Skip to main content
x
ክቡር ሚኒስትሩ ከሌላ ሚኒስትር ጋር እያወሩ ነው

ክቡር ሚኒስትሩ ከሌላ ሚኒስትር ጋር እያወሩ ነው

[አንድ ጋዜጠኛ የክቡር ሚኒስትሩ ቢሮ ውስጥ ነው]

  • እንዴት ነዎት ክቡር ሚኒስትር?
  • እንዴት ነህ?
  • ክቡር ሚኒስትር በጣም አስቸገሩኝ እኮ፡፡
  • ምን አደረግኩ ደግሞ?
  • በስንት መከራና ጭቅጭቅ እኮ ነው የተገኙት፡፡
  • ምን ፈልገህ ነው ለመሆኑ?
  • ክቡር ሚኒስትር ሕዝብ እኮ ከእርስዎ ብዙ ይጠብቃል፡፡
  • ሰውዬ ከዚህ በላይ ልፈንዳልህ እንዴ?
  • ፍንዳታን ምን አመጣው?
  • ታዲያ ከዚህ በላይ ምን ልሁንላችሁ?
  • ሕዝብ እኮ ስለሚሠሩት ሥራ መግለጫ እንዲሰጡ ይፈልጋል፡፡
  • የምን መግለጫ ነው?
  • ይኸው እኛ ራሳችን ደብዳቤ ብናስገባ፣ የሕዝብ ግንኙነቱን ብናናግር ምንም ዓይነት ምላሽ ማግኘት አልቻልንም፡፡
  • ከዚህ በላይ ምን ዓይነት መግለጫ ነው የምትፈልጉት?
  • ክቡር ሚኒስትር አልፎ ተርፎ በግል አማካሪዎ በኩል ቃለ መጠይቅ እንዲሰጡን ያደረግነው ሙከራ አልተሳካም፡፡
  • አንተ ጋዜጠኛ ነህ አይደል?
  • ስለሱማ አይጠራጠሩ ክቡር ሚኒስትር፡፡
  • አገሪቱ ውስጥ ምን ዓይነት ሥራ እየሠራሁ እንደሆነ እያወቅህ የምን መግለጫ ነው የምትለኝ?
  • ስለሚሠሩት ሥራ ጋዜጣዊ መግለጫ መስጠት አለብዎ፡፡
  • በየጊዜው ጋዜጣዊ መግለጫ ይላክላችኋል አይደል እንዴ?
  • ክቡር ሚኒስትር እኔ እኮ ጋዜጠኛ እንጂ በቀቀን አይደለሁም፡፡
  • ምን እያልክ ነው?
  • እርስዎ ያሉትን እንደ በቀቀን እየደገምኩ አላስተላልፍም፡፡
  • ታዲያ ምንድነው የፈለግከው?
  • ጋዜጣዊ መግለጫ፡፡
  • ለምንድነው ጋዜጣዊ መግለጫ የፈለግከው?
  • ለሚሠሩት እያንዳንዱ ሥራ ተጠያቂ መሆኑዎን ያውቃሉ መቼም?
  • አገሪቱ ውስጥ የሚገርም ለውጥ እንዳለ ትጠራጠራለህ እንዴ?
  • እኔም እኮ የምፈልገው ለውጡን በተመለከተ ጥያቄ ለመጠየቅ ነው፡፡
  • በዚህ ወቅት እኮ ካለው የሥራ ብዛት የተነሳ ቅዳሜና እሑድ ሳንል እየሠራን ነው፡፡
  • እኔም እኮ ስለምትሠሩት ሥራ ለመጠየቅ ነው የመጣሁት፡፡
  • ለወሬ ጊዜ የለንም ስልህ?
  • ክቡር ሚኒስትር ለውጡ እኮ ግልጽነትና ተጠያቂነትን አምጥቷል እያላችሁ አይደል እንዴ?
  • በሚገባ እንጂ፡፡
  • ስለዚህ ለሚዲያው ግልጽ ሆነው ስለሚሠሩት ሥራ ተጠያቂ ሊሆኑ ይገባል፡፡
  • አንድ ነገር ስላልገባህ እኮ ነው፡፡
  • ምን ክቡር ሚኒስትር?
  • አንድ ፊልም ሲሠራ የሚያልፍበትን ሒደት እንይ፡፡
  • እሺ ክቡር ሚኒስትር፡፡
  • የፊልሙ ዳይሬክተር የፊልሙን ሒደት ለተመልካቾቹ ይፋ ያደርጋል?
  • እ. . .
  • በዚያ ላይ ዳይሬክተሩ በፊልሙ ውስጥ የተሳተፉትን ተዋናዮች እንዴት እንደመረጣቸው ለሕዝብ ይፋ ያደርጋል?
  • አልገባኝም ክቡር ሚኒስትር?
  • ስማ አንድ የፊልም ዳይሬክተር በፊልሙ ውስጥ የሚያደርገውን ነገር ለሕዝብ እንደማይገልጽ ሁሉ፣ እኛም ስለምንሠራው እያንዳንዱ ነገር ለሕዝቡ ማሳወቅ ያለብን አይመስለኝም፡፡
  • እደዚህ ከሆነማ መሠረታዊ ችግር አለ ማለት እኮ ነው፡፡
  • የምን ችግር?
  • ለለውጡ ግልጽነትና ተጠያቂነት ወዴት አሉ?
  • እሱማ ፊልሙ ለሕዝቡ ይፋ ሲደረግ መታወቁ አይቀርም፡፡
  • አሁን ገባኝ ክቡር ሚኒስትር፡፡
  • ምኑ ነው የገባህ?
  • ምን እየሠራችሁ እንደሆነ ገብቶኛል፡፡
  • ምን እየሠራን ነው?
  • ፊልም!

