Skip to main content
x
ከ200 በላይ በሚሆኑ አሠሪና ሠራተኛ አገናኝ ኤጀንሲዎች ላይ ዕርምጃ ተወሰደ
ወ/ሮ ዓለምፀሐይ ጳውሎስ

ከ200 በላይ በሚሆኑ አሠሪና ሠራተኛ አገናኝ ኤጀንሲዎች ላይ ዕርምጃ ተወሰደ

የአዲስ አበባ ከተማ አስተዳደር ሠራተኛና ማኅበራዊ ጉዳይ ቢሮ በተለያዩ ክፍለ ከተሞች ሕገወጥ ድርጊት ሲፈጸሙ ተደርሶባቸዋል ባላቸው 239 አሠሪና ሠራተኛ አገናኝ ኤጀንሲዎች ላይ የዕገዳና የእሸጋ ዕርምጃ መውሰዱን አስታወቀ፡፡  

የቢሮው ኃላፊ ወ/ሮ ዓለምፀሐይ ጳውሎስ እንደገለጹት፣ ከፍ ብሎ ከተጠቀሱት ኤጀንሲዎች መካከል 150 ያህሉ የዕገዳና የእሸጋ፣ የቀሩት 89 ኤጀንሲዎች ደግሞ የዕገዳ ዕርምጃ ተወስዶባቸዋል፡፡

የዕገዳና የእሸጋ ዕርምጃ የተወሰደባቸው በልደታ፣ በቦሌ፣ በቂርቆስ፣ በአራዳ፣ በየካ፣ በአዲስ ከተማ፣ በንፋስ ስልክ ላፍቶ ክፍለ ከተማ የሚገኙ 84 ኤጀንሲዎች ሲሆኑ፣ ዕርምጃ የተወሰደባቸውም ከሥራ ፈላጊዎች ገንዘብ በመቀበል ሕገወጥ ድርጊት በመፈጸማቸው መሆኑን አስረድተዋል፡፡

በአዲስ ከተማ ክፍለ ከተማ የሚገኙ 66 አሠሪና ሠራተኛ አገናኝ ኤጀንሲዎች ደግሞ የብቃት ማረጋገጫ ፈቃድ ሳይኖራቸው በመሥራታቸው መታሸጋቸውን ኃላፊዋ ተናግረዋል፡፡

በአራዳ፣ በልደታ፣ በንፋስ ስልክ ላፍቶ፣ በጉለሌ፣ በአቃቂ፣ በኮልፌ፣ በቦሌ፣ በየካና በቂርቆስ ክፍለ ከተሞች የሚገኙ 89 ኤጀንሲዎች ላይ የዕገዳ ዕርምጃ እንደተወሰደባቸው፣ ይህም ሊሆን የቻለው ፈቃድ ባወጡበት ቦታና አድራሻ መገኘት ባለመቻላቸውና ቢሯቸውም ዝግ ሆኖ በመገኘቱ ነው፡፡

ሌሎች 20 አሠሪና ሠራተኛ አገናኝ ኤጀንሲዎች በየአደባባዩና ሕዝብ በሚተላለፍባቸው አካባቢዎች የውሸት ማስታወቂያ በመለጠፍ ከሥራ ፈላጊዎች ገንዘብ በመቀበል ተጠርጥረዋል፡፡ በመሆኑም በኤጀንሲዎቹ ላይ ሕጋዊ ዕርምጃ ለመውሰድ የሚያስችል መረጃ በመሰብሰብ ላይ መሆኑን ወ/ሮ ዓለምፀሐይ አስረድተዋል፡፡

እንደ ኃላፊዋ፣ የብቃት ማረጋገጫ ፈቃድ ሳይኖራቸው እየሠሩ ባሉት ሌሎች 968 አሠሪና ሠራተኛ አገናኝ ኤጀንሲዎች ላይ ዕርምጃ ለመውሰድ የሚያስችል ክትትልና ቁጥጥር በመካሄድ ላይ ነው፡፡ ማሸጉና ዕገዳ መጣሉ አስተዳደራዊ ዕርምጃ ሲሆን፣ ከዚህ ባሻገር ደግሞ በሕግ እንዲጠየቁ የክስ ሥርዓት የሚመሠረትበት አሠራር ይከተላል፡፡

ኤጀንሲዎች ሕጋዊውን ሥርዓት ተከትለው ነው እየተንቀሳቀሱ ያሉት? ወይስ ከሕግ ባፈነገጠ መንገድ ነው እየሠሩ ያሉት? የሚለውን ለማወቅ የክትትልና ቁጥጥር ሥራ በተከናወነበት ወቅት አዲስ ፈቃድ የመስጠቱ ሥራ ቆሞ እንደነበር የቢሮ ኃላፊዋ አመልክተው፣ ከየካቲት 25 ቀን 2011 ዓ.ም. ጀምሮ ግን ሕጋዊ ፈቃድ ወስደው መንቀሳቀስ እንደሚችሉ አስረድተዋል፡፡

ፈቃዱም የሚሰጠው ለዚህ ሲባል የወጣውን መሥፈርት ማሟላታቸው ከተረጋገጠ በኋላ መሆኑን ተናግረዋል፡፡ ኅብረተሰቡም ሕገወጥ እንቅስቃሴ ሲያይ እንዲጠቁም ጠይቀዋል፡፡