Skip to main content
x
ክቡር ሚኒስትሩን ሾፌራቸው ወደ ቤት እየወሰዳቸው ነው

ክቡር ሚኒስትሩን ሾፌራቸው ወደ ቤት እየወሰዳቸው ነው

[ክቡር ሚኒስትር ወደ ሥራ ከመሄዳቸው በፊት ከባለቤታቸው ጋር እያወሩ ነው]

  • በጠዋት ምን ተገኝቶ ነው በደስታ የተሞላሽው?
  • ጓደኛዬ አዲስ የቢዝነስ ፕሮፖዛል ሠርታልኝ ነው፡፡
  • የምን ፕሮፖዛል?
  • የአስመጪነት ቢዝነስ ፕሮፖዛል፡፡
  • ነጋዴ ልትሆኚ?
  • የተከበሩ ሚኒስትር እኔ ምን ያንሰኛል?
  • በተማርሽበት ብትሠሪ ይሻልሻል፡፡
  • የማይደረገውን?
  • እንዴት?
  • ብር ከአካፋ በሚዛቅበት ጊዜ ሞኝ አይደለሁም፡፡
  • ካዋጣሽ ቀጥይ፡፡
  • እንደሱ ብሎ ነገር የለም፡፡
  • ምን ማለት ይሆን?
  • አንተም ታግዘኛለህ፡፡
  • እንዴት ነው የማግዝሽ?
  • ሥልጣንህ ለመቼ ሊጠቅመኝ ነው ታዲያ?
  • ለመሆኑ ምንድነው የምታስመጪው?
  • ከፍተኛ ትርፍ የሚያስገኙ ተፈላጊነት ያላቸው ምርቶችን፡፡
  • ካፒታሉን ከየት ለማግኘት አቅደሻል?
  • ዕድሜ ለአንተ የባንክ ብድር ታመቻችልኛለህ፡፡
  • እኔ?
  • አዎ አንተ፡፡
  • እኔ እንዲህ ዓይነት ነገር መስማት አልፈልግም፡፡
  • ከብድር በተጨማሪ ሌላም ነገር እፈልጋሁ፡፡
  • ሌላው ደግሞ ምንድነው?
  • የውጭ ምንዛሪ በቅድሚያ በአስቸኳይ እንዲፈቀድልኝ እፈልጋለሁ፡፡
  • አንቺ ሴትዮ ገና አንድ ዓመታችን እኮ ነው፣ ያምሻል?
  • የሚያምህስ አንተ፡፡
  • እኔን ምንድነው የሚያመኝ?
  • ሰው ሁሉ እየተተኮሰ አንተ ከመጋቢት እስከ መጋቢት እያልክ ታወራለህ፡፡
  • እኔ አገሬን በቅንነት ነው ማገልገል የምፈልገው፡፡
  • በዚህ በፍየል ዘመን በግ አትሁን፡፡
  • ምንድነው የምትይው?
  • መጀመርያ ለራስ ከዚያ ለአገር ይሞከራል፡፡
  • ኧረ ይኼ ከመጠን ያለፈ ራስ ወዳድነት ይቅርብሽ፡፡
  • ከራስ በፊት ምንም የሚቀድም የለም፡፡
  • ለእኔ ግን አገሬ ትቀድማለች፡፡
  • አገሬ አገሬ ብትል ማንም አይሰማህም፡፡
  • ለምን?
  • አልሰማህም እንዴ?
  • ምኑን?
  • ኢትዮጵያዬ በማለታቸው ተሰደብኩ ብለው ሲበሳጩ፡፡
  • በአገሩ ምክንያት የተሰደበ ሰው አላውቅም፡፡
  • ሰውየው በንዴት እየተንገበገቡ ሲናገሩ አልሰማህም?
  • የቱ ሰውዬ?
  • ለኢትዮጵያዊነት ቀብድ የሰጠኝ ማን ነው ያሉት ናቸዋ፡፡
  • እሳቸው ሲናገሩ እንኳ ዕንባዬ ነበር የመጣው፡፡
  • እዚህ አገር እኮ መተማመን ጠፍቷል፡፡
  • የጊዜ ጉዳይ ነው ይስተካከላል፡፡
  • እንዳይመስልህ፡፡
  • አንቺ ግን ምን ነክቶሻል?
  • በማንም መበለጥ አልፈልግም፡፡
  • ምናለበት ቢቀርብሽ?
  • ያሰብኩትን ከማሳካት ወደኋላ አልልም፡፡
  • አጉል ድፍረት ጣጣ ያመጣል፡፡
  • ደፋርና ጭስ መውጫ አያጣም ተብሏል፡፡