[ክቡር ሚኒስትሩ አማካሪያቸውን ቢሯቸው አስጠሩት]

  • አንተ ምን ሆነህ ነው?
  • ምነው ክቡር ሚኒስትር?
  • ምን እንደምትመስል ራስህን አይተኸዋል?
  • ምን ሆንኩኝ ክቡር ሚኒስትር?
  • ለመሆኑ አግብተሃል?
  • አዎን ክቡር ሚኒስትር ምነው?
  • ታዲያ እንደዚህ ሆነህ ከቤትህ ስትወጣ፣ ሚስትህ ዝም ብላ አየችህ?
  • ምን ሆኛለሁ ግራ አጋቡኝ እኮ?
  • ለማንኛውም በሸሚዝህ ቁልፎች ዓይኖቼን እንዳታጠፋኝ፡፡
  • ሸሚዜ ምን ሆነ ክቡር ሚኒስትር?
  • ቦርጭህ እኮ የሸሚዝህን ቁልፎች ሊያስፈነጥራቸው ነው፡፡
  • መቼም ቀልደኛ ነዎት ክቡር ሚኒስትር፡፡
  • እኔ እየቀለድኩ አይደለም፣ ራስህን በመስታወት ተመልክተኸዋል?
  • ይኼን ያህል ወፍሬያለሁ እንዴ?
  • የአንተ ደግሞ ቅርፅ የሌለው ውፍረት ነው፡፡
  • ምን እያሉ ነው ክቡር ሚኒስትር?
  • ሌላው ሰውነትህ ቀጠን ብሎ ቦርጭ ብቻ ነው ያለህ፡፡
  • ታዲያ ምን ይጠበስ?
  • ዝም ብለህ ማታ ማታ ድራፍትህን ስለምትልፍ እኮ ነው እንደዚህ ቦርጫም የሆንከው፡፡
  • እንከባበር እንጂ ክቡር ሚኒስትር?
  • እንደ አንተ ዓይነት ሰው እንዴት ነው እዚህ ሊሠራ የሚችለው?
  • ምን ሆነዋል ክቡር ሚኒስትር?
  • እንደ አንተ ዓይነት ቅርፅ የሌለው ውፍረት ያለው ሰው እንዴት ከእኛ ጋር ይሠራል?
  • ከመቼ ጀምሮ ነው ውፍረት የሥራ ብቃት መመዘኛ የሆነው?
  • በአሁኑ ወቅትማ ዋነኛ መመዘኛ መሥፈርት ነው፡፡
  • ክቡር ሚኒስትር እንደ ኢሕአዴግ እኮ ግራ የሚያጋባ ፓርቲ የለም፡፡
  • እንዴት?
  • አንድ ሰሞን ታማኝነት ዋነኛ መመዘኛ ነው ይል ነበር፣ አሁን ደግሞ ውፍረት የሥራ መመዘኛ ሆነ?
  • ሰሞኑን አለቃችን ምሁራንን ሰብስበው ፑሽአፕ እንዳሠሯቸው አልሰማህም?
  • ስለዚህ ከዚህ በኋላ የመንግሥት ሠራተኛ አትሌትና ቦክሰኛ መሆን አለበት እያሉ ነው?
  • አሁን ወሬውን ትተህ አሥር ፑሽአፕ ውረድ፡፡
  • ምን?
  • እዚህ ፊቴ ነው እድትሠራልኝ የምፈልገው?
  • ምን ሆኑ ክቡር ሚኒስትር?
  • ለነገሩ በዚህ ቦርጭ ልትሠራው እንደማትችል ገብቶኝ ነበር፡፡
  • በጣም አዝናለሁ ክቡር ሚኒስትር፡፡
  • አሁን በአስቸኳይ ከመንግሥት ተጨማሪ በጀት ማስለቀቅ አለብን፡፡
  • የምን በጀት?
  • ጠቅላላ ሠራተኛችን መግባት አለበት፡፡
  • የት ነው የሚገባው?
  • ጂም!

