Skip to main content
x
ክቡር ሚኒስትሩ ከቀድሞ ጓደኛቸው ጋር ተገናኝተው እያወሩ ነው

ክቡር ሚኒስትሩ ከቀድሞ ጓደኛቸው ጋር ተገናኝተው እያወሩ ነው

[ክቡር ሚኒስትሩ ጠዋት ከሚስታቸው ጋር ቁርስ እየበሉ እያወሩ ነው]

  • ሳረሳው አንድ ነገር ልንገርሽ፡፡
  • ምንድነው የምትነግረኝ?
  • ወቅቱን በደንብ ታውቂዋለሽ ብዬ እገምታለሁ፡፡
  • እንግዲህ ይኼ የጥምቀት ወቅት ነው፡፡
  • አንቺ ከእንዲህ ዓይነት ነገር ተላቀቂ አላልኩሽም እንዴ?
  • እዚህ ላይ ወራጅ አለ፡፡
  • መጀመርያስ ማን ተሳፈሪ አለሽ?
  • አንተ ሃይማኖት የለህምና ስለእኔ ሃይማኖት አስተያየት መስጠት አቁም፡፡
  • እኔም እኮ ሃይማኖት አለኝ፡፡
  • ምን የሚሉት ሃይማኖት ነው ያለህ አንተ ደግሞ?
  • አብዮታዊ ዴሞክራሲ፡፡
  • ለነገሩ የእናንተን ታቦት አውቀዋለሁ፡፡
  • የምን ታቦት?
  • የሙስና፡፡
  • እ. . .
  • እናንተ ታቦታችሁን በየጊዜው ነው የምታነግሡት፡፡
  • ሴትዮ ምንድነው የምታወሪው?
  • ስለአንተ ሃይማኖት ነዋ፡፡
  • ለማንኛውም አሁን ስለሃይማኖት ላወራሽ አይደለም የፈለግኩሽ?
  • ስለምንድን ነው ልታወራኝ የፈለግከኝ?
  • ሰሞኑን ወሳኝ የሆነ ስብሰባ በከተማችን ውስጥ ይደረጋል፡፡
  • የምን ስብሰባ?
  • የአፍሪካ ኅብረት ስብሰባ ነዋ፡፡
  • ደግሞ ሰሞኑን ልታሰቃዩን ነዋ፡፡
  • ምን ሆነሽ ነው የምትሰቃይው?
  • በቃ በየሰዓቱ መንገዱን እየዘጋችሁ መግቢያ መውጫ ልታሳጡን ነው፡፡
  • ስሚ ስብሰባው እኮ ከፍተኛ አገራዊ ፋይዳ አለው፡፡
  • በነገራችን ላይ ሰሞኑን በየሚዲያው የምታሰሙት መግለጫ ያስገርመኛል፡፡
  • ምኑ ነው የገረመሽ?
  • ያው መንገድ ምናምን ሊዘጋ ስለሆነ ይኼ ጨዋ ሕዝብ ምናምን እያላችሁ ታሞካሹታላችሁ፡፡
  • ሌላስ ጊዜ ቢሆን?
  • ሌላ ጊዜማ እናንተ ላይ ጥያቄ ሲያነሳባችሁ ፀረ ልማት፣ ፀረ ሰላም እያላችሁ ታብጠለጥሉታላችሁ፡፡
  • አሁን ያልተጠየቅሽውን ለምን ታወሪያለሽ?
  • ለማንኛውም ለእኔም የቪአይፒ ፓስ ብታስወጣልኝ ደስ ይለኛል፡፡
  • ሴትዮ እንደዚህ ዓይነት ነገር ውስጥ አትክተቺኝ፡፡
  • አንተ ድሮም እኔን መጥቀም አትፈልግም፡፡
  • ይኸው የሚጠቅምሽን ነገር ልነግርሽ አይደል እንዴ?
  • ምድነው እሱ?
  • በዚህ ስብሰባ አሪፍ ሥራ መሥራት ይቻላል፡፡
  • ምን ዓይነት ሥራ?
  • ለስብሰባው የሚመጡ የውጭ አገር ዜጎች መሆናቸውን ታውቂያለሽ?
  • እሱማ አውቃለሁ፡፡
  • ስለዚህ ከፍተኛ ዶላር ይዘው ነው የሚመጡት፡፡
  • ታዲያ ምን ይጠበስ?
  • ስሚ ባለፈው ከፍተኛ ኪሳራ እንደደረሰብን ረሳሽው?
  • የምን ኪሳራ ነው የምታወራው?
  • መንግሥት ብርን ዲቫልዩ ሲያደርገው እኮ ሀብታችን በ15 በመቶ ነው የቀነሰው፡፡
  • አልገባኝም?
  • አንቺ መቼ እንደዚህ ዓይነት ነገር ይገባሻል?
  • ምን እያልክ ነው?
  • ገንዘባችንን በብር በማስቀመጣችን ምክንያት ብር ዲቫልዩ ሲደረግ ሀብታችን በ15 በመቶ ቀንሷል፡፡
  • እ. . .
  • በዶላር አስቀምጠነው ቢሆን ግን ሀብታችን በ15 በመቶ ይጨምር ነበር፡፡
  • ታዲያ ምን ማድረግ እንችላለን?
  • ገንዘባችንን በዶላር ማስቀመጥ አለብን፡፡
  • ዶላር ታዲያ ከየት ይመጣል?
  • የስብሰባ ተሳታፊዎቹ የውጭ ዜጎች ስለሆኑ ዶላር ነው የሚጠቀሙት፡፡
  • እኔ ባንክ አይደለሁ፣ እኔ ጋር አይመነዝሩ?
  • እሱን እኮ ነው የምልሽ?
  • እንዴት?
  • በየሆቴሉ ማቋቋም አለብሽ፡፡
  • ምን?
  • የውጭ ምንዛሪ ቢሮ!

