Skip to main content
x
የጦር ምሽግ በመገንባት ክስ የተመሠረተባቸው ዘጠኝ ግለሰቦች በፅኑ እስራት እንዲቀጡ ተወሰነ

የጦር ምሽግ በመገንባት ክስ የተመሠረተባቸው ዘጠኝ ግለሰቦች በፅኑ እስራት እንዲቀጡ ተወሰነ

የወንጀል ሕግ አንቀጽ 32 (1ሀ እና ለ)፣ አንቀጽ 38፣ የሽብርተኝነት አዋጅ ቁጥር 652/2001 አንቀጽ 7(1) የተደነገገውን በመተላለፍ፣ የሽብር ተግባር ወንጀል ክስ ተመሥርቶባቸው ከነበሩት 14 ተከሳሾች ውስጥ ዘጠኙ በፅኑ እስራት እንዲቀጡ፣ የፌዴራል ከፍተኛ ፍርድ ቤት ልደታ ምድብ 19ኛ ወንጀል ችሎት ውሳኔ አስተላለፈ፡፡

እነ ጌታሁን በየነ በሚል የክስ መዝገብ ክስ የተመሠረተባቸው 14 ተከሳሾች በቁጥጥር ሥር የዋሉት በደቡብ ክልል አርባ ምንጭ አካባቢ እንደነበር በወቅቱ መዘገባችን ይታወሳል፡፡ ተከሳሾቹ የቀረበባቸውን የወንጀል ተግባር ክስ እንዲከላከሉ ብይን የተሰጠ ቢሆንም፣ ዘጠኙ ተከሳሾች ‹‹መከላከል አንፈልግም›› በማለታቸው ጥፋተኛ ተብለዋል፡፡

ጥፋተኛ በተባሉት ተከሳሾች ላይ ከሳሽ የፌዴራል ጠቅላይ ዓቃቤ ሕግም የቅጣት ማክበጃ ሐሳብ እንደሌለው ለፍርድ ቤቱ ገልጿል፡፡ ፍርድ ቤቱ የወንጀል ደረጃውን ‹‹ከባድ›› በማለትም የቅጣት ውሳኔ ሰጥቷል፡፡ በመሆኑም ሁለት ተከሳሾች በ16 ዓመታት ከስድስት ወራት ፅኑ እስራት፣ አንድ ተከሳሽ በ15 ዓመታት ፅኑ አስራት፣ አምስት ተከሳሾች በአምስት ዓመታት ፅኑ እስራትና አንድ ተከሳሽ ደግሞ ሦስት ዓመታት ከአሥር ወራት ፅኑ እስራት (በአብላጫ ድምፅ) እንዲቀጡ ውሳኔ ተሰጥቷል፡፡

ፍርድ ቤቱ የቅጣት ውሳኔውን ከገለጸ በኋላ፣ ፍርደኞቹ በዕለቱ የተሰየሙትን ዳኞች ዘልፈዋል፡፡

ተከሳሾቹ ክስ የተመሠረተባቸው የአርበኞች ግንቦት ሰባት አባል በመሆን አርባ ምንጭ አካባቢ ባለ ጫካ ውስጥ ምሽግ ወይም የጦር ቤዝ በመገንባት፣ ወታደራዊ ሥልጠና ለማድረግ ሲንቀሳቀሱ ነበር ተብሏል፡፡ ከሁለት ዓመታት በፊት በቁጥጥር ሥር የዋሉት ፍርደኞቹ፣ በጥቅምት ወር 2009 ዓ.ም. ክስ እንደተመሠረተባቸው መዘገባችን ይታወሳል፡፡ ከተከሳሾቹ ውስጥ አምስት ተከሳሾች እንደሚከላከሉ በመግለጻቸው የመከላከያ ምስክሮቻቸውን እንዲያቀርቡ ቀጠሮ ተሰጥቷቸዋል፡፡