Skip to main content
x

በሱዳንና ሳዑዲ ዓረቢያ የታሰሩ ኢትዮጵያውያንን ወደ ኢትዮጵያ ለማዘዋወር መንግሥት እንቅስቃሴ ጀመረ

በፈጸሙት ወንጀል ተፈርዶባቸው በሱዳንና በሳዑዲ ዓረቢያ የታሰሩ ኢትዮጵያውያንን ወደ ኢትዮጵያ ለማዘዋወር፣ መንግሥት እንቅስቃሴ መጀመሩን የሪፖርተር ምንጮች አመለከቱ፡፡

ለጉዳዩ በጣም ቅርብ የሆኑ የሪፖርተር ምንጮች እንደገለጹት ፍርደኛ ኢትዮጵያውያኑን ከሱዳንና ከሳዑዲ ዓረቢያ እስር ቤቶች ወደ ኢትዮጵያ እስር ቤቶች ለማዘዋወር በእንቅስቃሴ ላይ የሚገኘው፣ ሕጋዊ ሥልጣን ያለው የአገሪቱ ጠቅላይ ዓቃቤ ሕግ ተቋም ነው፡፡

ከአንድ ዓመት በላይ የሚያስቀጣ ወንጀል የተፈረደባቸውን እስረኛ ዜጎቻቸውን የማዘዋወር ስምምነት (Extradition Threaty) በኢትዮጵያና በሱዳን በኩል ለአርባ ዓመታት ያህል የነበረና ከሁለት ዓመት በፊት ደግሞ ማሻሻያ ተደርጎበት በሁለቱም አገሮች የሕግ አውጪ አካላት መፅደቁንም ምንጮች ገልጸዋል፡፡

በአሁኑ እንቅስቃሴ ተፈርዶባቸው በሱዳን እስር ቤቶች የሚገኙ 72 ኢትዮጵያውያንን ወደ ኢትዮጵያ እስር ቤቶች ለማዘዋወር ጥረት እየተደረገ መሆኑን ገልጸዋል፡፡

ተፈርዶባቸው በሳዑዲ ዓረቢያ እስር ቤቶች የሚገኙ ኢትዮጵያውያንን ወደ ኢትዮጵያ የማዘዋወር እንቅስቃሴም ተጠናከሮ የቀጠለ መሆኑን የገለጹት ምንጮች፣ ምን ያህል እስረኞች ሊዘዋወሩ እንደሚችሉ ማወቅ ግን አልተቻለም፡፡

ኢትዮጵያና ሳዑዲ ዓረቢያ እስረኞችን ለማዘዋወር ስምምነት የተፈራረሙት መቼ እንደሆነ ለማጣራት የተደረገው ጥረት አልተሳካም፡፡ ይሁን እንጂ ከ20 ዓመት በፊት ሳዑዲ ዓረቢያ በከፍተኛ የግድያ ሙከራ በኢትዮጵያ የፍትሕ ሥርዓት የተፈረደበት አንድ ዜጋዋን እንዳዘዋወረች መረጃዎች ያመለክታሉ፡፡

ይህ ግለሰብ አል ሙክረን የተባለ ሲሆን እ.ኤ.አ. በ1995 በአዲስ አበባ የቀድሞውን የግብፅ ፕሬዚዳንት ሆስኒ ሙባረክ ከሌሎች ግብረ አበሮቹ ጋር ለመግደል በመሞከሩ ተፈርዶበት የነበረ ሲሆን፣ በሳዑዲ ዓረቢያ መንግሥት ጥያቄ ወደ ሳዑዲ ዓረቢያ መዘዋወሩን መረጃዎች ያመለክታሉ፡፡ አል ሙክረን በሳዑዲ ዓረቢያ ለሁለት ዓመታት ከታሰረ በኋላ በአገሪቱ መንግሥት ይቅርታ ተደርጎለት መለቀቁን መረጃዎች ያሳያሉ፡፡ ግለሰቡ የአልቃይዳ አመራር አባልና አደገኛ አሸባሪ መሆኑ ከተለቀቀ በኋላ በመታወቁ እ.ኤ.አ. በ2004 ተገድሏል፡፡

በሳዑዲ ዓረቢያ እስር ቤቶች እጅግ በርካታ ኢትዮጵያውያን ይገኛሉ፡፡ አብዛኞቹ በሕገወጥ መንገድ ወደ ሳዑዲ ዓረቢያ የሚጓዙ በመሆናቸው ምን ያህል ኢትዮጵያውያን በሳዑዲ ዓረቢያ እንደሚገኙ እንኳን በውል አይታወቅም፡፡

አገሮች እስረኞችን የማዘዋወር ስምምነት ውስጥ የሚገቡት ለፖለቲካ ዓላማ መሆኑ ይነገራል፡፡ ከ107 አገሮች ጋር ስምምነት ያላት አሜሪካ ደግሞ የራሷንና የአጋሮቿን ብሎም የዓለምን ደኅንነት ለማስጠበቅ እንዲህ ዓይነት ስምምነት እንደምትፈርም ይነገራል፡፡

ኢትዮጵያና አሜሪካ የተፈረደባቸው እስረኞችን የማዘዋወር ስምምነት የላቸውም፡፡ የኢትዮጵያ ጠቅላይ ዓቃቤ ሕግ ተቋም ከአሜሪካ መንግሥት ጋር ይህንን ስምምነት ለመፈራረም ከሁለት ዓመት በፊት እንቅስቃሴ ቢጀምርም እስካሁን ሒደቱ አልተጠናቀቀም፡፡