Skip to main content
x
የኢትዮጵያ የምትፈልገው እንደ ዓድዋ ጀግኖች ከፊት የሚሠለፉላትን ብቻ ነው!

የኢትዮጵያ የምትፈልገው እንደ ዓድዋ ጀግኖች ከፊት የሚሠለፉላትን ብቻ ነው!

ኢትዮጵያ በዓለም አደባባይ የተመሰከረላት ታላቅ አገር ናት፡፡ ታላቅ አገር ስለመሆኗ ከሚመሰክሩላት ታላላቅ ታሪካዊ ክንውኖች መካከል አንዱ፣ የዛሬ 123 ዓመት በዘመኑ በአውሮፓ ኃያል ከነበሩት ኮሎኒያሊስቶች መካከል አንደኛው ከሆነው ጣሊያን ጋር ተዋግታ ዓለምን ጉድ ያሰኘ አንፀባራቂ ድል መጎናፀፏ ነው፡፡ የካቲት 23 ቀን 1888 ዓ.ም. የአገር ሉዓላዊነትን ለማስከበር በተደረገ በዚህ ታሪካዊ ጦርነት የተገኘው ታላቅ ድል ለፓን አፍሪካኒዝም እንቅስቃሴ መፈጠር ምክንያት ከመሆኑም በላይ፣ የመላው ዓለም ጥቁር ሕዝቦችን አንገት በኩራት ቀና ያደረገ ነበር፡፡ ይህ ታላቅና አንፀባራቂ የዓድዋ ድል የተገኘው ደግሞ፣ እናት አገራቸውን ከራሳቸው በላይ ያፈቅሩ በነበሩ ጀግኖች ኢትዮጵያዊያን ነው፡፡ በዓድዋ ተራሮች ላይ በጀግንነት እየፎከሩ ከፊት ረድፍ ሆነው ወራሪውን ኃይል ያንበረከኩትን እነዚያ ኩሩ ኢትዮጵያዊያን ታሪክና ትውልድ ይዘክሩዋቸዋል፡፡ ይኼንን የመሰለ አኩሪና አንፀባራቂ ድል የተቀዳጁትም፣ አገራቸውን ከስሜታዊነት በላይ በምክንያታዊነት ያፈቅሩ ስለነበር ነው፡፡ ይህ በምክንያታዊነት ላይ የተመሠረተ የአገር ፍቅር እናት አገራቸውን ከዘመኑ ወራሪ ኮሎኒያሊስት ኃይል ከመታደጉም በተጨማሪ፣ ኢትዮጵያን በዓለም አቀፍ ደረጃ ስሟን በወርቅ ቀለም አስመዝግቧል፡፡ ታላቁ የዓድዋ ድል መታሰቢያ በሚዘከርበት ዋዜማ ላይ፣ ምክንያታዊ ሆኖ አገርን ማገልገል የእያንዳንዱ ኢትዮጵያዊ ኃላፊነት እንደሆነ ማሰብ ይገባል፡፡

