Skip to main content
x
ክቡር ሚኒስትሩ ከአማካሪያቸው ጋር ቢሯቸው እያወሩ ነው

ክቡር ሚኒስትሩ ከአማካሪያቸው ጋር ቢሯቸው እያወሩ ነው

[ክቡር ሚኒስትሩ ለሌላ ሚኒስትር ጓደኛቸው ስልክ ይደውላሉ]

  • እኔ የምልህ አንድ በጣም እየከነከኝ ያለ ጉዳይ አለ፡፡
  • ምንድነው ክቡር ሚኒስትር?
  • በዚህ ፕሮጀክት ሊሰበሰብ የሚችለው ገንዘብ ቀላል አይደለም፡፡
  • የትኛው ፕሮጀክት?
  • የትረስት ፈንዱ ነዋ፡፡
  • አልገባኝም ክቡር ሚኒስትር?
  • ስማ በቀን አንድ ዶላር ማለት ለዳያስፖራው ምንም አይደለም፡፡
  • እሱማ ቀላል ነው፡፡
  • እንዲያውም አንዳንዶቹ አሥርም ማድረግ እንችላለን እያሉ ነው፡፡
  • ክቡር ሚኒስትር ለአገር እኮ ምንም ሊደረግ ይችላል፡፡
  • አሁን በአሜሪካ ብቻ አንድ ሚሊዮን ዳያስፖራ ይኖራል?
  • ልክ ነዎት ክቡር ሚኒስትር፡፡
  • ይህ ማለት በየቀኑ አንድ ሚሊዮን ዶላር ከዚያ ይሰበሰባል ማለት ነው፡፡
  • በትክክል ክቡር ሚኒስትር፡፡
  • በዓመት ደግሞ 365 ሚሊዮን ዶላር ማለት ነው፡፡
  • አልተሳሳቱም ክቡር ሚኒስትር፡፡
  • በአገር ውስጥ ገንዘብ ሲሰላ ደግሞ ወደ አሥር ቢሊዮን ብር ገደማ ነው፡፡
  • እሱን እንኳን አላሰላሁትም ነበር፡፡
  • በአሥር ዓመት ደግሞ መቶ ቢሊዮን ብር ማለት ነው፡፡
  • ክቡር ሚኒስትር ይኼን ያህል ሒሳቡ ምነው አስጨነቀዎት?
  • ምን ነካህ በአሥር ዓመት እኮ ሌላ ህዳሴ ግድብ መሥራት እንችላለን ማለት ነው?
  • እ. . .
  • ሌላው ቢቀር የማዳበሪያ ፋብሪካው ብትል የቆሙ የስኳር ፋብሪካዎችን ማንቀሳቀስ ይቻላል፡፡
  • ክቡር ሚኒስትር ስለእነሱ ፕሮጀክቶች ግን ሲያወሩ አያፍሩም?
  • ምን ያሳፍረኛል?
  • በእርስዎ ምክንያት መሰለኝ ተሰነካክለው የቀሩት?
  • ይኼኛውም ፕሮጀክት እንዳይሰናከል ሐሳብ ስላለኝ እኮ ነው፡፡
