Skip to main content
x
[ክቡር ሚኒስትሩ ከአንድ የተቃዋሚ ፓርቲ መሪ ጋር ተገናኝተው እያወሩ ነው]

[ክቡር ሚኒስትሩ ከአንድ የተቃዋሚ ፓርቲ መሪ ጋር ተገናኝተው እያወሩ ነው]

  • ምነው ክቡር ሚኒስትር?
  • ምን ሆንክ?
  • ምን እያደረጋችሁ ነው?
  • ምን አደረግን?
  • አገሪቱን አያዩዋትም እንዴ?
  • ምን ሆነች?
  • ከጫፍ እስከ ጫፍ እኮ እየተፍለቀለቀች ነው፡፡
  • ቡና እኮ ከኢትዮጵያ ተገኘ የምንለው ዝም ብለን አይደለም፡፡
  • እንዴት ክቡር ሚኒስትር?
  • አየህ ቡና ተፈልቶ ከተንተከተከ በኋላ ሲሰክን ነው የሚቀዳው፡፡
  • ምን እያሉ ነው?
  • ስለዚህ አሁን አገሪቱ ልክ እንደ ቡና እየተንተከተከች ነው፡፡
  • ክቡር ሚኒስትር ቡናው እኮ እሳት ከበዛበት ገንፍሎ ያልቃል፡፡
  • እንግዲህ እሳቱን መመጠን ነው ዋናው ጨዋታ፡፡
  • እሳቱን የምታነዱት ራሳችሁ ናችሁ ማለት ነው?
  • እንደ እሱ አልወጣኝም፡፡
  • ለነገሩ ባይሉም ግልጽ ነው፡፡
  • እንዴት ማለት?
  • መንግሥት ሁሌም ጭር ሲል አይወድማ፡፡
  • ስማ መንግሥት እሳት ያነዳል እያልክ ነው?
  • ባያነድም ሌሎች ሲያነዱ አብሮ ይሞቃል፡፡
  • የምን አሽሙር ነው?
  • ክቡር ሚኒስትር ይኸው አንዱ ፖለቲከኛ ነኝ ባይ ያወራውን አልሰሙም?
  • ስለምን ያወራውን?
  • ስለሥራ ቋንቋ ነዋ፡፡
  • ምን አለ?
  • የብሔራችሁን ቋንቋ ከሚናገሩ ሰዎች ውጪ አታግቡ ያለውን ነዋ፡፡
  • እ…
  • እንደ እኛ ተመፃዳቂ ኅብረተሰብ መቼም አላየሁም፡፡
  • እንዴት?
  • ሥራ ሳይኖረን በሥራ ቋንቋ እንጣላለን፡፡
  • እዚህስ ላይ ትክክል ነህ፡፡
  • ለማንኛውም ሕዝቡ ሿሿ ተሠርተናል እያለ ነው፡፡
  • ምንድነው ሿሿ?
  • የታክሲ ላይ የዘረፋ ስልት ናት፡፡
  • ሰውዬ ፈር አትልቀቅ እንጂ፡፡
  • ምን አደረግኩ ክቡር ሚኒስትር?
  • ሌቦች እያልክ እየተሳደብክ እኮ ነው፡፡
  • ሕዝቡ የሚላችሁን ነው የነገርኳችሁ፡፡
  • እኮ ምን አደረግን?
  • ሰሞኑን እንኳን ያደረጋችሁትን ረሳችሁት?
  • ምን አደረግን?
  • በኮንዶሚኒየሙ ነዋ፡፡
  • እ…
  • ኢትዮጵያ በዓለም መድረክ እንድትታወቅ እያደረጋችኋት ነው፡፡
  • በመደመር ፍልስፍናችን ማለትህ ነው?
  • ኧረ የለም፡፡
  • ታዲያ በምንድነው?
  • መንግሥት ሆኖ መንግሥትን በመቃወም፡፡
  • እ…
  • ራሳችሁ ቤት ሰጥታችሁ ራሳችሁን ትቃወማላችሁ?
  • እ…
  • ለማንኛውም እናንተን ለማስመዝገብ ደፋ ቀና እያልኩ ነው፡፡
  • የት? ምርጫ ቦርድ?
  • እዚያማ ተመዝግባችኋል፡፡
  • ታዲያ ምን ላይ ነው የምታስመዘግበን?
  • የድንቃ ድንቅ መዝገብ ላይ!

