Skip to main content
x
ምርት ገበያ በመጋቢት ወር የ3.6 ቢሊዮን ብር ግብይት አስተናገደ
በምርት ገበያው የ25 በመቶ የገበያ ድርሻ የያዘው አኩሪ አተር ከፍተኛ የግብይት ዕድገት እየታየበት ነው

ምርት ገበያ በመጋቢት ወር የ3.6 ቢሊዮን ብር ግብይት አስተናገደ

በቅርቡ የተቀላቀለው የአኩሪ አተር ድርሻ በ25 በመቶ ማደጉ ተገልጿል

በቅርቡ ወደ ማዕከላዊው የግብይት ሥርዓት የገባው አኩሪ አተር የግብይት መጠኑ ከዕለት ዕለት እየጨመረ መምጣቱንና በመጋቢት ወር የተካሄደው ግብይትም ካለፈው ወር ጋር ሲነጻጸር በመጠን የ46 በመቶ፣ በዋጋ የ47 በመቶ ጭማሪ እንደታየበት የኢትዮጵያ ምርት ገበያ አስታውቋል፡፡

ምርት ገበያው የመጋቢት የ2011 ዓ.ም. የግብይት ክንውኑን የሚያሳይ መረጃ ይፋ አድርጓል፡፡ ከመረጃው እንደታየው ከሆነ፣ ወደ ምርት ገበያው እየገባ የሚገኘው የአኩሪ አተር መጠን በየጊዜው የመጠንም የዋጋም ጭማሪ የሚታይበትን ግብይት እያስተናገደ ነው፡፡ ለግብይት የዋለው የገንዘብ መጠንም እየጨመረ መጥቷል፡፡

በመጋቢት ወር ብቻ 21 ሺሕ ቶን አኩሪ አተር ለግብይት ቀርቦ በ282 ሚሊዮን ብር እንደተገበያየ የሚጠቅሰው ይኸው መረጃ፣ አማካይ የግብይት ዋጋውም ከየካቲት ወር ጋር ሲነጻጸር በ0.23 በመቶ ጨምሯል፡፡ ምርት ገበያው ከሚገበያያቸው አጠቃላይ ምርቶች ውስጥ በመጋቢት ወር አኩሪ አተር ያስመዘገበው ውጤት ከመጠን አኳያ የ25 በመቶ ድርሻ እንዲይዝ አስችሎታል፡፡

በመጋቢት ወር በነበሩት 21 የግብይት ቀናት ውስጥ 30,216 ቶን ቡና፣ 26,390 ቶን ሰሊጥ፣ 21,395 ቶን አኩሪ አተር፣ 6,245 ቶን ነጭ ቦሎቄና 25 ቶን አረንግዴ ማሾ በጠቅላላው በ3.6 ቢሊዮን ብር ተገበያይቷል፡፡ ቡና የግብይት መጠኑን 36 በመቶ በዋጋም 54 በመቶ ድርሻ በመያዝ ቀዳሚ ሲሆን፣ ከየካቲት ወር 2011 ዓ.ም. ጋር ሲነጻጸርም በመጠን የ0.21 በመቶ ጭማሪ እንዳሳየ ምርት ገበያው አስታውቋል፡፡

በተጨማሪም 18,785 ቶን ያልታጠበ ለውጭ ገበያ የሚቀርብ ቡና በ1.13 ቢሊዮን ብር ተገበያይቷል፡፡ የጊምቢ ቡና በመጠን የግብይቱን 18.53 በመቶ ሲመራ የኢሉአባቦራና ቄለም ቡና በመጠን 16 በመቶ በመያዝ ይከተላሉ፡፡ 1,359 ቶን የታጠበ ለውጭ ገበያ የሚቀርብ ቡና በ79.7 ሚሊዮን ብር ሲገበያይ የታጠበ የሲዳማ ቡና የግብይቱን በመጠን 36.26 በመቶ በመያዝ ቀዳሚ ነው፡፡ የጉጂና የይርጋጨፌ ቡና በ20.84 እና 18.84 በመቶ በመያዝ ተከታይ መሆናቸውም ይኸው የምርት ገበያው ወርሃዊ መረጃ ያመለክታል፡፡