  • ምን ዓይነት ሐሳብ?
  • ይኼንን ፈንድ የሚያንቀሳቅሱት ሰዎች በጥንቃቄ ሊመረጡ ይገባል፡፡
  • በዳያስፖራው በኩል ፈንዱን የሚያንቀሳቅሱት ሰዎች እኮ የሚታመኑና ኃላፊነት የሚሰማቸው ተብለው ነው የተመረጡት፡፡
  • ገንዘቡ ወደዚህ ሲላክ እንዳይባክን እዚህም የሚታመኑና ኃላፊነት የሚሰማቸው ሰዎች ሊመረጡ  ይገባል፡፡
  • ክቡር ሚኒስትር ገንዘቡ እኮ የሚላከው በባንክ ነው፡፡
  • ቢሆንም ፈንዱ እዚህ ሥራ ላይ ሲውል እንዳይባክን ተመሳሳይ ኮሚቴ ያስፈልጋል፡፡
  • ክቡር ሚኒስትር ምን እያሰቡ እንደሆነ አልገባኝም?
  • ስማ እዚህ የሚመሠረተው ኮሚቴ ውስጥ አንተና እኔ መግባት አለብን፡፡
  • ክቡር ሚኒስትር በእጃችን ላይ የያዝናቸውን ሥራዎች እንኳን መቼ በሚገባ ተገበርናቸው?
  • ማወቅ ያለብህ ነገር ለእያንዳንዱ ልፋታችን እኮ ተገቢውን ጥቅም እናገኛለን፡፡
  • ምን ዓይነት ጥቅም ነው?
  • ኮሚሽን እንወስዳለና፡፡
  • ኧረ ክቡር ሚኒስትር ትንሽ ይፈሩ?
  • ለምንድነው የማፍረው? መጽሐፉም እኮ ጥረህ ግረህ ብላ ነው የሚለው፡፡
  • ክቡር ሚኒትር የስኳሩና የማዳበሪያው አልበቃ ቢልዎት ትረስት ፈንዱንም መብላት ያምርዎታል?
  • እዚህ ላይ እንዳትሳሳት፣ እኔ ብቻዬን ተጠያቂ ልሆን አልችልም፡፡
  • ምን?
  • ከበፊቱም ቀስ እያልን እንብላ የሚል ሐሳብ ባቀርብም፣ የሚሰማኝ አጥቼ ነው በአንዴ አገሪቱ መቀመቅ ውስጥ የገባችው፡፡ እንደዚያ ያደረጉት ሌሎች ናቸው፡፡
  • ክቡር ሚኒስትር እኔ አሁን እንደዚህ ዓይነት ነገር ውስጥ መግባት አልፈልግም፡፡
  • አሁን ያመጣሁት ሐሳብ በጣም አስታራቂ ነው፡፡
  • የምን አስታራቂ ሐሳብ ነው?
  • ለአገልግሎታችን የምንጠይቀው ክፍያ በጣም አነስተኛና ተመጣጣኝ ነው፡፡
  • ምን ያህል ነው?
  • ከአንድ ዶላር አንድ ሳንቲም!

