Skip to main content
x
ለክቡር ሚኒስትሩ አንድ የቀድሞ ሚኒስትር ስልክ ደወሉላቸው

ለክቡር ሚኒስትሩ አንድ የቀድሞ ሚኒስትር ስልክ ደወሉላቸው

[ክቡር ሚኒስትሩ ከአንድ ከውጭ ከመጣ ተመራማሪ ጋር ስብሰባ ላይ ተገናኝተው እያወሩ ነው]

  • እንዴት ነዎት ክቡር ሚኒስትር?
  • አላወኩህም ማን ልበል?
  • በውጭ አገር የምኖር ተመራማሪ ነኝ፡፡
  • ምን ላይ ነው የምትመራመረው?
  • የፖለቲካ ተመራማሪ ነኝ፡፡
  • እ . . .
  • ምነው ክቡር ሚኒስትር?
  • ሰላይ ነሃ፡፡
  • ኧረ በፍጹም ክቡር ሚኒስትር፡፡
  • ታዲያ ምንድን ነህ?
  • እኔ በውጭ አገር ያለ የዩኒቨርሲቲ አስተማሪ ነኝ፡፡
  • ምን ልታደርግ መጣህ ታዲያ?
  • የመንግሥትን ጥሪ ተቀብዬ ነዋ፡፡
  • የምን ጥሪ?
  • ኢትዮጵያውያን አገራችሁ ገብታችሁ አገልግሉ ብላችሁ አልነበር እንዴ?
  • እሱስ ብለናል፡፡
  • ስለዚህ እኔም የአቅሜን ላበረክት ነበር የመጣሁት፡፡
  • አገሪቱን እንዴት አገኘሃት ታዲያ?
  • እሱን እንኳን ይተውት ክቡር ሚኒስትር፡፡
  • ምነው?
  • አሁን ልመለስ ነው፡፡
  • እንዴ ለምን?
  • አገሪቱ እኮ አስፈሪ ሁኔታ ላይ ናት፡፡
  • ምን ሆነች?
  • መቼም ይኼ ይጠፋዎታል ብዬ አላስብም፡፡
  • ምኑ ነው የሚጠፋኝ?
  • አገሪቱ ምን ያህል አስፈሪ ሁኔታ ላይ እንዳለች ነዋ፡፡
  • ለውጥ ላይ እኮ ሁሌም መንገራገጭ ያለ ነው፡፡
  • የምን ለውጥ?
  • አሃ አንተ ከለውጡ አደናቃፊዎች ጋር ነው የተሠለፍከው ማለት ነው?
  • የሚገርመው አሁንም የመፈረጅ ፖለቲካ እንደቀጠለ ነው፡፡
  • ታዲያ ለውጥ የለም እያልክ ነው?
  • ለውጥማ አለ፡፡
  • ታዲያ የምን ለውጥ የምትለኝ ለምንድነው?
  • የጠበቅነው ለውጥ ስለሌለ ነዋ፡፡
  • ምን እያልክ ነው?
  • ክቡር ሚኒስትር የዘር ፖለቲካ እኮ ከድሮው ብሶበታል፡፡
  • ምን እናድርግ ታዲያ?
  • ይኸው ሰዎች ከሚኖሩበት አካባቢ በዘራቸው ምክንያት ብቻ እየተፈናቀሉ ነው፡፡
  • ያው ይኼ እኮ የለውጡ አካል ነው፡፡
  • በየአካባቢው የሚነሱ ግጭቶች በየጊዜው እየጨመሩ ነው፡፡
  • የለውጡ አደናቃፊዎች ሴራ ነዋ፡፡
  • አሁን ጣት መቀሰር ያቁሙ ክቡር ሚኒስትር፡፡
  • ሁሉንም ነገር ታዲያ መንግሥት ላይ ለምን ይደፈደፋል?
  • አገር የማስተዳደር ሥራ እኮ የመንግሥት መስሎኝ?
  • እሱማ ልክ ነው፡፡
  • ስለዚህ ሥርዓተ አልበኝነት በአገሪቱ ሲሰፍን ከመንግሥት ውጪ ማን ይጠየቃል?
  • ቢሆንም ሕዝቡ ካልተባበረን ብቻችን እንዴት እንችላለን?
  • ለማንኛውም እኔ ልመለስ ነው፡፡
  • አንተም እኮ ኃላፊነት አለብህ፡፡
  • እኔ ኃላፊነቴን የምወጣው እናንተም ኃላፊነታችሁን መወጣት ስትችሉ ነው፡፡
  • ከዚህ በላይ ምን እናድርግ?
  • ክቡር ሚኒስትር መንግሥት ሥራውን እየሠራ አይደለም፡፡
  • ምን?
  • እንዲያውም አሁን መንግሥት ምን እየሠራ እንደሆነ ያውቃሉ?
  • ምንድነው የሚሠራው?
  • ጠብ ሲል ስደፍን!

