Skip to main content
x
ንግድ ባንክ የኦሮሚያ ባንክ ኃላፊን በምክትል ፕሬዚዳንትነት ሾመ
አቶ ኑሪ ሁሴን

ንግድ ባንክ የኦሮሚያ ባንክ ኃላፊን በምክትል ፕሬዚዳንትነት ሾመ

በወለድ አልባ የባንክ አገልግሎት ፈር ቀዳጅ በመሆን በመስኩ ከተቀሩት ባንኮች ሰፊውን የገበያ ድርሻ የያዘው የኦሮሚያ ኢንተርናሽናል ባንክ ሲሆን፣ ይህንን አገልግሎት በዳይሬክተርነት ሲመሩ የቆዩት አቶ ኑሪ ሁሴን የኢትዮጵያ ንግድ ባንክ ምክትል ፕሬዚዳንት ሆነው ተሰየሙ፡፡

የሪፖርተር ምንጮች እንደገለጹት፣ አቶ ኑሪ ወደ ንግድ ባንክ ያቀኑት የወለድ አልባ ባንክ አገልግሎትን በምክትል ፕሬዚዳንትነት እንዲመሩ ሲሆን፣ ንግድ ባንክ በሰጣቸው ምደባ መሠረት በኃላፊነት ቦታቸው ሥራ እንደጀመሩ ታውቋል፡፡ በወለድ አልባ አገልግሎት ዘርፍ የኦሮሚያ ኢንተርናሽናል ባንክ ለደረሰበት ደረጃ ከፍተኛ ድርሻ እንደነበራቸው የሚነገርላቸው አቶ ኑሪ፣ ንግድ ባንክን እንዲቀላቀሉ የተፈለገው ባንኩ የወለድ አልባ አገልግሎቱን ለማሳደግ የያዘውን ዕቅድ ለማሳካት በማሰብ እንደሆነ ተሰምቷል፡፡ በዘርፉ ከፍተኛ ልምድ ያካበቱትን አቶ ኑሪን ባንኩ ድርድር እንደወሰዳቸውም ለማወቅ ተችሏል፡፡ አቶ ኑሪ በወለድ አልባ አገልግሎት ዙሪያ ስላበረከቷቸው ሥራዎች በግላቸው ከተለያዩ ተቋማት ዕውቅና ሲሰጣቸው ቆይተዋል፡፡ የኦሮሚያ ኢንተርናሽናል ባንክም በዘርፉ ከአፍሪካ ዕውቅና ያገኘ የኢትዮጵያ ብቸኛው ባንክ ነው፡፡

አቶ ኑሪ ከኦሮሚያ ኢንተርናሽናል ባንክ ተሰናብተው ወደ ንግድ ባንክ እንዲገቡ የንግድ ባንክ ከፍተኛ ኃላፊዎች ረጅም ጊዜ የወሰደ ድርድር ሲያደርጉ መቆየታቸው ተሰምቷል፡፡ በቀረበላቸው የተሻለ የኃላፊነት ደረጃና ደመወዝ ጭምር ጥያቄውን መቀበላቸውም ታውቋል፡፡

በአሁኑ ወቅት በወለድ አልባ የባንክ አገልግሎት ትልቁን የገበያ ድርሻ የያዘው ኦሮሚያ ኢንተርናሽናል ባንክ ከወለድ ነፃ የባንክ አገልግሎት የሰበሰበው ተቀማጭ ገንዘብ መጠን አራት ቢሊዮን ብር ደርሷል፡፡ በዚሁ የአገልግሎት ዘርፍ ወደ ሁለት ቢሊዮን ብር አበድሯል፡፡ ከወለድ ነፃ የባንክ አገልግሎት ላይ ኦሮሚያ ኢንተርናሽናል ባንክ ያካሄደው ሰፊ ሥራ በዚህ አገልግሎት ብቻ የሚያገኘው ዓመታዊ ትርፍ ከዓመት ዓመት እየጨመረ መጥቷል፡፡ ከባንኩ መረጃ መረዳት እንደሚቻለውም በ2008 የሒሳብ ዓመት 39 ሚሊዮን ብር፣ በ2009 የሒሳብ ዓመት 132 ሚሊዮን ብርና በ2010 የሒሳብ ዓመት ደግሞ 194 ሚሊዮን ብር ከወለድ ነፃ የባንክ አገልግሎት ትርፍ አግኝቷል፡፡

የኢትዮጵያ ንግድ ባንክ ከወለድ ነፃ የባንክ አገልግሎት ዘርፍን በበላይነት ለመምራት ባንኩን የተቀላቀሉት አቶ ኑሪ፣ በባንክ ኢንዱስትሪ ውስጥ ከ17 ዓመት በላይ የሠሩ ናቸው፡፡

አቶ ኑሪ ለኢትዮጵያ ንግድ ባንክ አዲስ አለመሆናቸውን ለማወቅ ተችሏል፡፡ ሥራ ሲጀምሩ በኢትዮጵያ ንግድ ባንክ ለስድስት ዓመታት የሠሩ መሆኑን ለማወቅ ተችሏል፡፡ ከንግድ ባንክ ከወጡ በኋላ በኦሮሚያ ኢንተርናሽናል ባንክ መጀመርያ በምክትል ዳይሬክተርነት ከዚያም በዳይሬክተርነት የኃላፊነት ደረጃ ላይ እንደሠሩ ለማወቅ ተችሏል፡፡

የኢትዮጵያ ንግድ ባንክ ከዚህ ቀደም ባልተለመደ ሁኔታ ለከፍተኛ የሥራ ኃላፊነት ከግል ባንኮች ባለሙያዎችን እየወሰደ ነው፡፡ በአሁኑ ወቅት ባንኩን በፕሬዚዳንትነት እያገለገሉ ያሉትን አቶ ባጫ ጊና ጨምሮ ሌሎች ከሰባት በላይ የሚሆኑ በከፍተኛ የሥራ ኃላፊነት ላይ የተመደቡ ባለሙያዎች ከአዋሽ ባንክ መሄዳቸው ይታወሳል፡፡

አቶ ባጫ የኦሮሚያ ኅብረት ሥራ ባንክን በምክትል ፕሬዚዳንትነት ሲመሩ እንደነበር ይታወቃል፡፡ በቅርቡም የንግድ ባንክ ፕሬዚዳንት ሆነው መሾማቸው ይታወሳል፡፡