Skip to main content
x
ለክቡር ሚኒስትሩ አንድ ባለሥልጣን ስልክ ይደውሉላቸዋል

ለክቡር ሚኒስትሩ አንድ ባለሥልጣን ስልክ ይደውሉላቸዋል

[ለክቡር ሚኒስትሩ የእህታቸው ልጅ ስልክ ደወለላቸው]      

  • ሰላም ጋሼ፡፡
  • እንዴት ነህ ጎረምሳው?
  • አለሁ ጋሼ፡፡
  • እናትህ እንዴት ናት?
  • ትንሽ አሟታል ባክህ፡፡
  • ምን ሆነች ደግሞ?
  • ብዙ ነገር ነዋ፡፡
  • አልገባኝም?
  • ምን ጋሼ የእኛን ኑሮ እያወቅከው?
  • እኮ ምን ሆናችሁ?
  • ጋሼ አራቱም ወንድሞቼ እኮ ሥራ የላቸውም፡፡
  • እሱማ አውቃለሁ፡፡
  • ታዲያ ይኼን ቤተሰብ ከማስተዳደር እኮ አገር ማስተዳደር ይቀላል፡፡
  • ወዴት ወዴት?
  • ማለቴ ምን ያህል አስቸጋሪ ሕይወት እየመራች መሆኑን ልነግርህ ነው፡፡
  • ቢሆንም ከአገር ማስተዳደር ጋር ማነፃፀር አይገባም፡፡
  • እሱማ ምን ያህል ከባድ መሆኑን አውቃለሁ፡፡
  • ምኑ ነው ከባድ?
  • አገር ማስተዳደሩ ነዋ፡፡
  • ማን ከበደን አለህ?
  • ባትሉም እንደ ከበዳችሁ ታስታውቃላችሁ፡፡
  • ምን እያልክ ነው?
  • ጋሼ አገሪቱን እያየሃት አይደል እንዴ?
  • የለውጡ አደናቃፊ ነህ እንዴ?
  • ምነው ጋሼ?
  • ምነው?
  • ለለውጡ ስንትና ስንት መስዋዕትነት እንደከፈልን ረሳኸው?
  • ታዲያ ምን እያልክ ነው?
  • ያው ከለውጡ የጠበቅነውን አላገኘንም ብዬ ነው፡፡
  • ከለውጡ ምን ነበር የጠበቅከው?
  • ብዙ ነገር ጋሼ፡፡
  • እኮ ምን?
  • እኔን ጨምሮ ሁሉም ወንድሞቼ ሥልጣን የሚያገኙ መስሎኝ ነበር፡፡
  • ሌላስ?
  • በቃ ይኼ ዘግናኝ የድህነት ሕይወታችን በአንዴ የሚያበቃ መስሎኝ ነበር፡፡
  • እኮ እንዴት?
  • መንግሥት ትልቅ ኃላፊነት ሰጥቶኝ በአንዴ ባለሀብት የምሆን መስሎኝ ነበር፡፡
  • ሲያምርህ ይቅር፡፡
  • አሁንማ ገባኝ፡፡
  • ምኑ ነው የገባህ?
  • የማስበው ሁሉ ህልም እንደሆነ፡፡
  • ሮም በአንድ ቀን አልተገነባችም ሲባል አልሰማህም?
  • ምን እያልክ ነው ጋሼ?
  • ለውጡ በአንድ ጊዜ አይመጣም፡፡
  • አሁን እንኳን አልታለልም ጋሼ፡፡
  • እንዴት ማለት?
  • ለውጡ ለእኛ ጭራሽ አስቸጋሪ ሆኗል፡፡
  • መጀመሪያውንም ቢሆን እኮ ጠርጥሬያለሁ እኔ?
  • ምኑን ነው የጠረጠርከው?
  • ከለውጡ አደናቃፊዎች ጋር መወገንህን፡፡
  • ኧረ ለእርሱ እኔ ጊዜ የለኝም፡፡
  • ታዲያ ይኸው ለውጡ ለእኔ ጭራሽ አስቸጋሪ ሆኗል እያልክ አይደል እንዴ?
  • እኮ ሕይወታችን ከድጡ ወደ ማጡ ስለሆነብኝ ነዋ፡፡
  • ሁሉም ችግር በአገር የመጣ ስለሆነ መቻል አለብህ፡፡
  • ለማንኛውም አሁን የደወልኩት አንድ ነገር ሰምቼ ነው፡፡
  • ምን ሰማህ?
  • የኮንዶሚኒየም ዕጣ ሊወጣ ነው አሉ፡፡
  • አዎን ሰምቻለሁ፡፡
  • አንድ ባለሁለት ፈልጌ ነው፡፡
  • ባለሁለት ምን?
  • መኝታ ነዋ፡፡
  • ምን?
  • 20/80!

