Skip to main content
x
የኢትዮጵያውያን የግል ስኬት በበርኒግሃም የቤት ውስጥ ሻምፒዮና ይፈተናል

የኢትዮጵያውያን የግል ስኬት በበርኒግሃም የቤት ውስጥ ሻምፒዮና ይፈተናል

ኢትዮጵያውያን አትሌቶች በበርኒግሃም የቤት ውስጥ ሻምፒዮና ከፍተኛ ፉክክር ይጠብቃቸዋል፡፡ ከየካቲት 22 እስከ 25 ቀን 2010 ዓ.ም. ለሚካሄደው የአይኤኤፍ የቤት ውስጥ ሻምፒዮና የሚሳተፉ አትሌቶችም ስም ይፋ ሆኗል፡፡

በኢትዮጵያ አትሌቲክስ ፌዴሬሽን የተመረጡት በተለያዩ ዓለም አቀፍ መድረኮች ላይ በተከናወኑ ውድድሮች ስኬታማ የሆኑ አትሌቶች ናቸው፡፡

በለንደን በርኒግሃም የሚሰናዳው የዓለም የቤት ውስጥ ሻምፒዮና ከመድረሱ በፊት ኢትዮጵያውያን አትሌቶች በግል ያመጡት ውጤት ሲሰማ ነበር፡፡ በነዚህ ውድድሮች ላይ ውጤታማ መሆን የቻሉት እነዚህ አትሌቶች አገራቸውን ወክለው የሚያመጡት ውጤት ከወዲሁ እየተጠበቀ ይገኛል፡፡

በዘንድሮ ዓለም አቀፍ ውድድሮች በማራቶን፣ በመካከለኛና በአጭር ርቀት  በመሳተፍ ኢትዮጵያውያን አትሌቶች ስም በውጤት ሲነሳ ቆይቷል፡፡ ፌዴሬሽኑ ስማቸውን ይፋ ካደረጋቸው አትሌቶች ውስጥ ገንዘቤ ዲባባ፣ ሐጎስ ገብረ ሕይወት፣ ዮሚፍ ቀጄልቻና ወጣቱ ሰለሞን ባረጋ ይገኙበታል፡፡  በተለይ በግል ውድድሮች አልቀመስ ያለችው ገንዘቤ ዲባባ 1,500 ሜትርና 3,000 ሜትር ኢትዮጵያን ትወክላለች፡፡

የ27 ዓመቷ ገንዘቤ ሦስት የቤት ውስጥ ውድድሮች በ1,500 ሜትር እ.ኤ.አ. 2012 እና በ3,000 ሜትር 2014፣ እንዲሁም 2016 ድልን  ተቀናጅታለች፡፡ ዘንድሮም ባደረገቻቸው ተከታታይ የግል ውድድሮች ማሸነፏ ጥሩ ብቃት ላይ እንዳለች ማሳያ እንደሆነ በተለያዩ የሚዲያ አውታሮች እየተነገረ ይገኛል፡፡

በተጨማሪም በ3,000 ሜትር ዮሚፍ ቀጄልቻ ሌላኛው ተጠባቂ አትሌት ነው፡፡ ዮሚፍ በለንደን ያሳየውን የቡድን ሥራ ጥረት በዚህኛውም ከወጣቱ ሰለሞን ባረጋ ጋር በመሆን እንደሚያሳካ ይጠበቃል፡፡ ሌላው የ3,000 ሜትር ኢትዮጵያን የሚወክለው ሐጎስ ገብረ ሕይወት ነው፡፡ ሁሉም አትሎቶች ከግል ውድድሮች ባሻገር አገራቸውን ወክለው የሚያደርጉት ይኼ ውድድር ከፍተኛ ትኩረትን ስቧል፡፡

በ17ኛው የዓለም የቤት ውስጥ ሻምፒዮና ኢትዮጵያን የሚወክሉ አትሌቶች በ800 ሜትር ወንድ መሐመድ አማን፣ በ1,500 ሳሙኤል ተፈራ፣ ተሬሳ ቶሎሳና አማን ወጤ፣ 3,000 ወንድ ሰለሞን ባረጋ፣ ሐጎስ ገብረ ሕይወት፣ ዮሚፍ ቀጄልቻ፣ በሴቶች 800 ሜትር ሀብታም ዓለም፣ 1,500 ሜትር ገንዘቤ ዲባባ፣ ዳዊት ሥዩምና ጎዳፍ ፀጋዬ፣ 3,000 ሜትር ገንዘቤ ዲባባ፣ ዳዊት ሥዩምና ፋንቱ ወርቁ ናቸው፡፡