Skip to main content
x

በመድኃኒት ፈንድና አቅርቦት ኤጀንሲ ከስምንት ሚሊዮን ብር በላይ የሚያወጡ መድኃኒቶች ጉድለት ተረጋገጠ

የኢትዮጵያ መድኃኒት ፈንድና አቅርቦት ኤጀንሲ በሸጎሌና በቃሊቲ ሁለት የመድኃኒትና የሕክምና መገልገያ መሣሪያዎች ክምችት መጋዘኖች፣ ባለፈው በጀት ዓመት 8,623,363 ብር ከ40 ሳንቲም የሚያውጡ ልዩ ልዩ ዓይነት መድኃኒቶች መጉደላቸው ታወቀ፡፡ በጉድለት ከተያዙትም መካከል በሸጎሌ መጋዘን 3,330,855 ብር ከ16 ሳንቲም፣ እንዲሁም በቃሊቲ ቁጥር ሁለት መጋዘን 5,292,508 ብር ከ24 ሳንቲም የሚያወጡ መድኃኒቶች መሆናቸውን መረጃዎች ይጠቁማሉ፡፡

የኤጀንሲው የሕግ አገልግሎት ዳይሬክተር አቶ ፈቃዱ ታደሰ ለሪፖርተር እንደገለጹት፣ በሸጎሌ መጋዘን ከፍ ብሎ የተጠቀሰውን መድኃኒት አጉድለዋል ተብለው የተጠረጠሩት ሁለት የመጋዘኑ ሠራተኞች ከሥራቸው እንዲሰናበቱ ተደርጓል፡፡

ሠራተኞች የተሰናበቱት በመጀመርያ ጉዳያቸው በኤጀንሲው የዲሲፕሊን ኮሚቴ ታይቶ ኮሚቴው ለኤጀንሲው የበላይ ኃላፊ በጉድለቱ ላይ ትኩረት ያደረገ የውሳኔ ሐሳብ ካቀረበ በኋላ ሲሆን፣ የበላይ ኃላፊው ደግሞ በቀረበላቸው ሐሳብ መሠረት የሥራ ስንብት ውሳኔ ማሳለፋቸው አስረድተዋል፡፡

ሠራተኞቹም በውሳኔው ቅር በመሰኘታቸው ለፌዴራል አስተዳደር ፍርድ ቤት ይግባኝ ያቀረቡ ሲሆን፣ ፍርድ ቤቱም ይገባኙን ከመረመረ በኋላ የበላይ ኃላፊው ያሳለፉትን ውሳኔ ማፅደቁንና በወንጀል የመጠየቃቸው ጉዳይ ግን በዓቃቤ ሕግ መያዙን ነው ዳይሬክተሩ የተናገሩት፡፡

በቃሊቲ ቁጥር ሁለት መጋዘን ለተፈጸመው የመድኃኒት ጉድለት በተጠያቂነት የተጠረጠሩት የሁለት ኃላፊዎች ጉዳይ ለኤጀንሲው የዲስፕሊን ኮሚቴ መቅረቡን ከማወቅ የዘለለ፣ መረጃ እንደሌላቸው የሕግ አገልግሎቱ ዳይሬክተር አስረድተዋል፡፡

በሁለቱም መጋዘኖች ለተከሰተው የመድኃኒቶች ጉድለት ተጠያቂ ናቸው የተባሉ አራቱን ተጠርጣሪዎች ላይ በዲሲፕሊን ኮሚቴ ክስ የመሠረተባቸው፣ የኤጀንሲው የሰው ሀብት አስተዳደርና ልማት ዳይሬክቶሬት መሆኑ ታውቋል፡፡

በዳይሬክተሩ አቶ አሸናፊ ኢረና ፊርማ በአራቱ ተጠርጣሪዎች ላይ ለዲሲፒሊን ኮሚቴ የቀረበው ተመሳሳይ ክስ፣ ‹‹የፌዴራል መንግሥት ሠራተኛ የዲሲፕሊን አፈጻጸምና ቅሬታ አቀራረብ ሥነ ሥርዓት ደንብ ቁጥር 77/1994 አንቀጽ 8 ንዑስ (1) ያሟላ›› መሆኑን ጠቅሶ፣ ተከሳሾች በፈጸሙት የእምነት ማጉደል የሙስና ድርጊት ጉዳያቸው በዲሲፕሊን ኮሚቴው ታይቶ ውሳኔ እንዲሰጥበት ይጠይቃል፡፡

እንደገና በአቶ አሸናፊ ኢረና ፊርማ በቁጥር መአኤ4/መአኤ1/124/11 ኅዳር 26 ቀን 2011 ዓ.ም. ጉዳዩ ‹‹ክስ ማቅረቡን ይመለከታል›› በሚል ርዕስ፣ ለዲሲፕሊን ኮሚቴ ከተጻፈው የቢሮ ማስታወሻ (ኦፊስ ሜሞ) ለመረዳት እንደተቻለው የቃሊቲ ቁጥር ሁለት መጋዘን ተጠርጣዎች ጉዳያቸው በዲሲፕሊን ኮሚቴ እንዲታይ ጠይቆ 28 ገጽ መረጃ በማያያዝ ማቅረቡን ያወሳል፡፡

አጠቃላይ ሁኔታውን አስመልክቶ አቶ አሸናፊና የዲሲፕሊን ኮሚቴ ሰብሳቢው አቶ ሙሉሰው አያልነህ ስለጉዳዩ እንዲያብራሩ ቢጠየቁም ወደ ሕዝብ ግንኙነት አገልግሎት ዳይሬክቶሬት በመምራታቸው፣ የሕዝብ ግንኑነት ዳይሬክተሯ ወ/ሮ አድና በሬ ማብራሪያ እንዲሰጡ ቢጠየቁም ከሁለት ቀናት በኋላ ምላሽ ለመስጠት ቃል ገብተው ነበር፡፡

ነገር ግን የተጠርጣሪዎቹ ጉዳይ በሕግ የተያዙ መሆኑን በቀነ ቀጠሮው ገልጸው ሌሎች ጉዳችን አጣርተው መረጃ እንደሚሰጡ ቃል ቢገቡም፣ ስልካቸው ላይ በተደጋጋሚ ቢደወል ፈቃደኛ ሳይሆኑ ቀርተዋል፡፡