Skip to main content
x
ከ107.9 ሚሊዮን ብር በላይ የውጭ ምንዛሪ አሳጥተዋል የተባሉ ቡና ነጋዴዎች ተከሰሱ

ከ107.9 ሚሊዮን ብር በላይ የውጭ ምንዛሪ አሳጥተዋል የተባሉ ቡና ነጋዴዎች ተከሰሱ

ግንዛቤውና ዕውቀቱ የሌላቸውን ሰዎች ስም በመጠቀምና በሐሰተኛ ሰነድ የቡና ላኪነትን ንግድ ፈቃድ በማውጣት ከ2.7 ሚሊዮን ቶን በላይ ቡና በሕገወጥ መንገድ በመሸጥ፣ 7.9 ሚሊዮን ዶላር ወይም 107.9 ሚሊዮን ብር የውጭ ምንዛሪ መንግሥትን አሳጥተዋል የተባሉ ቡና ነጋዴዎችና ተባባሪዎቻቸው ክስ ተመሠረተባቸው፡፡

የፌዴራል ዓቃቤ ሕግ ክስ የመሠረተበቸው ነጋዴዎችና ግለሰቦች ኤልያስ ጀማል፣ አብዱልመጅድ ያሲን፣ ሸውሜ ሳሊያ (በሌለበት)፣ ዘሪሁን ሁሴን (ያልተያዘ) እና ፋጡማ ጀማል የሚባሉ ናቸው፡፡

ኤልያስና አብዱልመጅድ የተባሉት ተከሳሾች ለውጭ አገር ገበያ የሚውል ቡና በአገር ውስጥ በመሰወርና በመሸጥ ያልተገባ ጥቅም ለማግኘት መመካከራቸውን ዓቃቤ ሕግ በክሱ ጠቁሟል፡፡ ኤልያስ በቡና ንግድ ዘርፍ ያለውን ዕውቀት በመጠቀምና ከአብዱልመጅድ ጋር በመስማማት ስለቡና ንግድ ምንም ግንዛቤ የሌለውን ተገኝ ቦጋለ ደለሎ የተባለ የሐዋሳ ነዋሪን በማታለልና ሥራ እንደሚያሠሩት በመንገር፣ ወደ አዲስ አበባ አምጥተው በሐሰተኛ ስም ፎቶውን ለጥፈው ከዱከም ከተማ አስተዳደር ቀበሌ 01 መታወቂያ እንዳስወጡለት የዓቃቤ ሕግ ክስ ያስረዳል፡፡

 ሐሰተኛ መታወቂያው ከወጣለት በኋላ የንግድ ፈቃድ እስከሚወጣ ድረስ አውቶቡስ ተራ አካባቢ ቤት ተከራይተው በማቆየት፣ በሌላ ስም ያወጡትን የቡና ላኪነት ንግድ ፈቃድ ለማንቀሳቀስ ውክልና እንዲቀበል ማድረጋቸውን ዓቃቤ ሕግ በክሱ ዘርዝሯል፡፡ የቡና ግዥ ውል እንዲፈርም፣ የንግድ ሥራ ፈቃድ እንዲያወጣና በኢትዮጵያ ምርት ገበያ አገናኝ ከሆነችው የአንደኛ ተከሳሽ እህት አምስተኛ ተከሳሽ ወ/ሮ ፋጡማ ጀማል ጋር ውል እንዲፈራረም እንዳደረጉትም አክሏል፡፡

 ይኼንን ካደረጉ በኋላ ለግለሰቡ 3,000 ብር በመስጠት ወደ መጣበት ሐዋሳ እንዲመለስ በማድረግ፣ በንግድ ፈቃዱ በወ/ሮ ፋጡማ በኩል በአጠቃላይ በድምሩ 2,783,509 ኩንታል ቡና ወደ ውጭ አገር ተልኮ የውጭ ምንዛሪ ማስገኘት ሲገባቸው፣ አገር ውስጥ በመሸጥ 7,918,854 ዶላር ወይም 107,970,144 ብር የውጭ ምንዛሪ መንግሥት እንዲያጣ ማድረጋቸውን የዓቃቤ ሕግ ክስ ያስረዳል፡፡

 ተከሳሾቹ በቡና ላኪነት ንግድ ፈቃድ ለመሥራት እውነተኛ አቅምና ፍላጎት ያልነበራቸውንና ስለዘርፉ ምንም ግንዛቤ የሌላቸውን ሌሎች ሰዎችን በማሳሳት ሐሰተኛ ሰነዶችን ተጠቅመው፣ ስምና ማንነታቸውን በመሰወር በገንዘብ በመደለል ንግድ ሚኒስቴርን፣ የኢትዮጵያ ምርት ገበያና ሌሎች ተቋማትን በማታተል ድርጊቱን መፈጸማቸውን ዓቃቤ ሕግ በክሱ በዝርዝር አስረድቷል፡፡

በመሆኑም ተከሳሾቹ የወንጀል ሕግ አንቀጽ 32(1ሀ፣ ለናሐ)፣ 696 (ሐ)፣ 375(ለ)፣ 379፣ 354(1)፣ 353(1ሀ) ሥር የተደነገገውን ተላልፈው በመገኘታቸው በከባድ አታላይነት፣ የመንግሥታዊ ሰነዶችን አስመስሎ ማዘጋጀትና ወደ ሐሰተኛነት መለወጥ፣ በአገር ኢኮኖሚ ላይ በሚፈጸም ወንጀሎች ተባባሪ በመሆናቸው በፌዴራል ከፍተኛ ፍርድ ቤት ልደታ ምድብ ወንጀል ክስ ችሎት መሥርቶባቸዋል፡፡