እንዲሁም 5,518 ቶን ልዩ ቡና በ447 ሚሊዮን ብር ተገበያይቷል፡፡ 1,139 ቶን ያልታጠበ ልዩ ቡና በ128.2 ሚሊዮን ብር ሲገበያይ፣ 4,379 ቶን የታጠበ ልዩ ቡና ደግሞ በ318.8 ሚሊዮን ብር ግብይቱ ተፈጽሟል፡፡

በዚህ ወር 26,390 ቶን ሰሊጥ በ1.3 ቢሊዮን ብር ሲገበያይ፣ ሁመራ/ጎንደር ሰሊጥ የግብይት መጠኑን 70.63 በመቶ እንዲሁም የግብይት ዋጋውን 72.82 በመቶ በመሸፈን ቀዳሚ ነው፡፡ ካለፈው ዓመት ተመሳሳይ ወቅት ጋር ሲነጻጸርም የሰሊጥ የግብይት ዋጋ የ12.04 በመቶ ጭማሪ ሲያሳይ አማካይ የገበያ ዋጋውም በ25.42 በመቶ ከፍ ብሏል፡፡

በሌላ በኩል 6,245 ነጭ ቦሎቄ በ111 ሚሊዮን ብር ሲገበያይ፣ ካለፈው ዓመት ተመሳሳይ ወቅት ጋር ሲነጻጸር በ49.58 በመቶ በመጠንና በ74.46 በመቶ በዋጋ ጭማሪ አሳይቷል፡፡ 25 ቶን አረንጓዴ ማሾ በ562 ሺሕ ብር ግብይቱ ሲፈጸም አማካይ የገበያ ዋጋውም በኩንታል 2,250 ብር ነበር፡፡

ይህ በእንዲህ እንዳለ በየሩብ ዓመቱ በሚያካሂው የኢትዮጵያ ምርት ገበያ የአባላት ወንበር የሽያጭ ሒደት ከሰሞኑን ተከናውኗል፡፡ ለሽያጭ በወጣው ጨረታ መሠረት አንድ የአባልነት ወንበር እስከ 3.5 ሚሊዮን ብር አውጥቷል፡፡ አባላት ወንበራቸው እንዲሸጥላቸው የሚያቀርቡትን ጥያቄ መሠረት በማድረግ ሦስት የአባልነት ወንበሮችን ለመሸጥ በተካሄደ ጨረታ ወንበሮቹ በተጠቀሰው ዋጋ መሠረት ተሸጠዋል፡፡ ለሰባተኛ ጊዜ በዋና መሥሪያ ቤቱ የሽያጭ መድረክ በተካሄደው ጨረታ እስከ 3.5 ሚሊዮን ብር ድረስ ላቀረቡ ተጫራቾች የአባልነት ወንበሮች ተላልፈዋል፡፡

የኢትዮጵያ ምርት ገበያ የአባልነት ወንበሮቻቸው እንዲሸጡላቸው ለሚጠይቁ አባላት በየሩብ ዓመቱ ጨረታ በማውጣት የሚሸጥ ሲሆን፣ የሰሞኑ ሽያጭም በዚህ መነሻነት እንደተከናወነ ተገልጿል፡፡

በጨረታውም ሦስት ተሳታፊዎች ቀርበው የምርት ገበያውን የአባልነት ወንበር ለመግዛት ዋጋ ሰጥተዋል፡፡ ለጨረታው የቀረበው ከፍተኛ ዋጋ 3.5 ሚሊዮን ብር ሲሆን፣ ዝቅተኛው 3.2 ሚሊዮን ብር እንደነበርም መረጃው አመልክቷል፡፡