Skip to main content
x
የኢትዮጵያ ምርት ገበያ አዲስ ሥራ አስፈጻሚ በቅርቡ ይፋ እንደሚደረግ ተገለጸ

የኢትዮጵያ ምርት ገበያ አዲስ ሥራ አስፈጻሚ በቅርቡ ይፋ እንደሚደረግ ተገለጸ

የኢትዮጵያ ምርት ገበያ ዋና ሥራ አስፈጻሚ የሥራ መልቀቂያ ማስገባታቸው ከተሰማ በኋላ የምርት ገበያው የቦርድ አመራሮች ከሠራተኛው ጋር ባደረጉት ውይይት ቀጣዩን የምርት ገበያው ዋና ሥራ አስፈጻሚ በቅርቡ እንደሚሰየሙ ማስታወቃቸው ተገለጸ፡፡

የሪፖርተር ምንጮች እንደገለጹት የምርት ገበያው ቦርድ ቀጣዩን የምርት ገበያ ዋና ሥራ አስፈጻሚ በቅርቡ እንደሚያስታውቁ ከመግለጻቸውም በላይ፣ ምርት ገበያው ሊከተለው ይገባል የተባለው አዲስ የአሠራር ሥርዓት እንደሚተገበርም ተናግረዋል፡፡

ከሁለት ሳምንት በፊት ባልተጠበቀ ነው በተባለ መንገድ የሥራ መልቀቂያ ያስገቡት የምርት ገበያው ዋና ሥራ አስፈጻሚ አቶ ኤርሚያስ እሸቱን የሚተካ እስኪሰየም ድረስ ሥራቸውን እንዲቀጥሉ ተደርጎ እየሠሩ መሆኑ ይታወቃል፡፡

ከቅዳሜ መስከረም 6 ቀን 2010 ዓ.ም. ስብሰባ በኋላ ግን እሳቸውን የሚተካ አዲስ ሰው እንደሚሰየም ወይም እንደሚወከል የጠቆሙት ምንጮች፣ የምርት ገበያው አዲሱ ሥራ አስፈጻሚ አሁን በምርት ገበያው ውስጥ በኃላፊነት ላይ ከሚገኙት ውስጥ ሊሆን ይችላል የሚልም እምነት እንዳላቸው ገልጸዋል፡፡ የምርት ገበያው የመጀመርያዋ ዋና ሥራ አስፈጻሚ ዶ/ር ኢሌኒ ገብረመድህን ከለቀቁ በኋላ የተሰየሙት ሁለት ሥራ አስፈጻሚዎች ከምርት ገበያው ውጪ በአቢሲኒያና በዘመን ባንክ በምክትል ፕሬዚዳንትነት ሲያገለግሉ የነበሩ እንደነበር ይታወቃል፡፡

በጉዳዩ ቅርበት ያላቸው ወገኖች ለሪፖርተር እንደገለጹትም፣ የኢትዮጵያ ምርት ገበያ ቀጣዩ ዋና ሥራ አስፈጻሚ ማን ይሁን የሚለውን ባይወስንም ከአንድ ሳምንት ባነሰ ጊዜ ውሳኔውን ያሳውቃል ተብሎ እየተጠበቀ ነው፡፡ እነዚህ ወገኖችም በአሁኑ ወቅት በኃላፊነት ላይ ከሚገኙት የምርት ገበያው ሠራተኞች ውስጥ ሊሆን ይችላል የሚለውን አመለካከት አንፀባርቀዋል፡፡

አቶ ኤርሚያስ የሥራ መልቀቂያ ደብዳቤ ያስገቡበት ምክንያት እስካሁን ግልጽ ባይሆንም፣ የመልቀቂያ ጥያቄያቸውን ቦርዱ መቀበሉን ከቅዳሜው የቦርዱ ምላሽ ማረጋገጥ ያስቻለ ሆኗል፡፡

በጉዳዩ ላይ ብዙ ማብራሪያ ያልሰጡት የቦርድ አባላት አዲስ የሚሰየመውን ሥራ አስፈጻሚ በቅርቡ እናሳውቃችኋለን በሚል አጭር መልስ ከመስጠታቸውም በላይ፣ የተለያዩ ለውጦችንና አሠራሮችን እየተገበረ እንደሚገኝ የሚነገርለትን ምርት ገበያ አሁንም ተጨማሪ ለውጦች ያስፈልጉታል ብለዋል፡፡ ይህንንም ለውጥ ለማምጣት በቅርቡ አዲስ አሠራር ተግባራዊ የሚደረግ መሆኑን ከመጠቆም ውጭ ዝርዝር ማብራሪያ ሳይሰጡበት እንዳለፉ ያገኘነው መረጃ ያስረዳል፡፡

አቶ ኤርሚያስ ምርት ገበያውን በዋና ሥራ አስፈጻሚነት መምራት የጀመሩት ከታኅሳስ 2007 ዓ.ም. ጀምሮ እንደሆነ አይዘነጋም፡፡ የኢትዮጵያ ምርት ገበያ አሁን ባለው መዋቅሩ ከዋና ሥራ አስፈጻሚው ቀጥሎ አራት ምክትል ሥራ አስፈጻሚዎች ያሉት ሲሆን፣ ከ300 በላይ ሠራተኞች ይዞ በመንቀሳቀስ ላይ ነው፡፡

የምርት ገበያው ሠራተኞች ከቦርዱ ጋር ባደረጉት ውይይት ባለፉት ወራት ስለተከናወኑ ሥራዎች እንዲሁም በሥራ ወቅት ይገጥመዋል በተባሉ ጉዳዮች ላይ የተነጋገሩ መሆኑን ለማወቅ ተችሏል፡፡ ከሠራተኞች ሊስተካከሉ ይገባል የተባሉ ጥያቄዎች ቀርበው እንደነበረም ያገኘነው መረጃ ያስረዳል፡፡

የኢትዮጵያ ምርት ገበያ ከሐምሌ 1 ቀን 2009 ዓ.ም. ጀምሮ ተግባራዊ እያደረገው ባለው አዳዲስ የአሠራር ለውጦች በተለይ በቡና ግብይት ላይ ለውጥ እየመጣ መሆኑ እየተገለጸ ነው፡፡

ምርት ገበያው ይህንኑ ተከትሎ ባለፉት ሁለት ወራት ባካሄዳቸው በሁሉም ምርት ግብይቶች በሐምሌ 2009 ዓ.ም. 1.2 ቢሊዮን ብር በነሐሴ 2009 ደግሞ 1.7 ቢሊዮን ብር ማግኘት መቻሉን አስታውቋል፡፡ በተለይ በምርት ገበያው በነሐሴ 2009 መገበያየት የቻለው የቡና መጠን በ66 በመቶ ማደጉ የግብይት መጠኑ መጨመሩ በምሳሌነት ተጠቅሷል፡፡