Skip to main content
x
የእግር ኳስ ፌዴሬሽን አመራሮች ምርጫ ለአራተኛ ጊዜ ተራዘመ
ውጣ ውረድ ያልተለየው የኢትዮጵያ እግር ኳስ ፌዴሬሽን በአራት ወር ውስጥ ካካሄዳቸውና ካልተሳኩት የምርጫ ጉባዔዎች አንዱ

የእግር ኳስ ፌዴሬሽን አመራሮች ምርጫ ለአራተኛ ጊዜ ተራዘመ

የሥራ ዘመኑን በፈጸመው የኢትዮጵያ እግር ኳስ ፌዴሬሽን ሥራ አስፈጻሚ ኮሚቴና ፕሬዚዳንት ምትክ ምርጫ ለማካሄድ ለየካቲት 24 ቀን 2010 ዓ.ም. ተቀጥሮ የነበረው ጉባዔ ለአራተኛ ጊዜ ተራዘመ፡፡

ብሔራዊ ፌዴሬሽኑ ባለፈው ሐሙስ እንዳስታወቀው ምርጫው ላልተወሰነ ጊዜ የተራዘመው በዓለም አቀፍ ተቋሙ አማካይነት ነው፡፡ የፊፋ  ልዑካን መጋቢት 3 ቀን ከመጣ በኋላ በሚከናወነው ተግባር የምርጫ ቀኑ ይቆረጣል ብሏል፡፡

በአፋር ክልል ሰመራ ከተማ ሊካሄድ የነበረው የፕሬዚዳንታዊና የሥራ አስፈጻሚ ምርጫ መጀመርያ ኅዳር 1 ቀን ለማካሄድ ታስቦ የነበረ ቢሆንም፣ በነበረው ውዝግብ ለታኅሣሥ 16 ቀን ከዚያም ለጥር 5 ቀን፣ በመጨረሻም የካቲት 24 ቀን ለማከናወን ታቅዶ ነበር፡፡

ባለፈው ጥር ብሔራዊ ፌዴሬሽኑ ምርጫው የሚካሄድበትን ቀን ለፊፋናካፍ አስቀድሞ ባለማሳወቁ ምክንያት ምርጫው መራዘሙን ፊፋ በላከው ደብዳቤ ማሳወቁ ይታወቃል። ምርጫው ለአራተኛ ጊዜ ለመተላለፉ ሌላው ሰበብ ምርጫው የሚካሄድበት ቀንና የጉባዔው አጀንዳ  ለክልል እግር ኳስ ፌደሬሽኖች አስቀድሞ አለመድረሱ  ነው፡፡

ቀደም ባሉት ጊዜያት ከአስመራጭ ኮሚቴና ከአባላቱ ጋር በተያያዘ የተነሱት ውዝግቦች ተከትሎ ከፊፋ ጋር በተለያዩ አካላት በተደረጉት የደብዳቤ ልውውጦች የምርጫው ቀን መቀያሩ ይታወቃል፡፡

ፊፋ በጥር ወር ልኮት በነበረው ደብዳቤው ምርጫውን ለማካሄድ አስቀድሞ መጣራት ያለባችው ጉዳዮች በመኖራቸው እንዲራዘም በጠየቀው መሠረት የካቲት 24 ቀን እንዲሆን መወሰኑ ይታወሳል፡፡

ፊፋ ከታኅሣሥ 16 ወደ የካቲት 24 ቀን የተንከባለለውን የኢትዮጵያ እግር ኳስ ፌዴሬሽን የአመራሮች ምርጫ ጉዳይን አስመልክቶ ለአስመራጭ ኮሚቴው ሰብሳቢና በግልባጭ ለፌዴሬሽኑ ያኔ የላከው ደብዳቤ ይዘትና ጭብጥ ፌዴሬሽኑ ሊከተለው የሚገባው የምርጫ መመርያ የፊፋን ደንብና መመርያ መነሻ ያደረገ መሆን እንዳለበት አስረግጦ አውስቷል፡፡

ይሁንና ይህንኑ ደንብና መመርያ ተግባራዊ መድረግ አለመደረጉ የሚወሰነው ደግሞ በቃል ብቻ ‹‹እንቀበለዋለን›› ከሚለው ባሻገር ደንቡን በጠቅላላ ጉባዔ አፀድቆ መመርያ ሲያደርገው እንደሆነ በመግለጽም አሳስቦ ነበር፡፡ ፌዴሬሽኑ ለጊዜው ቀደም ሲል ሲሄድበት በነበረው ዓይነት አሁንም ምርጫውን ማከናወን እንደሚችል፣ የምርጫ ኮዱን በሚመለከት ደግሞ ፊፋ ከአዲሱ አመራር ጋር በሒደት ተነጋግሮ ተፈጻሚ እንደሚያደርገው መግለጹ በወቅቱ  መዘገባችን አይዘነጋም፡፡

የዘንድሮ ምርጫሰላማዊና በዕርጋታ ለማከናወን በሚቻልበት ዙሪያ ለመወያየት የፊፋ ልዑክ መጋቢት 3 ቀን አዲስ አበባ እንደሚደርስ ይጠበቃል፡፡ የፊፋ ልዑክ በምርጫው ዙሪያ ከሚመለከታቸው አካላት ጋር ውይይት ካደረገ በኋላ ምርጫው የሚካሄድበትን ቀን ይፋ እንደሚያደርግ ይጠበቃል፡፡