Skip to main content
x
በገቢዎች ጽሕፈት ቤት ቃጠሎ ምክንያት የጋምቤላ ከተማ ከንቲባ ከምክትላቸው ጋር ከሥልጣን ተነሱ

በገቢዎች ጽሕፈት ቤት ቃጠሎ ምክንያት የጋምቤላ ከተማ ከንቲባ ከምክትላቸው ጋር ከሥልጣን ተነሱ

ኅዳር 16 ቀን 2010 ዓ.ም. የጋምቤላ ከተማ አስተዳደር ገቢዎች ጽሕፈት ቤት በእሳት ቃጠሎ ከወደመ በኋላ፣ ተገቢውን ዕርምጃ አልወሰዱም በሚል ምክንያት የከተማው አስተዳደር ከንቲባ አቶ አኬኔ ኦፓዳ እና ምክትላቸው አቶ ጀምስ ኬች ከሥልጣናቸው ተነሱ፡፡

የጋምቤላ ሕዝቦች ዴሞክራሲያዊ ንቅናቄ (ጋሕዴን) ለሳምንት ያህል ግምገማ ሲያካሂድ ቆይቶ፣ ጥር 10 ቀን 2010 ዓ.ም. የጋምቤላ ከተማ አስተዳደር ከንቲባና ምክትላቸው ጥፋተኞች ናቸው በማለት ከሥልጣናቸው ማንሳቱ ታውቋል፡፡

የጋምቤላ ከተማ አስተዳደር ከንቲባ አቶ አኬኔ እሳቸውም ሆኑ ምክትላቸው ከሥልጣን መነሳታቸውን ለሪፖርተር አረጋግጠዋል፡፡ ድርጅቱ የወሰደውን ዕርምጃ አምነው መቀበላቸውንም ለሪፖርተር አስታውቀዋል፡፡

ሪፖርተር ከተለያዩ ምንጮች መረዳት እንደቻለው የጋምቤላ ከተማ አስተዳደር ገቢዎች ጽሕፈት ቤት የሒሳብ ጉድለቶች ይታዩበት ነበር፡፡ ጽሕፈት ቤቱ የሒሳብ ጉድለቶች የሚታዩበት በመሆኑም፣ የጋምቤላ ከተማ አስተዳደር መምህራንን ጨምሮ ለራሱ 1,547 ሠራተኞች ደመወዝ ለመክፈል እንኳ እየተቸገረ መሆኑ ታውቋል፡፡

የከተማው አስተዳደር በዚህ አጣብቂኝ ውስጥ እያለ ኅዳር 16 ቀን 2010 ዓ.ም. ቅዳሜ ለእሑድ አጥቢያ ከሌሊቱ ሰባት ሰዓት ላይ የገቢዎች ጽሕፈት ቤት በእሳት ቃጠሎ ወድሟል፡፡ በዚህ ውድመት የገቢ መግለጫ ሰነዶች፣ ኮምፒዩተሮችና የቢሮ መገልገያ ቁሳቁሶች ከእነ ሕንፃው አመድ ሆነዋል፡፡

ለውድመቱ ተጠያቂ ናቸው የተባሉ 12 ግለቦች በፖሊስ ቁጥጥር ሥር ቢውሉም፣ ቃላቸውን ሰጥተው ወዲያው መለቀቃቸው ተገልጿል፡፡ የከተማው ፖሊስ የቃጠሎው መንስዔ በተፈጥሮ አደጋ ነው ወይስ በሰው ሠራሽ ምክንያት የሚለውን ከፌዴራል ፖሊስ ጋር ተባብሮ ባካሄደው ምርመራ፣ ቃጠሎው በተፈጥሮ ሳይሆን ሰው ሠራሽ መሆኑንና ጽሕፈት ቤቱ ሆን ተብሎ እንዲነሳ በተደረገ እሳት እንደወደመ መረጋገጡን አቶ አኬኔ ጭምር ለሪፖርተር ገልጸዋል፡፡

ነገር ግን የክልሉ ገዥ ፓርቲ ጋሕዴን ተጠርጣሪ ወንጀለኞችን ለፍርድ የማቅረብ ሒደቱ በተገቢው መንገድ አልተከናወነም የሚል ድምዳሜ ላይ በመድረሱ ዋነኛ ኃላፊነት የተጣለባቸው ዋናና ምክትል ከንቲባዎች ላይ ዕርምጃ ወስዷል፡፡

እስከ ቀጣዩ ጉባዔ ድረስ ከተማውን የማስተዳደር ሥልጣን የጋሕዴን ጽሕፈት ቤት መረከቡን አቶ አኬኔ ገልጸዋል፡፡