Skip to main content
x
ክቡር ሚኒስትሩ ቢሮ ሌላ ሚኒስትር መጡ

ክቡር ሚኒስትሩ ቢሮ ሌላ ሚኒስትር መጡ

  • ዛሬ ከየት ተገኘህ ወዳጄ?
  • እርስዎን ማግኘት እኮ በጣም አስቸጋሪ ሆነ ክቡር ሚኒስትር፡፡
  • ፈልገኸኝ ነበር?
  • እንዴት ነው ግን በሥራ ሰዓት የማይገኙት?
  • መቼ ሥራ ፈታሁ ብለህ ነው?
  • በተከታታይ ቀናት ቢሮ መጥቼ ላገኝዎት አልቻልኩም፡፡
  • አገሪቷ ምን ዓይነት ሁኔታ ላይ እንዳለች ዘነጋኸው?
  • ምን እያሉ ነው ክቡር ሚኒስትር?
  • አገሪቷ ከባድ ቀውስ ውስጥ ናት እኮ፡፡
  • ታዲያ ይኸው እኛ አመራር እየሰጠን አይደል እንዴ?
  • እ…
  • እርስዎ እኮ ቢሮም የሉም፣ ከእኛም ጋር የሉም፡፡
  • ስማ አገሪቷ ቀውስ ውስጥ ስለገባች እኮ ነው የጠፋሁት፡፡
  • እንዴት ማለት?
  • በዚህ ጊዜ ነገ የሚፈጠረው ስለማይታወቅ ንብረት በጊዜ መሰብሰብ ነው፡፡
  • የመንግሥትን ሥራ እርግፍ አድርገው የራስዎን ቢዝነስ እያሯሯጡ ነው?
  • ታዲያ ምን ማድረግ እችላለሁ?
  • ክቡር ሚኒስትር ግን አላበዙትም?
  • ምን አጠፋሁ?
  • በዚህ ሕዝብ ላይ ግን እየቀለዱ መሆኑን ያውቃሉ?
  • ይህ ሕዝብ እኮ ምስኪን ነው፣ ምንም አያውቅም፡፡
  • ክቡር ሚኒስትር የሚነዱትን መኪና፣ ያለዎትን ሀብት፣ የሚኖሩበትን ቤት ቢያምኑም ባያምኑም ይህ ሕዝብ ጠንቅቆ ነው የሚያውቀው፡፡
  • እሺ የእኔ መንግሥቱ ኃይለ ማርያም?
  • እየቀለድኩ አይደለም ክቡር ሚኒስትር፣ በዚህ ከቀጠልን እንደ እሱ መሆናችን አይቀርም፡፡
  • የድሮ ሥርዓት ናፋቂ ሆነሃል ማለት ነው?
  • አሁን ያለውን ሁኔታ መካድ ምንም ስለማያዋጣ፣ ለሕዝቡ ጥያቄ ምላሽ መስጠት ነው የሚያዋጣን፡፡
  • እኔ ሕዝቡ ጥያቄ አለው ብዬ አላምንም፡፡
  • ማን ነው ጥያቄ ያለው?
  • አመራሩ ነው፡፡
  • አመራሩ የምን ጥያቄ ነው ያለው?
  • እከሌ የሰረቀው እከሌ ከሰረቀው ይበልጣል፣ ስለዚህ እከሌ እከሌን ሊያዘው አይችልም የሚል ነዋ፡፡
  • ምን እያሉ ነው?
  • እርስ በርሳችን ተናንቀናል፣ ማን ምን እንደበላ ይታወቃል፣ ማን ምን እንደሰረቀ ይታወቃል፡፡
  • እ…
  • አሁን ጤነኛ የሆነ ደፍሮ እጁን ያውጣ ቢባል ማን ያወጣል?
  • እሱማ ማንም አያወጣም፡፡
  • አሁን አንተ ለመሆኑ እኔን ስትወነጅል እኔ ነፃ ነኝ ለማለት ፈልገህ ነው?
  • እንደዚያ እያልኩ ሳይሆን ይህ የሕዝብ ጎርፍ ጠራርጎ እንዳይዋስደን ያስፈራል፡፡
  • ለነገሩ ዛሬ እኔ ጋ ለምን እንደመጣህም አውቃለሁ፡፡
  • ለምንድነው የመጣሁት?
  • ሥልጣኔን እንድለቅና መቀጣጫ እንድደረግ ልታደራድረኝ አይደል የመጣኸው?
  • እውነቱን ንገረኝ ካሉ ለዚያ ነው የመጣሁት፡፡
  • ስማ እኔም በቂ ሀብትና ንብረት ስለሰበሰብኩ ሥልጣኔን ብለቅ አይቆጨኝም፡፡
  • ታዲያ ለምን አይለቁም ክቡር ሚኒስትር?
  • መልቀቁን እለቃለሁ፡፡
  • ምን የሚፈልጉት ነገር አለ?
  • በእኔ በኩል ደግሞ እንዲደረግልኝ የምፈልገው ነገር አለ፡፡
  • ምን ክቡር ሚኒስትር?
  • በርካታ ቤቶችና ፋብሪካዎች አሉኝ፡፡
  • እሱማ ባንክ ያለዎትም ገንዘብ ከፍተኛ ነው፡፡
  • ከዚያ ውጪ አሁን የራሴን መርከብ እያስገነባሁ ነው፡፡
  • ለምን?
  • በራስህ መርከብ ዕቃህን ስታስመጣ ትርፉ የትየለሌ ነዋ፡፡
  • ከዚህ በላይ ታዲያ ምን ይፈልጋሉ?
  • ይኼ ሁሉ ሀብት እንዲወረስ የምፈልግ ይመስልሃል?
  • እ…
  • ምን እሱ ብቻ?
  • ሌላ ደግሞ ምን ቀረ?
  • ቂሊንጦ ልገባ እችላለሁ፡፡
  • እሱማ ልክ ነው፡፡
  • ስለዚህ እኔ ሥልጣኔን ስለቅ እንዲሰጠኝ የምፈልገው ነገር አለ፡፡
  • ምንድነው እሱ?
  • ከለላ!

