Skip to main content
x
ክቡር ሚኒስትሩ ልጆቻቸው በመኝታ ቤት ሲጨቃጨቁ ከእንቅልፋቸው ነቁ

ክቡር ሚኒስትሩ ልጆቻቸው በመኝታ ቤት ሲጨቃጨቁ ከእንቅልፋቸው ነቁ

[ክቡር ሚኒስትሩ ከጸሐፊያቸው ጋር እያወሩ ነው]

  • ምን ሆነሻል?
  • ምን ሆንኩ ክቡር ሚኒስትር?
  • እንባሽ እየፈሰሰ እኮ ነው፡፡
  • አልቻልኩም ክቡር ሚኒስትር፡፡
  • ምን ተፈጠረ?
  • ጉድ ሆኜልዎታለሁ፡፡
  • እኮ ምን ሆንሽ?
  • ተዘረፍኩ፡፡
  • ተዘረፍኩ?
  • አዎን ክቡር ሚኒስትር፡፡
  • ማን ነው የዘረፈሽ?
  • ሌቦች ናቸዋ ክቡር ሚኒስትር፡፡
  • ምን ያስለቅስሻል ታዲያ?
  • ክቡር ሚኒስትር እሱን እኔ ነኝ የማውቀው፡፡
  • ንገሪኝ አይዞሽ?
  • ሙሉ ደመወዜን ነው እኮ የወሰዱብኝ፡፡
  • በቃ ተረጋጊ፡፡
  • መንግሥት ግን አለ?
  • ምን እያልሽ ነው?
  • እውነቴን ነው ክቡር ሚኒስትር እስቲ መልሱልኝ?
  • በሚገባ እንጂ፡፡
  • አይመስለኝም ክቡር ሚኒስትር፡፡
  • እንዴት ማለት?
  • አገሩን ሁሉ እኮ ሌባ ብቻ ነው የሞላው፡፡
  • አልገባኝም?
  • ክቡር ሚኒስትር በከፍተኛ ሥጋት እኮ ነው እየኖርን ያለው፡፡
  • የምን ሥጋት ነው?
  • በቃ በሰላም ወጥቶ በሰላም መግባት እኮ አጋጣሚ እየሆነ ነው፡፡
  • አንቺን ሌባ ሲሰርቅሽ ሕይወት ሁሉ ይጨልምብሻል እንዴ?
  • ክቡር ሚኒስትር እኔ ሠርቶ አደር እንጂ እንደ ሌላው አይደለሁም፡፡
  • ሌላው ምንድነው?
  • ሌላውማ ሠርቆ አደር ነዋ፡፡
  • ቀልደኛ ነሽ መቼም፡፡
  • ክቡር ሚኒስትር እየቀለድኩ ሳይሆን እጅግ ተማርሬ ነው የምነግርዎት፡፡
  • ይኼን ያህል መማረር አያስፈልግም ስልሽ?
  • ክቡር ሚኒስትር ከተማው ውስጥ እኮ እንደ ሰደድ እየተፋፋመ ነው፡፡
  • ምኑ?
  • ሌብነቱ፡፡
  • ይኼን ያህል?
  • ያልተነካ ግልግል ያውቃል አሉ፡፡
  • እንዴት?
  • በከተማዋ ከፍተኛ የሆነ ስርቆትና ዝርፊያ ነው ያለው ስልዎት፡፡
  • ለነገሩ ይኼንን ችግር ሌሎችም ሰዎች ነግረውኛል፡፡
  • ባለፈው ባለቤቴን ማጅራቱን መተውት ይኼ የአልጋ ቁራኛ ሆኗል፡፡
  • በጣም ያሳዝናል፡፡
  • ታዲያ አሁን ቤተሰቤን በምን ልቀልብ ነው ወሩን ሙሉ?
  • ችግር የለውም አንድ መላ እንፈጥራለን፡፡
  • ክቡር ሚኒስትር ነገም ይኼ ዕጣ እንደማይደርስብኝ ማረጋገጫ የለም፡፡
  • እስቲ እኔ ከሚመለከታቸው ጋር እነጋገርበታለሁ፡፡
  • በከተማዋ ውስጥ ያለው የሥራ አጥ ቁጥር መጨመር ወጣቱን ለዘረፋ እያጋለጠው ነው፡፡
  • አሁን እኮ ወጣቶች እየተደራጁ የሥራ ዕድል እንዲያገኙ እየተደረገ ነው፡፡
  • እሱን እንኳን ተውት ክቡር ሚኒስትር፡፡
  • እንዴት?
  • ወጣቶቹ ቢደራጁም ሥራ ካልተሰጣቸው ምን ያደርጋሉ?
  • ሥራ ይፈጥራሉዋ፡፡
  • ክቡር ሚኒስትር እንዲያውም ወጣቶቹ የሚደራጁት ለሥራ ሳይሆን ለሌላ ነገር ነው የሚመስለው፡፡
  • ለምንድነው የሚደራጁት?
  • ለዝርፊያ!  

