Skip to main content
x
አንድ በውጭ የሚኖር ተቃዋሚ ለክቡር ሚኒስትሩ ስልክ ደወለላቸው

አንድ በውጭ የሚኖር ተቃዋሚ ለክቡር ሚኒስትሩ ስልክ ደወለላቸው

[ክቡር ሚኒስትሩ አንድ ኢንቨስተርን ሆቴል ቀጥረው እየጠበቁት ነው]

  • ይቅርታ ክቡር ሚኒስትር አረፈድኩኝ አይደል?
  • አሥራ አምስት ደቂቃ እኮ አስቀመጥከኝ፡፡
  • መንገድ ተዘጋግቶብኝ ነው፡፡
  • በሌለኝ ሰዓት ከየት አመጣዋለሁ፡፡
  • በጣም ይቅርታ ክቡር ሚኒስትር፣ ከውጭ እንግዶች መጥተውብኝ ነው፡፡
  • የምን የውጭ እንግዳ?
  • አገራችን ውስጥ ኢንቨስት የሚያደርጉ ናቸዋ፡፡
  • በዚህ ወቅት አገራችን ኢንቨስት ማድረግ የሚፈልጉ ባለሀብቶች አሉ?
  • አይ ያው ለረዥም ጊዜ ስንነጋገርበት የነበረና ሲጠና የነበረ ፕሮጀክት ነው፡፡
  • አሁንም ኢንቨስተሮች በመንግሥታችን ላይ እምነት አላቸው ማለት ነው?
  • በሚገርም ሁኔታ እኛም ይኼንኑ ነበር ስንወያይ የነበረው፡፡
  • እና እዚህ ኢንቨስት ማድረግ ይፈልጋሉ?
  • አሁን አሁን እንኳን እነሱን ማሳመን እየከበደኝ ነው፡፡
  • ምኑ ነው የከበደህ?
  • እዚህ ኢንቨስት ማድረግ አይፈልጉም፡፡
  • ለምን?
  • ይኸው ሦስት ዓመት ሙሉ ብጥብጥ ስለነበር እምነታቸውን አጥተዋል፡፡
  • ለዚህች አገር እኮ ይኼ የሰላምና መረጋጋት ጉዳይ ዋነኛ ችግር እየሆነ ነው፡፡
  • ክቡር ሚኒስትር እነዚህ ሰዎች ለአገሪቱ ምን ያህል ጥቅም ያለው ፕሮጀክት ነበር ያሰቡት፡፡
  • ምን ታደርገዋለህ?
  • ባይገርምዎት ከዚህ ቀደም በተመሳሳይ ከሁለት ኢንቨስተሮች ጋር ለመሥራት ተስማምተን እንደዚሁ ፈረሰብኝ፡፡
  • ምን ትቀልዳለህ?
  • በኢንዱስትሪ ፓርኮቻችን ሥራ ሊጀምሩ አስበው በፀጥታው ሁኔታ ተደናግጠው ነው የሄዱት፡፡
  • እነሱ እንኳን አይጠቅሙንም፡፡
  • እንዴት ክቡር ሚኒስትር?
  • እኛ ቱሪስት ኢንቨስተር አንፈልግም፡፡
  • ምን ማለት ነው?
