Skip to main content
x
በአህጉራዊ ጨዋታ ቅዱስ ጊዮርጊስና ወላይታ ድቻ ይጠበቃሉ

በአህጉራዊ ጨዋታ ቅዱስ ጊዮርጊስና ወላይታ ድቻ ይጠበቃሉ

በቶታል ካፍ አፍሪካ ሻምፒዮና ሊግ ጨዋታ ቅዱስ ጊዮርጊስ የዑጋንዳውን ክለብ ኬሲቪኤን ሲገጥም ወላይታ ድቻ በኮንፌዴሬሽን ዋንጫ ጨዋታ የግብፅ ዛማሌክን ይገጥማል፡፡

በዘንድሮው የካፍ ውድድር ላይ ኢትዮጵያን ወክለው የሚጫወቱት ሁለቱ ክለቦች ዛሬ የካቲት 28 ቀን 2010 ዓ.ም. በአዲስ አበባና በሐዋሳ ስታዲየሞች ያከናውናሉ፡፡

ለ14 ጊዜ የኢትዮጵያ ፕሪሚየር ሊግ የዋንጫ ባለቤት ቅዱስ ጊዮርጊስ ወደ ምድብ ድልድል የሚወስደውን የመጀመሪያ ዙር ጨዋታ የ12 ጊዜ የዑጋንዳ ፕሪሚየር ሊግ አሸናፊን ይገጥማል፡፡

ቅዱስ ጊዮርጊስ ወቅታዊ አቋሙ ጫና ውስጥ እንደከተተው ቢገለጽም የማሸነፍ ግምቱ እንዲሁ እንደተሰጠው ይነገራል፡፡ ከወትሮው በተለይ በኢትዮጵያ ፕሪሚየር ሊግ ወጥ አቋም ማሳየት የተሳነው ክለቡ ካለው ወቅታዊ ውጤት አንፃር ፈታኝ ይሆንበታል የሚሉም አልታጡም፡፡

ቅዱስ ጊዮርጊስ ባለፉት 15 የፕሪሚየር ሊግ ጨዋታዎች 23 ነጥብ ብቻ በመሰብሰብ አራተኛ ደረጃ ላይ ተቀምጧል፡፡ ከዚህም ባሻገር በተለየ በወላይታ ድቻ የ2ለ1ና በሐዋሳ 4ለ1 ሽንፈት ከደረሰበት በኋላ ክለቡ ያለበትን ወቅታዊ አቋም አሳማኝ እንዳልሆነ እየተገለጸ ይገኛል፡፡

በቅድመ ማጣሪያ ጨዋታ ከደቡብ ሱዳን ክለብ አልሰላም ዋው ፎርፌ አግኝቶ ወደ ቀጣዩ ዙር ማለፉ ይታወሳል፡፡

በሌላ በኩል በካፍ ኮንፌዴሬሽን ዋንጫ የሚካፈለው ወላይታ ድቻ የግብፅ ኃያል ክለብ ዛማሊክን በሐዋሳ ስታዲየም ያስተናግዳል፡፡ ለመጀመሪያ ጊዜ ለካፍ ኮንፌዴሬሽን ዋንጫ ሻምፒዮና የሚሳተፈው ድቻ በፊፋ ማጣሪያ የዛንዚባሩን ዘማሞቶ 2ለ1 ድምር ውጤት ረቶ ነበር ወደ መጀመርያ ዙር ማጣሪያ ጨዋታ መግባት የቻለው፡፡

በሐዋሳ ስታዲየም ብዙ ተመልካች በጉጉት የሚጠብቀው ጨዋታ ሲሆን፣ የግብፅ የ12ኛ ጊዜ የፕሪሚየር ሊግ አሸናፊ የሆነው ዛማሊክ ለወላይታ ድቻ ፈታኝ እንደሚሆንበት እየተገለጸ ይገኛል፡፡

ዛማሌክ በአፍሪካ ሻምፒዮንስ ሊግ አምስት ጊዜ ስኬታማ መሆን የቻለ ክለብ ሲሆን፣ በአፍሪካ የአሸናፊዎች አሸናፊ ዋንጫ፣ የዓረብ ክለቦች ዋንጫ፣ እንዲሁም የተለያዩ ዓለም አቀፍ ውድድሮች በመሳተፍ ስኬታማ ጉዞን መጓዝ ችሏል፡፡

ድቻ የመልስ ጨዋታውን ከመጋቢት 7 እስከ 8 ቀን በካይሮ ዓለም አቀፍ ስታዲየም ሲያደርግ፣ ቅዱስ ጊዮርጊስም የመልስ ጨዋታውን መጋቢት 8 ቀን ካምፓላ ሌጎጎ ስታዲየም ያከናውናል፡፡

በአፍሪካ ሻምፒዮንስ ሊግ የመጀመሪያ ዙር ውድድር በደርሶ መልስ ጨዋታ ከሚሳተፉ 32 አገሮች 16 ወደ ምድብ ድልድል ይገባሉ፡፡ በአምናው የአፍሪካ ሻምፒዮንስ ሊግ በታሪኩ ለመጀመሪያ ጊዜ ወደ ምድብ ድልድሉ ውስጥ መግባት የቻለው ቅዱስ ጊዮርጊስ ዘንድሮም የተሻለ ውጤት በማስመዝገብ የሻምፒዮንስ ሊግ ጉዞን ለማሳካት ትልቅ ዝግጅት እንደሚጠብቀው የብዙዎች አስተያየት ነው፡፡