[ክቡር ሚኒስትሩ ከደላላ ወዳጃቸው ጋር ተገናኝተው እያወሩ ነው]

  • እንቅስቃሴ እንዴት ነው?
  • ኧረ በጣም አሳሳቢ ነው ክቡር ሚኒስትር፡፡
  • ምኑ ነው ያሳሰበህ?
  • ኢኮኖሚው እየተናጋ እኮ ነው፡፡
  • ምን ሆኖ?
  • እሱንማ እርስዎን ልጠይቅዎት እንጂ?
  • ኢኮኖሚው ምንም አልሆነም፡፡
  • የሁላችንም ምኞት እሱ ነበር፡፡
  • ይኼ ምኞት አይደለም እውነታ ነው፡፡
  • ክቡር ሚኒስትር ይኼው ሁሉም ነገር እኮ ከድጡ ወደ ማጡ እየሆነ ነው፡፡
  • ስማ ይኼ ያልተደመሩ ሰዎች ወሬ ነው፡፡
  • የኪራይ ሰብሳቢዎች ማለትዎ ነው?
  • ኪራይ ሰብሳቢዎች ባልተደመሩ ተቀይሯል፡፡
  • ክቡር ሚኒስትር መንግሥት ዲክሽነሪ ቀይሯል ማለት ነው?
  • ምን ጥያቄ አለው?
  • ስለዚህ ልማታዊ በምንድነው የተተካው?
  • እሱማ የተደመረ ነው የሚባለው፡፡፡
  • በፊት መንግሥት የጥፋት ኃይሎች ይል ነበር፣ እሱስ አቻ ትርጉም ተገኝቶለታ?
  • በሚገባ፡፡
  • ምን ተባለ?
  • አሁን ለውጡን የሚያደናቅፉ ነው የሚባሉት፡፡
  • ክቡር ሚኒስትር እኔ ግን አንድ ሐሳብ መጥቶልኛል፡፡
  • የምን ሐሳብ?
  • ያው እንደ ደላላ ሥርዓት በተቀየረ ቁጥር ውጤታማ ለመሆን የገዥውን ቋንቋ ማወቅ ግድ ይላል፡፡
  • ለዚያ አይደል እንዲህ እያስተማርኩህ ያለሁት?
  • እኔማ ለምን ሰፋ አናደርገውም ብዬ ነው፡፡
  • እንዴት አድርገን?
  • ክቡር ሚኒስትር በሁሉም ዘርፍ ከመንግሥት ጋር የማይሠራ የለም፡፡
  • እሱማ ግልጽ ነው፡፡
  • ስለዚህ ባለሀብቱም የአሁኑን መንግሥት ፍልስፍና ማወቅ ይፈልጋል፡፡
  • የመደመር ፍልስፍናን ነው መንግሥት የሚከተለው፡፡
  • አዩ አሁን ባለሀብቱ በፊት የመንግሥት ደጋፊ ከሆነ ልማታዊ ባለሀብት ነበር የሚባለው፡፡
  • አሁን ደግሞ የተደመረ ባለሀብት ነዋ የሚባለው፡፡
  • ኪራይ ሰብሳቢው ባለሀብትስ ምንድነው የሚባለው?
  • ያልተደመረ ባለሀብት፡፡
  • ስለዚህ ባለፈውም ከበፊቱ ክቡር ሚኒስትር ጋር ሆነን ተመሳሳይ መጽሐፍ አሳትመን ነበር፡፡
  • ምን ዓይነት መጽሐፍ?
  • የመንግሥትን ፍልስፍና ለሁሉም ዘርፍ በግልጽ ቁልጭ አድርጎ የሚሳይ መጽሐፍ አሳትመን ነበር፡፡
  • ጥሩ ሐሳብ ነው፡፡
  • በወቅቱ ልማታዊነትና ኪራይ ሰብሳቢነት ብለን ነበር ያሳተምነው፡፡
  • የሕዝቡ አቀባበል እንዴት ነበር?
  • ክቡር ሚኒስትር ከሚያስቡት በላይ ነበር የተጠቀምነው፡፡
  • ስለዚህ ተመሳሳይ መጽሐፍ ማሳተም አዋጭ ነው እያልከኝ ነው?
  • ክቡር ሚኒስትር የበፊቱ መጽሐፍ ቅጽ ሁለት ብለን እናሳትመዋለን፡፡
  • የሚገርም የቢዝነስ ሐሳብ ነው፡፡
  • ክቡር ሚኒስትር ሁሉም ባለሀብት ከእጁ የማይለየው መጽሐፍ ነው የምናሳትመው፡፡
  • የመጽሐፉን ርዕስ ግን ምን ይባል?
  • የተደመረና ያልተደመረ ከምንለው ገዥ ርዕስ ብንመርጥ ጥሩ ነው፡፡
  • እንዲያውም አጭር ርዕስ መጣልኝ፡፡
  • ምን?
  • ድምር!  

