Skip to main content
x
ኢትዮጵያና ሩሲያ የኑክሌር ኢነርጂ ለመገንባት ተስማሙ
የሩሲያ የውጭ ጉዳይ ሚኒስትር ሰርጌ ላቭሮቭ

ኢትዮጵያና ሩሲያ የኑክሌር ኢነርጂ ለመገንባት ተስማሙ

ኢትዮጵያና ሩሲያ የኑክሌር ኢነርጂ ለመገንባት ተስማሙ፡፡ የሩሲያ የውጭ ጉዳይ ሚኒስትር ሰርጌ ላቭሮቭ ከሐሙስ የካቲት 29 ቀን 2010 ዓ.ም. ጀምሮ ለሁለት ቀናት ይፋ የሥራ ጉብኝት ወቅት እንደተናገሩት፣ ሁለቱ አገሮች በኑክሌር ኢነርጂ ተባብረው ለመሥራት ስምምነት ላይ ደርሰዋል፡፡ ሁለቱ አገሮች ከኑክሌር ኢነርጂ በተጨማሪ በሳይንስና ቴክኖሎጂ፣ እንዲሁም በትምህርት ዘርፍ በትብብር ለመሥራት ስምምነት ላይ ደርሰዋል፡፡

‹‹ዕቅዳችን የሁለቱን አገሮች ግንኙነት ወደፊት ለማስኬድና የተፈራረምናቸውን ጉዳዮች ተፈጻሚ እንዲሆኑ ለማስቻል ነው፤›› ሲሉ ሪፖርተር ላቀረበላቸው ጥያቄ ምላሽ ሰጥተዋል፡፡

ሁለቱ አገሮች ለሰላማዊ ጥቅም የሚውል የኑክሌር ኢነርጂ በጋራ ለማበልፀግ ስምምነት ላይ መድረሳቸው ተጠቁሟል፡፡

የውጭ ጉዳይ ሚኒስትር ወርቅነህ ገበየሁ (ዶ/ር) በበኩላቸው፣ ሩሲያ ለኢትዮጵያ የዕዳ ስረዛ ማድረጓን ጠቁመዋል፡፡ ከውጭ ጉዳይ ሚኒስቴር የተገኘው መረጃ እንደሚያመለክተው የላብሮቭ ወደ ኢትዮጵያ መምጣትን ተከትሎ ሩሲያ ለኢትዮጵያ የ162 ሚሊዮን ዶላር ዕዳ መሰረዟ ታውቋል፡፡

አሥራ ሦስት ሺሕ ኢትዮጵያውያን በሩሲያ በተለያዩ ዘርፎች ትምህርታቸውን እንደተከታተሉ ታውቋል፡፡ እነዚህ ተማሪዎች ለሁለቱ አገሮች ግንኙነት እንደ ድልድይ ሆነው ያገለግላሉ ሲል የውጭ ጉዳይ ሚኒስቴር ባወጣው መግለጫ አስታውቋል፡፡

ለአፍሪካ አገሮች አፍሪካዊ መፍትሔ የሚለውን መርህ ሩሲያ እንደምትደግፍ የገለጹት ሰርጌ ላብሮቭ፣ በአካባቢ ሰላምና በባለብዙ ወገን አጀንዳዎች ላይ አገራቸው ከኢትዮጵያ ጋር ተባብራ ትሠራለች ብለዋል፡፡