[በአሜሪካ የሚገኝ የተቃዋሚ ፓርቲ መሪ ለክቡር ሚኒስትሩ ደወለላቸው]

  • ክቡር ሚኒስትር እንዴት ነዎት?
  • አንተ በሕይወት አለህ?
  • አሁንማ እንደ አዲስ የተፈጠርኩ ያህል ነው እየተሰማኝ ያለው፡፡
  • ምን ተገኝቶ?
  • መቼም እንደሚያውቁት እኔና እርስዎ ያኔ ነው ዩኒቨርሲቲ የምንተዋወቀው፡፡
  • እሱማ ልክ ነው፡፡
  • እንግዲህ ይኸው ከአርባ ዓመታት በላይ ትግል ውስጥ ነበርኩ፡፡
  • የምን ትግል ነው? የኑሮ ትግል ነው?
  • ክቡር ሚኒስትር ሕዝቤን ነፃ ለማውጣት ስንትና ስንት መስዋዕትነት ስከፍል ነበር፡፡
  • ከአርሊንግተን እስከ መሀል ዲሲ ድረስ ታክሲ መንዳት ነው ትግል?
  • እ. . .
  • ማታ ማታ ደግሞ የሐበሻ ምግብ በልቶ የማር አረቄ መጠጣት ነው እንደ ትግል የተቆጠረው?
  • ክቡር ሚኒስትር ስለእኔ የትግል ሕይወት ምንም የሚያውቁት ነገር የለም፡፡
  • ለመሆኑ በርገርና ፒዛ እየበላህ ታገልኩ ስትል ትንሽ አታፍርም?
  • ክቡር ሚኒስትር ኢትዮጵያ ውስጥ አሁን ለመጣው ለውጥ ዋነኛ መንስዔ እኔ ነኝ፡፡
  • ኪኪኪ. . . ወደው አይስቁ አሉ?
  • ክቡር ሚኒስትር ከአርባ ዓመታት በላይ ነው እኮ የታገልኩት፡፡
  • ለመሆኑ በፓርቲህ ውስጥ ኃላፊነትህ ምንድነው?
  • የዲሲን፣ የሜሪላንድንና የቨርጂኒያን ፖለቲካዊ እንቅስቃሴ የምመራው እኔ ነኝ፡፡
  • ፓርቲያችሁ ስንት አባላት አሉት?
  • ዲሲ ላይ ሁለት አሉ፣ ሜሪላንድ ላይ በዕጩነት የያዝናት አንድ እሳት ልጅ አለች፣ ቨርጂኒያ ደግሞ እኛን ለመቀላቀል በቋፍ ላይ ያሉ ሁለት አሉ፡፡
  • አምስት ሰው ይዘህ ነው ፓርቲ የምትመራው?
  • ክቡር ሚኒስትር እንዳይታለሉ፣ ዌስት ኮስት ላይም ሌሎች አሉ፡፡
  • ዌስት ኮስት ላይ ስንት አባል አላችሁ?
  • እዚያ ደግሞ ሁለት ወሳኝ ሰዎች አሉን፡፡
  • እና ሰባት ሰው ይዛችሁ ነው አሁን ኢትዮጵያ ውስጥ የመጣውን ለውጥ ያመጣችሁት?
  • ክቡር ሚኒስትር ክርስትናን እኮ በዓለም ላይ ያስፋፉት 12 ሰዎች መሆናቸውን አይዘንጉ፡፡
  • እ. . .
  • ስለዚህ እኛም ሰባት ሆነን በድፍን ኢትዮጵያ የፖለቲካ ሐሳባችንን ማንሰራፋት እንችላለን፡፡
  • እንደዚህ እያሳቅከኝ ግን ሆዴን እንዳታሳምመኝ?
  • ክቡር ሚኒስትር አሁን እኛም ጠንከር ማለት አለብን ብለን ከሌሎች ሁለት ፓርቲዎች ጋር ልንጣመር ነው፡፡
  • ከእነማን ጋር?
  • ከእኛ የፖለቲካ አመለካከት ጋር አንድ ዓይነት አመለካከት ያላቸውን ሁለት ፓርቲዎች መርጠናል፡፡
  • ለመሆኑ እነሱ ስንት አባል አላቸው?
  • አንደኛው እንደነገረኝ ሦስት የአጎቶቹ ልጆችና ሁለት የአክስቶቹ ልጆች የፓርቲው አባል ናቸው፡፡
  • ምን አልከኝ?
  • የሚገርመው ክቡር ሚኒስትር እነዚህ የአጎቶቹና የአክስቶቹ ልጆች ከማኅበራዊ ድረ ገጽ ጋር ከፍተኛ የሆነ ቁርኝት አላቸው፡፡
  • ለመሆኑ በፌስቡክ ምን ያህል ተከታይ አላቸው?
  • በቅርቡ አንድ ሺሕ ተከታዮች እንደሚኖራቸው ነግሮኝ፣ ለዚያም ትልቅ ድግስ ደግሰው ቀኑን እንደሚዘክሩት አጫውቶኛል፡፡
  • ፓርቲው ከተመሠረተ ስንት ዓመቱ ነው?
  • 27 ዓመቱ ክቡር ሚኒስትር፡፡
  • ሌላኛውስ?
  • እሱኛው ፓርቲ ደግሞ ከመሪው ስምንት ቤተሰቦች ውስጥ አምስቱ በፕሮግራሙ አምነው አባል ሲሆኑ፣ ሦስቱ በቅርቡ አባል ይሆናሉ ተብለው ይጠበቃሉ፡፡
  • በጣም ነው ያሳቅኸኝ፡፡
  • ክቡር ሚኒስትር አይሳቁ፣ በቅርቡ ትልቅ ግንባር ነው የምንፈጥረው፡፡
  • ለእናንተ ያለኝ ምክር ከግንባር ይልቅ በሌላ ነገር ብትደራጁ የሚል ነው፡፡
  • በምን ክቡር ሚኒስትር?
  • በጥቃቅንና አነስተኛ!

