Skip to main content
x
የተከሰከሰው አውሮፕላን አብራሪ ችግር እንደገጠመው ለበረራ ተቆጣጣሪዎች ማሳወቃቸው ተገለጸ

የተከሰከሰው አውሮፕላን አብራሪ ችግር እንደገጠመው ለበረራ ተቆጣጣሪዎች ማሳወቃቸው ተገለጸ

ከአዲስ አበባ ቦሌ ዓለም አቀፍ ኤርፖርት ተነስቶ ወደ ናይሮቢ ኬንያ ሲበር በቢሾፍቱና በሞጆ ከተሞች መካከል ኤጀሬ በምትባል ቦታ የተከሰከሰው አውሮፕላን አብራሪ ያሬድ ጌታቸው (ካፒቴን) ከቦሌ ኤርፖርት በተነሱ በደቂቃዎች ልዩነት ችግር እንደገጠማቸውና ተመልሰው ለማረፍ እንደሚፈልጉ ለበረራ ተቆጣጣሪዎች አስታውቀው እንደነበር ተገለጸ፡፡ ይህ የተገለጸው መጋቢት 1 ቀን 2011 ዓ.ም. ጉዳዩን በማስመልከት የኢትዮጵያ አየር መንገድ ዋና ሥራ አስፈጻሚ አቶ ተወልደ ገብረ ማርያምና ሌሎች የአየር መንገዱ ኃላፊዎች በሰጡት መግለጫ ነው፡፡

አብራሪው በጠየቁት መሠረትም ከበረራ ተቆጣጣሪዎች ፈቃድ ተሰጥቷቸው ለማረፍ ሲመለሱ ከራዳር ዕይታ ውጪ መሆናቸውና መከስከሳቸው ተገልጿል፡፡

አውሮፕላኑ ከደቡብ አፍሪካ ጆሃንስበርግ ከተማ ተመልሶ በቦሌ ዓለም አቀፍ ኤርፖርት መደበኛ ምርመራ ሲደረግበት ቆይቶ ምንም ችግር እንዳልታየበት የገለጹት የአየር መንገዱ ኃላፊዎች፣ ከሦስት ሰዓታት ቆይታ በኋላም ወደ ኬንያ ናይሮቢ እንደበረረም አስታውቀዋል፡፡

አየር መንገዱ የተከሰከሰውን ጨምሮ ስድስት ቦይንግ 737—8 ማክስ አውሮፕላኖች ያሉት ሲሆን፣ አየር መንገዱ የተከሰከሰውን አውሮፕላን ከተረከበ ገና አራት ወራት መሆኑንም አክለዋል፡፡ አውሮፕላኑ ያገለገለበት የበረራ ሰዓትም 1,200 ሰዓታት እደሆነም ታውቋል፡፡

የአውሮፕላኑ ዋና አብራሪ የነበሩት ያሬድ (ካፒቴን) በአየር መንገዱ እ.ኤ.አ. ከ2010 ጀምረው በአብራሪነት ሲሠሩ የቆዩ ሲሆን፣ በአጠቃላይ የ8,231 ሰዓታት የበረራ ልምድ ነበራቸው፡፡ ረዳት አብራሪው አህመድ ኑር 200 ሰዓታት ይህል የበረራ ልምድ እንደነበራቸውም ተነግሯል፡፡

የአደጋው ምክንያትን በሚመለከት የተጠየቁት የሥራ ኃላፊዎቹ፣ ግምታዊ ከሆነ የመላምት መልስ እንደሚቆጠቡ አስታውቀው፣ ምርመራው እስከሚጠናቀቅ መጠበቅ እንደሚገባና በኢትዮጵያ ሲቪል አቪዬሽን ባለሥልጣንና በቦይንግ ለሚደረገው የምርመራ ሥራ ሙሉ ትብብር እንደሚደርጉ ተናግረዋል፡፡

በአውሮፕላን መከስከስ አደጋው ተሳፋሪዎችንና የአየር መንገዱን ሠራተኞች ጨምሮ በአጠቃላይ 157 ሰዎች ሞተዋል፡፡