[ክቡር ሚኒስትሩ ከልጃቸው ጋር እያወሩ ነው]

  • አንተ ልጅ ምን እያደረግ ነው?
  • ኢንተርኔት ላይ የሆነ ጽሑፍ እያነበብኩ ነው፡፡
  • ከትምህርትህ ጋር ይገናኛል?
  • አይገናኝም ዳዲ፡፡
  • ለመሆኑ ዛሬ ትምህርት የለም እንዴ?
  • ኧረ አለ ዳዲ፡፡
  • ታዲያ ከትምህርት ቤት ቀርተህ ነው ኢንተርኔት የምትጠቀመው?
  • ምን ያደርግልኛል ዳዲ?
  • ምኑ?
  • ትምህርቱ፡፡
  • ጉድና ጅራት ከወደ ኋላ ነው አሉ፡፡
  • ምነው ዳዲ?
  • ትምህርትን ነው ምን ያደርግልኛል የምትለው?
  • አዎን ዳዲ ምነው?
  • ካልተማርክማ የፈለግከውን መሆን አትችልም፡፡
  • የማላውቅ መሰለህ እንዴ ዳዲ?
  • ምኑን ነው የማታውቀው?
  • ኢትዮጵያ ውስጥ መማር አያዋጣም ብለዋል፡፡
  • ምን?
  • ተምረው ኮብል አይደል እንዴ የሚፈልጡት?
  • ወይ የዛሬ ልጆች?
  • ተምሬ ድንጋይ ፈላጭ ልሁን?
  • የተማረ ሰው ድንጋይ አይፈልጥም፡፡
  • እሱማ ትንሽ ከተማርክ የሰው ጭንቅላት ትፈልጣለህ አሉ፡፡
  • ምን?
  • እንዴ ይኸው የዩኒቨርሲቲ ተማሪዎች ሁሌ አይደል እንዴ የሚደባደቡት?
  • ስማ ልጄ መማር በጣም ጠቃሚ ነገር ነው፡፡
  • ዳዲ እኔ እኮ ሁሉን ነገር በሚገባ አውቃለሁ፡፡
  • ምንድነው የምታውቀው?
  • መቼ ዕለት አለቃችሁ በቲቪ ሲያወሩ ሰምቻቸዋለሁ፡፡
  • ምን አሉ?
  • ኢንጂነሩም፣ ዶክተሩም፣ ሁሉም ሥራውን ትቶ እየሠራው ያለ ነገር አለ፡፡
  • እ…
  • ስለዚህ ሁሉም ተምሮ አሁን የሚሠራው ሌላ ነገር ነው፡፡
  • ምን እያልክ ነው?
  • ስለዚህ እኔም በሌላ ነገር ጊዜዬን ከማቃጥል ከአሁኑ ብጀምር አይሻልም?
  • የምታወራው ምንም አልገባኝም?
  • በዚያ ላይ ደግሞ አዋጭ ነው አሉ፡፡
  • እ…
  • ዕውቀት ኖረህም አልኖረህም መሥራት ትችላለህ፡፡
  • ያለ ዕውቀት ምንም መሥራት አትችልም፡፡
  • ዳዲ እኔም በጥቂት ዕውቀት ጥሩ ገቢ የሚገኝበት መሆኑን ስለተረዳሁ ትምህርት በመማር ጊዜዬን አላጠፋም፡፡
  • ተሳስተሃል ልጄ፡፡
  • አልተሳሳትኩም ዳዲ፣ ምን መሆን እንደምፈልግ በደንብ አውቃለሁ፡፡
  • ምንድነው መሆን የምትፈልገው
  • አክቲቪስት!

[ለክቡር ሚኒስትሩ አንድ ወዳጃቸው ስልክ ደወለላቸው]

  • ምን እየተሠራ ነው ክቡር ሚኒስትር?
  • ምነው?
  • እኔ ለእናንተ እንደዚህ ነኝ?
  • ምን ሆነህ ነው?
  • ለውጡን እዚህ ያደረስኩት እኔ አይደለሁ እንዴ?
  • እሱማ ምን ጥርጥር አለው፡፡
  • እውነት ብንነጋገር ያለ እኔ እዚህ ትደርሱ ነበር?
  • አይታሰብም ስልህ፡፡
  • ታዲያ ለምንድነው የሚገባኝን ቦታ የማትሰጡኝ?
  • ከዚህ በላይ ምን እናድርግ ጌታዬ?
  • ክቡር ሚኒስትር በጣም ደስተኛ አይደለሁም፡፡
  • ምን ጎደለብህ?
  • ይኸው ትንሽ ከፊታችን ዞር በል እያሉኝ ነው፡፡
  • አገር እንዲረጋጋ እኮ ነው፡፡
  • እኔ እኮ በሐሳቡ ተስማምቼ ነበር፡፡
  • ምን ጎደለህ ታዲያ?
  • ኤርፖርት ችግር ገጥሞኝ ነው፡፡
  • የምን ችግር?
  • አትወጣም እያሉኝ ነው፡፡
  • ማን ነው ያለው?
  • ኤርፖርት ያሉ ኃላፊዎች፡፡
  • ለምን?
  • የያዝኩት ዶላር ይወረሳል እያሉ ነው፡፡
  • የምን ዶላር ነው?
  • የሥራ ማስኬጃ!