  • በየአገሩ እየዞሩ ይጠቅመኛል አይጠቅመኝም ብለው የሚሠሩትን ሳይሆን የምንፈልገው ከእኛው ጋር ሁሉን ነገር የሚጋፈጡትን ነው፡፡
  • አልገባኝም ክቡር ሚኒስትር?
  • እነዚህ ኪራይ ሰብሳቢዎች ናቸው፡፡
  • እንዴት ክቡር ሚኒስትር?
  • እንደዚህ ዓይነቶቹ ኢንቨስተሮች በየቀኑ ነው እኔ ጋ ቢመጡም ፊት አልሰጣቸውም፡፡
  • ለምን ክቡር ሚኒስትር?
  • እነዚህ ወዲያው በልተው ወዲያው መጥፋት ነው የሚፈልጉት፡፡
  • ታዲያ ምን ዓይነቶቹን ነው እኛ የምንፈልጋቸው?
  • ከእኛ ጋር በችግሩም በደስታውም ጊዜ የሚሆኑትን ነዋ፡፡
  • አሁን እኮ ደስታ የሚባል ነገር ጠፍቶ ይኸው ለሦስት ዓመት ችግር ነው የሰማነው፡፡
  • አየህ ሊነጋ ሲል ይጨልማል ስለሚባል ለዚያ ነው፡፡
  • ክቡር ሚኒስትር እርስዎን በሚኒስትርነት አውቅዎታለሁ፣ በኢንቨስተርነት አውቅዎታለሁ፣ በነብይነት ግን አላውቅዎትም፡፡
  • ከአንተም ጋር ተደፋፈርን ማለት ነው?
  • ኧረ እኔ ለጨዋታ ነው፣ እኔ ለነገሩ ችግር የለብኝም፡፡
  • ምን እያልክ ነው?
  • ዛሬ ከኢሕአዴግ ጋር እንደ ሠራሁት፣ ነገም ሌላ ከመጣ ከእሱም ጋር መሥራት አይከብደኝም፡፡
  • ምን አልክ አንተ?
  • ምነው ክቡር ሚኒስትር?
  • እንዴት እንደዚህ ልታስብ ትችላለህ?
  • ምን ችግር አለው ክቡር ሚኒስትር፣ እኔ እኮ ነጋዴ ነኝ፡፡
  • በዚህ ሥርዓት አይደለም እንዴ ከአፈር ተነስተህ እዚህ የደረስከው?
  • እሱንማ አልክድም ክቡር ሚኒስትር፣ ብዙ ተጠቅሜያለሁ፡፡
  • ታዲያ እንዴት ከሌላ መንግሥትም ጋር ቢሆን መሥራት እችላለሁ ትላለህ?
  • ጠቅላይ ሚኒስትሩ ለሰላማዊ የሥልጣን ሽግግር ዝግጁ ነኝ ስላሉ እሱንም ማሰቡ አይከፋም ብዬ ነዋ፡፡
  • እኔማ መቼ ሰላማዊ የሥልጣን ሽግግርን ተቃወምኩ?
  • እና ለሰላማዊ የሥልጣን ሽግግር ዝግጁ ነዎት?
  • በሚገባ እንጂ፣ እኔን ያስፈራኝ ሌላኛው ሽግግር አይኖርም ብዬ ነው፡፡
  • ሌላኛው ሽግግር ምንድነው?
  • ሰላማዊ የሀብት ሽግግር!