[ለክቡር ሚኒስትሩ አንድ የተቃዋሚ ፓርቲ ስልክ ደወለላቸው]

  • አገሪቱ ወዴት እያመራች ነው ክቡር ሚኒስትር?
  • ወደ ልማት ነዋ፡፡
  • ልማትማ ድሮ ቀረ፡፡
  • አንተ ያልተደመርክ ተቃዋሚ ነህ ማለት ነው?
  • ለማን ብዬ ነው የምደመረው?
  • አሁን አይደል እንዴ ለተቃዋሚዎች ቀን የወጣላችሁ?
  • ለእኔ ግን ቀኑ የጨለመብኝ አሁን ነው፡፡
  • እንዴት?
  • ክቡር ሚኒስትር የሚሠራውን ነገር አያዩም እንዴ?
  • ምን ተሠራ?
  • እኛ ለስንት ዓመታት በሰላም ስንታገል ከርመን ይኼው ስንቱ ነፍጥ ያነሳ እንደ ጀግና እየተቆጠረ ነው፡፡
  • ምን እያልክ ነው?
  • አሁን እኮ ከውጭ የገቡት ብቻ ናቸው እንደ ተቃዋሚ እየተቆጠሩ ያሉት፡፡
  • እናንተማ በፊትም እኮ ቢሆን ልማታዊ ተቃዋሚዎች ነበራችሁ፡፡
  • ታዲያ አገሪቱ ውስጥ ለውጡን አላዩትም፡፡
  • የምን ለውጥ?
  • ይኼው እኛን እንደ ተቃዋሚ መቁጠር ስታቆሙ ሁሉም ነገር በአፍጢሙ መደፋት ጀመረ፡፡
  • አልገባኝም፡፡
  • እኛ መንግሥትን ስንቃወም የአገሪቱ ኢኮኖሚ በ11 በመቶ እያደገ ነበር፡፡
  • እ . . .
  • ይኼው እኛን እንደ ተቃዋሚ መቁጠር ስታቆሙ ኢኮኖሚው ሳይቀር ማሽቆልቆል ጀመረ፡፡
  • አንተ ግን ህሊና አለህ?
  • ምነው ክቡር ሚኒስትር?
  • የምታወራውን ነገር ታውቀዋለህ?
  • በሚገባ እንጂ ክቡር ሚኒስትር፡፡
  • ለማንኛውም አንተም ተቃዋሚ ተብለህ መቆጠርህ ያሳዝናል፡፡
  • እኔ እኮ ልማታዊ ተቃዋሚ ነኝ አልኩዎት፡፡
  • አሁን ምንድነው የምትፈልገው?
  • መንግሥት እያገለለን ነው፡፡
  • ምን አድርጎ?
  • በየስብሰባው የሚጠራው ከውጭ የመጡትን ተቃዋሚዎች ብቻ ነው፡፡
  • እናንተ እኮ ተቃዋሚዎች አልነበራችሁም፡፡