[ክቡር ሚኒስትር ቢሮ እንደደረሱ አማካሪያቸውን አስጠሩት]

  • ለበላይ አካል የሚቀርበው ዓመታዊ የአፈጻጸም ሪፖርት አለቀ?
  • ክቡር ሚኒስትር ትንሽ ይቀራል፡፡
  • ምንድነው የሚቀረው?
  • የአንድ ዓመት አፈጻጸማችን ዝቅ ያለ ስለሆነ እያስተካከልኩ ነው ክቡር ሚኒስትር፡፡
  • ምኑን ነው የምታስተካክለው?
  • ቁጥሮቹን ነው ክቡር ሚኒስትር፡፡
  • ቁጥሮቹ ምን ሆኑ?
  • ያሳጡናል ክቡር ሚኒስትር፡፡
  • የሥራ አፈጻጸማችን በመቶኛ ስንት ነው?
  • 77 በመቶ ብቻ ነው ክቡር ሚኒስትር፡፡
  • የፋይናንስ ክዋኔያችንስ?
  • 80 በመቶ ብቻ ነው ክቡር ሚኒስትር፡፡
  • አንተ ስንት ለማድረግ አሰብክ?
  • ከ95 በመቶ በላይ ክቡር ሚኒስትር፡፡
  • ለምን እንዋሻለን ግን?
  • ክቡር ሚኒስትር የመንግሥት ሪፖርት የሚታወቀው እኮ በውሸት ነው፡፡
  • ካልዋሸን የሠራን አይመስልህም በቃ?
  • ባህል ስለሆነ አይሥጉ ክቡር ሚኒስትር፡፡
  • እኔ ግን በዚህ አልስማማም፡፡
  • የአንድ ዓመት ተሿሚ ስለሆኑ የምልዎትን ቢሰሙ ይሻላል ክቡር ሚኒስትር፡፡
  • ምን እያልክ ነው?
  • አቅራቢውም ተቀባዩም ሞቅ ሞቅ ሲል ነው የሚወዱት ክቡር ሚኒስትር፡፡
  • ገና በአንድ ዓመታችን ውሸትን ይዘን እንነሳ?
  • የበዓለ ሲመቱ አንደኛ ዓመት ሞቅ ደመቅ የሚለው ቁጥሮችም ከፍ ሲሉ ነው ክቡር ሚኒስትር፡፡
  • ኧረ ሰው ይታዘበናል አንተ ሰውዬ?
  • ክቡር ሚኒስትር ሰው በነገር ጦዞ ቁጥር ላይ ሳይሆን ያለው ሌላ ነገር ላይ ነው፡፡
  • ምን ላይ?
  • አዲስ አበባ፣ ኮዬ ፈጬ፣ ጌዴኦ፣ . . . የሚባሉ አጀንዳዎች ናላውን አዙረውታል፡፡
  • አንተ ደግሞ ቁጥር እየቀሸብክ ሌላ ራስ ምታት ትፈጥራለህ፡፡
  • የዛሬ ዓመት እርስዎ እኔን በእጥፍ ያልበለጡኝ እንደሆነ ከምላሴ ፀጉር ይነቀል፡፡
  • እኔ እንዳንተ አይደለሁም፡፡
  • ሌሎችም እንዲህ እያሉ ነው ሰተት ብለው የገቡበት፡፡
  • እኔ እኮ የሥልጣን ጉጉት የለብኝም፡፡
  • የበፊቶቹም እንዲህ ይሉ ነበር ክቡር ሚኒስትር፡፡
  • ይኼ ሌላ ያ ሌላ፡፡
  • ሁሉም ያው ነው ክቡር ሚኒስትር፡፡
  • እንዴት ነው ያው የሚሆነው?
  • የማንም ፖለቲከኛ ግቡ ሥልጣን እንደሆነ ያጡታል እንዴ?
  • ሥልጣን ለእኔ ተራ ነገር ነው፡፡
  • ክቡር ሚኒስትር ለእኔ ደግሞ ሌላ ነው፡፡
  • ማለት?
  • እርስዎ ሥልጣን ተራ ነው ሲሉ እኔ ደግሞ . . .
  • አንተ ደግሞ ምን?
  • ሥልጣን ተራ አይደለም እላለሁ፡፡
  • ምንድነው ታዲያ?
  • የሁሉም ነገር ምንጭ ነው፡፡
  • ለአንተ ሊሆን ይችላል፡፡
  • ሲባል አልሰሙም እንዴ ክቡር ሚኒስትር?
  • ምን ተባለ?
  • ሥልጣንና የነብር ጅራት ከተያዘ ለመልቀቅ ይቸግራል፡፡  

[ክቡር ሚኒስትሩ ከአንድ ዲፕሎማት ጋር እያወሩ ነው]