[ለክቡር ሚኒስትሩ አንድ ደላላ ደወለ]

  • ሄሎ ክቡር ሚኒስትር፡፡
  • አንተ ሰላቢ ምን ፈለግክ?
  • ምነው ክቡር ሚኒስትር?
  • ምን ቀርቶህ ነው የምትደውልልኝ?
  • ሰላም አይደሉም እንዴ ክቡር ሚኒስትር?
  • ስሜን አትጥራ፣ ስምህን ቄስ ይጥራው፡፡
  • ዛሬ በግራ ጎንዎት ነው መሰለኝ የተነሱት?
  • ኧረ ግራ ጎንህን ጦር ይውጋው፡፡
  • እ…
  • አንተን ያወቅኩበት ቀን የተረገመ ነው፡፡
  • ዛሬ የምን ጉድ ነው?
  • ከአንተ በላይ ምን ጉድ አለ?
  • ከሰው ጋር ተጣልተዋል እንዴ?
  • አንተ ከራስ የተጣላህ ጥገኛ፡፡
  • ምነው ክቡር ሚኒስትር?
  • ዝም በል መልስ ልትሰጠኝ ነው ደግሞ?
  • ምንድነው የሚያወሩት?
  • እንደ አንተ ዓይነቱ መዥገር ነው ሕዝቡን እየመጠጠ ያለው፡፡
  • አልገባኝም ክቡር ሚኒስትር?
  • ሕዝቡ በአንተ ዓይነቱ እየተማረረ ነው አገሩን የሚጠላው፡፡
  • እንዴ ክቡር ሚኒስትር?
  • ለመሆኑ ስንተኛ ክፍል ነው ያቆምከው?
  • ስምንተኛ ክፍል ነው ያቆምኩት፡፡
  • ዋናው ሥራህ ምንድነው?
  • ድለላ፡፡
  • ያለህ ሀብት ስንት ነው?
  • እ…
  • ባለፈው አምስተኛ ፎቅህን እንደጀመርክ ነግረኸኛል፡፡
  • እሱማ ያው በድለላ ነው የሠራሁት፡፡
  • በዚህ አሥር ዓመት ውስጥ አይደል እንዴ ይህን ሁሉ ሀብት ያካበትከው?
  • ያው አገሪቷም እኮ በአሥር ዓመት ውስጥ ነው በሚገባ ያደገችው፡፡
  • እንደ አንተ ዓይነቱ ነው እኛንም የሚያሰድበው፡፡
  • መስመር ያለፉ አልመሰልዎትም ክቡር ሚኒስትር?
  • ምን?
  • ከእኔ የባሰ አገሪቷን ያቆረቆዟት ጊንጥ አይደሉ እንዴ?
  • ምን አልክ አንተ?
  • አገሪቷን እንደ ሸንኮራ መጠው ካደረቁ በኋላ የተፏት እርስዎ አይደሉ?
  • ሥርዓትህን ያዝ፡፡
  • ሕዝቡን አገልግሉ ተብለው ተሹመው በሕዝቡ ሲገለገሉ የቆዩ ኪራይ ሰብሳቢ አይደሉ?
  • እኔ ጠፋሁ?
  • አንዴ ስኳር፣ አንዴ ማዳበሪያ እያሉ ሕዝቡን ራቁቱን እንዳስቀሩት ረሱት እንዴ?
  • ምን እያልክ ነው?
  • በራስዎት ዓይን ውስጥ ያለውን ግንድ ሳያወጡ፣ በእኔ ዓይን ውስጥ ያለውን ስንጥር ለማውጣት ባይሞክሩ ጥሩ ነው፡፡
  • በጣም ተናንቀናል ማለት ነው?
  • እኔ መቼ ናቅኩዎት?
  • ማን ነው የናቀኝ ታዲያ?
  • ሕዝቡ!

