  • ከየት አምጥተን?
  • ለምን ከበጀቱ ተቀናሽ አድርጋችሁ አትከፍሉልንም?
  • ከየትኛው በጀት?
  • ከታራሚዎች!

[ለቀድሞ ሚኒስትር አንድ የተቃዋሚ ፓርቲ መሪ ደወለላቸው]

  • እንደዚህ ሆናችሁ ማየቴ ደስ ብሎኛል ክቡር ሚኒስትር፡፡
  • ሰውዬ ከሚኒስትርነት ከወረድኩ ቆይቻለሁ እኮ፡፡
  • ብቻ በጣም ደስ ብሎኛል፡፡
  • ምኑ ነው ደስ ያሰኘህ?
  • እናንተ እንደዚህ የመንግሥት ተቃዋሚ ሆናችሁ ማየቴ፡፡
  • እኛ አሁንም መንግሥት ነን፡፡
  • ኪኪኪ…
  • ምን ያስቅሃል?
  • የልባችሁን ጥንካሬ ግን ሁሌም አደንቀዋለሁ፡፡
  • እንዴት?
  • አብቅቶላችሁም አለን ስትሉ ይገርመኛል፡፡
  • እንዳይመስልህ እንዲያውም አሁን ተጠናክረናል፡፡
  • አልሞት ባይ ተጋዳይ አለ፡፡፡
  • በቅርቡ በአዲስ የትግል ሥልት ብቅ እንላለን፡፡
  • የሚገርመኝ ለምን አይበቃችሁም?
  • ምኑ ነው የሚበቃን?
  • ፖለቲካው ነዋ፡፡
  • ለምን ይበቃናል?
  • አረጃችኋ፡፡
  • በፖለቲካ የምትበስለው እኮ ስታረጅ ነው፡፡
  • ለመሆኑ ልትገዙት የምታስቡት የአገሪቱ ሕዝብ ከ70 በመቶ በላይ ወጣት መሆኑን አታውቁም?
  • ለዚያ እኮ ነው አገሪቱን ሽማግሌዎች መምራት ያለባቸው፡፡
  • ምክሬን ከሰሙ ግን ቢበቃችሁ ይሻላችኋል፡፡
  • እንዲያውም በቅርቡ በአዲስ መልክ ሥራ እንጀምራለን፡፡
  • ልክ እንደ ምግብ ቤት?
  • መቀለዱ ነው?
  • ለነገሩ ብዙ ጊዜያችሁን ሆቴል ስታጠፉ ከእነሱ ስትራቴጂ መማር ጀመራችሁ?
  • ነገርኩህ በቃ፡፡
  • ምን ልታደርጉ ነው?
  • ቀድሞ ከተጣላናቸው ጋር ሳይቀር ዕርቅ አውርደናል፡፡
  • እሱ ጥሩ ነው፡፡
  • ስለዚህ አዲስ ፓርቲ በቅርቡ ጠብቅ፡፡
  • ምን የሚሉት?
  • ሽ.ነ.ግ.
  • ምን ማለት ነው?
  • ሽማግሌ ነፃ አውጪ ግንባር!