  • እንዴት ነህ ወዳጄ?
  • ደህና ነኝ ክቡር ሚኒስትር፡፡
  • ምን እግር ጣለህ?
  • የመጣሁበትን ጉዳይ ሳያውቁት አይቀርም፡፡
  • ምን ይሆን?
  • ባለፈው አንድ ዓመት በአገሪቱ ለታየው ለውጥ ደስታዬን መግለጽ እፈልጋለሁ፡፡
  • ጥሩ፡፡
  • አንዳንድ ችግሮች ቢኖሩም ተስፋ እንዳለ ግልጽ ነው፡፡
  • ጥሩ፡፡
  • በሌላ በኩል ለለውጡ የማይመጥኑ ድርጊቶች ይታያሉ፡፡
  • ለምሳሌ?
  • የበቀደሙ ጋዜጣዊ መግለጫ ክልከላ አንዱ ነው፡፡
  • የቱ ጋዜጣዊ መግለጫ?
  • የባልደራስ ምክር ቤት መግለጫ፡፡
  • እሱ እኮ ፖሊስ የፀጥታ ሥጋት አለ ስላለ ነው ያልተካሄደው፡፡
  • ክቡር ሚኒስትር ፖሊስ የፀጥታ ሥጋትን ማስወገድ እንጂ መግለጫ ማስቆም የለበትም፡፡
  • ሥጋቱ ተጨባጭ ሲሆንስ?
  • የከተማ አስተዳደሩ ይወስናል እንጂ ፖሊስ ለምን ይወስናል?
  • ከፖሊስ በላይ የፀጥታ ሥጋትን ማን ሊናገር ይችላል?
  • በበኩሌ እንዲህ ዓይነቱ ነገር አይጥመኝም፡፡
  • ለምን?
  • የፀጥታ አካላት ገለልተኛ መሆን አለባቸው እንጂ፣ አስፈጻሚውን መተካት አይጠበቅባቸውም፡፡
  • እኛ ሥጋቱ አሳስቦን እንጂ ክፋት አላሰብንም፡፡
  • ሌላው ወገን ግን ሆን ተብሎ የተደረገ ይመስለዋል ክቡር ሚኒስትር፡፡
  • ለማንኛውም ስብሰባው ወደፊት መካሄድ ይችላል ተብሏል፡፡
  • ዘላቂና አስተማማኝ ዴሞክራሲ የሚገነባው ግልጽነት ሲኖር ስለሆነ ጥንቃቄ ቢደረግ መልካም ነው፡፡
  • እኛ እኮ ለራሳችን ስንል ነው እንጂ ለታይታ አንሠራም፡፡
  • እኛም ቢሆን ደስ ይለናል ግን . . .
  • ግን ምን?
  • አንዳንዴ የተደበላለቁ ነገሮች ይታያሉ ክቡር ሚኒስትር፡፡
  • ለምሳሌ?
  • በአንድ በኩል ለለውጡ ተስፋ የሚሰጡ ሥራዎች ሲታዩ፣ በሌላ በኩል ደግሞ የሚያስቀለብሱም ይታያሉ፡፡
  • በሽግግር ወቅት የሚያጋጥም ነው፡፡
  • ቢሆንም ከሕዝብ ጋር ጀርባና ሆድ እንዳትሆኑ ተጠንቀቁ፡፡
  • ወዳጄ እኛ እኮ ለሕዝባችን እናስባለን፡፡
  • ቢሮክራሲያችሁ ቀርፋፋ ስለሆነ ብዙ ነገር ከተበላሸ በኋላ ነው ድምፃችሁ እንኳን የሚሰማው፡፡
  • እንዲህ እንኳን አንታማም፡፡
  • ሌላው ቀርቶ በአዲስ አበባ ጉዳይ ጠቅላይ ሚኒስትሩና የለውጡ ቡድን ከዘገየ በኋላ አይደል እንዴ እየተናገሩ የነበረው?
  • የአዲስ አበባ ጉዳይ በእርግጥ ችግር ፈጥሮብን ነበር፡፡
  • መንግሥት ሲንቀራፈፍ አቋሙ ባለመታወቁ ብዙዎች ማኩረፋቸውን እናውቃለን፡፡
  • እናንተማ ከዚህም በላይ ባታውቁ ነው የሚገርመኝ፡፡
  • እንዴት ክቡር ሚኒስትር?
  • ማታ ምን በልተን እንደተኛን እንኳ ታውቃላችሁ፡፡
  • እ . . . ?
  • በየትኛው ጎናችን ተኝተን እንዳደርን ጭምር ነው የምታውቁት፡፡
  • ይቀልዳሉ ክቡር ሚኒስትር?
  • ቀልድ ብችል ኖሮ ኮሜዲያን ነበር የምሆነው፡፡
  • ኧረ ሌላም መሆን ይችላሉ ክቡር ሚኒስትር፡፡
  • ምን?
  • አስማተኛ፡፡

