Skip to main content
x
አዋሽ ባንክ ለራያ ቢራ አክሲዮኖች ግዥ የሚውል 750 ሚሊዮን ብር ብድር ለቢጂአይ ፈቀደ

አዋሽ ባንክ ለራያ ቢራ አክሲዮኖች ግዥ የሚውል 750 ሚሊዮን ብር ብድር ለቢጂአይ ፈቀደ

አዋሽ ባንክ ቢጂአይ ኢትዮጵያ ለራያ ቢራ አክሲዮኖች ግዥ ለሚያውለው ክፍያ 750 ሚሊዮን ብር ብድር መፍቀዱ ታወቀ፡፡

የሪፖርተር ምንጮች እንደገለጹት፣ አዋሽ ባንክ ለቢጂአይ ኢትዮጵያ የፈቀደው ብድር መጠን በአገሪቱ በግል ባንክ ለአንድ ፕሮጀክት በአንድ ጊዜ የተፈቀደ ከፍተኛው ነው፡፡ ቢጂአይ ኢትዮጵያ በቅርቡ የራያ ቢራ አክሲዮኖችን ለመግዛት ላደረገው ስምምነት ክፍያ ለመፈጸም እንዲችል ባቀረበው ጥያቄ መሠረት ባንኩ ብድሩን ፈቅዷል፡፡

ቢጂአይ ኢትዮጵያ በራያ ቢራ ውስጥ ካለው የ42 በመቶ ድርሻው በተጨማሪ፣ ቀሪዎቹን አክሲዮኖች ለመግዛት ከ2.5 ቢሊዮን ብር በላይ መክፈል ይጠበቅበታል፡፡ አዋሽ ባንክ የፈቀደለት 750 ሚሊዮን ብር ብድር የራያ ቢራ ቀሪ አክሲዮኖችን ለመግዛት ያወጣል ተብሎ ከሚጠበቀው፣ አንድ ሦስተኛውን ክፍያ ይሸፍንለታል ተብሎ ታምኗል፡፡

      ቢጂአይ ኢትዮጵያ በራያ ቢራ አክሲዮን ማኅበር ውስጥ ካለው ድርሻ ውጪ ያሉትን አክሲዮኖች እያንዳንዳቸውን ሰባት እጥፍ የሚሆን ዋጋ በመስጠት ለመግዛት ያቀረበው ሐሳብ በአብላጫው ባለአክሲዮኖች ተቀባይነት አግኝቶ፣ አክሲዮኖችን የማዘዋወሩ ሥራ እየተከናወነ እንደሆነ ታውቋል፡፡

      ቢጂአይ ኢትዮጵያ ያቀረበው የአክሲዮን ግዥ ዋጋ አንድ ሺሕ ብር ዋጋ ያለውን አንድ አክሲዮን በሰባት ሺሕ ብር ለመግዛት የሚያስችል ነው፡፡ እስካሁን ባለው መረጃ ከራያ ቢራ ቀሪዎቹ 58 በመቶ አክሲዮኖች ውስጥ ከ90 በመቶ በላይ ድርሻ የያዙ ከፍተኛ ባለአክሲዮኖች፣ ስምምነት ፈጽመው የአክሲዮን ዝውውሩ እየተከናወነ እንደሆነ ታውቋል፡፡

ቢጂአይ ለዚህ ሽያጭ ክፍያ ከሚውለው ገንዘብ በተጨማሪ፣ በአጠቃላይ ከአዋሽ ባንክ ከአንድ ቢሊዮን ብር በላይ የተበደረ መሆኑንም የምንጮች መረጃ  ያስረዳል፡፡

አዋሽ ባንክ በአሁኑ ወቅት ከአገሪቱ የግል ባንኮች ውስጥ ከፍተኛውን ብድር በማቅረብ የሚታወቅ ሲሆን፣ በ2010 ዓ.ም. ስድስት ወራት መጨረሻ ድረስ 27 ቢሊዮን ብር ብድር አቅርቧል፡፡ የተቀማጭ ገንዘብ መጠኑ ደግሞ ከ37 ቢሊዮን ብር በላይ እንደደረሰ የተገኘው መረጃ ያመለክታል፡፡ የተከፈለ ካፒታሉ 2.8 ቢሊዮን የደረሰው አዋሽ ባንክ፣ ባለአክሲዮኖች በቅርቡ ባካሄዱት ጠቅላላ ጉባዔ ካፒታሉን ወደ ስድስት ቢሊዮን ብር እንዲያድግ መወሰናቸው ይታወሳል፡፡ ለሁለት ተከታታይ ዓመታት ከአንድ ቢሊዮን ብር በላይ በማትረፍ ቀዳሚ የግል ባንክ መሆን መቻሉ ይታወቃል፡፡  

በተመሳሳይ ቢጂአይ ኢትዮጵያ በአገሪቱ ከፍተኛ የቢራ አምራች ሲሆን፣ ዓመታዊ የትርፍ መጠኑም ከአንድ ቢሊዮን ብር በላይ ማድረስ ከቻሉ ጥቂት የአገሪቱ ኩባንያዎች ውስጥ አንዱ መሆን የቻለ ነው፡፡ የቢጂአይ ኢትዮጵያ እናት ኩባንያ የሆነው ዓለም አቀፉ ካስቴል ኩባንያ ዘቢዳር ዋነኛ ባለድርሻ የሆነውን የቤልጂየሙን ዩኒቢራ አክሲዮኖች ለመግዛት ስምምነት ላይ ተደርሷል፡፡ ኩባንያው በዘቢዳር ውስጥ 60 በመቶ የአክሲዮን ድርሻ ያለው ሲሆን፣ ይህን አክሲዮኖች ድርሻ ለካስቴል ለመሸጥ ስምምነት እንዳደረገ ይታወሳል፡፡ ይህ ስምምነት ግን የሚፀናው በኢትዮጵያ የንግድ ውድድርና ሸማቾች ባለሥልጣን አማካይነት ከፀደቀ በኋላ መሆኑ መገለጹ አይዘነጋም፡፡