Skip to main content
x

የኢትዮጵያ የዓይነ ሥውራን ማኅበር የአፍሪካ ፎረምን ሊያዘጋጅ ነው

በአራት ዓመት አንድ ጊዜ የሚካሄደው የአፍሪካ የዓይነ ሥውራን ፎረም በአዲስ አበባ ሊካሄድ እንደሆነ ተገለጸ፡፡ ፎረሙ የሚካሄደው ለሰባተኛ ጊዜ ሲሆን፣ ኢትዮጵያ ስታዘጋጅ ደግሞ የመጀመሪያዋ ነው፡፡

የኢትዮጵያ ዓይነ ሥውራን ብሔራዊ ማኅበር መጋቢት 27 ቀን 2011 ዓ.ም. በሰጠው መግለጫ፣ የአፍሪካ የዓይነ ሥውራን ፎረም ከመስከረም 26 እስከ 30 ቀን 2012 ዓ.ም. በአዲስ አበባ ይካሄዳል፡፡

ፎረሙ በተሳታፊዎች ብዛትና ለዓይነ ሥውራን በሚሰጠው ጠቀሜታ ከጊዜ ወደ ጊዜ እያደገ በመምጣቱ፣ በ75 ተሳታፊዎች የተጀመረው ፎረም አድጎ አዲስ አበባ ላይ በሚካሄደው ከ400 እስከ 500 ተሳታፊዎች እንደሚገኙበት ተነግሯል፡፡

ፎረሙ የዕውቀትና የመረጃ ምንጭ ሆኖ ከማገልገሉም ባሻገር በዓይነ ሥውራን ላይ የሚሠሩ ድርጅቶች ከፍተኛ ሽግግር እንዲያደርጉ፣ ነባር የአገልግሎት ሞዴሎች እንዲሻሻሉ፣ አዳዲስ የአገልግሎት አሰጣጦች እንዲተዋወቁና አማራጮች እንዲሰፉ አድርጓል፡፡

 የኢትዮጵያና የአፍሪካ ኅብረት ባለሥልጣናት በሚገኙበት ፎረም ጥናታዊ ጽሑፎችና የምርምር ውጤቶች ይቀርባሉ ተብሎ ይጠበቃል፡፡ ለዓይነ ሥውራን ጠቃሚ ስለሆኑ ቴክኖሎጂዎችና በፈጠራ የባለሙያዎች ማብራሪያዎችም ይኖራሉ፡፡ ለዓይነ ሥውራን ጠቃሚ የሆኑ ምርቶችና ቴክኖሎጂዎች ከሁሉም የዓለም ክፍል ተሰባስበው በአንድ ቦታ የሚታዩበት “የቴክሼር” ዓውደ ርዕይ እንደሚኖርም ተገልጿል፡፡

የኢትዮጵያ ዓይነ ሥውራን ብሔራዊ ማኅበር፣ ዓላማውን በዓይነ ሥውርነትና በዓይነ ሥውራን ላይ አድርጎ በ1952 ዓ.ም. በ29 ዓይነ ሥውራን አባላትና በአንዲት ተባባሪ አባል የተመሠረተ ማኅበር ነው፡፡

በሚቀጥለው ዓመት 60ኛ ዓመቱን የሚያከብረው ማኅበሩ፣ ተልዕኮና ራዕዩን ዕውን ለማድረግ እየተንቀሳቀሰ መሆኑንና በአሁኑ ወቅት ከ16‚000 ሺሕ በላይ አባላትን አቅፎ፤ በተለያየ ምክንያት የማኅበሩ አባል ላልሆኑትም ዓይነ ሥውራን ቀጥተኛና ቀጥተኛ ያልሆኑ አገልግሎቶችን እየሰጠ የሚገኝ መሆኑን የማኅበሩ ፕሬዚዳንት አቶ ወሰን ዓለሙ ገልጸዋል፡፡

በሰው ኃይልና በቁሳቁስ በሚፈለገው ደረጃ ባይጠናከርም ማኅበሩ በአምስት የተለያዩ ክልሎች ውስጥ በ31 ቅርንጫፎች ጽሕፈት ቤቶች ከፍቶ በየቦታው ላሉ አባላት ተደራሽ አገልግሎት ለመስጠት እየጣረ ይገኛል፡፡

ማኅበሩ ዓይነ ሥውራን ሕፃናት ሙሉ ወጪያቸው ተሸፍኖ ትምህርት ማግኘት እንዲችሉ ትምህርት ቤት ከፍቶ በማስተማር ላይ ሲሆን፣ የተለያዩ መጻሕፍትንና ሰነዶችን በብሬል ጽሑፍና በድምፅ በማዘጋጀት ዓይነ ሥውራን በቀላሉ መረጃን እንዲያገኙም አድርጓል፡፡

አቶ ዓለሙ እንደሚሉት፣ ማኅበሩ ዓይነ ሥውራን የሚገለገሉባቸውን የተለያዩ ቁሳቁሶች በአገር ውስጥ እንዲመረቱና ከውጭ አገሮችም እንዲገቡ በማድረግ የተለያዩ ሥራዎችን እያከናወነ ሲሆን፣ መንግሥትና  ሌሎችም ባለድርሻ አካላት በዕቅዶቻቸው ውስጥ የዓይነ ሥውራን ዜጎችን ያማከለ ጉዳይ አካተው እንዲሠሩ አስተዋጽኦ አድርጓል፡፡

በተመስገን ተጋፋው