ኢትዮጵያ በወሳኝ ታሪካዊ ወቅት ላይ ትገኛለች፡፡ ይኼንን ታላቅና ታሪካዊ ወቅት በብልኃትና በኃላፊነት መንገድ በመምራት አንፀባራቂ ውጤት ለማስመዝገብ፣ ከስሜታዊነት ይልቅ ምክንያታዊነት ይፈልጋል፡፡ የተጀመረው ሁለገብ ለውጥ በመላ ኢትዮጵያዊያን ድጋፍ ወደፊት መራመድ አለበት፡፡ ለዚህ ለውጥ የተቃና ዕርምጃ ደግሞ የብሔር፣ የቋንቋ፣ የእምነት፣ የፖለቲካ አቋምና የመሳሰሉት ልዩነቶች ጠበው የጋራ ራዕይ ሊኖር የግድ ይላል፡፡ በስግብግብነትና በራስ ወዳድነት ሁሉንም ነገር በማግበስበስ፣ የለውጡን ተልዕኮ ማጨናገፍ አይገባም፡፡ ለነፃነት፣ ለእኩልነትና ለፍትሕ የሚደረግ ለውጥ በራስ ወዳዶች እንዳይጨናገፍ በአንድነት መቆም ተገቢ ነው፡፡ የተጀመረው ለውጥ በተለያዩ ምክንያቶች ችግር ሲገጥመው ወይም ተስፋ የሚያስቆርጥ ነገር ሲያጋጥም፣ እንደ ጲላጦስ እጅን እየተጣጠቡ ጣትን ወደ ሌሎች ከመቀሰር ችግርን የጋራ አድርጎ መፍትሔ መፈለግ የዜግነት ግዴታን መወጣት ነው፡፡ ለውጡ ፍሬ አፍርቶ በነፃነትና በእኩልነት መኖር የሚቻለው እንደ አየር ፀባይ በሚለዋወጥ ወላዋይ አቋም ሳይሆን፣ መንግሥት ሲሳሳት በመውቀስና የማስተካከያ ሐሳብ በማቅረብ ጭምር ነው፡፡ ሁሉንም ነገር ጽንፍ እያስያዙ ለጭቅጭቅና ለግጭት የሚዳርጉ ችግሮችን ከመኮልኮል ወይም እንደ ነገረኛ ሰው ስህተት ብቻ ከማነፍነፍ ይልቅ፣ የመፍትሔ አካል ሆኖ ለውጤታማነት መታገል ያስከብራል፡፡ ኢትዮጵያ አሁን የምትፈልገው እንደ ዓድዋ ጀግኖች ከፊት ረድፍ ተሠልፈው የሚታገሉላትን እንጂ፣ ወሬ ላይ ተጥደው የአሉባልታ መርዝ እየረጩ የሚያመሳቅሏትን አይደለም፡፡

ድህነት፣ ሥራ አጥነት፣ ተረጂነት፣ ኋላቀርነት፣ ማይምነትና የመሳሰሉት የዘመናት ልክፍቶች አሁንም የአገር መጠሪያና መዋረጃ ሆነው ሳለ፣ ነጋ ጠባ የማይረቡ አጀንዳዎች እየፈለጉ መነታረክና ሕዝብን ማጋጨት ከኪሳራ በስተቀር ፋይዳ የላቸውም፡፡ ኢትዮጵያ የዴሞክራሲና የብልዕግና አገር መሆን የምትችለው፣ መጀመርያ ለዘመናት ከተዘፈቀችበት አረንቋ ውስጥ ስትወጣ ነው፡፡ ከ100 ሚሊዮን በላይ ሕዝብ ያላት ትልቅ አገር ውስጥ፣ ኢኮኖሚው በፍጥነት አገግሞ ሥራ መፍጠር ካልተቻለ ቀውስ ይፈጠራል፡፡ ሰላምና መረጋጋት በአስቸኳይ ሰፍኖ ኢኮኖሚው ካለበት አሳሳቢ ሁኔታ ውስጥ መመንጠቅ አለበት፡፡ ሥራ አጥ በበዛበት አገር ውስጥ ሥርዓተ አልበኝነት እንጂ፣ የሕግ የበላይነት ሊሰፍን አይችልም፡፡ በተለይ አገርን ቀውስ ውስጥ የሚከቱ አጀንዳዎች እየፈበረኩ ሕዝብ የሚያምሱ የግጭት ነጋዴዎች ሰለባ መሆን አይገባም፡፡ ኢትዮጵያ ከፊቷ በርካታ ጉዳዮች የሚጠብቋት አገር መሆኗ እየታወቀ፣ በየሥርቻው በሚፈበረኩ ግጭቶች ስትታመስ የሚጎዳው በስሙ የሚነገድበት ሕዝብ ነው፡፡ ለአገሩ ፍቅርና ቅንነት ያለው እያንዳንዱ ኢትዮጵያዊ ማሰብ ያለበት፣ ከኢትዮጵያ ህልውና በላይ ምንም የሚበልጥ ነገር አለመኖሩን ነው፡፡ ይህ ፍቅር ለአገር መስዋዕት መሆን ድረስ መሆኑን ደግሞ የዓድዋ ጀግኖች አስተምረው በክብር አልፈዋል፡፡