[የክቡር ሚኒስትሩ የታላቅ ወንድም ልጅ ስልክ ደወለችላቸው]

  • ሰላም ጋሼ፡፡
  • ከየት ተገኘሽ አንቺ ዱርዬ?
  • ምን መሄጃ አለኝ ብለህ ነው ጋሼ?
  • ለመሆኑ ምን እየሠራሽ ነው?
  • ምንም ጋሼ፡፡
  • ሥራ የለሽም?
  • ከየት መጥቶ ጋሼ?
  • ከዩኒቨርሲቲ ተመርቀሻል አይደል እንዴ?
  • ብመረቅስ ታዲያ?
  • ሥራ እንዴት የለሽም ብዬ ነዋ?
  • እየቀለድክብኝ መሆን አለበት ጋሼ፡፡
  • የምን ቀልድ ነው?
  • አገሪቱ ውስጥ ሥራ ከማግኘት ሎተሪ ቆርጠህ የሚወጣልህ ዕድል የተሻለ ነው፡፡
  • አንቺም በለውጡ አታምኚም?
  • በለውጡማ በጣም አምናለሁ ጋሼ፡፡
  • ታዲያ ምን እያልሽ ነው?
  • በለውጡ ግን ሥራ የለም፡፡
  • ለምን አትፈጥሪም ታዲያ?
  • ምንድነው የምፈጥረው?
  • ሥራ ነዋ፡፡
  • እሱማ አያዋጣም ጋሼ፡፡
  • ለምንድነው የማያዋጣው?
  • ኢኮኖሚው ተቀዛቅዟል፡፡
  • ይኼ እንኳን ስንፍናሽን ለመሸፈን ይመስላል፡፡
  • እንዴት ጋሼ?
  • ሥራ መፍጠር ሲያቅትሽ ኢኮኖሚው ተቀዛቅዟል ምናምን ትያለሽ፡፡
  • ሲጀመር ጋሼ ትምህርት ቤትስ ቢሆን መቼ ሥራ ፈጠራ አስተማሩን?
  • ምን?
  • በዚያ ላይ አሁን ወጣቱ ሥራ ከመፍጠር ግጭት መፍጠር ይቀለዋል፡፡
  • እንዴት?
  • በቃ ዩኒቨርሲቲ ገብተን ተመርቀን እስክንወጣ ሜጀር ያደረግነው ግጭትን ነዋ፡፡
  • እውነትም ብልሹ የሆነ ትውልድ ነው፡፡
  • ከዚያም ባለፈ ሥራ ከመፍጠር ግጭት መፍጠር አሁን አዋጭ ነው፡፡
  • እንዴት ማለት?
  • ግጭት በመፍጠር በአንዴ ታዋቂ ትሆናለህ፣ ስለዚህ ራስህን ለመሸጥ ቀላል ነው፡፡
  • ምን?
  • በአጠቃላይ ሥራ በቀላሉ ማግኘት ከባድ ነው፡፡
  • ለምን በወረዳ አትደራጂም?
  • ተደራጅቼ ነበር ጋሼ፡፡
  • ሥራ አልሰጡሽም ታዲያ?
  • ጋሼ ሥራው ለእኔ የሚሆን አይደለም፡፡
  • አየሽ ሥራ ትንቂያለሽ ማለት ነው፡፡
  • ለማንኛውም ዛሬ የደወልኩት አንድ ነገር ሰምቼ ነው፡፡
  • ምን ሰማሽ?
  • የኮንዶሚኒየም ዕጣ ሊወጣ ነው አሉ፡፡
  • እሺ፡፡
  • አንድ ባለሦስት ፈልጌ ነበር፡፡
  • ባለሦስት ምን?
  • መኝታ ነዋ፡፡
  • ምን?
  • 40/60!

[ለክቡር ሚኒስትሩ አንድ ባለሥልጣን ስልክ ይደውሉላቸዋል]

