Skip to main content
x
ክቡር ሚኒስትሩ ከደላላው ጋር እያወሩ ነው

ክቡር ሚኒስትሩ ከደላላው ጋር እያወሩ ነው

[ክቡር ሚኒስትሩ ከአንድ ታዋቂ ግለሰብ ጋር ሆቴል ተገኝተው እያወሩ ነው]

  • ሰላም ክቡር ሚኒስትር፡፡
  • እንዴት ነህ?
  • አገሪቱ ወዴት እያመራች ነው ክቡር ሚኒስትር?
  • አገሪቱማ በለውጥ ጎዳና ላይ ናት፡፡
  • በነውጥ ጎዳና ማለትዎ ነው?
  • ምን ይላል ይኼ?
  • ክቡር ሚኒስትር ለምን የሚነገራችሁን አትሰሙም?
  • ምንድነው የተነገረን?
  • ሮድማፕ አዘጋጁ፡፡
  • የምን ሮድማፕ ነው?
  • ለውጡ ሮድማፕ ያስፈልገዋል፡፡
  • ሮድማፕ ምንድነው?
  • ለውጡ የሚጓዝበት አቅጣጫ ጠቋሚ ሮድማፕ ማዘጋጀት ያስፈልጋል፡፡
  • ለምን ያስፈልጋል?
  • የምንሄድበትን እንድናውቀው ነዋ ክቡር ሚኒስትር፡፡
  • የምንሄደውማ ወደ ልማት፣ ዲሞክራሲና ዕድገት ነው፡፡
  • እንዳይሸወዱ ክቡር ሚኒስትር፡፡
  • እንዴት?
  • የተዘጋጀ ሮድማፕ ከሌለ በመሀል ጉዟችን ወደ ሌላ ሊሆን ይችላል፡፡
  • ወደ ሌላ ወዴት?
  • ወደ ዕልቂትና ፍጅት፡፡
  • አንተ ደግሞ ሁሌ ሕዝብ ማሸበር ትወዳለህ፡፡
  • እውነቴን ነው ክቡር ሚኒስትር፡፡
  • እኔ ያልኩት ለምን አልሆነም ማለት ትወዳለህ፡፡
  • እስከ ዛሬም እኔን ብትሰሙኝ እንዲህ ባልሆናችሁ ነበር፡፡
  • እንዴት? እንዴት?
  • ለውጡ እንዴት መሄድ እንዳለበት ነግሬያችሁ ነበር፡፡
  • አንተን ማን ነው መካሪ ያደረገህ?
  • ከእርስዎ ጋር እንዲህ መነጋገር አይገባንም ክቡር ሚኒስትር፡፡
  • እኮ ለምን?
  • በአሁኑ ወቅት ሁሉም ኢትዮጵያዊ ስለአገሪቱ ዕጣ ፈንታ የመወሰን አቅም አለው፡፡
  • እሱስ ልክ ነው፡፡
  • እኔ ደግሞ ምን ያህል ተፅዕኖ ፈጣሪ እንደሆንኩ ያውቃሉ፡፡
  • ምን ይደረግ እያልክ ነው?
  • አሁንም የምንነግራችሁን ካልሰማችሁ አገሪቱ ወደባሰ ነገር መሄዷ አይቀርም፡፡
  • እንዴት?
  • ክቡር ሚኒስትር በየቦታው መፈናቀሉ እኮ በጣም እየጨመረ ነው፡፡
  • ምን ይደረግ?
  • ሁሉንም አካላት በጠረጴዛ ዙሪያ አስቀምጣችሁ አወያዩ፡፡
  • አሁን ከእኔ ጋርም መወያየት አለባችሁ ለማለት ነው?
  • መልሱን መቼም እርስዎም ያውቁታል፡፡
  • ወይ ጣጣ፡፡
  • የአገሪቱ ኢኮኖሚም ከድጡ ወደ ማጡ እያዘገመ ስለሆነ በአፋጣኝ ይታሰብበት፡፡
  • እ…
  • ለማንኛውም እኔ በግሌ ያሰብኩት ፕሮጀክት አለ፡፡
  • የምን ፕሮጀክት?
  • ለአገሪቱ በጣም ጠቃሚ ፕሮጀክት ነው፡፡
  • እሺ፡፡
  • ስለዚህ በአፋጣኝ እንዲሰጠኝ እፈልጋለሁ፡፡
  • ምን?
  • የውጭ ምንዛሪ፡፡
  • ስማ አገሪቱ ያላት የውጭ ምንዛሪ ለመድኃኒትና ለነዳጅ ነው ሲባል አልሰማህም?
  • ቢሆንም እኔ ለፕሮጀክቴ የውጭ ምንዛሪ እፈልጋለሁ፡፡
  • ምን ልትገዛ?
  • ላሰብኩት ፕሮጀክት ስልሳ አዝዣለሁ፡፡
  • ስልሳ ምን?
  • 8!

