Skip to main content
x
ክቡር ሚኒስትሩ ከአማካሪያቸው ጋር ቢሯቸው እየተወያዩ ነው

ክቡር ሚኒስትሩ ከአማካሪያቸው ጋር ቢሯቸው እየተወያዩ ነው

[የክቡር ሚኒስትሩ ቢዝነስ ፓርትነር ስልክ ደወለላቸው]

  • እንኳን አደረስዎት ክቡር ሚኒስትር፡፡
  • ዛሬ ነው የምትደውለው?
  • የበዓል ቀን ቴክስት አድርጌ ነበር፣ አልደረስዎትም እንዴ?
  • አንተ ገንዘብ ዝም ብሎ ሲፈስልህ እየጠገብክ ነው ማለት ነው?
  • ክቡር ሚኒስትር በእውነት ቴክስት አድርጌ ነበር፡፡
  • ለማንኛውም ይሁንልህ፡፡
  • በዓሉ እንዴት ነበር ግን?
  • ይኼኛው ገናማ ልማታዊ ነበር እኮ፡፡
  • እንዴት ክቡር ሚኒስትር?
  • እስረኞች ይፈታሉ መባሉን አልሰማህም?
  • እሱማ ሰምቻለሁ፡፡
  • የተፈረደባቸውና ጉዳያቸው በዓቃቤ ሕግ እየታየ ያሉ እስረኞች ብቻ ሳይሆኑ ወደፊትም የሚገቡት ይፈታሉ ተብሏል፡፡
  • እርስዎንም ስለሚመለከት ነው በጣም ደስ ያለዎት?
  • እንዴት?
  • ወደፊት ከሚገቡት መካከል መኖርዎ አይቀርም ብዬ ነው?
  • ምንድነው የምትቀባጥረው?
  • ለማንኛውም ዛሬ የደወልኩት ለሌላ ጉዳይ ነው፡፡
  • ለምን ጉዳይ?
  • መቼም በዓልን ቤትዎ ነው ያሳለፉት?
  • ቤት ተጎልቼ ቲቪ ሳይ ነው የዋልኩት፡፡
  • ስለዚህ ቲቪ እየኮመኮሙ ነዋ የሳለፉት?
  • ምን ቲቪ ብቻ ቢራውንም ስኮመኩም ሰክሬ ነበር፡፡
  • ብዙ ጠጡ እንዴ ክቡር ሚኒስትር?
  • ጠጥቼ ሳይሆን በማስታወቂያው ነው እንጂ የሰከርኩት፡፡
  • በነገራችን ላይ ጥሩ ነጥብ ነው ያነሱት፡፡
  • አንተም ታዝበኸው ነበር?
  • እኔማ አገሪቷ ያደገችው በመጠጥ ብቻ ነው እንዴ እስክል ድረስ የቢራ ማስታወቂያዎቹ አስገርመውኝ ነበር፡፡
  • አንተ ደግሞ ባገኘኸው አጋጣሚ ልማቱን መተቸት ትወዳለህ፡፡
  • እኔ እንኳን የታዘብኩትን ልንገርዎ ብዬ ነው፡፡
  • ለማንኛውም ስለቲቪ ለምን ጠየቅከኝ?
  • አንደኛው ቴሌቪዥን ጣቢያ ያቀረበው ፕሮግራም የአገሪቷን ዕድገት ራሱ እንድጠይቅ እያደረገኝ ነው፡፡
  • ምን እያልክ ነው?
