Skip to main content
x
የእንግሊዝ ኩባንያ በኢትዮጵያ የ200 ሚሊዮን ዶላር ኢንቨስትመንት ፕሮጀክቶችን ሊጀምር ነው

የእንግሊዝ ኩባንያ በኢትዮጵያ የ200 ሚሊዮን ዶላር ኢንቨስትመንት ፕሮጀክቶችን ሊጀምር ነው

ኢንትሬድ የተሰኘውና ዋና መሥሪያ ቤቱን በእንግሊዝ ያደረገው ኩባንያ በሱዳን ሰፊ የጥጥ እርሻ እንዳለው ከመግለጹም ባሻገር፣ በኢትዮጵያ ሰፊ የጥጥ እርሻ የማልማት ዕቅድ እንዳለውና በ200 ሚሊዮን ዶላር ኢንቨስትመንት ሦስት ፕሮጀክቶችን ለመጀመር መነሳቱን አስታወቀ፡፡

የኢንትሬድ ኩባንያ (Intrade Co UK ltd) ዋና ሥራ አስፈጻሚ ሱዳናዊው ዋግዲ ማሁጉብ፣ ሰኞ ታኅሳስ 30 ቀን 2010 ዓ.ም. ከኢትዮጵያ ኢንቨስትመንት ኮሚሽን ኮሚሽነር አቶ ፍፁም አረጋ ጋር የመጨረሻውን የኢንቨስትመንት ስምምነት በተፈራረሙበት ወቅት እንደተገለጸው፣ ኢንቴሬድ ኩባንያ በመለ ከተማ አቅራቢያ በተገባው የመለ ኢንዱስትሪ ፓርክ ውስጥ በ100 ሚሊዮን ዶላር ኢንቨስትመንት የጨርቃ ጨርቅና አልባሳት አምራችነት ለመሰማራት ተስማምቷል፡፡

አቶ ፍፁም እንዳብራሩት፣ ኩባንያው በኢንዱስትሪ ፓርኩ ውስጥ በ10.5 ሔክታር መሬት ላይ የሚያርፍ ማምረቻ ቦታ የሚኖረው ሲሆን፣ የመጀመርያ ምዕራፍ ግንባታውን በ16 ወራት ወይም በአንድ ዓመት ከአራት ወራት ውስጥ በማጠናቀቅ ምርት ለመጀመር ተስማምቷል፡፡

ኩባንያው ብትን ጨርቅ በማምረት በኢንዱስትሪ ፓርኩ ለሚገቡ የስፌት ፋብሪካዎች ጨርቅ ከማቅረብ በተጨማሪ ለውጭ ገበያ እንደሚያቀርብ ይጠበቃል ያሉት አቶ ፍፁም፣ ከጨርቃ ጨርቅ ባሻገር በአግሮ ፕሮሰሲንግ መስክና በፋርማሲውቲካል ዘርፍ ለመሰማራት የኢንቨስትመንት ፈቃድ መውሰዱንም ጠቁመዋል፡፡ በዚህ መሠረት ለጨርቃ ጨርቅ ፕሮጀክቱ ከመደበው የ100 ሚሊዮን ዶላር የኢንቨስትመንት ካፒታል በተጨማሪ በቦሌ ለሚ ለሚገነባው የመድኃኒትና ተጓዳኝ ምርቶች ፋብሪካ 70 ሚሊዮን ዶላር፣ እንዲሁም የምግብ ዘይት ፋብሪካ ለመገንባት 30 ሚሊዮን ዶላር በመመደብ በጠቅላላው 200 ሚሊዮን ዶላር የሚያወጡ ሦስት ፕሮጀክቶችን ለመጀመር ፈቃድ መውሰዱን ኮሚሽነሩ ገልጸዋል፡፡ በፋርማሲውቲካል ዘርፍ የመግባቢያ ሰነድ ስምምነት መፈረሙንና ያቀረበው የቢዝነስ ዕቅድ እየተገመገመ እንደሚገኝ፣ በምግብ ዘይት መስክ ለመሰማራት የቀረበው ዕቅድ ግን ማስተካከያ እንዲደረግበት ለኩባንያው ኃላፊዎች መመለሱን ኮሚሽነሩ አብራርተዋል፡፡

የኢንትሬድ ዋና ሥራ አስፈጻሚ ሚስተር ማህጉብ በበኩላቸው፣ በመለ ኢንዱስትሪ ፓርክ ውስጥ የሚተከለው የጨርቃ ጨርቅ ፋብሪካ በቂ የጥጥ አቅርቦት ችግር እንዳይገጥመው ከሱዳን እንደሚያገኝ አስታውቀዋል፡፡ ወደፊት ግን ሰፊ የጥጥ እርሻ በኢትዮጵያ ለማቋቋም ውጥን እንዳለውም ጠቅሰዋል፡፡ በዘረመል ምህንድስና የሚመረት ግማሽ ሚሊዮን ቶን ጥጥ በሱዳን እንደሚመረትም ለኮሚሽነር ፍፁም ገልጸውላቸዋል፡፡

ከዚህ ባሻገር በአኩሪ አተርና በሱፍ የምግብ ዘይት ማምረት የካበተ ልምድ ያለው በመሆኑ፣ በኢትዮጵያም ይህንን የማምረት ሐሳብ ኩባንያው እንዳለው ያብራሩት ሚስተር ማህጉብ፣ በሱዳንና በኢትዮጵያ መካከል ያለውን ኢኮኖሚያዊ ግንኙነት ለማጠናከር የሚያግዙ ፕሮጀክቶች ስለመሆናቸውም ተናግረዋል፡፡

በአሁኑ ወቅት ህንድ፣ ቻይናና ሌሎችም ጥጥ አምራች አገሮች ወደ ውጭ መላክ ማቆማቸው በጨርቃ ጨርቅና አልባሳት ኢንዱስትሪው ላይ ትልቅ ሥጋት ነው ያሉት አቶ ፍፁም፣ የኢንትሬድ ወደ ኢትዮጵያ መምጣት በጥጥ ምርት በኩል የሚታየውን የአቅርቦት ችግር ለመቅረፍ ያግዛል ብለዋል፡፡