Skip to main content
x
የረዥም ርቀት ንግሥቷ በማራቶንም ብቃቷን ማሳየት ጀመረች

የረዥም ርቀት ንግሥቷ በማራቶንም ብቃቷን ማሳየት ጀመረች

ለዓመታት የረዥም ርቀት ንግሥነቷን አስጠብቃ የቆየችው ጥሩነሽ ዲባባ በዓለም አቀፍ የሩጫ ውድድር ገድሏ መዘከር የጀመረው ከ18 ዓመት ዕድሜዋ ጀምሮ ነው፡፡ በብዙ ዓለም አቀፍ መድረኮች ወድቃ በመነሳትና ከሕመም ጋር በመታገል ከኋላ ተነስታ ያሸነፈችባቸው የዓለም ሻምፒዮናና ኦሊምፒኮች ምስክሮች ናቸው፡፡

በለጋነቷ ያጀመረችው የታላቅነት ውጤት ጉዞዋ የትራክ ንግሥናዋ በለንደኑ የዓለም አትሌቲክስ ሻምፒዮና አብቅቶ ወደ ጎዳና ሩጫ የውጤት ግስጋሴ ጀምሯል፡፡ በርካቶች ‹‹የመካከለኛና የረዥም ርቀት ንግሥት›› በማለት የሚጠሯት ጥሩነሽ፣ ከሰሞኑ ብቃቷን ያሳየችበት፣ የማሸነፉ ወኔዋ ገና እንደጋለ፣ ጉልበቷ እንዳልነጠፈ ያስመሰከረችበትን የቺካጎ ማራቶን ድሏን አብስራለች፡፡

የትራክ ውድድርን ለተተኪዎቿ እንዳስረከበች በለንደኑ የዓለም ሻምፒዮና ያስታወቀችው አትሌቷ፣ ከረዥም ጊዜ የወሊድ ዕረፍት በኋላ በትራኩ የታዩት ተዓምረኛ እግሮቿ ለጎዳና ሩጫውም የማይበገሩ መሆኑን አስመስክራለች፡፡

በዓለም አቀፍ አትሌቲክስ ፌዴሬሽኖች ማኅበር (አይኤኤኤፍ) በወርቅ ደረጃ ከሚታወቁ ማራቶኖች አንዱ የሆነው ቺካጎ ባለፈው እሑድ መስከረም 28 ቀን 2010 ዓ.ም. ተከናውኗል፡፡ አራት አሠርታትን በዘለቀው ቺካጎ ማራቶን የተወዳደረችው ጥሩነሽ፣ ርቀቱን አንደኛ ሆና ለማጠናቀቅ 2 ሰዓት 18 ደቂቃ 31 ሰከንድ ፈጅቶባታል፡፡ በወንዶች መካከል በተደረገው ተመሳሳይ የሩጫ ውድድር ኢትዮጵያዊው ሲሳይ ለማ ርቀቱን 2 ሰዓት 11 ደቂቃ 46 ሰከንድ አጠናቆ አራተኛ በመሆን ውድድሩን አጠናቋል፡፡ አሜሪካዊው ጋለን ራፕ 2 ሰዓት 09 ደቂቃ 20 ሰከንድ፣ በአንደኝነት ሲያጠናቅቅ ኬንያውያኑ አቤል ኪሩይ እና በርናንድ ሊፕዮጎ ሁለተኛ ሦስተኛ በመሆን ተከታትለው ገብተዋል፡፡  

በሴቶች ኬንያዊቷ ብሪግድ ኮስጌይ 2 ሰዓት፣ 20 ደቂቃ 22 ሰከንድ እና አሜሪካዊቷ ጆርዳን ሐሳይ 2 ሰዓት፣ 20 ደቂቃ 57 ሰከንድ በማጠናቀቅ ሁለተኛና ሦስተኛ በመሆን ማጠናቀቃቸው ተገልጿል፡፡

በተመሳሳይ በኔዘርላንድ ኢንድሆቨን በተከናወነው ማራቶን በኬንያውያኑ የበላይነት ተጠናቋል፡፡ በዚሁ መሠረት ፌስቱስ ታለን 2 ሰዓት 06 ደቂቃ 13 ሰከንድ፣ ፍሊክስ ኪርሞ 2 ሰዓት፣ 06 ደቂቃ 13 ሰከንድ እና ማሪያስ ኪፕሰረም 2 ሰዓት 06 ደቂቃ 43 ሰከንድ ያስመዘገቡት ሰዓት ሲሆን፣ ኢትዮጵያዊው ደጀኔ ደበላ 2 ሰዓት፣ 07 ደቂቃ10 ሰከንድ በሆነ ጊዜ አጠናቆ አራተኛ ወጥቷል፡፡

በሴቶች በተደረገው ተመሳሳይ ውድድር ኬንያውያቱ ኢዩኒስ ጀፕቶ 2 ሰዓት 26 ደቂቃ13 ሰከንድ እና ዋንጅንጉ ንዱንጋ 2 ሰዓት 36 ደቂቃ 38 ሰከንድ አንደኛና ሁለተኛ ወጥተው ሲያጠናቅቁ፣ ቤልጀማዊቷ ሐና ቫንደንቡቼ 2 ሰዓት 37 ደቂቃ 30 ሰከንድ ሦስተኛ መውጣቷ ታውቋል፡፡ በዚሁ ዕለት በብክሮሽያና በፈረንሳይ በተከናወኑ የማራቶን ውድድሮች በአብዛኛው በኬንያውያንና ኢትዮጵያውያን የበላይነት መጠናቀቃቸው ዘገባው አመልክቷል፡፡