[ክቡር ሚኒስትሩ ለሚስታቸው ስልክ ደወሉ]

  • አሪፍ የቢዝነስ ሐሳብ አለኝ፡፡
  • የምን የቢዝነስ ሐሳብ?
  • እኛ ቢሮ አካባቢ በፍጥነት ቤት ተከራዩ፡፡
  • እናንተ አካባቢ እኮ ዶላር ለመመንዘር ብዙ አይመችም፡፡
  • ቤቱን የምትከራይው ዶላር ለመመንዘር አይደለም፡፡
  • ታዲያ ለምንድነው?
  • እንድትከፍቺ ነዋ፡፡
  • ምን?
  • ጂም!

[ክቡር ሚኒስትር የቀድሞ የዩኒቨርሲቲ አስተማሪ የነበረና በቅርቡ ጥሪ ከተደረገለት ሰው ጋር ተገናኝተው እያወሩ ነው]

  • እንኳን ደስ አለህ?
  • ለምኑ ይሆን ክቡር ሚኒስትር?
  • መቼም አለቃችን ያቀረቡትን ጥሪ ሰምተሃል?
  • የትኛውን ጥሪ?
  • ተባራችሁ የነበራችሁ የዩኒቨርሲቲ አስተማሪዎች እንድትመለሱ ጥሪ ቀረበላችሁ አይደል እንዴ?
  • እኔ እንኳን ለዚህ ጥሪ ከአገልግሎት መስጫ ክልል ውጪ ነኝ፡፡
  • ለምን?
  • ክቡር ሚኒስትር የተባረርነው በግፍ ቢሆንም፣ እኔ አሁን የተሻለ ነገር አለኝ፡፡
  • ከመምህርነት ውጪማ የተሻለ ነገር የለም፡፡
  • አውቃለሁ ክቡር ሚኒስትር፡፡
  • ታዲያ ምን እያልክ ነው?
  • ክቡር ሚኒስትር እኔ ከተባረርኩ በኋላ እኮ የንግድ ሥራ ውስጥ ገብቼ በጣም የተሳካ ሕይወት እየመራሁ ነው፡፡
  • እሱንማ እኔ አውቃለሁ፡፡
  • ስለዚህ በሥራው መቅረት ሕይወቴ ብዙም አልተጎዳም፡፡
  • አሁን ግን የተገኘውን አጋጣሚ መጠቀም አለብህ፡፡
  • የቱን አጋጣሚ ክቡር ሚኒስትር?
  • ቀጣዩን ትውልድ ማስተማር አለብህ፡፡
  • ምንድነው የማስተምረው?
  • በፊት ምን ነበር የምታስረምረው?
  • ክቡር ሚኒስትር እኔ እኮ ጭልጥ ብዬ ንግድ ውስጥ ገብቻለሁ፡፡
  • ብትገባስ ታዲያ?
  • ስለዚህ ማስተማር አልችልም፡፡
  • ቢያስ እንኳን ስለሕይወት ስኬትህ ለምን አታስተምርም?
  • ይቅርብኝ ክቡር ሚኒስትር፡፡
  • ኃላፊነት አለብህ እኮ፡፡
  • የምን ኃላፊነት?
  • ቀጣዩን ትውልድ የማስተማር ነዋ፡፡
  • እሱማ የእናንተ ኃላፊነት ነው፡፡
  • እና አላስተምርም እያልክ ነው?
  • አዎን ክቡር ሚኒስትር፡፡
  • ትንሽ የምታገኘው ገንዘብ እንኳን አያሳሳህም?
  • የምን ገንዘብ ክቡር ሚኒስትር?
  • ያው ተመለሱ ከተባላችሁ እስከዛሬ የነበራችሁ ደመወዝ ከተከፈላችሁ በአንዴ ሚሊየነር ትሆናላችሁ እኮ?
  • ክቡር ሚኒስትር እኔ እኮ አሁንም ሚሊየነር ነኝ፡፡
  • ቢሆንም ሌላ ሚሊዮን አትጠላም መቼም?
  • ክቡር ሚኒስትር እዚህ አገር ማስተማር እኮ ሚሊየነር አያደርግም፡፡
  • ታዲያ ምንድነው ሚሊየነር የሚያደርገው?
  • መዝረፍ!