  • አገሪቷ እንደዚህ አድጋለች እየተባለ ዜጎች ግን የመጠጥ ውኃ ለማግኘት ምን ያህል ፍዳ እንደሚያዩ ሳይ አዘንኩ፡፡
  • ዕድገት እኮ ሒደት ነው እንጂ ሁሉም ነገር በአንዴ አያድግም፡፡
  • ለማንኛውም ይህን ችግር ያሳየው ጣቢያ የሠራውም ሥራ አስገርሞኛል፡፡
  • ምን ሠርቶ ነው እንደዚህ የምታደንቀው?
  • የመጠጥ ጉድጓድ ቆፍሮ ውኃ ለዜጎች አውጥቷል፡፡
  • ጥሩ ሥራ ነው፡፡
  • አገሪቷ ውስጥ ያሉ ባለሀብቶች በእንደዚህ ዓይነት በጎ ተግባር ሲሳተፉ እኮ የዜጎችን ሕይወት በደንብ መቀየር ይቻላል፡፡
  • በሐሳብ ደረጃ ጥሩ ነው፣ ሐሳቡም ይበረታታል፡፡
  • የእናንተ ችግር ግን ሐሳብን ወደ ተግባር መቀየሩ ላይ ነው፡፡
  • ሰውዬ በበዓሉ የደወልከው ልትሳደብ ነው እንዴ?
  • አደዋወሌማ አንድ ነገር ፕሮፖዝ ለማድረግ ነው፡፡
  • ምንድነው ፕሮፖዝ የምታደርገው?
  • እኔና እርስዎ በምንሠራው ቢዝነስ ስምም እንደዚህ ዓይነት በጎ ሥራ ብንሠራ ለማለት ነበር፡፡
  • ሰውዬ ምን ነካህ?
  • ምነው ክቡር ሚኒስትር?
  • አገር በዕርዳታ ልታድግ አትችልም ሲባል አልሰማህም?
  • አልገባኝም ክቡር ሚኒስትር?
  • በየመንገዱ የለማኝ መዓት እያጨናነቀን መሆኑን ረሳኸው?
  • እ…
  • አገሪቷ ውስጥ የለማኝ ቁጥር በጣም እያደገ መጥቷል፡፡
  • ሌላኛው የዕድገቱ መገለጫ ነው ማለት ነው?
  • ምን ይላል ይኼ?
  • እርስዎ ለማኝ በዝቷል ስላሉኝ ነው፡፡
  • አገር የሚያድገው በሥራ እንጂ በዕርዳታ አይደለም፡፡
  • ለነገሩ እዚህ አገር በሥራ ብቻ ሳይሆን በስርቆትም ይታደጋል፡፡
  • እ…
  • ያው እንደ እርስዎ ማለቴ ነው፡፡
  • ሰውዬ ጤና የለህም እንዴ?
  • ለማንኛውም ኮርፖሬት ሶሻል ሪስፖንሲቢሊቲ የሚባል ነገር ያውቃሉ?
  • ጠንቅቄ ነው የማውቀው፡፡
  • ስለዚህ እሱን እንወጣ እያልኩዎት ነው፡፡
  • እሱንማ እየተወጣሁ ነው፡፡
  • እንዴት?
  • የእኔ ኮርፖሬት ሶሻል ሪስፖንሲቢሊቲ የሚያገለግለው አንድና አንድ ብቻ ነው፡፡
  • ለማን ነው?
  • ለራሴ!