[ክቡር ሚኒስትሩ ቢሮ እንደገቡ የሞተር ፑል ኃላፊውን ጠርተው እያነጋገሩት ነው]

  • አቤት ክቡር ሚኒስትር፡፡
  • እስቲ ተቀመጥ፡፡
  • እሺ ክቡር ሚኒስትር?
  • በጣም ላፋጣኝ ጉዳይ ነው የፈለግኩህ፡፡
  • ምን ነበር ክቡር ሚኒስትር?
  • ስንት መኪና ነው ያለን?
  • የምን መኪና ነው?
  • ማለቴ ሚኒስቴር መሥሪያ ቤቱ ስንት መኪና አለው?
  • የእርስዎን ጨምሮ ወደ አርባ ይጠጋሉ፡፡
  • ከአርባዎቹ መኪኖች ለሰው እየተጠቀምንበት ያለው ስንቱን ነው?
  • አብዛኛዎቹ የፊልድ መኪናዎች ናቸው፡፡
  • ስለዚህ ስንቶቹ ናቸው ሰው የሚጠቀምባቸው?
  • አሥራ አምስት ይሆናሉ ክቡር ሚኒስትር፡፡
  • ስለዚህ ሃያ አምስት መኪኖች ነፃ ናቸው እያልከኝ ነው?
  • አዎን ክቡር ሚኒስትር፡፡
  • በቃ እነዚህን መኪኖች ቶሎ ኪራይ እናስገባቸዋለን፡፡
  • ምን አሉኝ ክቡር ሚኒስትር?
  • ሰማኸኝ አይደል እንዴ መኪኖቹ ኪራይ ይገባሉ፡፡
  • የምን ኪራይ?
  • ስማ ከተማው ውስጥ ከፍተኛ እጥረት እንዳለ አታውቅም?
  • የውጭ ምንዛሪ እጥረት ነው?
  • በዚህ ወቅት መኪና ራሱ እንደ ውጭ ምንዛሪ ይሆናል፡፡
  • እ. . .
  • በዚህ ወቅት ከፍተኛ የኪራይ መኪና እጥረት አለ፡፡
  • ለምን ክቡር ሚኒስትር?
  • ከተማ ውስጥ ምን እንዳለ አታውቅም?
  • ምን አለ ክቡር ሚኒስትር?
  • ሚዲያ አትከታተልም እንዴ?
  • ባለፈው ቲቪዬን መብራት ስላቃጠለው ዜና ካየሁ ቆየሁ፡፡
  • ለምን ቲቪ አትገዛም?
  • ኧረ ከውሸት ስለተገላገልኩ ደስ ብሎኛል፡፡
  • ለማንኛውም ሰሞኑን የመሪዎች ስብሰባ አለ፡፡
  • እሺ፡፡
  • ስለዚህ መኪኖቹ ሥራ መግባት አለባቸው፡፡
  • እ. . .
  • አንተ ከዚህ ሥራ ትጠቀማለህ?
  • በምን?
  • ኮሚሽን ታገኛለህ፡፡
  • ስለዚህ መኪኖቹ ይከራዩ እያሉኝ ነው?
  • እንዲያውም የእኔ ቪ8 ይከራይ፡፡
  • እርስዎስ?
  • እኔ እከራያለሁ፡፡
  • ምን?
  • ቪትስ!

