Skip to main content
x
ከፍተኛ የመንግሥት ባለሥልጣናት በምስክርነት እንዳይቀርቡ የተሰጠው ውሳኔ ተቃውሞ አስነሳ
አቶ በቀለ ገርባ

ከፍተኛ የመንግሥት ባለሥልጣናት በምስክርነት እንዳይቀርቡ የተሰጠው ውሳኔ ተቃውሞ አስነሳ

በእነ ጉርሜሳ አያኖ የክስ መዝገብ አቶ በቀለ ገርባን ጨምሮ ለተከሰሱ አራት ተጠርጣሪዎች ከፍተኛ የፌዴራልና የክልል የመንግሥት የሥራ ኃላፊዎች የመከላከያ ምስክር ሆነው እንዲቀርቡ የተጠየቀውን፣ ፍርድ ቤት ሐሙስ ጥር 3 ቀን 2010 ዓ.ም.  ሙሉ በሙሉ ውድቅ በማድረጉ ተከሳሾች ተቃውሞ አሰሙ፡፡ እነ አቶ በቀለ ገርባ ጠቅላይ ሚኒስትር ኃይለ ማርያም ደሳለኝን፣ የሕዝብ ተወካዮች ምክር ቤት አፈ ጉባዔ አቶ አባዱላ ገመዳን፣ የኦሮሚያ ክልል ርዕሰ መስተዳድር አቶ ለማ መገርሳን፣ የኦሮሞ ሕዝብ ዴሞክራሲያዊ ድርጅት (ኦሕዴድ) ጽሕፈት ቤት ኃላፊ ዓቢይ አህመድ (ዶ/ር) እና የለገዳዲ ከተማ ከንቲባ ወ/ሮ ጫልቱ ሳኒ በመከላከያ ምስክርነት እንዲቀርቡ ጥያቄ ማቅረባቸው የሚታወስ ነው፡፡

ነገር ግን የጠቅላይ ሚኒስትር ቢሮ ለፍርድ ቤቱ በጻፈው ደብዳቤ፣ ጠቅላይ ሚኒስትሩ በሕዝብ ተወካዮች ምክር ቤት ተገኝተው ላቀረቡት ማብራሪያ ራሳቸው ቀርበው ማረጋገጫ ከመስጠት ይልቅ፣ ፍርድ ቤቱ መልዕክቱን ያስተላለፈውን ሚዲያ ጠይቆ ማረጋገጥ እንደሚችል ጠቅሶ አሳውቆ ነበር፡፡ ፍርድ ቤቱ ጠቅላይ ሚኒስትሩ በሕዝብ ተወካዮች ምክር ቤት ተገኝተው በአገሪቱ ያጋጠመው የመልካም አስተዳደር ችግር እንደሆነና የሌላ ውጫዊ አካል ተፅዕኖ እንዳልነበረ ተናግረዋል በማለት ነበር ተከሳሾቹ በምስክርነት የቆጠሯቸው፡፡ ፍርድ ቤቱም በዚህ ጉዳይ ላይ ማብራሪያ እንዲሰጡ ጠቅላይ ሚኒስትሩ እንዲቀርቡ ማዘዣ እንዲወጣ ትዕዛዝ ሰጥቶ ነበር፡፡

ከኦሮሚያ ክልል የተቆጠሩ ምስክሮች እንደሚገኙ፣ ነገር ግን በሥራ መደራረብ ምክንያት ተለዋጭ ቀን ተሰጥቷቸው መጥተው እንዲመሰክሩ እንዲደረግላቸው ፍርድ ቤቱን በኦሕዴድ ጽሕፈት ቤት በኩል ጠይቀው ነበር፡፡

ፍርድ ቤቱ ግን ‹‹በረባ ባልረባ የመንግሥት ባለሥልጣናት ቀርበው ይመስክሩ ቢባል ሥራቸውን በአግባቡ እንዳይወጡ ማድረግ ነው፤›› በማለት የተቆጠሩት ምስክሮች ይቅረቡ መባሉን ውድቅ አድርጎታል፡፡

ይህ የፍርድ ቤቱ ውሳኔ በተከሳሾቹ ከፍተኛ ተቃውሞ የገጠመው ሲሆን፣ ‹‹ከዚህ በኋላ ፍድር ቤት አንቀርብም፣ አሁኑኑ ፍረዱብን፣ በእኛ ይብቃ፣ እኛ ሞተን ልጆቻችን ይኑሩ፣ እንኳን እኛ እነ ጄኔራል ታደሰ ብሩም ሞተዋል…›› በማለትና የተለያዩ የኦሮሚኛ ዝማሬዎችን በማሰማት ተቃውሟቸውን ገልጸዋል፡፡

በዚህ ምክያት ፍርድ ቤቱ ችሎት በመድፈር ተከሳሾችን የስድስት ወራት እስራት ፈርዶባቸው፣ በጉዳያቸው ላይ ፍርድ ለመስጠት ለጥር 10 ቀን 2010 ዓ.ም. ቀጠሮ ሰጥቷል፡፡