Skip to main content
x
በሕግ አምላክ እንጂ በጉልበታችሁ አምላክ ይባል ወይ?!

በሕግ አምላክ እንጂ በጉልበታችሁ አምላክ ይባል ወይ?!

ለነፃነት፣ ለፍትሕና ለእኩልነት በአንድነት መቆም የተቻለ አይመስልም፡፡ ‹እኔ ብቻ ልክ፣ እኔ ያልኩት ካልሆነ ሞቼ እገኛለሁ፣ ሁሉም ነገር በእኔ በጎ ፈቃድ ብቻ መፈጸም አለበት፣› ወዘተ የሚሉ ፉከራና ቀረርቶዎች ተያይዞ ለመጥፋት ካልሆነ በስተቀር የሚፈይዱት እንደሌለ ይታወቃል፡፡ ራስንና አገርን ሰላም እየነሱ የሕዝቡን ሕይወት ማመሰቃቀል ያተረፈው ነገር ቢኖር ጽንፈኝነትን ነው፡፡ በፌዴራል መንግሥትና በክልላዊ መንግሥታት መካከል ያለው ግንኙነት ውጥንቅጡ በመውጣቱ ምክንያት፣ እንኳን ለመናበብና ስህተቶችን ለማረም በቅጡ የሚነጋገሩ አይመስልም፡፡ የአንድ ፓርቲ ሰዎች የተለያዩ ክልሎችን እየመሩ መናበብ ባለመቻላቸው፣ ሕዝብን ከሕዝብ ሊያጋጩና ደም ሊያፋስሱ የሚችሉ መግለጫዎች እየተሰሙ ነው፡፡ ሌላው ቀርቶ በአዲስ አበባ ከተማ ባለቤትነት ላይ እየተሰሙ ያሉ አሳዛኝ ትርክቶች የነገውን ተስፋ ያጨልማሉ፡፡ አዲስ አበባ ከኢትዮጵያውያን አልፋ የአፍሪካውያን ከተማ መሆኗ እየታወቀ በዕብሪት ‹የእኔ ብቻ› የሚሉ ወገኖች አየሩን መቆጣጠራቸው ያሳዝናልም፣ ያሳፍራልም፡፡ ሕግ አለ ተብሎ በሚታሰብበት አገር ውስጥ ከሕግ የበላይ በመሆን አገርን ለማተራመስ የሚደረገውን ጥረት፣ መንግሥት በአስቸኳይ መላ ካልፈለገለት እንኳን የተጀመረው ለውጥ የአገሪቱም ህልውና ያሠጋል፡፡ አሁን እየታየ ያለው ማስፈራራትና ድንፋታ በሕግ አደብ የማይገዛ ከሆነ መንግሥት አገር እየመራሁ ነው ባይል ይሻለዋል፡፡ የሕግ የበላይነት ጠፍቶ ሕገወጥነት እየበዛ ነውና፡፡

ኢትዮጵያ ውስጥ ከጥንት ጀምሮ ‹በሕግ አምላክ፣ ሕግ ይከበር› ማለት የተለመደ የሕዝባችን የሕግ አክባሪነት መገለጫ ነበር፡፡ ጉልበተኞች አገር ሲያምሱና ሲያተራምሱ ሕግ ማክበር ቀርቶ ሥርዓተ አልበኝነት ያደረሰው መጠነ ሰፊ ጥፋት አይዘነጋም፡፡ ዛሬ ‹በሕግ አምላክ› ሲባል ሰሚ ሲጠፋ ‹በጉልበታችሁ አምላክ› ይባል ወይ? በሠለጠነ መንገድ መነጋገርና ልዩነትን ማጥበብ ሲቻል፣ የጉልበት መንገድ እየተመረጠ የንፁኃንን ሕይወት ማጥፋትና ማፈናቀል አልበቃ ብሎ፣ አገር ለማፍረስ እንቅልፍ ማጣት ምን ይሉታል? አገር የምትመሩም ሆነ ሥልጣን ለመያዝ የምትፎካከሩ ራሳችሁ ሰላም አጥታችሁ አገር አትበጥብጡ፡፡ የፖለቲካ አክቲቪስትነት ካባ የደረባችሁ ግለሰቦችም ሆናችሁ ስብስቦች፣ ድርጊታችሁ ምን እያስከተለ እንደሆነ ራሳችሁን መርምሩ፡፡ የተሰጣችሁን ሥልጣን በአግባቡ መምራት ያቃታችሁ ሹማምንት ኃላፊነታችሁን ለሚችሉት አስረክቡ፡፡ መወሰን የማይችል ተሿሚ በአክቲቪስቶች ቀጭን መመርያ እየተመራ አገርን ገደል ውስጥ ከሚከት ዞር ቢደረግ ይመረጣል፡፡ ሕዝብን ከሕዝብ አጋጭቶ ደም ለማፋሰስ ያሰፈሰፋችሁም አደብ ግዙ፡፡