[ክቡር ሚኒስትሩ ከአንድ ጋዜጠኛ ጋር ተገናኝተው እያወሩ ነው]

  • ምነው ክቡር ሚኒስትር?
  • ምን ሆንክ?
  • ስንት ተስፋ አድርገንባችሁ፡፡
  • እኮ ምን ሆንክ?
  • ክቡር ሚኒስትር የእውነቴን ልንገርዎት፡፡
  • ንገረኝ፡፡
  • በለውጡ ትልቅ ተስፋ አድርጌ ነበር፡፡
  • አሁንም ተስፋ አትቁረጥ፡፡
  • አይ ክቡር ሚኒስትር በዚህ ከቀጠልንማ ትኬት መቁረጤ አይቀርም፡፡
  • የምን ትኬት?
  • አገር ለመክዳት ነዋ፡፡
  • ምን ሆንክ ደግሞ አንተ?
  • ዓይናችን እያየ እኮ አገሪቱ እንደ አውሮፕላናችን ልትከሰከስ ነው፡፡
  • የለውጡ አደናቃፊ ነህ ልበል?
  • ኧረ የለውጡ ደጋፊ ነበርኩ፡፡
  • ታዲያ አርፈህ ድጋፍህን ቀጥላ፡፡
  • ክቡር ሚኒስትር እያስፈራችሁኝ ነው፡፡
  • ለውጥ እኮ ዝም ብሎ አይመጣም፡፡
  • ውኃ ሲወስድ እያሳሳቀ ነው አሉ፡፡
  • ምን እያልክ ነው?
  • ዝም ብላችሁ በቃላት እየሸነገላችሁን አገሪቱ ወዳልሆነ አቅጣጫ እያመራች ነው፡፡
  • ስማ ታፍኖ የነበረ ሕዝብ ነፃ ሲወጣ ከዚህም የባሰ ሊታይ ይችላል፡፡
  • ማን ነው ነፃ የወጣው?
  • ሁሉም ሕዝብ ነዋ፡፡
  • እ…
  • እናንተ ራሳችሁ እንደ ልባችሁ መናገር የጀመራችሁት አሁን አይደል እንዴ?
  • የመናገር መብታችን እኮ በአጭሩ ሊቀጭ ነው፡፡
  • ማን ነው የሚቀጨው?
  • እናንተው ናችኋ፡፡
  • እንዴት አድርገን?
  • ይኸው የጥላቻ ንግግር ሕግ እያወጣችሁ አይደል እንዴ?
  • የጥላቻ ንግግር ይፈቀድ እያልክ ነው?
  • እሱማ እንዲቆም እኔም እታገላለሁ፡፡
  • ታዲያ ምን እያልክ ነው?
  • ፈርዶብኝ በማር ውስጥ የተደበቀን መርዝ የመለየት ችሎታ አለኝ፡፡
  • አልገባኝም?
  • በዚህ ሕግ በኃላፊነት የሚሠሩ ሚዲያዎችም እንደሚታፈኑ አውቃለሁ፡፡
  • እ…
  • በፀረ ሽብር ሕጉ እኮ የተደረገው እንደዚያው ነው፡፡
  • እሱ እኮ ሊሻሻል ነው፡፡
  • ይሻሻላል ስትሉን እኮ በጥሩ መስሎን ነበር፡፡
  • በጥሩ ነው የሚሻሻለው፡፡
  • ክቡር ሚኒስትር ያሻሻላችሁት ይኼኛው እኮ ይብሳል፡፡
  • እ…
  • ለማንኛውም የተባላችሁትን ልንገራችሁ፡፡
  • ምን ተባልን?
  • ትሻልን ፈተን…
  • እ…
  • ትብስን አገባን!

[ለክቡር ሚኒስትሩ አንድ ተመራማሪ ስልክ ይደውልላቸዋል]

