Skip to main content
x
ወደ ዓረብ አገሮች ለሚሄዱ ዜጎች የጤና ምርመራ የሚያደርጉ የሕክምና ተቋማት ተለዩ

ወደ ዓረብ አገሮች ለሚሄዱ ዜጎች የጤና ምርመራ የሚያደርጉ የሕክምና ተቋማት ተለዩ

ለቤት ሠራተኝነትና ለሌሎች ሥራዎች ወደ ዓረብ ባህረ ሰላጤ አገሮች ለሚሄዱ ኢትዮጵያውያንን የጤና ምርመራ አገልግሎት የሚሰጡ የሕክምና ተቋማትን መለየቱን ጤና ጥበቃ ሚኒስቴር አስታወቀ፡፡

የባህረ ሰላጤውን አገሮች ምክር ቤት የጤና መመዘኛ መሥፈርት አሟልተው የተገኙት የሕክምና ተቋማት 70 ብቻ መሆናቸውን የገለጸው ጤና ጥበቃ ሚኒስቴር፣ ባወጣው ማስታወቂያ መሠረት ተመዝግበው የነበሩት ግን 111 እንደነበሩ አስታውቋል፡፡

የጤና ጥበቃ ሚኒስቴር የጤና አገልግሎት ዳይሬክቶሬት ከፍተኛ ኦፊሰር አቶ ዓብይ ዳዊት እንደገለጹት፣ የጤና ተቋማቱ የተመረጡት ከፌዴራልና ከክልል ከተሞች ነው፡፡ አንድ የጤና ተቋም ብቃት ያለው የውስጥ ደዌ ሕክምና ራዲዮሎጂስትና ኤሌክትሮኒክ ዲጂታል ሜዲካል ሲስተም ሊኖረው እንደሚገባ፣ ይኼም የባህረ ሰላጤው አገሮች ምክር ቤት የጤና መመዘኛ መሥፈርት መሆኑን አስረድተዋል፡፡

በመሥፈርቱ መሠረት ሙሉ ሆነው ከተገኙት ወይም ከተመረጡት ውስጥ 50 ያህሉ ከአዲስ አበባ ሲሆኑ፣ 20 ደግሞ ከክልል ከተሞች መሆኑን አክለዋል፡፡

የተመረጡ የጤና ተቋማት ሥራ የሚጀምሩት ከዓረብ ባህረ ሰላጤ አገሮች ምክር ቤት ጋር ከተፈራረሙ በኋላ መሆኑም ታውቋል፡፡ ተቋማቱ የተመረጡት ጥንቃቄ በተሞላበት ሁኔታ ሲሆን፣ ይኼም የተደረገበት ዋናው ምክንያት ከኢትዮጵያ ወደ ባህረ ሰላጤው አገሮች የሚሄዱት ሠራተኞች ይዘዋቸው በሚሄዱ በሽታዎች ሰለባ መሆናቸውን የአገሮቹ ዜጎች በመግለጻቸው መሆኑም ተጠቁሟል፡፡

ኢትዮጵያውያን ወደ ባህረ ሰላጤው አገሮች እንዳይሄዱ ከ2006 ዓ.ም. ጀምሮ በመንግሥት ታግዶ የቆየ ቢሆንም፣ መንግሥት ሕጉን አሻሽሎና ከሳዑዲ ዓረቢያ በስተቀር ከሦስት አገሮች ጋር ስምምነት ላይ በመድረሱ ከጥር 22 ቀን 2010 ዓ.ም. ጀምሮ ዕገዳውን በማንሳት በ20 ኤጀንሲዎች አማካይነት ዜጎች መሄድ እንዲችሉ መፈቀዱን መዘገባችን ይታወሳል፡፡

ነገር ግን መንግሥት ለ20 ኤጀንሲዎች ፈቃድ የሰጠ ቢሆንም፣ ሁሉም አሁንም ወዳልተፈቀደባት ሳዑዲ ዓረቢያ ለመላክ የሚያስችል ብቻ ፈቃድ የተሰጣቸው ስለሆነ ወደ ሌሎች አገሮች መላክ እንደማይችሉ ታውቋል፡፡