Skip to main content
x

የነዳጅ አቅርቦትና ሥርጭትን የሚቆጣጠር ባለሥልጣን ሊቋቋም ነው

ሕጋዊ ባልሆነ የነዳጅ አቅርቦትና ሥርጭት በሚሳተፉ ላይ ቅጣት ይጥላል

የነዳጅና የነዳጅ ውጤቶች አቅርቦትና ሥርጭትን የሚቆጣጠር ባለሥልጣን ሊቋቋም ነው።

የነዳጅና ነዳጅ ውጤቶች አቅርቦትና ሥርጭት ተቆጣጣሪ ባለሥልጣን የሚል ስያሜ የሚኖረውን ይኼንን ተቋም የሚያቋቋም ረቂቅ አዋጅ ተሰናድቶ፣ ለሕዝብ ተወካዮች ምክር ቤት ማክሰኞ ሚያዚያ 1 ቀን 2011 ዓ.ም. ቀርቧል።

ባለሥልጣኑ ነዳጅና የነዳጅ ውጤቶችን በማጣራት፣ በማቅረብ፣ በማከማቸት፣ በማጓጓዝ፣ በማከፋፈል፣ በመቸርቸርና ሌሎች ተያያዥነት ያላቸውን ተግባራት የመቆጣጠር ሥልጣን እንደሚኖረው ረቂቁ ያመለክታል።

የነዳጅና የነዳጅ ውጤቶች ግብይትም ተገቢ በሆነ የንግድ አሠራር መመራቱንና ምርቱም ለታለመለት አገልግሎት መዋሉን፣ እንዲሁም ለኅብረተሰቡ ተደራሽ ስለመሆኑ የማረጋገጥ ኃላፊነት ይሰጠዋል።

ተቆጣጣሪ ባለሥልጣኑን ለማቋቋም የተፈለገበት ምክንያት የነዳጅ አቅርቦት፣ ሥርጭትና የቁጥጥር ተግባር በተበታተነ ሁኔታ በተለያዩ ተቋማት የሚመራ ከመሆኑ ጋር ተያይዞ ሕገወጥ ተግባራት ሲፈጸሙ፣ በባለቤትነት የእርምት ዕርምጃ የመውሰድ ኃላፊነት ላይ ብዥታ በመኖሩ ነው።

ተቆጣጣሪ ባለሥልጣኑ ከሚኖሩት ኃላፊነቶች መካከል ከነዳጅ ምርት አቅርቦትና ሥርጭት ጋር በተገናኘ ሕጋዊ ባልሆነ ተግባር ውስጥ በተሳተፉ፣ ወይም በፈጸሙ የግብይት ተሳታፊዎች ላይ የቅጣት ዕርምጃ መውሰድ ይገኝበታል።

የቅጣት ዓይነቱ ወደፊት በሚኒስትሮች ምክር ቤት በሚወጣ ደንብ እንደሚወሰን ረቂቅ የማቋቋሚያ አዋጁ ያመለክታል። የነዳጅና የነዳጅ ውጤቶች የችርቻሮ መሸጫ ዋጋ ቢያንስ በወር አንድ ጊዜ ለመከለስ የውሳኔ ሐሳብ አዘጋጅቶ፣ የበላይ ተጠሪ ለሆነው የንግድ ሚኒስቴር በማቅረብ የማስወሰንና ተፈጻሚነቱንም የመከታተል ኃላፊነት ይኖረዋል።

በነዳጅና በነዳጅ ውጤቶች አቅርቦት የሚሳተፉ ተቋማትን የትርፍ ህዳግ፣ እንዲሁም የትራንስፖርት ታሪፍ እንደ ሁኔታው የሚሻሻልበትን ሁኔታ በማጥናት ለንግድ ሚኒስቴር እንደሚያቀርብ፣ ይህም ለሚኒስትሮች ምክር ቤት ቀርቦ ውሳኔ ከተሰጠበት የውሳኔውን ተግባራዊነት ባለሥልጣኑ ይከታተላል።

መንግሥት በየዓመቱ ለነዳጅና የነዳጅ ውጤቶችን ለማስገባት ከፍተኛ የውጭ ምንዛሪ እንደሚያወጣ የሚታወቅ ሲሆን፣ ባለፉት ስምንት ወራት ውስጥም 1.7 ቢሊዮን ዶላር ወጪ መደረጉን የብሔራዊ ባንክ መረጃ ያመለክታል።

ረቂቅ አዋጁን የተመለከተው ፓርላማው ለዝርዝር ዕይታ ለሚመለከተው ቋሚ ኮሚቴ መርቶታል፡፡