Skip to main content
x
የአዲስ አበባ ፖሊስ ኮሚሽነር ከኃላፊነታቸው ተነሱ
ሜጀር ጄኔራል ደግፌ በዲ

የአዲስ አበባ ፖሊስ ኮሚሽነር ከኃላፊነታቸው ተነሱ

የአዲስ አበባ ፖሊስ ኮሚሽንን ከዘጠኝ ወራት በላይ በኮሚሽነርነት ሲመሩ የቆዩት ሜጀር ጄኔራል ደግፌ በዲ ከኃላፊነታቸው ተነሱ፡፡

ኮሚሽኑን ለዓመታት ሲመሩ የነበሩትን አቶ ይህደጎ ሥዩምን ተክተው በጠቅላይ ሚኒስትር ዓብይ አህመድ (ዶ/ር) ሰኔ 19 ቀን 2010 ዓ.ም. የተሾሙት ሜጀር ጄኔራል ደግፌ፣ ከኃላፊነታቸው በድንገት የተነሱበት ዝርዝር ምክንያት ለጊዜው ባይታወቅም፣ ማክሰኞ ሚያዝያ 1 ቀን 2011 ዓ.ም. የደረሳቸው የስንብት ደብዳቤ ግን ‹‹በጡረታ›› የሚል መሆኑ ታውቋል፡፡

ኮሚሽነሩ ለበርካታ ዓመታት በመከላከያ ሠራዊት አባልነት የሠሩ ናቸው፡፡ የአዲስ አበባ ፖሊስ ኮሚሽነር ተደርገው ሲሾሙ፣ የሁለቱ ተቋማት ተግባርና የሥራ አፈጻጸም ሁኔታ ለየቅል በመሆኑ ለጊዜው ግርታን ፈጥሮ እንደነበር ይታወሳል፡፡

ነገር ግን ላለፉት ዘጠኝ ወራት ኮሚሽኑን ሲመሩ ቆይተው፣ ከሚያዝያ 1 ቀን 2011 ዓ.ም. ጀምሮ በጡረታ ከኃላፊነታቸው መነሳታቸው ታውቋል፡፡

ሜጀር ጄኔራል ደግፌ በጡረታ የተሰናበቱት በተቋም ደረጃ ምንም ዓይነት ችግር ገጥሟቸው ሳይሆን፣ በሕመም ምክንያት መሆኑንና ይኼንንም ከመንግሥት ጋር ውይይት አድርገው መተማመን ላይ በመድረሳቸው መሆኑን የሪፖርተር ምንጮች አረጋግጠዋል፡፡