Skip to main content
x
ሕዝብንና መንግሥትን 34.6 ሚሊዮን ብር አሳጥተዋል የተባሉ ተጠርጣሪ ታሰሩ

ሕዝብንና መንግሥትን 34.6 ሚሊዮን ብር አሳጥተዋል የተባሉ ተጠርጣሪ ታሰሩ

ከቂርቆስ ክፍለ ከተማ ማኅበራት ማደራጃ ባለሙያዎች ጋር በመመሳጠር፣ መንግሥትና ሕዝብ ሊያገኙ ይችሉት የነበረን ከ34.6 ሚሊዮን ብር በላይ ገቢ በማሳጣት የተጠረጠሩ ግለሰብ ታሰሩ፡፡

ተጠርጣሪው አቶ ፀጋዬ በርሔ ገብረ እግዚአብሔር የሚባሉ ናቸው፡፡ በክፍለ ከተማው ወረዳ 11 ውስጥ ነዋሪ መሆናቸውንና መንግሥትና ሕዝብ ሊያገኙት ይችሉ የነበረን 34,671,491 ብር አሳጥተዋል የተባሉት፣ 2,408 ካሬ ሜትር ስፋት ቦታ በመሸጥ 1,100,000 ብር ለግል ጥቅማቸው በማዋል መሆኑን፣ የፌዴራል ፖሊስ ኮሚሽን የወንጀል ምርመራ ቢሮ ለፍርድ ቤት አስረድቷል፡፡

ግለሰቡ ከማኅበራት ማደራጃ ባለሙያዎች ጋር በመመሳጠር አድራሻ የሌላቸውን አባላት ስም በሕገወጥ መንገድ ‹‹ግራር 1996 የጋራ መኖሪያ ቤት ኅብረት ሥራ ማኅበር›› በሚል ስያሜ የሚጠራ ማደራጀታቸውን፣ መርማሪ ፖሊስ ለፌዴራል ከፍተኛ ፍርድ ቤት አስረኛ ወንጀል ችሎት አስረድቷል፡፡

ግለሰቡ ሐሰተኛ ማኅበሩን ከመሠረቱ በኋላ፣ የአቅም ማሳያ ገንዘብ በባንክ ያስያዙ በማስመሰልና ሐሰተኛ ሰነድ በመጠቀም ቦታውን መውሰዳቸውንም አክሏል፡፡

ተጠርጣሪው ማኅበሩን በሕገወጥ መንገድ ካደራጁት የማኅበሩ አመራሮች ጋር ግንኙነት በማድረግ ቦታውን ለሌሎች ሦስተኛ ወገኖች አሳልፈው መስጠታቸውን መርማሪው አስረድተዋል፡፡ በመሆኑም ተጨማሪ ምርመራ ለማድረግ በወንጀለኛ መቅጫ ሥነ ሥርዓት ሕግ ቁጥር 59(2) መሠረት 14 ቀናት ተጨማሪ የምርመራ ጊዜ ጠይቋል፡፡

ተጠርጣሪው ዋስትና የጠየቁ ቢሆኑም ተቀባይነት አላገኙም፡፡ ፖሊስም ከጠየቀው ተጨማሪ ጊዜ ውስጥ ሰባት ቀናት ተፈቅዶለት ለመጋቢት 5 ቀን 2010 ዓ.ም. ቀጠሮ ተሰጥቷል፡፡