[ክቡር ሚኒስትሩ ከሚስታቸው ጋር ምሳ እየበሉ እያወሩ ነው]

  • ከቢሮ እየተመለስኩ አንድ በጣም አሪፍ ሐሳብ ነው የበራልኝ፡፡
  • የምን ሐሳብ?
  • ለመሆኑ በዳያስፖራውና በአገር ውስጥ መካከል ያለውን ትስስር እየተከታተልሽ ነው?
  • ምን ሚዲያው በጠቅላላ ስለእሱ ነው የሚያላዝነው ሰለቸኝ እኮ?
  • ይኼማ ሊሰለችሽ አይገባም፡፡ ለእኔና ለአንቺ መረጃ ማለት እኮ ገንዘብ ማለት ነው፡፡
  • አልገባኝም?
  • ያኔ ለሕዝቡ የኮንዶሚኒየም ቤቶች ይገንባ ሲባል፣ እኛም በተጓዳኝ ለቤቶቹ ፊኒሺንግ የሚሆኑ ዕቃዎችን ማስመጣት በመጀመራችን ምን ያህል እንደከበርን ታውቂያለሽ?
  • እሱማ ሚሊየነር ያደረገን ቢዝነስ ነው፡፡
  • አሁንም ተለቅና ረቀቅ ያለ ነገር መጥቷል፡፡
  • ምን ዓይነት ነገር?
  • ሰሞኑን የጠቅላይ ሚኒስትሩን ንግግሮች ሰምተሻቸዋል?
  • ያው ሁሌም እንደሚሉት መደመር፣ ፍቅር፣ ይቅርታና አንድነት አይደል እንዴ?
  • ስሚ በእነዚህ ቃላት እኮ እኛም ተጠቃሚ መሆናችንን አትርሺ?
  • እንዴት ሆኖ?
  • ይኸው የይቅርታ ዘመን ስለሆነ አይደል እንዴ ያን ሁሉ ዘርፈን ዝም የተባልነው፡፡
  • እንዳይመስልህ፡፡
  • ማለት?
  • እስሩ ከተጀመረ አይደለም የአገር ውስጥ የጎረቤት አገርም እስር ቤት አይበቃም ብለው ነው ዝም ያሉት፡፡
  • አንቺ ደግሞ እስኪ ደግ ደጉን አስቢ፡፡
  • እንግዲህ ጊዜው ሲደርስ ታየዋለህ፡፡
  • ለማንኛውም ይኼኛው አጋጣሚ እንዲያልፈኝ አልፈልግም፡፡
  • የምን አጋጣሚ ነው?
  • ሰሞኑን ጠቅላይ ሚኒስትሩ ግንቡ ፈርሶ ድልድይ ይሠራ እያሉ ነው፡፡
  • ምን ማለት ነው እሱ?
  • ያኔ የአሜሪካኑን ፕሬዚዳንት ግንብ እገነባለሁ ብለው ይኸው ሥልጣን ላይ ሲወጡ ግንቡን ለማስገንባት ደፋ ቀና እያሉ ነው፡፡
  • ምን እያልክ ነው ታዲያ?
  • የአሁን ጊዜ መሪዎች ፊት ለፊት ነው የሚናገሩት፡፡
  • አልገባኝም?
  • ጠቅላይ ሚኒስትሩ እንዳሉት በቃ ሰሞኑን ድልድዮች መሠራት ይጀምራሉ፡፡
  • የምን ድልድይ?
  • ክልልን ከክልል፣ ክፍለ ከተማን ከክፍለ ከተማ፣ ዞንን ከዞን፣ ወረዳን ከወረዳ የሚያገናኙ ድልድዮች ይሠራሉ፡፡
  • ሰውዬ ለየልህ አይደል?
  • ነገርኩሽ የእሳቸው ንግግር ቀጥተኛ ነው፡፡
  • ለማንኛውም ጤንነትህን ብትመረመር ጥሩ ነው፡፡
  • አንቺ ደግሞ ቶሎ ብለሽ ፈቃድ ብታወጪ ደስ ይለኛል፡፡
  • የምን?
  • የኮንስትራክሽን!