[ክቡር ሚኒስትሩ ከሌላ ሚኒስትር ጋር እያወሩ ነው]

  • አንድ ነገር ላስቸግር ነበር የመጣሁት፡፡
  • ክቡር ሚኒስትር አሁን ጊዜ የለኝም፡፡
  • ይኼ በጣም አንገብጋቢ ጉዳይ ነው፡፡
  • ክቡር ሚኒስትር በጣም ትልቅ ጉዞ ነው እያዘጋጀን ያለነው፡፡
  • እኔም የመጣሁት በጉዞው ላይ ለመነጋገር ነው፡፡
  • ምንድነው የምንነጋገረው?
  • ከጠቅላይ ሚኒስትሩ ጋር አሜሪካ ልትሄዱ ነው አይደል?
  • አዎን ምነው?
  • ያው እሳቸውን አጅበው የሚሄዱ የመንግሥት ባለሥልጣናት አሉ አይደል?
  • እሱማ የሚያጅቧቸው ባለሥልጣናት ይኖራሉ፡፡
  • እኔንም አብራችሁ እንድታካትቱኝ ነዋ፡፡
  • ኪኪኪ. . .
  • ምን ያስቅሃል?
  • ክቡር ሚኒስትር አሁንም አሜሪካ ብርቅዎ ነው?
  • ስማ አሜሪካ ለቁጥር የሚያዳግት ጊዜ ነው የሄድኩት፡፡
  • ታዲያ አሁን ለምን መሄድ ፈለጉ?
  • መደመሬን ለማሳየት ነዋ፡፡
  • ከተደመሩ እዚያ ድረስ ለምን መሄድ ፈለጉ?
  • መደመሬን በተግባር ለማሳየት ነው፡፡
  • እዚህም ሆነው መደመርዎን በተግባር ማሳየት ይችላሉ እኮ?
  • እዚያ የምሄድበት ዓላማ አለኝ፡፡
  • የቤዝ ቦል ጨዋታ ሊያዩ ነው?
  • አትቀልድ እንጂ?
  • ታዲያ አሜሪካንን ሲጎበኙ ሲልከን ቫሊን አላየሁትም ብለው ነው የሚሄዱት?
  • ለምን ትቀልዳለህ?
  • አሜሪካ ታዲያ ለምን መሄድ ፈለጉ?
  • መደመሬን በተግባር ለማሳየት አልኩህ እኮ፡፡
  • አልገባኝም ክቡር ሚኒስትር?
  • ባለፈው ጠቅላይ ሚኒስትሩ ያላችሁን ዶላር አምጡ አላሉም?
  • አዎን ብለዋል፡፡
  • ስለዚህ የእሳቸውን ጥሪ ተቀብዬ መደመር ፈልጌ ነው፡፡
  • ምን እያሉ ነው?
  • አሜሪካ መሄድ የምፈልገው ለዚሁ ነው፡፡
  • ለምኑ?
  • ላመጣው ነዋ፡፡
  • ምኑን?
  • ዶላሩን!