የኢትዮጵያ ሕዝብ ዘመናትን አብሮ የተሻገረው ክፉና ደግ ጊዜያትን በአንድነት አሳልፎ ነው፡፡ ብሔር፣ ቋንቋ፣ እምነት፣ ባህልና የመሳሰሉት ልዩነቶች ሳይገድቡት እዚህ ዘመን የተደረሰው፣ ከመለያየት ይልቅ በአንድነት የሚያኖሩት የጋራ እሴቶች ስለሚበዙ ነው፡፡ ይኼንን የመሰለ ታላቅና ባለ ታሪክ ሕዝብ ይዞ የዘመናት ድህነትን ታሪክ ማድረግ ሲገባና ከሠለጠኑት አገሮች ተርታ መሠለፍ ሲቻል፣ ጥቃቅንና የማይጠቅሙ ጉዳዮች ላይ ተጥዶ አገር ማተራመስ ዕብደት ነው፡፡ ይህችን ታሪካዊት አገር በዕድገትና በብልፅግና የአፍሪካ ፈርጥ ማድረግ እየተቻለ፣ ሕዝብን ደም ለማፋሰስ ‹ጉሮ ወሸባዬ› ማለት የለየለት ክህደት ነው፡፡ በሕግ የበላይነት የምትመራ ዴሞክራሲያዊት አገር ለመገንባት በጋራ መክሮና ዘክሮ መደላዱሉን ማመቻቸት እየተቻለ፣ አገርን ወደ ፍራስራሽነት ለመቀየር መማሰን ከሚታገሱት በላይ ነው፡፡ ትናንት ለነፃነት ሲጮሁ የነበሩ ልሳኖች አገር ለማፍረስ ሲያላዝኑ መስማት ያንገበግባል፡፡ ራስ ወዳድነት፣ ጥጋብና ማናለብኝነት አየሩን እየናኙት እንዴት ስለሕግ የበላይነት መነጋገር ይቻላል? እንዴትስ የነገዋን ዴሞክራሲያዊት አገር ማለም ይሞከራል? በሕግ አምላክ!

‹‹የማን ቤት ጠፍቶ የማን ሊበጅ፣ የአውሬ መፈንጪያ ይሆናል እንጂ›› ከሚል የጀብደኞች ኋላቀር አስተሳሰብ ውስጥ መውጣት ይገባል፡፡ የጋራ የሆነች አገርን እንደ ቅርጫ ዕጣ መጣጣል በታሪክና በትውልድ ያስጠይቃል፡፡ ሁሉንም ነገር ‹የእኔ ብቻ ነው› ማለት አያዋጣም፡፡ በመንጋ ፖለቲካ በመመራት የሚገኘው ውጤት ምናልባት ከተሳካ ጊዜያዊ ድል እንጂ፣ ዘለቄታዊና አስተማማኝ የሆነ ድል አይኖርም፡፡ ስህተትን በስህተት ለማረም መሞከር ከሕዝብ ጋር ያጣላል፡፡ ተስፋ የተጣለበትን ለውጥ በማሽመድመድ ለአምባገነንነት ወይም ለሥርዓተ አልበኝነት ያጋልጣል፡፡ አሁን በመሬት ላይ የሚታየው የኢትዮጵያ ተጨባጭ ሁኔታ ከተስፋ ይልቅ ሥጋት ያጠላበት ነው፡፡ የአዲስ አበባ ከተማ አስተዳዳርና የኦሮሚያ ክልላዊ መንግሥት ሰሞኑን ዕጣ  በወጣባቸው የጋራ መኖሪያ ቤቶች ላይ መናበብ አለመቻላቸው ከባድ ሥጋት ደቅኗል፡፡ ያገኛትን እየተጎራረሰ ዘመናትን የተሻገረ ሕዝብን በዚህ ጊዜ በኮንዶሚኒየም ምክንያት ማጋጨት ያሳዝናል፡፡ በአዲስ አበባ ከተማ ባለቤትነት ላይ ከግራና ከቀኝ የሚሰሙ ተቃርኖዎች ራሳቸውን የቻሉ ሥጋቶች ናቸው፡፡ ተሰሚነት አለን የሚሉ የግራና የቀኝ ወገኖች መነጋገርና መደራደር ባለመፈለጋቸው፣ ነገ ከነገ ወዲያ ምን እንደሚከሰት አይታወቅም፡፡ የፌዴራል መንግሥቱ ዝምታም ከሚታገሱት በላይ ሆኗል፡፡ በመሀል ግን ሕዝብ ሰላም አጥቷል፡፡ በሕግ አምላክ!