[ክቡር ሚኒስትሩ ከአማካሪያቸው ጋር ቢሯቸው እያወሩ ነው]

  • ክቡር ሚኒስትር ጋዜጠኞቹ ተጠርተዋል፡፡
  • የምን ጋዜጠኞች?
  • ባለፈው የምንሠራቸውን ሥራዎች ማሳወቅ ስላለብን ፕሬስ ኮንፈረንስ ይጠራ ብለውኝ ነበር፡፡
  • ታዲያ ሳታማክረኝ ነው የምትጠራቸው?
  • እኔማ አሁን ትክክለኛው ጊዜ ነው ብዬ አስቤ ነበር፡፡
  • እንዴት?
  • ያው ከተሾሙ መቶ ቀናት ስለሞላዎት በዚህ ጊዜ ያከናወኗቸውን ነገሮችን ነዋ ጋዜጠኞቹ የሚጠይቁዎት፡፡
  • በእነዚህ በመቶ ቀናትማ ፍቅር፣ መደመርና ይቅርታ ላይ ነዋ የሠራነው፡፡
  • እሱ ላይ ታዲያ እርስዎ ምን ሠርተዋል?
  • እንደምታውቀው የሻይ ቤታችን ሠራተኛና ጥበቃችን ለረዥም ዓመት ተኮራርፈው፣ እኔ ነኝ መካከላቸው ገብቼ ያስታረቅኳቸው፡፡
  • እ. . .
  • ከዚያም ባለፈ በግምጃ ቤቱ ኃላፊና በሾፌሩ መካከል የተከሰተው አለመግባባት ወደ ቡድን ግጭት ተሻግሮ በርካታ የመሥሪያ ቤታችንን ሠራተኞች ተሳትፈው እኔ ነኝ በሰላም እንዲቋጭ ያደረግኩት፡፡
  • ምን አሉኝ ክቡር ሚኒስትር?
  • ለዚህም ተግባሬ ሠራተኞቼ የዓመቱ የበጎ ሰው ሽልማት ይገባሃል ሲሉኝ፣ ከእሱ ይልቅ ይቅርታ እንዲያደርጉልኝ መጠየቄን መቼም ሰምተሃል?
  • የምን ይቅርታ?
  • በፊት የሰረቅኩትን ገንዘብ እዳልሰረቅኩ ተቆጥሮ ይቅርታ እንድባል ነዋ፡፡
  • ክቡር ሚኒስትር መሥሪያ ቤታችን እኮ ሊያስፈጽማቸው የሚገባቸው ሌሎች በርካታ ፕሮጀክቶች አሉ፡፡
  • እሱንም አስመልክቶ ጠቅላይ ሚኒስትሩ በሰጡት አቅጣጫ ድልድዮች እንዲገነቡ ልናደርግ ነው፡፡
  • የምን ድልድይ ነው?
  • ሻይ ቤትን ከጥበቃዎች የሚያገናኝ፣ እንዲሁም ግምጃ ቤቶችን ከሾፌሮችና እንደ ሁኔታው ወደፊት ሌሎች ድልድዮችንም እንጨምራለን፡፡
  • በዚህ ዓይነትማ በመቶ ቀናት ያከናወኗቸው ተግባራት ከመቶ ሲፈተኑ ውጤቱ ይታወቃል፡፡
  • ስንት ነው?
  • ዜሮ!