[ክቡር ሚኒስትሩ ቢሮ ሲገቡ አማካሪያቸው አስጠሩት]

  • ምነው ተናደዋል ክቡር ሚኒስትር?
  • ምን የሚያስደስት ነገር አለ ብለህ ነው?
  • ለነገሩ አገሪቷ ከድጡ ወደ ማጡ እየገባች ምን የሚያስደስት ነገር አለ ብለው ነው?
  • ግን እንደዛ የከፋ ነገር ውስጥ ናት አገሪቷ?
  • እንዲያውም የሰው ምሬት ከሚወራውም በላይ ነው፡፡
  • ምን እያልክ ነው?
  • የብሔር ፖለቲካው ጦዞ ምን ላይ እንደደረሰ ያውቃሉ?
  • እኛ ምን እናድርግ ታዲያ?
  • ሰዎች የሚጠቀሙት በዜግነት ሳይሆን በደጋፊነት ነው፡፡
  • የምን ደጋፊ ነው?
  • የሥርዓት ደጋፊ ነዋ፡፡፡
  • እንዴት?
  • አንድ ዜጋ ስኬታማ የሚሆነው የሥርዓቱ ደጋፊ ከሆነ ነው፡፡
  • ሰው እንደዛ ነው የሚያስበው?
  • ክቡር ሚኒስትር ለደጋፊ እኮ በሩ ሁሉ ክፍት ነው፡፡
  • እ…
  • ጨረታው ለእሱ ነው፣ ሥራው ለእሱ ነው፣ ቢዝነሱ ለእሱ ነው፣ ብቻ ምን አለፋዎት ሁሉ ነገር ለእሱ ነው፡፡
  • ሥርዓቱን የማይደግፈውስ?
  • እሱማ ይታሰራል፣ ይሰቃያል፣ ይከስራል፣ ብቻ ምን አለፋዎት መከራውን ይበላል፡፡
  • አንተም እንደዚህ ነው የምታስበው?
  • ክቡር ሚኒስትር ይኼ እኮ እውነታ ነው፡፡
  • ምን?
  • ሕዝቡ ወዶ ይመስልዎታል እንደዚህ የተነሳው?
  • ምን እያልክ ነው?
  • የሀብት ክፍፍሉ ፍትሐዊ ስላልሆነ ነው፡፡
  • አንተም ፍትሐዊ አይደለህም ብለህ ነው የምታስበው?
  • ለእሱማ እኔ ጥሩ ምስክር ነኝ፡፡
  • ማለት?
  • እርስዎ ከአንድ አይሉ አምስት ቤት አለዎት፣ ከአንድ አይሉ አምስት መኪና አለዎት፣ ከአንድ አይሉ አምስት ሕንፃ አለዎት፡፡
  • ከእንደ አንተ ዓይነቱ ምቀኝ ጋር ነበር የምሠራው?
  • እውነቱን አይደል እንዴ የተናገርኩት?
  • አሁን እኔ ሀብታም ብሆን ምን አስቀናህ?
  • ቀንቼ አይደለም፡፡
  • ለማንኛውም አንተ የእኔ አማካሪ መሆንህ ያሳዝናል፡፡
  • እኔም ክቡር ሚኒስትር ሰሞኑን ላስገባልዎት ሳስብ ነበር፡፡
  • ምንድነው የምታስገባልኝ?
  • መልቀቂያዬን!