  • ታዲያ ምንድን ነን?
  • ሰላዮች፡፡
  • ክቡር ሚኒስትር ሥርዓቱ ተቀይሯል ብለው ነው የሚሰድቡን?
  • እኔ እውነቱን ነው የነገርኩህ፡፡
  • በጣም ያሳዝናል ክቡር ሚኒስትር፡፡
  • በመጀመርያ ተቃዋሚ ለመባል የራሳችሁ የፖለቲካ አጀንዳ ይኑራችሁ፡፡
  • ክቡር ሚኒስትር የደወልኩልዎት እኮ አብረን እንድንሠራ ጥሪ ለማቅረብ ነው፡፡
  • ለእናንተ የመንግሥት ምላሽ ምን እንደሆነ ታውቃለህ?
  • ምንድነው?
  • ጥሪ አይቀበልም!

[ክቡር ሚኒስትሩ ልጆቻቸው በመኝታ ቤት ሲጨቃጨቁ ከእንቅልፋቸው ነቁ]

  • እዚህ ቤት መተኛት አይቻልም?
  • ይቅርታ ዳዲ፡፡
  • በምንድነው የምትጨቃጨቁት?
  • በሳሎን ቤት፡፡
  • በሳሎን ቤት?
  • አዎን ዳዲ፡፡
  • በሳሎን ቤት ምን ያጣላችኋል?
  • ሳሎን ቤቱ ላይ እሷ የይገባኛል ጥያቄ አንስታ ነው፡፡
  • የምን የይገባኛል ጥያቄ ነው?
  • በፊት በፊት የማድርበት እኔ ስለነበርኩ ሳሎኑ የእኔ ነው አለችኝ፡፡
  • እ . . .
  • ምን እሱ ብቻ የሳሎን ቤቶቹን አትክልቶቹ የምንከባከባቸውና የተከልኳቸው እኔ ስለሆንኩ ሳሎኑ የእኔ ነው አለችኝ፡፡
  • አንተስ ምን አልካት?
  • እኔማ እንዲያውም ካልሽ ሳሎን ውስጥ ያሉ አብዛኛዎቹ መጻሕፍት የእኔ ስለሆኑ ሳሎኑ የእኔ ነው አልኳት፡፡
  • እ . .
  • ዳዲ ፕሌይ ስቴሽን እየተጫወትኩ አብዛኛውን ጊዜ የማጠፋው እኮ ሳሎን ቤት ነው፡፡
  • እኔ የምለው ሁለታችሁም የራሳችሁ መኝታ ቤት አላችሁ አይደል እንዴ?
  • አዎን ዳዲ፡፡
  • ታዲያ በሳሎን ቤት ምን አጣላችሁ?
  • እሷ ሳሎኑ የእኔ ነው ውጣልኝ ስትለኝ ነዋ፡፡
  • ለማንኛውም ሳሎኑ የሁለታችሁም አይደለም፡፡
  • ታዲያ የማን ነው?
  • የሁላችንም!