Skip to main content
x

አምስት ሚሊዮን ብር ለሚከፈልበት የጠቅላይ ሚኒስትሩ የራት ግብዣ ምላሾች እየመጡ ነው

በጠቅላይ ሚኒስትር ዓብይ አህመድ (ዶ/ር) አነሳሽነት ለአዲስ አበባ የወንዝ ዳርቻዎች ልማት ፕሮጀክት ገቢ ማሰባሰቢያነት በተጠራውና ‹‹ገበታ ለሸገር›› በተሰኘው የአምስት ሚሊዮን ብር (በአንድ ሰው) የራት ግብዣ፣ በርካታ ምላሾች ከወዲሁ እያስተናገደ እንደሚገኝ ታወቀ፡፡

አንዳንድ መረጃዎች እንደሚጠቁሙት፣ ‹‹ገበታ ለሸገር›› ለተሰኘው እንቅስቃሴ ምላሽ የሚሰጠባቸው የድረ ገጽና የኢሜል አድራሻዎች ይፋ በተደረጉ በመጀመሪያው ዕለት፣ ከ100 በላይ ቃል የገቡ ግለሰቦች በኢሜል ፍላጎታቸውን አስታውቀዋል፡፡ ከአገር ውስጥ በተጨማሪ የውጭ ዜጎችና ድርጅቶችም ፍላጎት ማሳየታቸው እየተሰማ ነው፡፡

የጠቅላይ ሚኒስትሩ ‹‹ገበታ ለሸገር›› ፕሮግራም፣ በጥቂቱ ከአንድ ሺሕ በላይ ታዳሚዎችን እንደሚያሳትፍ ሲጠበቅ፣ ከአምስት ቢሊዮን ብር በላይ እንደሚገኝበትም ግምቶች እየወጡ ነው፡፡ ይህም ማለት የአዲስ አበባ ወንዞች ዳርቻ ልማትን ለማሳመር ከታቀደው ሸራተን ሆቴል አካባቢ ለሚገነባው የ2.5 ቢሊዮን ብር የመነሻ ፕሮጀክት አኳያ ከዕጥፍ በላይ ሊገኝበት እንደሚችል አመላካች ነው፡፡

 ለሦስት ዓመታት በሚካሄደው ፕሮጀክት 56 ሔክታር የሚሸፍኑ ልዩ ልዩ የልማት ሥራዎች ታቅደዋል፡፡ የእንጦጦና የአቃቂ ወንዞችን የሚያካልለው ይህ ፕሮጀክት፣ የአዲስ አበባን ገጽታ ከመቀየር በተጨማሪ ለሥራ ዕድል፣ ለቱሪዝም፣ ለሥነ ምኅዳርና ለአረንጓዴ ልማት የተመቸች ውብ አዲስ አበባን የመፍጠር ዓላማ ያለው  ነው፡፡

በአንድ ሰው አምስት ሚሊዮን ብር ወይም 180 ሺሕ ዶላር መዋጮ የተጠየቀበት የጠቅላይ ሚኒስትሩ ገበታ፣ በሌሎች አገሮች ከተካሄዱ የገቢ ማሰባሰቢያ ገበታዎች አኳያ ሲታይ ‹‹ውዱ ገበታ›› ሊያሰኘው እንደሚችል መረጃዎች ይጠቁማሉ፡፡ ለአብነትም እ.ኤ.አ. በ2012 ለአሜሪካ ፕሬዚዳንትነት የተወዳደሩት የኮንባረስ አባሉ ፖል ራየን፣ ለምርጫ ቅስቀሳ ይረዳቸው ዘንድ ያዘጋጁት የራት ግብዣ በአንድ ሰው 50 ሺሕ ዶላር የተጠየቀበት ነበር፡፡

ከዚህ በተጨማሪም ለፕሬዚዳንት ባራክ ኦባማ ዳግም ፕሬዚዳንታዊ ምርጫ ዘመቻ፣ የገንዘብ ማሰባሰቢያነት በሆሊውድ የፊልም ተወናዩ ጆርጅ ክሉኒ አማካይነት የተሰናዳው የራት ግብዣ በአንድ ሰው 40 ሺሕ ዶላር የተከፈለበት እንደነበር መረጃዎች ያመለክታሉ፡፡

በአዲስ አበባ ከእንጦጦ ጀምሮ እስከ ቀበናና አቃቂ ወንዞች ድረስ የሚዘልቀው አጠቃላይ ፕሮጀክቱ 29 ቢሊዮን ብር ይፈጃል፡፡