  • ሰላም ክቡር ሚኒስትር፡፡
  • እንዴት ነህ ወዳጄ?
  • ሥራ እንዴት ይዞታል?
  • መቆሚያ መቀመጫ የለኝም፡፡
  • ለውጡ አያስተኛም አይደል?
  • ተረቱ ራሱ ተቀየረ አይደል እንዴ?
  • የቱ ተረት?
  • ከመውለድህ በፊት ተኛ የሚለው ነዋ፡፡
  • ምን ተባለ?
  • ከለውጡ በፊት ተኛ ተባለ፡፡
  • እርሱስ እኔም እንቅልፍ የለኝም ክቡር ሚኒስትር፡፡
  • አንተማ በፊትስ መቼ ተኝተህ ታውቃለህ?
  • ምን እያሉ ነው ክቡር ሚኒስትር?
  • አንተ በደህነኛውም ጊዜ በኪኒን ነው የምትተኛው ብዬ ነው፡፡
  • ቀልድ መቼም ያቁበታል?
  • በለውጡ ቀልድ የለም ወዳጄ፡፡
  • አንዳንድ ነገሮች ግን እያስፈሩኝ ነው፡፡
  • ምንድነው የሚያስፈራህ?
  • የዘረኝነት ጉዳይ፡፡
  • ምኑ ነው ያስፈራህ?
  • አገሪቱ እኮ በጣም እየተከፋፈለች ነው፡፡
  • ይኼ የፀረ ለውጡ ኃይሎች ወሬ ነው፡፡
  • እንዴት ክቡር ሚኒስትር?
  • እንዲያውም አገሪቱ ወደ አንድነት ጎዳና እያቀናች ነው፡፡
  • ቢሆንማ ደስ ይለኝ ነበር፡፡
  • አይደለም እያልከኝ ነው?
  • ክቡር ሚኒስትር በየቦታው የሚታየው ዘረኝነት ግን ያስፈራል፡፡
  • ዘረኝነት ለ27 ዓመታት የተዘራ የፖለቲካ ዘር ነው እኮ፡፡
  • እንዴት ማጥፋት ይቻላል ክቡር ሚኒስትር?
  • እ…
  • ማለቴ ሁሉም ቦታ ሕዝቡ በዘርና በጎሳ እየተደራጀ ነው፡፡
  • ምን ታደርገዋለህ?
  • የመንግሥት የኃላፊነት ቦታዎች ሳይቀሩ እኮ በዘርና በጎሣ ነው የሚታደሉት፡፡
  • ማን ነው እንደዚህ እያለ የሚያስወራው?
  • ክቡር ሚኒስትር የእኛ አገር ዘረኝነት እኮ ከሕዝቡም በላይ ሄዶ መሬቱም ዘረኛ ሆኗል፡፡
  • አልገባኝም?
  • ማለቴ የአማራ መሬት፣ የኦሮሞ መሬት፣ የትግሬ መሬት ምናምን እያልን ከፋፍለነዋል፡፡
  • ምን እያልከኝ ነው?
  • መሬቱ ራሱ የሚናገረው ቋንቋ አለው፡፡
  • ሰው እንዴት ነገረኛ ሆኗል ልበል?
  • ፌዴራሊዝሙ በቋንቋ ስለሆነ መሬቱም ቋንቋውን ለምዶታል፡፡
  • በፌዴራሊዝሙ ቀልድ የለም፡፡
  • ኧረ እኔ አልቀለድኩም ክቡር ሚኒስትር፡፡
  • ፌዴራሊዝሙ ለድርድር የሚቀርብ ነገር አይደለም፡፡
  • ለማንኛውም ሕዝቡ በመንግሥት ሹመት ትችት እያቀረበ ነው፡፡
  • የምን ትችት?
  • ሹመት በብሔር ተዋጽኦ መሆን የለበትም እያለ ነው፡፡
  • ታዲያ በምን ተዋጽኦ ይሁን፡፡
  • በብቃት ተዋጽኦ!

[ለክቡር ሚኒስትሩ የቀድሞ ሚኒስትር ይደውሉላቸዋል]

  • እንዴት ነዎት ክቡር ሚኒስትር?
  • እንኳን አደረሰዎት፡፡
  • ለሰማዕታት ቀን ነው?
  • አይደለም አይደለም፡፡
  • ሌላ ምን በዓል አለ?
  • ለዓብይ ፆሙ እንኳን አደረሰዎት፡፡
  • ምን?
  • ምነው?
  • ፆሙ ስሙ ካልተቀየረ አልቀበለውም ክቡር ሚኒስትር፡፡
  • ኧረ እንደዚህ መሆን አያስፈልግም፡፡
  • ለውጡን እንደማልቀበል ያውቃሉ አይደል ክቡር ሚኒስትር?
  • ታዲያ ይኼ ከለውጡ ጋር ምን አገናኘው?
  • የፆሙን ስም አያውቁትም እንዴ?
  • በጣም ያሳዝናል፡፡
  • ክቡር ሚኒስትር ፈጣሪ ራሱ ለውጡን እንዳልተቀበለው ገብቶኛል፡፡
  • ኪኪኪ…
  • ምን ያስቅዎታል ክቡር ሚኒስትር?
  • ተቃውሟችሁ ምን ድረስ እንደሚሄድ ሳስበው ያስቀኛል፡፡
  • እውነቴን ነው ክቡር ሚኒስትር፡፡
  • እንዴት?
  • ይኸው መንግሥት ከእኛ ጋር በመጣላቱ ዝናብ እንኳን ዘንቦ አያውቅም፡፡
  • አሁንስ በጣም አሳቁኝ፡፡
  • ምኑ ነው የሚያስቀው ክቡር ሚኒስትር?
  • ተቃውሟችሁ ራሱ እኮ መሠረት ሊኖረው ይገባል፡፡
  • ከዚህ በላይ መሠረት ምን ይፈልጋሉ?
  • ነገ ደግሞ ዝናብ ሲዘንብ ፀሐይ የማትወጣው መንግሥት ከእኛ ጋር ስለተጣላ ነው ትላላችሁ፡፡
  • መቼ ይቀራል?
  • ለማንኛውም የኢትዮጵያ ፖለቲካ እንዲህ መሆኑ ያሳዝናል፡፡
  • ወደዱም ጠሉም ፆሙ ግን ስሙ ካልተቀየረ አልቀበለውም፡፡
  • የቱ ፆም?
  • ስሙን አልጠራውም ስልዎት፡፡
  • ዓብይ ፆም?
  • አዎ፡፡
  • ምን እንዲባል ነው የሚፈልጉት?
  • አቦይ ፆም!