Skip to main content
x
የኢሕአዴግ ሥራ አስፈጻሚ ኮሚቴ ስብሰባ ተቀምጧል
የደኢሕዴን ሊቀመንበርና የኢሕአዴግ ጽሕፈት ቤት ኃላፊ አቶ ሽፈራው ሽጉጤ

የኢሕአዴግ ሥራ አስፈጻሚ ኮሚቴ ስብሰባ ተቀምጧል

መካሄድ ከነበረበት ጊዜ ዘግይቶ እሑድ መጋቢት 2 ቀን 2010 ዓ.ም. የሚጀመረው የኢሕአዴግ ሥራ አስፈጻሚ ኮሚቴ፣ አገሪቱ ያለችበትን ወቅታዊ ሁኔታና ከዓመት በፊት ያካሄደውን ጥልቅ ተሃድሶ አፈጻጸም ገምግሞ ቀጣይ አቅጣጫዎችን ለማሳየት ስብሰባ ተቀመጠ፡፡  

የደኢሕዴን ሊቀመንበርና የኢሕአዴግ ጽሕፈት ቤት ኃላፊ አቶ ሽፈራው ሽጉጤ የካቲት 29 ቀን 2010 ዓ.ም. በሰጡት ጋዜጣዊ መግለጫ እንዳስታወቁት፣ አራቱም የግንባሩ ብሔራዊ ድርጅቶች ማለትም የሕወሓት፣ የብአዴን፣ የኦሕዴድና የደኢሕዴን አባላት የኢሕአዴግ ሥራ አስፈጻሚ ኮሚቴን ግምገማን መሠረት አድርገው ባካሄዱት የግምገማ ውጤት ላይ ሥራ አስፈጻሚው ውይይት ያደርጋል፡፡

የኢሕአዴግ ሥራ አስፈጻሚ ኮሚቴ በታኅሳስ ወር 2010 ዓ.ም. ስብሰባ ማካሄዱንና ውሳኔዎችን ማስተላለፉን ያስታወሱት አቶ ሽፈራው፣ የተላለፉትን ውሳኔዎች ብሔራዊ ድርጅቶቹ እንዴት እየፈጸሟቸው እንደሆነ ሥራ አስፈጻሚው ግምገማ እንደሚያደርግ ገልጸዋል፡፡ በመላ አገሪቱ ላለፉት ስድስት ወራት የተከናወኑ ሥራዎችንና ፀድቀው ወደ ሥራ የገቡ ዕቅድ አፈጻጸሞችም የሥራ አስፈጻሚ ኮሚቴው የግምገማው አካል መሆናቸውን አክለዋል፡፡

የካቲት 23 ቀን 2010 ዓ.ም. በሕዝብ ተወካዮች ምክር ቤት የፀደቀው አስቸኳይ ጊዜ አዋጅ ተግባራዊ ሊሆን እንደሚችል በተባበረ ድምፅ የተወሰነው፣ ሥራ አስፈጻሚ ኮሚቴው በታኅሳስ ወር ወቅታዊ ሁኔታዎችን ታሳቢ በማድረግ ባደረገው ስብሰባ መሆኑን አቶ ሽፈራው ተናግረዋል፡፡ በወቅቱ በምሥራቃዊ የአማራ ክልል አካባቢዎችና በኦሮሚያ ክልል አንዳንድ አካባቢዎች የፀጥታ ችግር መከሰቱም ለአስቸኳይ ጊዜ አዋጁ መታወጅ ምክንያት መሆኑን ጠቁመዋል፡፡

የአስቸኳይ ጊዜ አዋጁን ተግባራዊ ማድረግና የአገሪቱን የፀጥታ ችግር ማስተካከል፣ እንዲሁም የብሔራዊ ድርጅቶቹ የተናጠል ጉባዔዎችን ማካሄደ ወቅታዊና ተቀዳሚ ሥራዎች እንደነበሩ የገለጹት አቶ ሽፈራው፣ በእነዚህ ምክንያቶች የሥራ አስፈጻሚውና የምክር ቤት ስብሰባዎች ሳይካሄዱ ሊዘገዩ መቻላቸውን አብራርተዋል፡፡

በመሆኑም ሥራ አስፈጻሚው በቅርቡ ኃላፊነታቸውን በፈቃዳቸው መልቀቃቸውን ገልጸው መልቀቂያ ባቀረቡት ጠቅላይ ሚኒስትር ኃይለ ማርያም ደሳለኝ ምትክ ለመተካት፣ ተወያይቶ ለምክር ቤቱ እንደሚያቀርብም አቶ ሽፈራው ተናግረዋል፡፡ ሥራ አስፈጻሚ ኮሚቴው ውይይቱን እንዳበቃ የኢሕአዴግ ምክር ቤት ስለሚሰበሰብ፣ በሳምንቱ ውስጥ (ትክክለኛ ቀኑን አልገለጹም) የኢሕአዴግ ሊቀመንበር እንደሚመረጥና በኢሕአዴግ አሠራር መሠረት ሊቀመንበሩ ጠቅላይ ሚኒስትር እንደሚሆን ገልጸዋል፡፡

ሌላው አቶ ሽፈራው የገለጹት የኢሕአዴግ ድርጅታዊ ጉባዔ በየሁለት ዓመቱ የሚደረግ መሆኑን ነው፡፡ ነገር ግን የዘንድሮው ጉባዔ በአገሪቱ በተፈጠሩት ወቅታዊ ችግሮች ምክንያት ጉባዔው ከመጋቢት ወር ወደ ነሐሴ ወር 2010 ዓ.ም. እንዲተላለፍ ለብሔራዊ ድርጅቶቹ ማዕከላዊ ኮሚቴ አባላት ጥያቄ እንደሚቀርብ አክለዋል፡፡ በኢሕአዴግ ሕገ ደንብ መሠረት ለስድስት ወራት ማራዘም እንደሚቻልና በምክር ቤቱ የሚሳተፉት የብሔራዊ ድርጅቶቹ ማዕከላዊ ኮሚቴ አባላት በመሆናቸው፣ ጥያቄው ተፈቅዶ እንደሚራዘም ያላቸውን እምነት ተናግረዋል፡፡