[ክቡር ሚኒስትሩ ከቀድሞ ጓደኛቸው ጋር ተገናኝተው እያወሩ ነው]

  • ምንድነው የያዙት ክቡር ሚኒስትር?
  • ይኼ አሪፍ መጽሐፍ ነው፡፡
  • ምን ዓይነት መጽሐፍ?
  • ፊክሽን ነው፡፡
  • ፊክሽን ያነባሉ እንዴት ክቡር ሚኒስትር?
  • እኔ ከፊክሽን ውጪ መቼ አነባለሁ?
  • እንዴት ክቡር ሚኒስትር?
  • ፊክሽን በጣም ነው የሚያስደስተኝ፡፡
  • ይኼን ያህል?
  • በተለይ ይኼኛው ጸሐፊ በጣም አሪፍ ጸሐፊ ነው፡፡
  • መጽሐፉ ግን ትልቅ ይመስላል?
  • እኔ እኮ ይኼን መጽሐፍ በሦስት ቀን ነው የምጨርሰው፡፡
  • ምን ይቀልዳሉ?
  • ቮራሺየስ አንባቢ ነኝ እኮ፡፡
  • ቪሸስ ነው ያሉኝ?
  • ቮራሺየስ ነው ያልኩህ፡፡
  • እኔ እኮ እንግሊዝኛ ላይ ብዙም አይደለሁም፡፡
  • ለማንኛውም ይኼ ስለአንድ ባለሥልጣን ነው የሚያወራው፡፡
  • ምን ዓይነት ባለሥልጣን?
  • በቃ ይኼ ባለሥልጣን ሲስተሙን እንዴት አድርጎ እንደሚጫወትበትና እንደሚያምታታው ታያለህ በዚህ መጽሐፍ፡፡
  • በጣም ይገርማል፡፡
  • ሰውዬው እንዴት ባለሀብቶችና ፖለቲከኞች ላይ እንደሚጫወትባቸው ታያለህ?
  • እና እንደዚህ ዓይነት መጽሐፍ ነው የሚወዱት?
  • ሱስ ሆኖብኛል ስልህ?
  • ከፊክሽን ውጪም አያነቡም?
  • ለሌላው ብዙም ግድ የለኝም ስልህ?
  • ክቡር ሚኒስትር ፊክሽን ግን በሰዎች ምናብ የሚፈጠሩ ታሪኮች አይደሉም እንዴ?
  • ታዲያ ምን ችግር አለው?
  • ማለቴ እርስዎ እንደ ፖለቲከኛ እውነታ ላይ ያተኮሩ መጽሐፎችን ቢያነቡ ይጠቀማሉ ብዬ ነው፡፡
  • ለእኔ እንዲያውም የሚጠቅመኝ ፊክሽኑ ነው፡፡
  • አሁን አገሪቷ ላይ ምን እየተጫወታችሁ እንደሆነ ገባኝ፡፡
  • ምንድነው የምንጫወተው?
  • ዕቃ ዕቃ!

[ክቡር ሚኒስትሩ ከሌላ ሚኒስትር ጋር እያወሩ ነው]

  • መቼም ስለእርስዎ የማልሰማው ጉድ የለም ክቡር ሚኒስትር?
  • ምን ሰማህ ደግሞ?
  • የእርስዎ የኪራይ ሰብሳቢነትና የሙስና ሥልት እየተራቀቀ ከመምጣቱ ብዛት ለእኛም ራስ ምታት እየሆነብን ነው፡፡
  • እናንተ አስተሳሰባችሁ ሊቀየር ስላልቻለ ነው፡፡
  • ወደ ምን?
  • ወደ ዲጂታል፡፡
  • ክቡር ሚኒስትር አሁን በእርስዎ ተስፋ እየቆረጥን ነው፡፡
  • ዋናው ዋራንት አለመቁረጣችሁ ነው፡፡
  • የምን ዋራንት ነው?
  • የእስር ቤት ነዋ፡፡
  • እውነቱን ተናገር ካሉኝ ለእርስዎ የሚገባው እስር ቤት ነው፡፡
  • መቼም እሱ የሚያመጣውን ጣጣ ታውቁታላችሁ?
  • የምን ጣጣ ነው የሚያመጣው?
  • ከእኔ ጋር ያልተነካካ የለም፡፡
  • እሱን ችግርማ እናውቃለን፡፡
  • ስለዚህ እንደ ዶሚኖ ተያይዘን ነው የምንወርደው፡፡
  • የት?
  • ማረሚያ ቤት ነዋ፡፡
  • እኛም እሱ ነው የሚያስፈራን፡፡
  • ስለዚህ ይኼን ሐሳብ ተውት፡፡
  • እንዲህ ሆነው መቀጠል ግን አይችሉም፡፡
  • ለምን ሲባል?
  • ከፍተኛ የአቅም ችግር አለብዎት፡፡
  • ማን የሌለበት አለ?
  • በዚያ ላይ ኪራይ ሰብሳቢ ነዎት፡፡
  • ምን ታደርገዋለህ አለ ዘፋኙ፡፡
  • ስለዚህ ጡረታ ቢወጡ ይሻላል፡፡
  • እኔ ብዙ የለመድኩ ሰው ነኝ፣ የጡረታ ገቢ መቼ ትጠቅመኛለች?
  • ይኼኛው ለየት ያለ ጡረታ ነው፡፡
  • ምን ዓይነት ጡረታ?
  • የሹመት ጡረታ፡፡
  • የምን ሹመት?
  • የአምባሳደርነት!