[አንድ በውጭ የሚኖር ተቃዋሚ ለክቡር ሚኒስትሩ ስልክ ደወለላቸው]

  • ሄሎ ክቡር ሚኒስትር፡፡
  • የእኛ ኪራይ ሰብሳቢ፡፡
  • ክቡር ሚኒስትር በቃ አበቃላችሁ እኮ፡፡
  • ምኑ ነው ያበቃው?
  • ተበላችሁ እኮ፡፡
  • ምኑን ነው የተበላነው?
  • ቁማሩን ተበላችሁ፡፡
  • ምን እያወራህ እንደሆነ አልገባኝም?
  • ይኸው ሕዝቡ እስረኛ አስፈታችሁ፣ አሁን ደግሞ ጠቅላይ ሚኒስትሩን ሊያስቀይራችሁ ነው፡፡
  • እናንተ ለዚህ ነው ይህችን አገር ለመምራት ብቃቱም፣ አቅሙም የላችሁም የምንለው፡፡
  • ምን እያሉ ነው ክቡር ሚኒስትር?
  • እኛ እኮ እስረኞቹንም ለመፍታት ሆነ ጠቅላይ ሚኒስትሩ ከሥልጣን እንዲወርዱ ከተስማማን ቆየን፡፡
  • ክቡር ሚኒስትር እጃችሁን ተጠምዝዛችሁ እንጂ ተስማምታችሁ አይደለም፡፡
  • ስነግርህ ጠቅላይ ሚኒስትሩ ሥልጣናቸውን መልቀቅ ከፈለጉ ቆይተዋል፤ እኛ እስክንተካቸው ነበር የቆዩት፡፡
  • እናንተማ መቼም እንደማታምኑ አውቃለሁ፡፡
  • ስማ ምንም ይፈጠራል ብለህ እንዳታስብ፡፡
  • እሱንስ እንኳን ይተውት፡፡
  • ማለት?
  • እኔ አሁን ጮቤ እየረገጥኩ ነው፡፡
  • ለምኑ?
  • በቃ ክቡር ሚኒስትር አብቅቶላችኋል፣ እኔም ሻንጣዬን እያዘጋጀሁ ነው፡፡
  • ምን ለማድረግ?
  • አገሬ ለመግባት ነዋ፡፡
  • እስቲ አታስቀኝ?
  • ይኸው ጠቅላይ ሚኒስትሩ ሰላማዊ የሥልጣን ሽግግር ይኖራል እያሉ አይደል እንዴ?
  • ዶሮ ብታልም ጥሬዋን አሉ፡፡
  • አገሬ መግባቴ አይቀርም ስልዎት፡፡
  • ለነገሩ ይኼንን ማሰቡ አይከፋም፡፡
  • እንዴት?
  • አንድ ቀን አገራችሁ ትገቡ ይሆናል፡፡
  • ክቡር ሚኒስትር እርስዎም ውስጥዎት ያውቀዋል በቅርቡ መሆኑ አይቀርም፡፡
  • በነገራችን ላይ አሜሪካ ጥሩ ቤት አለህ አሉ፡፡
  • እሱንም ትቼው እምጣለሁ፡፡
  • እኔም እዚህ ጥሩ ቤት ስላለኝ አንድ ነገር አስቤ ነበር፡፡
  • ምን ክቡር ሚኒስትር?
  • ብንቀያየር ብዬ ነዋ፡፡
  • ምኑን?
  • ቤታችንን!

[ለክቡር ሚኒስትሩ አንድ ደላላ ይደውልላቸዋል]

  • ክቡር ሚኒስትር ተቸገርን እኮ፡፡
  • ምንድነው የተቸገርከው?
  • ምንም ሥራ መሥራት አልተቻለም፡፡
  • ምን ሆንክ ደግሞ?
  • አንዴ መንገድ ተዘግቶ አገር ይታመሳል፡፡
  • ምን ይኼ አዲስ ነገር ነው?
  • ሰላም ነው ብለን ደግሞ ሥራ ስንጀምር በድጋሚ ይታመሳል፡፡
  • ታዲያ ምን ይጠበስ?
  • መንግሥት ምን እየሠራ ነው?
  • ሥራውን እየሠራ ነዋ፡፡
  • ይኸው ንግዱም ቆሟል፣ ሁሉም እንቅስቃሴ ቆሟል፡፡
  • ስማ እኔም ንግዱ ውስጥ ስላለሁ ሁሉን ነገር ጠንቅቄ አውቀዋለሁ፡፡
  • ታዲያ ትንሽ አይቆጭዎትም?
  • ለዚያ አይደል እንዴ መፍትሔ ለማምጣት ጠብ እርግፍ እያልን ያለነው፡፡
  • ግን ምንም ዓይነት መሻሻል እያየን አይደለም፡፡
  • እንቅልፍ አጥተን ነው እየሠራን ያለነው፡፡
  • የሚመስለው ግን አውቃችሁ የተኛችሁ ነው፡፡
  • እንዴት ማለት?
  • ብትቀሰቀሱ አልሰማም አላችኋ?
  • ሰውዬ ልትጨቀጭቀኝ ነው የደወልከው?
  • እሱማ አንድ ጉዳይ ነበረኝ፡፡
  • የምን ጉዳይ?
  • በአካል ተገናኝተን ነው ማውራት ያለብን፡፡
  • ጫፉን ንገረኛ?
  • መሬት የሚፈልጉ ሰዎች ነበሩ፡፡
  • በዚህ ጊዜም መሬት እየደለልክልኝ ነው?
  • እንዲያውም ማጧጧፍ ያለብን በዚህ ወቅት ነው፡፡
  • ለምን?
  • ነገ ምን እንደሚፈጠር አይታወቅማ፡፡
  • በቃ ይኸው ነው ጉዳይህ?
  • በዚያውም እንኳን አደረሰዎት ለማለት ነው?
  • ፋሲካ ገና አይደል እንዴ?
  • ኧረ ለዓመታዊው በዓላችን ነው፡፡
  • ለምኑ?
  • ለአስቸኳይ ጊዜ አዋጁ!