[ክቡር ሚኒስትሩ በመሥሪያ ቤታቸው ከሠራተኛው ጋር አጠቃላይ ስብሰባ እያደረጉ ነው፡፡ ሠራተኞቹም በወቅታዊ ጉዳዮች ላይ ያላቸውን አስተያየት እንዲሰጡ ክቡር ሚኒስትሩ ዕድሉን ሰጧቸው]

  • እዛ ጋ ያለኸው አስተያየትህን ቀጥል፡፡
  • ለምንድነው የሚቀልዱብን ክቡር ሚኒስትር?
  • ምን እያልክ ነው?
  • ለምን ሥራ ያስፈቱናል?
  • አልገባኝም፡፡
  • ትርጉም ለሌለው ስብሰባ ለምን ጊዜያችንን ያባክናሉ?
  • ለምንድነው ትርጉም የሌለው?
  • የመንግሥትን ዲስኩር ከሚያሰሙን ሕዝቡን ብናገለግል ይሻላል፡፡
  • ሌላ አስተያየት ያለው አለ?

[ሌላ ሠራተኛ እጁን አወጣ]

  • አስተያየትህን ቀጥል፡፡
  • እኔ አንድ ጥያቄ አለኝ፡፡
  • የምን ጥያቄ?
  • የዛሬው ስብሰባ አበል አለው?
  • የምን አበል ነው?
  • በቃ አበል ከሌለው ጊዜያችንን አያቃጥሉብን፡፡
  • ሌላ አስተያየት ያለው አለ?

[ሌላኛው ሠራተኛ እጁን አወጣ]

  • አንተ እዛ ጋ ያለኸው፡፡
  • መሥሪያ ቤቱ በወንዝ እንዲደራጅ አድርገውታል፡፡
  • ምን ማለት ነው?
  • ይኸው ሙሉ መሥሪያ ቤቱ በእርስዎ ዘመድ አዝማዶች ነው የተሞላው፡፡
  • ምን?
  • መሥሪያ ቤቱ የቤተሰብ ሆኗል፡፡
  • ሌላ አስተያየት ካለ?

[ሌላኛው ሠራተኛ እጁን አወጣ]

  • ምንድነው አስተያየትህ?
  • ጓደኛዬ ያለው ላይ ለመጨመር ነው፡፡
  • ምንድነው የምትጨምረው?
  • በሠራተኛው መካከል ያለው የሀብት ክፍፍል ፍትሐዊ አይደለም፡፡
  • እንዴት?
  • ለምሳሌ እርስዎ ያለዎት ሀብት ከሌላው ሠራተኛ ጋር ሲነፃፀር የሰማይና የምድር ያህል ይለያያል፡፡
  • ምን?
  • አምስት ቤት እንዳለዎት እናውቃለን፣ አምስት መኪና እንዳለዎት እናውቃለን፣ አምስት ሕንፃ እንዳለዎት እናውቃለን፡፡
  • እና ምን ይጠበስ?
  • ይኼ እብሪት አያዋጣዎትም ክቡር ሚኒስትር፡፡
  • ታዲያ ምንድነው የምትፈልጉት?
  • እንዲለቁ ነዋ ክቡር ሚኒስትር፡፡
  • ምኑን ነው የምለቀው?
  • ሥልጣንዎን፡፡
  • ሥልጣኔን እንኳን አለቅም፣ ባይሆን ሌላ ነገር እለቃለሁ፡፡
  • ሌላ ምን?
  • ነጠላ ዜማ!