[ክቡር ሚኒስትሩ ለአንድ ባለሀብት ስልክ ይደውላሉ]

  • እንዴት ነዎት ክቡር ሚኒስትር?
  • ሰላም ወዳጄ፡፡
  • ሥራ እንዴት ነው?
  • ይኸው ተወጥረናል፡፡
  • እኛን አላልታችሁ ነዋ እናንተ የተወጠራችሁት፡፡
  • ምን እያልክ ነው?
  • ክቡር ሚኒስትር ሁሌም እነግርዎት ነበር እኮ፡፡
  • ምንድነው የምትነግረኝ?
  • ፖለቲካው ያለ ኢኮኖሚው ዋጋ የለውም፡፡
  • ታዲያ ኢኮኖሚው ምን ሆነ?
  • ክቡር ሚኒስትር ኢኮኖሚው የት አለ?
  • አልገባኝም?
  • አሁን እኮ በአውቶ ፓይለት ነው እየሄድን ያለነው፡፡
  • እ . . .
  • እንዳንከሰከስ መፍራት ነው፡፡
  • ኧረ ተው አታሟርት፡፡
  • ለመሆኑ ምን እያሰባችሁ ነው?
  • ስለምኑ?
  • ስለኢኮኖሚው ነዋ፡፡
  • የለውጡ ጠላቶች የኢኮኖሚውን ዋልታ መያዛቸውን አትርሳው፡፡
  • ክቡር ሚኒስትር አሁን ጣት መጠቋቆም የትም አያደርሰንም፡፡
  • ስማ ለውጥ የሚያደናቅፉ አይጠፉምና መረጋጋት ነው፡፡
  • ክቡር ሚኒስትር ስለምን ለውጥ ነው የሚያወሩት?
  • የለውጡ አደናቃፊዎች ጠልፈውህ ይሆናል ብዬ በፊትም ጠርጥሬ ነበር፡፡
  • ኧረ እኔ ማንም አይጠልፈኝም፡፡
  • ለምንድነው በገቢ ማሰባሰቢያ ፕሮግራሙ ላይ ያልመጣኸው?
  • የፕሮግራሙን ዓላማ እንዳልጣረስ ብዬ ነዋ፡፡
  • ለምን ትጣረሳለህ?
  • የጠራችሁን እኮ ገንዘብ እንድናዋጣ ነው፡፡
  • ታዲያ ለምን መጥተህ አላዋጣህም?
  • ከየት ክቡር ሚኒስትር?
  • እ. . .
  • ሰው እኮ ሥራ ስለቀዘቀበት ከሠራተኞቹ ጉሮሮ ላይ እየነጠቀ ነው የሚያዋጣው፡፡
  • እየተዋወቅን አንተናነቅ አለ፡፡
  • እንዴት ክቡር ሚኒስትር?
  • የእኛ አገር ነጋዴ ደግሞ እስከ ዛሬ ያተረፈውን እንኳን ተጠቅሞበት በትኖት ይጨርሰዋል እንዴ?
  • የሌላውን ባላውቅም እኔ ለፍቼ ነው የማገኘው፡፡
  • ስማ ሕዝቡን እያማረራችሁ ያካበታችሁትን ሀብት አሁን ሕዝቡ ሲጠይቃችሁ ፊታችሁን ታዞራላችሁ፡፡
  • እኔ የምለው ምን ነግደን እንስጣችሁ?
  • የእስከ ዛሬውን አውጡት፡፡
  • ከዚያ ባዷችንን እንቅር?
  • አንተ የሚነገርህ አይገባህም እንዴ?
  • ክቡር ሚኒስትር እናንተም ሥራችሁን ሥሩ እንጂ፡፡
  • ምን እናድርግ?
  • ኢኮኖሚውን አንቀሳቅሱት፣ ፓራላይዝድ ሊሆን ነው፡፡
  • መንግሥት እኮ አዲስ የኢኮኖሚ አቅጣጫ ሊያስተዋውቅ ነው፡፡
  • እሱን የኢኮኖሚ አቅጣጫ ሕዝቡ አውቆታል፡፡
  • ምንድነው እሱ?
  • የመዋጮ ኢኮኖሚ!

[ክቡር ሚኒስትሩ ከሾፌራቸው ጋር መኪና ውስጥ እያወሩ ነው]

