Skip to main content
x
በኢትዮጵያ ከግማሽ በላይ ሕፃናት ቅድመ መደበኛ ትምህርትን አለማግኘታቸው ዩኒሴፍ አስታወቀ
ዩኒሴፍ የቅድመ መደበኛ ትምህርት ተሳትፎ ዕድገት በኢትዮጵያ ወጥ ያልሆነና በክልሎች መካከል ከፍተኛ ልዩነት የሚታይበት መሆኑን በምሳሌ አስፍሯል

በኢትዮጵያ ከግማሽ በላይ ሕፃናት ቅድመ መደበኛ ትምህርትን አለማግኘታቸው ዩኒሴፍ አስታወቀ

ዓለም አቀፍ የሕፃናት መርጃ ድርጅት (ዩኒሴፍ) በሚያዝያ መባቻ ይፋ ባደረገው ዓለም አቀፍ የቅድመ መደበኛ ትምህርት ሪፖርት ላይ፣ በኢትዮጵያ ካሉ ለቅድመ መደበኛ ትምህርት ከደረሱ ሕፃናት ከግማሽ በላዩ ዕድሉን አለማግኘታቸውን አስታውቋል፡፡

ዝቅተኛ ገቢ ባላቸው አገሮች ውስጥ በአማካይ ከአምስት ሕፃናት ውስጥ አንዱ ብቻ የቅድመ መደበኛ ትምህርት ዕድል ማግኘቱን ያወሳው ዘገባው በኢትዮጵያ ዕድሉን ያላገኙ ሕፃናት መኖር በዓለም አቀፍ ደረጃ 175 ሚሊዮን የሚሆኑ ሕፃናት የቅድመ መደበኛ ትምህርት ተነፍገው ላሉት የራሱ አስተዋጽኦ አድርጓል ብሏል፡፡

ይሁን እንጂ ኢትዮጵያ የቅድመ መደበኛ ትምህርትን ለማስፋፋት ባላት ቁርጠኝነት የንዑስ ዘርፉ ጠቅላላ ተሳትፎ እ.አ.አ በ2007 ከነበረበት ሁለት በመቶ በ2017 ወደ 45 በመቶ ማደጉን ሳያመላክት አላለፈም፡፡

ዩኒሴፍ በዘገባው እንዳመለከተው፣ እ.ኤ.አ በ2010 በኢትዮጵያ የፀደቀው የልጆች እንክብካቤና ትምህርት ብሔራዊ የፖሊሲ ማዕቀፍ ተከትሎ የተስፋፋው የአንድ ዓመት የቅድመ መደበኛ ትምህርት ለተገኘው ውጤት ከፍተኛውን ሚና ተጫውቷል፡፡ ይሁን እንጂ ይህ የቅድመ መደበኛ ትምህርት ተሳትፎ ዕድገት ወጥ ያልሆነና በክልሎች መካከል ከፍተኛ ልዩነት የሚታይበት መሆኑን በምሳሌ አስፍሯል፡፡

ለዚህም አዲስ አበባ 93 በመቶና ትግራይ 88 በመቶ የቅድመ መደበኛ ትምህርት ተሳትፎ ያላቸው ሲሆን፣ በአንፃሩ በሶማሌ ክልል ውስጥ 4.5 በመቶና በአፋር ክልል 14 በመቶ ልጆች ብቻ ዕድሉን ማግኘታቸውን ጠቅሷል፡፡

ከፍተኛ ቁጥር ያላቸው ሕፃናት ከቅድመ መደበኛ ትምህርት ገበታ ውጪ የሚገኙባቸው አገሮች ለሰው ኃይል አቅም ግንባታ ወሳኝ ዕድል በማጣት ከጅምሩ ለከፋ ኢፍትሐዊነት አደጋ የተጋለጡ ይሆናሉ በማለት ዘገባው አስቀምጧል፡፡

‹‹ቅድመ መደበኛ ትምህርት ለልጆቻችን የመጀመሪያና ሁለተኛ ደረጃ ትምህርት እንዲሁም ከዚያም ባለፈ ለሚኖራቸው ስኬት መሠረት ይጥላል፤›› ያሉት በኢትዮጵያ የዩኒሴፍ ተወካይ ጁሊያን ሜልሶፕ፣ ሆኖም ግን በኢትዮጵያ ውስጥ ያሉ ብዙ ሕፃናት ይህንን ዕድል አለማግኘታቸው ክፍል ለመድገም ወይም ሙሉ ለሙሉ ትምህርት ለማቋረጥ ዕድላቸውን እንዲጨምር በማድረግ የዕድሉ ተጠቃሚ ከሆኑ የዕድሜ እኩዮቻቸው የበታች እንዲሆኑ ያደርጋቸዋል ሲሉም ገልጸዋል፡፡

ዩኒሴፍ ‹‹ለመማር ዝግጁ የሆነ ዓለም ጥራት ላለው የልጆች ትምህርት ቅድሚያ መስጠት›› በሚል መሪ ቃል በቅድመ መደበኛ ትምህርት ላይ ያቀረበው የመጀመሪያው ዓለም አቀፍ ሪፖርት እንደሚያመለክተው፣ ቢያንስ የአንድ ዓመት የቅድመ መደበኛ ትምህርት ያገኙ (የተከታተሉ) ልጆች፣ በትምህርታቸው ስኬታማ ለመሆን የሚያስፈልጋቸውን ወሳኝ ክህሎቶች ለማዳበር የበለጠ ዕድል እንዳላቸው፣ እንዲሁም ክፍል የመድገምና ትምህርት የማቋረጥ ዕድላቸው ያነሰ እንደሚሆን ነው፡፡ በዚህም ምክንያት በጎልማሳነት ዕድሜያቸው ለአገራቸው ሰላምና ብልፅግና አስተዋጽኦ የማድረግ ችሎታቸው የበለጠ ይሆናል፡፡

ዩኒሴፍ ለመጀመሪያ ጊዜ ያዘጋጀው በቅድመ መደበኛ ትምህርት ላይ ያተኮረው ዓለም አቀፍ ሪፖርት፣ አብዛኛዎቹ የዓለም መንግሥታት በንዑስ ዘርፉ ላይ በቂ መዋለ ንዋይ እንደማያፈሱ ያሳያል፡፡