[አንድ የክቡር ሚኒስትሩ ወዳጅ ደወለላቸው]

  • እንኳን አደረስዎ ክቡር ሚኒስትር፡፡
  • ዛሬ እንዴት ትዝ አልኩህ?
  • እንኳን አደረስዎ ለማለት ነው፡፡
  • እንኳን አብሮ አደረሰን፡፡
  • በዓል እንዴት ነበር?
  • በዓሉማ በጣም ልማታዊ ነበር፡፡
  • እንዴት ክቡር ሚኒስትር?
  • እስረኞች ሊፈቱ ነው፣ እስር ቤቱ ሊዘጋ ነው፣ ከዚህ በላይ ልማት የት አለ?
  • ለነገሩ ዜናውን ሰምቼ ተደስቻለሁ፡፡
  • ሁላችንም ተደስተናል፡፡
  • መግለጫችሁም አስደሳች ነበር፡፡
  • ስነግርህ ከዚህ በኋላ አስደሳች ነገር ብቻ ነው ያለን፡፡
  • የእናንተ ተሞክሮ የሚያሳየው ግን ሌላ ነው፡፡
  • እንዴት ማለት?
  • የምትፈጽሙት ያወራችሁትን ተቃራኒ ነዋ፡፡
  • ምንድነው የምትቀባጥረው?
  • ያን አሰቃቂ እስር ቤት እንዘጋለን ስትሉ ሰው ሌላ ነገር ደግሰውልን ነው እያለ ነው፡፡
  • ሌላ ምን?
  • በየቤታችን ሊገርፉን ነው እያለ ነው፡፡
  • ሰው መቼም ይቀልዳል አይደል?
  • ኢትዮጵያ ውስጥ ያልተከለከለ ብቸኛ ነገር ቀልድ ስለሆነ ነዋ፡፡
  • ለማንኛውም ይኼ ውሳኔ የተወሰነው የፖለቲካ ምኅዳሩን ለማስፋት ነው፡፡
  • ይኼማ የሁልጊዜ ዲስኩራችሁ ነው፡፡
  • ምን እያልክ ነው?
  • ሰው አሁንም አልተዋጠለትም፡፡
  • ታዲያ በውኃ ያወራርደዋ?
  • ውኃውስ ቢሆን በሳምንት አንዴ አይደል እንዴ የሚመጣው?
  • ምን ሆነሃል ሰውዬ?
  • ያው እናንተ ወሬ ታወራላችሁ እንጂ ተግባሩ ላይ የላችሁበትም፡፡
  • የአሁኑን ውሳኔ ወደኋላ እንደማንልበት ተማምለን ነው የጨረስነው፡፡
  • የማይተማመኑ ባልንጀሮች በየወንዙ ይማማላሉ ይባላል አይደል?
  • አትተማመኑም እያልከኝ ነው?
  • ውስጡን ለቄስ አይሻልም?
  • ዛሬ ሰው ነገር ነገር እያለው ነው ልበል?
  • ለማንኛውም ዘፋኙ እንዳለው እንዳትሆኑ፡፡
  • ምንድነው ዘፋኙ ያለው?
  • ጉራ ብቻ!

[ለክቡር ሚኒስትሩ አንድ ባለሀብት ደወለላቸው]

  • እንኳን አደረስዎ ክቡር ሚኒስትር፡፡
  • እንኳን አብሮ አደረሰን፡፡
  • በዓሉ እንዴት ነበር?
  • ልማታዊ በዓል ነበር፡፡
  • ለነገሩ እኔም በጣም ተደስቼ ነው በዓሉን ያሳለፍኩት፡፡
  • ምን ተገኘ?
  • ለሕዝቡ የሰጣችሁት የገና ስጦታ አስደስቶኛል፡፡
  • የትኛው ስጦታ?
  • የታሰሩ ፖለቲከኞች ይፈቱ መባሉና እስር ቤቱ መዘጋቱ ነዋ፡፡
  • ከዚህ በኋላ የሕዝቡን ጥያቄ በሚገባ እንመልሳለን፡፡
  • ለነገሩ ከዚህ በኋላ አገሪቷ ዝም ብላ አንደምትመነደግ ገብቶኛል፡፡
  • ከዚህ በኋላማ ልማት ብቻ ነው፡፡
  • ስለዚህ የሕዝቡን ጥያቄ ለመመለስ ተዘጋጅታችኋል ማለት ነው?
  • እያንዳንዱ የሕዝቡ ጥያቄ ይመለሳል ስልህ?
  • ከእናንተ አካሄድ ግን በርካታ አገሮች መማር ይገባቸዋል ባይ ነኝ፡፡
  • እንዴት ማለት?
  • ለምሳሌ እናንተ እስር ቤቱ ተዘግቶ ሙዚየም እንዲሆን ወስናችኋል፡፡
  • ትክክል ነው፡፡
  • እንደ ሳዑዲ ያሉ አገሮች ደግሞ ሆቴል ወደ እስር ቤት እየቀየሩ ነው፡፡
  • ስማ ኢትዮጵያ እኮ ለበርካታ አገሮች አርዓያ የምትሆን አገር ነች፡፡
  • አሁን የደረስንበት የዴሞክራሲ ደረጃ ብዙዎች የሚያስቀና ይመስለኛል፡፡
  • ምንም አልተሳሳትክም፡፡
  • በነካ እጃችሁ ግን ሳዑዲ ያለው ሆቴልም እንዲዘጋ ብታደርጉ ደስ ይለኛል፡፡
  • የትኛው ሆቴል?
  • ሪትስ ካርልተን ሆቴል ነዋ፡፡
  • ለምንድን?
  • እንዲፈቱ ነዋ፡፡
  • ማን?
  • ጧሪያችን!