[ክቡር ሚኒስትሩ የኤርፖርት የጥበቃ ኃላፊዎች ጋ ደወሉ]

  • አቤት ክቡር ሚኒስትር፡፡
  • አንድ ወዳጄ ስልክ ደውሎልኝ ነበር፡፡
  • ምን ልርዳዎት ታዲያ?
  • አትወጣም ብላችሁታል መሰለኝ፡፡
  • አዎን ክቡር ሚኒስትር፡፡
  • ለምን ከለከላችሁት?
  • ሕገወጥ ገንዘብ ይዟል፡፡
  • ሕገወጥ ገንዘብ አይደለም፡፡
  • ምን እያሉ ነው ክቡር ሚኒስትር?
  • መንግሥት የፈቀደለት ገንዘብ ነው፡፡
  • ክቡር ሚኒስትር መንግሥት ለግለሰብ ይኼን ያህል ዶላር እንደማይፈቅድ አውቃለሁ፡፡
  • እሱ ግለሰብ አይደለም፡፡
  • ምን ማለት ነው?
  • መንግሥት ነው፡፡
  • አሁን ምን ልርዳዎት?
  • ከአገር እንዲወጣ ፍቀዱለት፡፡
  • ክቡር ሚኒስትር በስልክ እኮ ትዕዛዝ መስጠት ድሮ ቀረ፡፡
  • የእኛው ሰው ነው ስልህ፡፡
  • ለማንኛውም አንድ ነገር ልተባበርዎት እችላለሁ፡፡
  • ምን?
  • እሱን ልለቀው እችላለሁ፡፡
  • ዶላሩስ?
  • ይታሰራል!

[ክቡር ሚኒስትሩ ከአንድ የአዲስ አበባ ነዋሪ ጋር ተገናኝተው እያወሩ ነው]

  • ምነው ክቡር ሚኒስትር?
  • ምነው?
  • የድጋፍ ቲሸርታችን ሳያረጅ እንዲህ ጉድ ትሠሩናለችሁ?
  • ምን አደረግን?
  • ክቡር ሚኒስትር ለውጡን እኮ ከልብ ነበር የደገፍነው፡፡
  • አሁንም ድጋፋችሁን አጠናክራችሁ ቀጥሉበት፡፡
  • እንዴት አድርገን?
  • ምነው?
  • ገና ወንበራችሁ ሳይፀና ሴራችሁ እኮ ተጋለጠ፡፡
  • የምን ሴራ?
  • ሁሉም ነገር የእኛ ነው እየተባለ እኮ ነው፡፡
  • እ…
  • ለውጡን ሳትጨርሱት ከተማዋ የእኛ ናት ማለታችሁ ግን ያስተዛዝባል፡፡
  • ምን መሰለህ?
  • ሌላው ደግሞ ከተማዋ የአፍሪካ መዲና ናት ይላል፡፡
  • እ…
  • ሌላው ደግሞ የሁሉም ናት ይላል፡፡
  • እሱማ ልክ ነው፡፡
  • አንዱ ደግሞ ሌሎቹም ከተሞች የእናንተ ናቸው ይለናል፡፡
  • እውነት ነው እኮ፡፡
  • ለማንኛውም የከተማዋን ነዋሪ ግራ አጋብታችሁታል፡፡
  • ሁሉም ነገር ይስተካከላል፡፡
  • በነገራችን ላይ ከተማዋ ራሷ በውዝግቡ ግር ስላላት ሰሞኑን ሁላችሁንም ትጋብዛችኋለች፡፡
  • ምንድነው የምትጋብዘን?
  • ሙዚቃ፡፡
  • የማንን?
  • የአስቴርን፡፡
  • ምን የሚለውን?
  • የማን ነሽ ይሉኛል. . .
  • እ…
  • . . . የማን ልበላቸው!