ኢትዮጵያ የሕግ የበላይነት የሰፈነባት ዴሞክራሲያዊ ሥርዓት እንድትገነባ የሚመኝ እያንዳንዱ ኢትዮጵያዊ፣ የግልና የቡድን ጥቅም ከአገር በላይ እንዳይሆን መታገል አለበት፡፡ በዚህ ዘመን አገር እያጠፋ ያለው ግለሰቦችና ቡድኖች ከአገር በላይ እንሁን ማለታቸው ነው፡፡ የአገር ክብርና ታሪክ ምንም የማይመስላቸው፣ ሌላው ቀርቶ የዓለም ጥቁሮች መመኪያ የሆነውን ታላቁን የዓድዋ ድል ጭምር ያንቋሽሻሉ፡፡ ለአገር ክብርና ታሪክ ደንታ ቢስ የሆኑ ግለሰቦችና ስብስቦች፣ የአገርን ራዕይ ከማጨናገፍ ወደኋላ አይሉም፡፡ ኢትዮጵያ ለዘመናት መጫወቻ ካደረጋት አምባገነንነት ወደ ዴሞክራሲ ለመሸጋገር ስትነሳ በየቦታው ግጭት እየተነሳ የንፁኃን ሕይወት ሲጠፋ፣ የአገር አንጡራ ሀብት እየወደመ ዜጎች ከቀዬአቸው ሲፈናቀሉ በስፋት እየታየ ነው፡፡ ለአገር ደንታ የሌላቸው ስግብግቦችና የአቋራጭ ሥልጣን ፈላጊዎች ሕዝቡን እርስ በርስ እያጋጩ አገር ያምሳሉ፡፡ እነዚህን ኃይሎች በሕግ አደብ አስገዝቶ አገርን ወደ ታላቅነት መመለስ ታሪካዊ ግዴታ ነው፡፡ ለዚህ ደግሞ የኢትዮጵያ ሕዝብ ከዳር እስከ ዳር በአንድነት መቆም ይኖርበታል፡፡ የዓድዋ ጀግኖች ያስተማሩት ይኼንን ኃላፊነት ጭምር ነው፡፡

የወቅቱን የኢትዮጵያ ሁኔታ በአንክሮ የሚከታተሉ አገር ወዳድ ኢትዮጵያዊያንም ሆኑ የውጭ ሰዎች፣ ኢትዮጵያ በአፍሪካ ተስፋ ከሚጣልባቸው አገሮች አንዷ መሆኗን ቢያምኑም ሥጋት ግን አላቸው፡፡ ኢትዮጵያ ልጆቿ ተባብረው ጠንክረው ከሠሩ ትንሳዔዋ ቅርብ መሆኑን የሚናገሩትን ያህል፣ ወጥረው የያዙዋት ችግሮች ደግሞ ለህልውናዋ ጭምር አሥጊ መሆናቸውን ያሳስባሉ፡፡ እንደ ምሳሌ ከሚነሱ መሠረታዊ ጉዳዮች መካከል በአገሪቱ የተለያዩ ሥፍራዎች የሚከሰቱ ግጭቶች አለመቆማቸው፣ ምርጫ 2012 እየተቃረበ መሆኑና የተዳከመው ኢኮኖሚ ዋነኞቹ ናቸው፡፡ ግጭትን በተባበረ ጥረት ማስቆም ከተቻለ እኮ ሌላው ዕዳው ገብስ ነበር፡፡ ፖለቲከኞችም ሆኑ በዙሪያቸው ያሉ አክቲቪስቶችና ደጋፊዎች ግጭት እየቀፈቀፉ አገር ከሚያምሱ ለአገር ውለታ ይዋሉ፡፡ ያኔ በመተባበር ምርጫውን ነፃ፣ ፍትሐዊና ዴሞክራሲያዊ በማድረግ ታሪክ መሥራት ይቻላል፡፡ የተዳከመው ኢኮኖሚ ተነቃቅቶ ለሚሊዮኖች ሥራ በመፍጠር ተዓምር መፍጠር ይቻላል፡፡ በሠለጠነ ንግግር፣ ውይይትና ድርድር የፖለቲካ ምኅዳሩ ክፍት ሲሆን፣ የሐሳብ የበላይነት ያለው የሕዝብ ቀልብ ስቦ ይመረጣል፡፡ ይኼንን ለማድረግ ግን የአገር ፍቅርን በስሜት ብቻ ሳይሆን በተግባር ማሳየት ይገባል፡፡ የዓድዋ ጀግኖችን ታሪክ መድገም የሚቻለው በዚህ መንገድ ብቻ ነው፡፡ ኢትዮጵያ የምትፈልገውም እንደ ዓድዋ ጀግኖች ከፊት የሚሠለፉላትን ብቻ ነው!