Skip to main content
x
የቆዳና ሌጦ ግብይት ተጠሪነት ለእንስሳትና ዓሳ ሀብት ሚኒስቴር ሊዛወር ነው

የቆዳና ሌጦ ግብይት ተጠሪነት ለእንስሳትና ዓሳ ሀብት ሚኒስቴር ሊዛወር ነው

  • ፀረ ሙስና ኮሚሽን አዲስ ኮሚሽነር ተሾመለት

ሐሙስ ኅዳር 7 ቀን 2010 ዓ.ም. ለምክር ቤት የቀረበው የጥሬ ቆዳና ሌጦ ግብይት ማሻሻያ ረቂቅ አዋጅ፣ ተጠሪነቱ ለእንስሳትና ዓሳ ሀብት ሚኒስቴር እንዲሆን ሐሳብ አቀረበ፡፡

ለሦስተኛ ዓመት የሥራ ዘመን አምስተኛ መደበኛ ስብሰባ ረቂቅ አዋጁን በንባብ ያቀረቡት የመንግሥት ምክትል ተጠሪው አቶ ጌታቸው በዳኔ እንደገለጹት፣ የጥሬ ቆዳና ሌጦ ግብይት አዋጅ ምርቱ በየግለሰብ ቤቶች እየባከነ የሚታየውን ችግር ለመቅረፍ ይረዳል፡፡ በአምራቾች እጅ ስለሚቆይም የምርት ጥራት ችግርን እንዲያሻሽል ይረዳልም ብለዋል፡፡

አሁን በሥራ ላይ ያለውን የጥሬ ቆዳና ሌጦ ግብይት አዋጅ ቁጥር 514/2006 ለማሻሻል፣ በርካታ አንቀጾች እንደገና እንዲታዩ ዝርዝር ሐሳቦች ተካተውበታል፡፡

ሕጉን በበላይነት ለማስፈጸምና ግብይቱን ለመምራት፣ በገበያ ውስጥ የሚስተዋሉ ችግሮችን እንዲቀርፍ ተብሎ ተጠሪነቱም ከንግድ ሚኒስቴር ወደ እንስሳትና ዓሳ ሀብት ሚኒስቴር እንዲዛወር በረቂቅ አዋጁ ተገልጿል፡፡

አዲስ ከተካተቱ አንቀጾችም ውስጥ በመጀመርያ ደረጃ ቆዳ አቅራቢዎች፣ ቆዳ አልፊዎችና ሰብሳቢዎችን እንዲሁም ባህላዊ ቆዳ አልፊዎችን ጨምሮ የያዘ የገበያው ተዋንያን ግዴታ ላይ የሚጥሉ አንቀጾች ከተካተቱት ውስጥ ይጠቀሳሉ፡፡

ለአብነትም በመጀመርያ ደረጃ ግብይት እንዲገበያይ ካልተፈቀደለት ሰው ጋር የጥሬ ቆዳ ወይም የሌጦ ግብይት የፈጸመ ግለሰብ ሲገኝ ቆዳው እንዲወረስ የሚል ድንጋጌ ይገኝበታል፡፡ ሆኖም ለግል ፍጆታው ከሚያመርተው ግለሰብ ውጪ ሆኖ በተገኘ ጊዜ፣ በተጨማሪ ከአንድ ዓመት የማይበልጥ እስራትና ከ15,000 ብር የማይበልጥ የገንዘብ መቀጮ እንደሚቀጣም ረቂቅ አዋጁ ይገልጻል፡፡

በረቂቅ አዋጁ ላይ መጠነኛ ውይይት የተደረጉ ሲሆን ለዝርዝር ዕይታ በዋነኝነት፣ ለግብርና ጉዳዮች ቋሚ ኮሚቴና በተባባሪነት ለንግድና ኢንዱስትሪ ቋሚ ኮሚቴ ተመርቷል፡፡

ከዚሁ ረቂቅ አዋጁ ቀደም ብሎ ምክር ቤቱ በጠቅላይ ሚኒስትሩ አቅራቢነት ለሥነ ምግባርና ፀረ ሙስና ኮሚሽን በዕጩነት የቀረቡትን የአቶ አየልኝ ሙሉዓለምን ሹመት በሙሉ ድምፅ አፅድቆታል፡፡

ከታኅሳስ 2009 ዓ.ም. ጀምሮ ሹመታቸው እስከፀደቀበት ዕለት ድረስ አቶ አየልኝ፣ በአማራ ክልል የሰሜን ጎንደር ዞን ዋና አስተዳዳሪ እንደነበሩም በምክር ቤቱ የተሰራጨው የግል ማኅደራቸው ያሳያል፡፡

ተሿሚው ኮሚሽነር ከ1983 ዓ.ም. ጀምሮ በክልሉ በተለያዩ ኃላፊነቶች ሲሠሩ መቆየታቸውና በአመራር የካበተ ልምድ እንዳላቸውም ለማወቅ ተችሏል፡፡ ተሿሚው ባለፈው ዓመት የሥራ ዘመናቸውን ያጠናቀቁትን የቀድሞ ኮሚሽነር አቶ ዓሊ ሱሌይማንን ይተካሉ፡፡ ለበርካታ ዓመታት ኮሚሽኑን የመሩት አቶ ዓሊም በሐምሌ 2009 ዓ.ም. ዲፕሎማትነት ተሹመው በቅርቡ ወደ ፈረንሣይ ፓሪስ ማቅናታቸውን መዘገባችን ይታወሳል፡፡