  • ምነው ክቡር ሚኒስትር?
  • ምነው?
  • ፊትዎ ጠቋቁሯል፡፡
  • እንዴት አይጠቋቁር?
  • አዲስ ነገር አለ እንዴ?
  • ሁሉ ነገር ያስጨንቃል፡፡
  • ይገባኛል ክቡር ሚኒስትር፡፡
  • አንዱን ስትለው አንዱ ይከተላል፡፡
  • አገር መምራት ከባድ ነው ክቡር ሚኒስትር፡፡
  • ያለ ዕድሜዬ በሽታ አሸከመኝ እኮ፡፡
  • ምንድነው የሚደረገው?
  • እኛም ግራ ገብቶናል፡፡
  • ብዙ ሰው እኮ ተስፋ ቆርጧል፡፡
  • ለምን?
  • በለውጡ በጣም ተስፋ አድርጎ ነበር፡፡
  • አሁንስ?
  • አሁንማ ለውጡ ተጠልፏል እየተባለ ነው፡፡
  • ማን ነው ግን የጠለፈው?
  • የሕዝቡም ጥያቄ እሱ ነው፡፡
  • ወይ ያለብን ጣጣ፡፡
  • አገሪቱ ተስፋ አላት ግን ክቡር ሚኒስትር?
  • እኛማ ተስፋ አለን እያልን ነው፡፡
  • በየቀኑ የሚሰማው ወሬ እኮ ዘግናኝ ነው፡፡
  • እ. . .
  • ክቡር ሚኒስትር ረሃብ የድሮ ታሪካችን ነው ብለን ሳንጨርስ ይኸው በርካቶች ተርበዋል፡፡
  • እስኪ ተው፡፡
  • መፈናቀሉ አሁንም አለ፡፡
  • ምን ይደረግ ብለህ ነው?
  • ከሁሉም አስፈሪው ደግሞ የኢኮኖሚው ጉዳይ ነው፡፡
  • እንዴት?
  • ሁሉም ነገር ተቀዛቅዟል፡፡
  • ወይ ጣጣ?
  • አፋጣኝ መፍትሔ ሊሰጠው ይገባል፡፡
  • ታዲያ እንዴት ይፈታ?
  • ይረጋጉ ክቡር ሚኒስትር፡፡
  • እኔ ሲጨንቀኝ መኪና መንዳት ያረጋጋኛል፡፡
  • ምን እያሉኝ ነው?
  • በቃ እኔ ልንዳ፡፡
  • ኧረ አይሆንም ክቡር ሚኒስትር፡፡
  • ለምን?
  • ፕሮቶኮል የሚባል ነገር አለ፡፡
  • ይኸው አለቃችን ሁሌ መሪዎችን የሚያሽከረክሩት እሳቸው አይደሉ እንዴ?
  • ትክክል አይደለም ክቡር ሚኒስትር ፕሮቶኮል መጠበቅ አለበት፡፡
  • እኔ እንዳየሁት ግን መሪዎቹ በጣም ነው ደስ የሚላቸው፡፡
  • ስለፕሮቶኮል መቼም ለእርስዎ አልነግርዎትም፡፡
  • ማካበድ አያስፈልግም እባክህ፡፡
  • ክቡር ሚኒስትር ይኸው አለቃችሁ መኪና እያሽከረከሩ ፕሮቶኮል ስለማይጠብቁ፣ ሌላ አገር ሲሄዱ ለእሳቸውም ፕሮቶኮል አይጠበቅላቸውም፡፡
  • እንዴት?
  • ይኸው በቅርቡ ሰሞኑን ማን እንደተቀበላቸው አላዩም፡፡
  • ማን ተቀበላቸው?
  • የትራንስፖርት ሚኒስትር!

[ለክቡር ሚኒስትሩ አንድ የቀድሞ ሚኒስትር ስልክ ደወሉላቸው]

  • እንዴት ነው ክቡር ሚኒስትር?
  • እግዚአብሔር ይይላችሁ፡፡
  • ምነው ክቡር ሚኒስትር?
  • ይኸው እሳት ላይ አስቀምጣችሁን ሄዳችሁ፡፡
  • እኛም እኮ ነግረናችሁ ነበር፡፡
  • ምኑን?
  • አገር መምራት እንዲህ ቀላል እንዳልሆነ፡፡
  • እናንተ ያጠፋችሁትን እያረምን እኮ ነው የተቸገርነው፡፡
  • እንዴት ነው ማረም ታዲያ?
  • የጊዜ ጉዳይ እንጂ መጠየቃችሁ አይቀርም፡፡
  • አለቃችሁን ግን ይኼ ሁሉ የቤት ሥራ ትተው ውጭ መሽከርከራቸው ምንድነው?
  • የእናንተን ስህተት ለማረም ነዋ፡፡
  • ቢሆንም ሁሉ ነገር ከውስጥ መጀመር ይሻላል፡፡
  • እንዴት?
  • ተለውጠናል እያላችሁ አይደል እንዴ?
  • ግጥም አድርገን ነዋ የተለወጥነው፡፡
  • ስለዚህ ወደ ውጭ ከማየት ወደ ውስጥ መመልከቱ ይበጃል፡፡
  • አሁን እናንተም ለምክር በቃችሁ?
  • ለማንኛውም ሰሞኑን አለቃችሁ የውጭ ጉዞ ስላበዙ ሥልጠናቸው ተቀየረ ወይ ለማለት ነው?
  • ወደ ምንድነው የሚቀየረው?
  • ሳናውቅ ሾማችኋቸው እንዴ?
  • ምን አድርገን?
  • በጠቅላይ ሚኒስትር ማዕረግ . . .
  • እ. . .
  • የውጭ ጉዳይ ሚኒስትር!