[ክቡር ሚኒስትሩ ከአማካሪያቸው ጋር ቢሯቸው እየተወያዩ ነው]

  • ሰሞኑን በተወሰነው ውሳኔ በጣም ነው የተገረምኩት ክቡር ሚኒስትር?
  • ምኑ ነው የገረመህ?
  • በኢሕአዴግ መዋቅር ውስጥ ብዙ ዓመት ስለሠራሁ እንዲህ ዓይነት ውሳኔ ይተላለፋል ብዬ አልጠበቅኩም፡፡
  • የትኛው ውሳኔ?
  • ባለፈው ሳምንት ፖለቲከኞች ይፈታሉ መባሉ አስገርሞኛል፡፡
  • ምን ይገርማል?
  • ከዚያም ባለፈ ማዕከላዊ ይዘጋል መባሉ አስደንቆኛል፡፡
  • ለሕዝቡ የሚያስብ መንግሥት ከዚህም በላይ ሌላ ርቀት መሄድ አለበት፡፡
  • ለነገሩ የሕዝቡ ጥያቄ ተጀመረ እንጂ መቼ ተነካ?
  • ማለት?
  • ሕዝቡ ከዚህ የባሱ በርካታ ጥያቄዎች አሉት፡፡
  • የምን ጥያቄ?
  • የልማት፣ የኢኮኖሚ ተጠቃሚነት፣ ፍትሐዊነትና የመሳሰሉት፡፡
  • ምን እያልከኝ ነው?
  • ይኼ ለመጀመር ጥሩ ነው፣ ግን ሌሎች በርካታ ጥያቄዎች ምላሽ ይፈልጋሉ፡፡
  • አንድ ነገር ስላልገባህ ነው፡፡
  • ምን ክቡር ሚኒስትር?
  • መንግሥት የዕድገትና ትራንስፎርሜሽን ዕቅድ መንደፉን ታውቃለህ?
  • በሚገባ እንጂ፡፡
  • ለተከታታይ ዓመታት ያስመዘገብነውን ዕድገት የውጭ ተቋማት ሳይቀሩ መስክረዋል፡፡
  • እሺ?
  • አሁን ሕዝቡ እየጠየቀ ያለው ትራንስፎርሜሽኑ የታለ እያለ ነው፡፡
  • ትራንስፎርመሩማ በየጊዜው እንደ ፈንዲሻ እየፈነዳ ነው፡፡
  • እኔ ያልኩህ ትራንስፎርሜሽን ነው፡፡
  • እሱስ የታለ?
  • ይኸው ተጀመረ፡፡
  • እንዴት?
  • እስር ቤቱን ወደ ሙዚየም ቀየርነው፡፡
  • እሺ?
  • ከዚያም አልፎ ገራፊዎቹን ወደ አስጎብኚነት ልንቀይራቸው ነው፡፡
  • ኪኪኪ…
  • ምን ያስቅሃል?
  • ገርሞኝ ነዋ፡፡
  • እሱ ብቻ አይደለም፡፡
  • እሺ?
  • ጥፍር ነቃዮቹንም በአነስተኛና ጥቃቅን አደራጅተን ትራንስፎርም ልናደርጋቸው ነው፡፡
  • ወደ ምን?
  • ወደ ጥፍር አስዋቢነት!