[ክቡር ሚኒስትሩ የፓርቲ ስብሰባ ውስጥ ናቸው]

  • ክቡር ሚኒስትር በጠቅላይ ሚኒስትሩ መልቀቅ ምን ያስባሉ?
  • የጠቅላይ ሚኒስትሩ ውሳኔ ትክክል ነው ባይ ነኝ፡፡
  • እንዴት ክቡር ሚኒስትር?
  • ሌሎቻችንም እንደ አርዓያ ልንከተለው የሚገባ ነዋ፡፡
  • ይኼ ነው ሐሳብዎ?
  • ሊታሰብበት የሚገባው ጉዳይ ሌላ ነው፡፡
  • ምንድነው እሱ?
  • የሚተካቸው ሰው ማን መሆን አለበት የሚለው ነዋ፡፡
  • እርስዎ ማን ይተካቸው ይላሉ?
  • ሕዝቡ እውነተኛ ለውጥ ነው የሚፈልገው፡፡
  • እሱማ ትክክል ነው፡፡
  • ስለዚህ በእኔ አስተያየት ቀጣዩ ጠቅላይ ሚኒስትር ከእሳቸው የሚያጥር መሆን አለበት፡፡
  • ምን?
  • ከዚያም ባለፈ መነጽር የማያደርግ ቢሆን ይሻላል፡፡
  • አበዱ ማለት ነው ክቡር ሚኒስትር?
  • ሕዝቡ እውነተኛ ለውጥ ነው የሚፈልገው ስላችሁ?
  • እና ይኼ ነው እውነተኛ ለውጥ ለእርስዎ?
  • ከቁመናው ባሻገር ራሰ በረሃ ሆኖ የደም ግባት ቢኖረው ይሻላል ባይ ነኝ፡፡
  • ቀጥለው እኔን ምረጡኝ እንዳይሉ?
  • ኧረ በፍጹም፡፡
  • የሚመረጠው ሰው እኮ ለቁንጅና ውድድር አይደለም የሚፈለገው?
  • እሱንማ አውቃለሁ፡፡
  • የሚመረጠው ሰው አገሪቷን ከገባችበት ቀውስ ሊያወጣት የሚችል መሪ መሆን አለበት፡፡
  • ለዚያ ነው እኮ ሰውየው እነዚህን ነገሮች ማሟላት ያለበት፡፡
  • ክቡር ሚኒስትር ስለጤነኝነትዎ እየተጠራጠርን ነው፡፡
  • እንግዲህ መስማማት ካልቻልን አንድ አስታራቂ ሐሳብ ላቅርብ፡፡
  • ምንድነው እሱ?
  • የሚፈለገው መሪ ኢትዮጵያን ወደ አንድነት የሚያመጣ መሆን አለበት፡፡
  • ለዚያ አይደል እንዴ እየተወያየን ያለነው፡፡
  • ስለዚህ በጋዜጣ ማውጣት ነዋ፡፡
  • ምንድነው የምናወጣው
  • የሥራ ማስታወቂያ!