ኢትዮጵያ ጭንቀት ውስጥ ሆና ሕዝብ መፃኢ ዕድሉ እያሳሰበው ባለበት በዚህ ወቅት፣ በትዕግሥትና በብልኃት የተቃረኑ ወገኖችን ማስማማት ያስፈልጋል፡፡ ጽንፍ ተይዞ ሁሉም ነገር የቅራኔ ምንጭ ከሆነ እንዴት ነው ለመጪው ምርጫ ዝግጅት የሚደረገው? ዜጎች ከቦታ ቦታ መዘዋወርስ እንዴት ይችላሉ? የሚፈለገው ማኅበራዊ ፍትሕ እንዴት ሊሰፍን ይችላል? ከእጅ ወደ አፍ በሆነ ኑሮ ሥቃይ ውስጥ በሚገኙ ሚሊዮኖች ላይ የዕለት ዕርዳታ ፈላጊዎች ተጨምረውና የሥራ አጡ ቁጥር እያሻቀበ፣ አገርን ከገባችበት ማጥ ውስጥ እንዴት ማውጣት ይቻላል? የፌዴራልና የክልል መንግሥታት በመሀላቸው ያለውን ግንኙነት አስተካክለው በፍጥነት ሕግ መከበር ይኖርበታል፡፡ የተፈጠሩ ስህተቶች ካሉም ሕዝብን ማዕከል አድርጎ ማስተካከል ይቻላል፡፡ ሕገወጥነትን በሕግ የበላይነት መስመር ማስያዝ ተገቢ ነው፡፡ ከላይ እስከ ታች ያሉ መንግሥታዊ መዋቅሮችን ከሕገወጦች ማፅዳት ይገባል፡፡ መንግሥት የሕዝብን ሰላምና ደኅንነት የማስከበር ኃላፊነት አለበት፡፡ ይኼንን ኃላፊነቱን ለመወጣት ደግሞ የሕግ ማስከበሪያ ተቋማቱንና ሕጋዊ ማዕቀፎችን በሚገባ መጠቀም አለበት፡፡ ‹ሰላም፣ ዴሞክራሲ፣ ብልፅግና፣ አገራዊ አንድነት፣ ፍትሕና አገራዊ ክብር› ተብለው በመንግሥት በምሰሶነት የተያዙት ጽንሰ ሐሳቦች ተግባራዊ መሆን የሚችሉት በሕግ የበላይነት ብቻ ነው፡፡ ለነፃነት፣ ለፍትሕና ለእኩልነት በፅናት የሚቆሙ ወገኖች ይኼንን ጥረት ማገዝ ይጠበቅባቸዋል፡፡ አገር ወደ ቁልቁለት እየተንደረደረች ዝምታው ሊበቃ ይገባል፡፡ በዚህ ወሳኝ ጊዜ ‹በሕግ አምላክ› እንጂ ‹በጉልበታችሁ አምላክ› እንዳይባል፣ ሁሉም ኢትዮጵያዊያን የሚጠበቅባቸውን ኃላፊነት መወጣት አለባቸው!