Skip to main content
x
ስድስት ሚሊዮን ብር በማጭበርበር የተጠረጠሩ ተከሰሱ

ስድስት ሚሊዮን ብር በማጭበርበር የተጠረጠሩ ተከሰሱ

የአደራ ዕቃ እንደያዙና ግምቱም 30 ሚሊዮን ብር እንደሆነ በመግለጽ፣ ከአንድ ግለሰብ ስድስት ሚሊዮን ብር በማጭበርበር ወስደዋል የተባሉ አምስት ተጠርጣሪዎች ክስ ተመሠረተባቸው፡፡

ተጠርጣሪዎች አቶ ጌትነት አዳነ፣ አቶ ብርሃኑ፣ በተለያዩ ስሞች የሚጠሩት ወ/ሮ ፀሐይ/ራሔል/ዓለሜ ኢሳ፣ ወ/ሮ ሃናን መሐመድ ሱሌማንና አቶ ዳዊት የሚባሉ ናቸው፡፡ ተጭበርብረው ስድስት ሚሊዮን ብር ተወስዶባቸዋል የተባሉት ተበዳይ ደግሞ፣ አቶ መሐመድ ሰዒድ ናጂ ይባላሉ፡፡

አቶ መሐመድ ሰዒድ ለፌዴራል ከፍተኛ ፍርድ ቤት ልደታ ምድብ ሰባተኛ ፍትሐ ብሔር ችሎት ያቀረቡት ክስ እንደሚያስረዳው፣ በሐምሌ ወር 2009 ዓ.ም. ከስታዲዮም ወደ ፍልውኃ መስጂድ መኪናቸውን እያሽከረከሩ ሲሄዱ፣ ወ/ሮ ሃናን የተባሉ ተከሳሽ እንዲያሳፍሯቸው ይጠይቋቸዋል፡፡

አቶ መሐመድ አሳፍረዋቸው እየተነጋገሩ ሲጓዙ፣ ወ/ሮ ሃናን ጥሩ ሥራ እንዳለ ይነግሯቸውና አብረው እንዲሠሩ በመጠየቅ አቶ ዳዊት ከሚባሉት ተከሳሽ ጋር መገናኛ አካባቢ ያገናኟቸዋል፡፡

ከአቶ ዳዊት ጋር ሲገናኙም በተመሳሳይ ሁኔታ ስላለው ጥሩ ሥራ በድጋሚ ነግረዋቸው አቶ ብርሃኑና ወ/ሮ ፀሐይ/ራሄል/ዓለሜ ከሚባሉት ተከሳሾች ጋር በመሆን፣ የማጭበርበሩ ዋና ተዋናይ መሆናቸው በክሱ ከተገለጹት አቶ ዳዊት ጋር ለመገናኘት ወደ ሒልተን ሆቴል ይዘዋቸው እንደሄዱ ክሱ ያብራራል፡፡

ተከሳሾቹ ለአቶ መሐመድ ጥሩ ሥራ ስላለ አብረን እንሥራ ያሏቸውና የአደራ ዕቃ እንደሆነ ገልጸው፣ ግምቱ 30 ሚሊዮን ብር መሆኑን የሰጧቸው ዕቃ አልማዝ መሆኑን እንደገለጹላቸው በክሱ ተጠቅሷል፡፡

የማይገባ ጥቅም ለማግኘት ተከሳሾቹ በግብረ አበርነት በመመሳጠር ‹‹ከሰው ጋር ስለተነጋገርን ስድስት ሚሊዮን ብር ስጡን፤›› በማለት አቶ መሐመድን በመጠየቅ፣ በተለያዩ ጊዜያት መውሰዳቸውን ክሱ ያስረዳል፡፡

አቶ መሐመድ ገንዘባቸውን ከሰጡ በኋላ፣ ተከሳሾቹ ደብዛቸውን በማጥፋታቸው ያስቀመጡትን ነገር ሲመለከቱ፣ ዕቃው እንደተባለው አልማዝ ሳይሆን ተራ ነገር መሆኑን በመረዳታቸውና እንደተታለሉ ስለገባቸው፣ ጉዳዩን ለፌዴራል ፖሊስ ማድረሳቸውንም ክሱ ያትታል፡፡ የፌዴራል ፖሊስ ወንጀል ምርመራ ቢሮ ባደረገው ክትትል የተወሰኑ ተጠርጣሪዎችን በቁጥጥር ሥር አውሎ እየመረመረ መሆኑንና ቀሪዎቹን ለመያዝ በክትትል ላይ መሆኑንም ክሱ ያብራራል፡፡  

አቶ መሐመድ የተፈጸመባቸው የማታለል ተግባር በፍትሐ ብሔር ሕግ ቁጥር 2162 የተደነገገውን መተላለፍ በመሆኑ፣ በሕግ ቁጥር 1896፣ 2028፣ 2035 እና 2162 መሠረት ዋናውን ገንዘብ ከእነ ወለዱ እንዲከፈላቸው ክሳቸውን ለፍርድ ቤቱ አቅርበዋል፡፡