  • በጣም አዝኛለሁ ክቡር ሚኒስትር፡፡
  • ለምን አዘንክ?
  • አገሪቱን እያሰብኩ ነዋ፡፡
  • ሁሉም ነገር መልክ መልኩን ይይዛል፡፡
  • ተው እንጂ ክቡር ሚኒስትር፡፡
  • ምነው?
  • ከዚህ በላይ አገሪቱ ምን እስክትሆን ነው የምትጠብቁት?
  • የተላለፈችልን አገር ምን ዓይነት እንደነበረች አትርሳ፡፡
  • እንዴት ክቡር ሚኒስትር?
  • ላለፉት 27 ዓመታት ሕዝብ ከሕዝብ ጋር እንዲተላለቅ ሲሠራ ነበር እኮ፡፡
  • እሱንማ አውቃለሁ፡፡
  • ታዲያ የ27 ዓመት ወጣት እንዴት ከአንድ ዓመት ጨቅላ ጋር ይወዳደራል?
  • ሁሉም ነገር ይገባኛል፡፡
  • ስለዚህ የአገሪቱ ችግር እንዲህ በቀላሉ አይፈታም፡፡
  • ክቡር ሚኒስትር አሁን ችግሩ ከዕለት ወደ ዕለት እየባሰበት እኮ ነው፡፡
  • የሴራ ፖለቲካውን እያወቅከው?
  • ቢሆንም በኋላ የታሪክ ተጠያቂዎች እንዳትሆኑ መጠንቀቅ አለባችሁ፡፡
  • ምን ማድረግ እንችላለን?
  • የአገሪቱ ኢኮኖሚ እኮ በአፍጢሙ እየተደፋ ነው፡፡
  • አገሪቱ እንዲህ እየታመሰች ኢኮኖሚው እንዴት ይረጋጋ?
  • በነገራችን ላይ ክቡር ሚኒስትር፣ ኢኮኖሚው መፍትሔ ቢያገኝ አገሪቱ ትረጋጋ ነበር፡፡
  • እንዴት?
  • ባለፈውም ነግሬዎት ነበር፡፡
  • ምንድነው የነገርከኝ?
  • ለወጣቱ የሥራ ዕድል ቢፈጠርለት በየቦታው ብጥብጥ ሊኖር አይችልም፡፡
  • እ…
  • ወጣቱ ወደ ጎዳና የሚወጣው የሚሠራው ስለሌለው ነው፡፡
  • እሱማ እናውቃለን፡፡
  • ስለዚህ ለወጣቱ ሥራ ፍጠሩለት፡፡
  • ሥራ ከተፈጠረለት ማን ይሠለፋል?
  • እ…
  • ማለቴ ለውጥ መኖሩ የሚታወቀው ሰው እንደ ልቡ መሠለፍ ሲችል ነው፡፡
  • አሁን ገባኝ፡፡
  • ምኑ?
  • እናንተ መፍጠር የምትፈልጉት ሥራ አይደለም፡፡
  • ታዲያ ምንድነው?
  • ሥራ አጥ!

[ክቡር ሚኒስትሩ ከደላላው ጋር እያወሩ ነው]

  • ሥራ እንዴት ነው?
  • ሁሉም ነገር ተቀዘቅዟል ክቡር ሚኒስትር፡፡
  • አንተ ሁሌ መለኛ አይደለህ እዴ?
  • አዎን ግን አሁን ትንሽ ከበድ ብሏል፡፡
  • እና ሥራ የለም እያልክ ነው?
  • እሱማ አንድ ሐሳብ መጥቶልኝ ነበር፡፡
  • ምን ዓይነት ሐሳብ?
  • ያው ከለውጡ በኋላ የሥራ አጡ ቁጥር ጨምሯል ክቡር ሚኒስትር፡፡
  • እሱማ ይታወቃል፡፡
  • በለውጡ ደግሞ ሕዝቡ እንደፈለገ ወደ ጎዳና ወጥቶ መሠለፍ ችሏል፡፡
  • ሥራ ከሌለ ቢሠለፍ ምን ያደርጋል?
  • አሁን ባሰብኩት ሐሳብ ለወጣቱም ሥራ ልንፈጥርለት እንችላለን፡፡
  • እንዴት?
  • በለውጡ ሁሉም ሰው መሠለፍ ይፈልጋል፡፡
  • እ…
  • ስለዚህ አጀንዳ ኖሯቸው ሠልፍ ለሚጠሩ ሠልፈኞችን ማቅረብ እንችላለን፡፡
  • እንዴት? እንዴት?
  • አዩ ክቡር ሚኒስትር እኛ ጎዳና የሚወጡ ሠልፈኞችን በማዘጋጀት አጀንዳ ኖሯቸው ሠልፍ ለሚጠሩ እናቀርባለን ማለት ነው፡፡
  • አንተ እኮ አባ መላ ነህ፡፡
  • ሠልፈኞችን ሲፈለግ በፆታ፣ ሲያስፈልግ በዕድሜ፣ ከዚያም በብሔርና በሃይማኖት እየከፋፈልን እናቀርባለን፡፡
  • ይኼማ ወሳኝ ሥራ ነው፡፡
  • ስለዚህ በአስቸኳይ ቢልቦርድ ላሠራ፡፡
  • ምን የሚል?
  • ሠልፈኞችን ከአሠላፊዎች ጋር እናገናኛለን!