Skip to main content
x
ከወልቃይት የማንነት ጥያቄ ጋር በተያያዘ ዳኛው ከችሎት እንዲነሱ የቀረበው አቤቱታ ውድቅ ተደረገ

ከወልቃይት የማንነት ጥያቄ ጋር በተያያዘ ዳኛው ከችሎት እንዲነሱ የቀረበው አቤቱታ ውድቅ ተደረገ

  • ጋዜጠኛው በፌስቡክ ገጹ ያሠራጨውን ዘገባ እንዲያርም ትዕዛዝ ተሰጠ

የወልቃይት የማንነት ጥያቄን ምክንያት በማድረግ በአማራ ሕዝብ ላይ የዘረኝነት አስተሳሰብ አራምደዋል በማለት የሽብር ተግባር ወንጀል ክስ የተመሠረተባቸው ተከሳሾች፣ ክሳቸውን ከሚመለከቱት ሦስት ዳኞች አንደኛው እንዲነሱላቸው ያቀረቡት አቤቱታ ውድቅ ተደረገ፡፡

ወልቃይትን በሚመለከት ጥናታዊ ጽሑፍ መጻፋቸውን፣ ጥናቱ በድረ ገጽ መለቀቁንና አቋም በያዙበት ጉዳይ ነፃ ሆነው ጉዳያቸውን ሊያዩ ስለማይችሉ ከችሎቱ እንዲነሱ ጥያቄ የቀረበባቸው፣ የፌዴራል ከፍተኛ ፍርድ ቤት ልደታ ምድብ አራተኛ ወንጀል ችሎት ዳኛ አቶ ዘርዓይ ወልደ ሰንበት መሆናቸውን መዘገባችን ይታወሳል፡፡

ተከሳሾቹ በእነ ብርሃኑ ሙሉ የክስ መዝገብ የሚጠሩ ሲሆን፣ አዋጅ ቁጥር 25/1988 አንቀጽ (1ሠ)ን በመጥቀስ አቶ ዘርዓይ ከችሎቱ እንዲነሱ ጥያቄ ሲያቀርቡ፣ ፍርድ ቤቱ ደግሞ አቶ ዘርዓይ በቀረበባቸው አቤቱታ ላይ መልስ እንዲሰጡ ትዕዛዝ ሰጥቶ ነበር፡፡

ዳኛው በሰጡት ምላሽ፣ ሕገ መንግሥቱ በሰጣቸው ሐሳብን በነፃነት የመግለጽ መብት ተጠቅመው ሐሳባቸውን መግለጻቸው ተገቢ መሆኑን እንደገለጹም ፍርድ ቤቱ በብይኑ አስታውቋል፡፡ ፍርድ ቤቱ አቶ ዘርዓይ ስለወልቃይት በመጻፍ ‘ሆርን አፌርስ’ የተሰኘው ድረ ገጽ ላይ ያሠራጩትንና ለአቤቱታው የሰጡትን መልስ፣ እንዲሁም ተከሳሾች ያቀረቡትን አቤቱታ መመርመሩን ገልጿል፡፡

ዳኛው ሐሳብን በነፃነት የመግለጽ መብታቸውን ተጠቅመው የሰጡት ሐሳብ መሆኑን ፍርድ ቤቱ ገልጾ፣ ተከሳሾች ካቀረቡት አቤቱት ጋር እንደማይገናኝ በማስረዳት አቤቱታው ተቀባይነት እንደሌለው አስታውቋል፡፡

ፍርድ ቤቱ የሰጠውን ብይን በፌስቡክ አድራሻው የዘገበው የሰማያዊ ፓርቲ ልሳን ነገረ ኢትዮጵያ ዋና አዘጋጅ የነበረው አቶ ጌታቸው ሽፈራው፣ ‹‹ፍርድ ቤቱ በብይኑ ያልገለጸውን ሐሳብ አሠራጭቷል፤›› ተብሎ በችሎት ጥያቄ ቀርቦበታል፡፡ ፍርድ ቤቱ በብይኑ፣ ‹‹ዳኛው አማራ በማንነቱ የማይኮራ፣ በጎጥ የሚጠራ ሕዝብ ነው ብሏል ብለህ በፌስቡክ ገጽህ አሠራጭተሃል?›› በማለት ጥያቄ እንዳቀረበለት አቶ ጌታቸው ለሪፖርተር ገልጿል፡፡

አቶ ጌታቸው በችሎት ከተነበበው ውጪ ምንም የጨመረው ነገር እንደሌለና ተከሳሾችም አቤቱታ ካቀረቡት ውጪ የዘገበው ነገር እንደሌለ በመግለጽ ለችሎቱ ያስረዳ ቢሆንም፣ ፍርድ ቤቱ ማረም (ማስተካከል) እንዳለበት እንዳስጠነቀቀው ገልጿል፡፡ የማያርም ከሆነ ወደ ሌላ ብይን እንደሚሄድም ስለነገረው አቶ ጌታቸው በፌስቡክ ገጹ ያሠራጨውን መረጃ ለማረም መገደዱን ለሪፖርተር አስረድቷል፡፡ ፍርድ ቤቱ በብይኑ ውስጥ ካነበበው ውጪ ምንም ነገር አዛብቶ እንዳልጻፈ አክሏል፡፡

ሌሎችም በእነ አቶ መብራቱ ጌታሁን (ስድስት ሰዎች) የክስ መዝገብ የተከሰሱ፣ ‹‹ዳኛ ዘርዓይ ሊዳኙን አይችሉም›› የሚል አቤቱታ በማቅረባቸው፣ አቶ ዘርዓይ መልስ እንዲሰጡ ፍርድ ቤቱ በማዘዝ ብይን ለመስጠት ለታህሳስ 18 ቀን 2010 ዓ.ም. ቀጠሮ ሰጥቷል፡፡