[ክቡር ሚኒስትሩን ሾፌራቸው ወደ ቤት እየወሰዳቸው ነው]

  • እነዚህ ሁሉ መኪኖች መንገድ ዳር ለምንድነው የቆሙት?
  • ባለቤቶቻቸው መጠጥ እየጠጡ ነው ክቡር ሚኒስትር፡፡
  • ጠጥተው ይነዳሉ ማለት ነው?
  • አጠጣጥስ ልክ አለው ክቡር ሚኒስትር?
  • ትራፊክ ፖሊሶች የሉም እንዴ?
  • ቢኖሩስ ክቡር ሚኒስትር?
  • አይቆጣጠሩም እንዴ?
  • ለሁሉም ነገር መላ አለው ክቡር ሚኒስትር፡፡
  • የምን መላ?
  • ሰጥቶ መቀበል የሚሉት መላ ነው፡፡
  • አንተ በምን አወቅክ?
  • ከአሥር ዓመት በላይ ሾፌር ነኝ ክቡር ሚኒስትር፡፡
  • አሥር ዓመት ሙሉ መኪና ትነዳለህ?
  • ምን ላድርግ ታዲያ ክቡር ሚኒስትር?
  • ለማደግ ጥረት አታደርግም?
  • እዚህ አገር ለማደግ አቋራጩ ነጋዴ መሆን ነው ክቡር ሚኒስትር፡፡
  • በቃ?
  • ይልቅ እርስዎም ባለቤትዎን ንግድ ውስጥ በቶሎ ይክተቱ፡፡
  • እኔማ አላደርገውም፡፡
  • አይ ክቡር ሚኒስትር ነገ የምናየውን?
  • ምንድነው የሚታየው?
  • አለ አይደል . . .
  • አለ ምን?
  • ባለቤትዎ ንግዱን ማቀላጠፍ ሲጀምሩና ብር በአካፋ ሲዝቁ ያኔ ይገባዎታል፡፡
  • አሁን አይገባህም እያልከኝ ነው?
  • አዎን ክቡር ሚኒስትር፡፡
  • እንዴት?
  • በምሳሌ ላስረዳዎት፡፡
  • በላ ንገረኝ፡፡
  • የአገራችን ፖለቲካ ለምን ንጭንጭ እንደሚበዛበት ያውቃሉ?
  • አንተ ንገረኛ?
  • የገንዘብ ድርቅ ስላለበት ነው፡፡
  • እ?
  • ሁሉም የሚጮኸው ሥልጣን ይዞ ገንዘብ ለመቀራመት ነው፡፡
  • ወይ ጉድ?
  • በእግሩ አገር የሚያካልል ፖለቲከኛ ከመብዛቱ የተነሳ ፓርቲዎች ከመቶ በላይ ናቸው፡፡
  • ህም . . .
  • ይኼ ሁሉ ወፈ ሰማይ ፓርቲ ውስጡ ቢፈተሽ ደግሞ ባዶ ነው፡፡
  • እና?
  • እናማ በባዶ እጅ ሥልጣን ይደብራል ክቡር ሚኒስትር፡፡
  • እኔም ልነግድ?
  • ከተገኘ ከእነ ባለቤትዎ በሰፊው ይግቡበት ክቡር ሚኒስትር፡፡
  • ለአገር አይጠቅምም፡፡
  • የበፊቱም ሚኒስትር እንዲህ ይሉ ነበር፡፡
  • ከዚያስ?
  • ከዚያማ ምኑ ይነገራል ክቡር ሚኒስትር፡፡
  • አንተም እንዲህ ነው የምታስበው?
  • ባገኝ አልጠላም ክቡር ሚኒስትር፡፡
  • እኔ የሌብነት ሱስ የለብኝም፡፡
  • የአገር ሱስ ደግሞ የትም አያደርስም፡፡
  • ለምን?
  • ትርፉ ብስጭት ነው፡፡
  • የፈለገው ይሁን ለጥቅም ብዬ አገሬን አልሰርቅም፡፡
  • የሚያምንዎት የለም ክቡር ሚኒስትር፡፡
  • እኔ ከህሊናዬ በላይ ምስክር አልሻም፡፡
  • የዘንድሮ ሰው ለህሊና ደንታ የለውም ክቡር ሚኒስትር፡፡
  • ቢሆንም እኔ ህሊናዬን ብያለሁ አንተስ?
  • ግራ ገብቶኛል!