Skip to main content
x

የሞተር ዘይትና ቅባት እጥረት አሽከርካሪዎችን እያማረረ ነው

በአገሪቱ የተከሰተው የሞተር ዘይትና ቅባት እጥረት እንዳማረራቸው አሽከርካሪዎች ገለጹ፡፡

የሞተር ዘይትና ቅባት ከገበያ በመጥፋቱ ለከፍተኛ ችግር መጋለጣቸውን አሽከርካሪዎች ለሪፖርተር ተናግረዋል፡፡ አንዳንድ የነዳጅ ማደያዎች ዝቅተኛ የጥራት ደረጃ ያለው የሞተር ዘይት እንደሚሸጡ የተናገሩት አሽከርካሪዎች፣ በጥቁር ገበያ በከፍተኛ ዋጋ እየተሸጠ እንደሆነ ጠቁመዋል፡፡

ሪፖርተር ያነጋገራቸው የውጭና አገር በቀል የነዳጅ ኩባንያ ኃላፊዎች፣ በውጭ ምንዛሪ እጥረት ምክንያት የሞተር ዘይትና ቅባት ለማስገባት እንደተቸገሩ ተናግረዋል፡፡ የቶታል ኢትዮጵያ ከፍተኛ የሥራ ኃላፊ ለሪፖርተር እንደተናገሩት፣ ኩባንያቸው የሞተር ዘይትና ቅባቶች ከውጭ ለማስገባት ከአገር ውስጥ ባንኮች የውጭ ምንዛሪ ለማግኘት ተቸግሯል፡፡

ባንኮች ለሞተር ዘይትና ቅባት ግዥ የውጭ ምንዛሪ እያቀረቡ ባለመሆናቸው የነዳጅ ኩባንያዎች ምርቶቹን ለማስገባት እንዳልቻሉ የገለጹት ኃላፊው፣ በገበያው ውስጥ ከፍተኛ እጥረት ሊከሰት እንደቻለ አስረድተዋል፡፡

የቶታል ዘይትና ቅባት ኢትዮጵያ ውስጥ ከ1950ዎቹ ጀምሮ ጥቅም ላይ የዋለ ሲሆን፣ ኩባንያው 173 ማደያዎች እንዳሉት ታውቋል፡፡

የጎመጁ ኦይል ኢትዮጵያ ማኔጂንግ ዳይሬክተር አቶ ቴዎድሮስ የሺዋስ፣ ከነሐሴ 2010 ዓ.ም. ጀምሮ የነዳጅ ኩባንያዎች ለሞተር ዘይትና ቅባት ግዥ የሚውል የውጭ ምንዛሪ ማግኘት ባለመቻላቸው በገበያ ውስጥ ከፍተኛ እጥረት ሊከሰት እንደቻለ ተናግረዋል፡፡ ጎመጁ ኦይል ኢትዮጵያ በነዳጅ ኢንዱስትሪ ታዋቂ ከሆነው ፔትሮናስ ሉብሪካንትስ ጋር ውል ተፈራርሞ የፔትሮናስ ዘይትና ቅባቶች በማከፋፈል ላይ እንደሚገኝ የገለጹት አቶ ቴዎድሮስ፣ የፔትሮናስ ዘይትና ቅባቶች ከፍተኛ የጥራት ደረጃ ያላቸው በመሆናቸው በቀላሉ ገበያ ውስጥ መግባት እንደቻሉ ተናግረዋል፡፡

ይሁን እንጂ ባለፉት ወራት ባንኮች የኢትዮጵያ ንግድ ባንክን ጨምሮ ለሞተር ዘይትና ቅባት ግዥ የውጭ ምንዛሪ ማቅረብ ባለመቻላቸው፣ ኩባንያቸው ምርቶቹን በበቂ ሁኔታ ማስገባት እንዳልቻለ ተናግረዋል፡፡ የሞተር ዘይትና ቅባት ከባለ ሁለት እግር ተሽከርካሪ ጀምሮ ፋብሪካዎች የሚጠቀሙበት ምርት በመሆኑ፣ መንግሥት አስቸኳይ መፍትሔ ካልሰጠ በኢኮኖሚው ላይ ትልቅ ችግር ሊፈጥር እንደሚችል ገልጸዋል፡፡

ቀላል ተሽከርካሪዎች ብቻ ሳይሆኑ የሕዝብና የጭነት ማመላለሻ ተሽከርካሪዎች፣ የግንባታ ማሽነሪዎችና ለአገር ከፍተኛ ጠቀሜታ ያላቸው የሲሚንቶና የስኳር ፋብሪካዎች ጭምር በዘይትና ቅባት ዕጦት ሥራቸው ስለሚስተጓጎል በኢኮኖሚ ላይ ተፅዕኖ ሊፈጥር እንደሚችል የነዳጅ ኩባንያ ኃላፊዎች ተናግረዋል፡፡

እጥረቱ በዚህ ከቀጠለ በአምራች ኢንዱስትሪ፣ በግንባታ ዘርፍ፣ በትራንስፖርትና በወጪና ገቢ ንግድ ላይ ተፅዕኖ ሊፈጥር የሚችል በመሆኑ መንግሥት በልዩ ሁኔታ የመፍትሔ አቅጣጫ ሊያስቀምጥ ይገባል ብለዋል፡፡

የነዳጅ ኩባንያዎች ከነዳጅ ሽያጭ የሚያገኙት የትርፍ ህዳግ አነስተኛ በመሆኑ ሲደጉሙ የቆዩት ከሞተር ዘይትና ቅባት በሚያገኙት ትርፍ በመሆኑ፣ ዘይትና ቅባት ማስገባት ካልቻሉ ከገበያ ሊወጡ እንደሚችሉ ያላቸውን ሥጋት ገልጸዋል፡፡

ጎመጁ ኦይል ኢትዮጵያ ከፔትሮናስ ኩባንያ ጋር በመተባበር አዲስ አበባ ውስጥ የሞተር ዘይትና ቅባት ማደባለቂያ ፋብሪካ ለመገንባት ፕሮጀክት ቀርፆ ወደ ግንባታ ለመግባት በዝግጅት ላይ እንደሆነ አቶ ቴዎድሮስ አስረድተዋል፡፡

ከሦስት ዓመት በፊት የተመሠረተው ጎመጁ ኦይል ኢትዮጵያ 45 ማደያዎች በአዲስ አበባና በክልሎች በመክፈት፣ ከ1,000 በላይ ዜጎች የሥራ ዕድል እንደፈጠረ ጠቁመዋል፡፡