Skip to main content
x
ለክቡር ሚኒስትሩ አንድ እስራት ፈርቶ የተደበቀ ጓደኛቸው ደወለላቸው

ለክቡር ሚኒስትሩ አንድ እስራት ፈርቶ የተደበቀ ጓደኛቸው ደወለላቸው

[ክቡር ሚኒስትሩ ከሚስታቸው ጋር እያወሩ ነው]

  • ምነው የተጨናነቅክ ትመስላለህ?
  • ምን እባክሽ እኔ መቼ ጭንቅላቴ ያርፋል ብለሽ ነው?
  • ምን ሆንክ ደግሞ?
  • ያው ጊዜው የለውጥ ስለሆነ እኔም በብዙ ነገር ለመለወጥ እያሰብኩ ነው፡፡
  • በምንድነው ደግሞ የምትለወጠው?
  • ከለውጡ ጋር ቢዝነሶቻችንንም መለወጥ አለብን፡፡
  • ያሉን ቢዝነሶቻችን ምን አሉን?
  • ያሉን ቢዝነሶችማ ከዚህ በኋላ ሊቀጥሉ የማይችሉበት ሁኔታ እየተፈጠረ እኮ ነው፡፡
  • ለምንድነው የማይቀጥሉት?
  • አገሪቱ ውስጥ ምን እየተካሄደ እንደሆነ አታውቂም?
  • መደመር፣ መቀነስ ምናምን ነዋ እየተካሄደ ያለው፡፡
  • አየሽ የሚቀነሱ ነገሮች አሉ ማለት ነው፡፡
  • ታዲያ እኛ ምን አገባን?
  • ስሚ እኛ የምንሠራቸው ቢዝነሶች በጠቅላላ ሕገወጥ መሆናቸውን አትርሺ፡፡
  • እኔና አንተ መቼ ሕጋዊ ሥራ ሠርተን እናውቃለን?
  • አሁን ብዙ ሕገወጥ ነገሮች እየቆሙ ስለሆነ እኛም ቆም ብለን ማሰብ አለብን፡፡
  • በፍፁም እንዳትሳሳት፡፡
  • ምን እያልሽ ነው?
  • አሁን እንዲያውም ብዙ ሕገወጥ ድርጊቶች እየበዙ ነው የመጡት፡፡
  • ሴትዮ ከተማ ውስጥ የለሽም እንዴ?
  • በሚገባ አለሁ እንጂ፡፡
  • ታዲያ የኮንትሮባንድ ንግዱ በአስደንጋጭ ሁኔታ እየተመታ እኮ ነው፡፡
  • ቢመታስ ታዲያ?
  • እኛም ቢዝነሳችንን ሳንቀይር በዚሁ ከቀጠልን ዜሮ መግባታችን ነው፡፡
  • እኔ ግን ምንም አያሳስበኝም፡፡
  • ስንትና ስንት ሰው መቀመቅ ውስጥ እየገባ ነው፡፡
  • እኛ ምን ቸገረን አማራጭ ቢዝነሶች አሉን እኮ?
  • አማራጭ ቢዝነሳችንም ሕገወጥ እንደሆነ አታውቂም?
  • ምኑ ነው ሕገወጥ?
  • የዶላር ምንዛሪ እኔ ሳላውቅ ሕጋዊ ሆኗል እንዴ?
  • ከእሱ ይልቅ የሚያሳስበኝ በዶላር መውደቅ የከሰርነው ነው፡፡
  • ለዚህ እኮ ነው በሁሉም ዘርፍ ቢዝነስ ይኑረን የምልሽ?
  • አሁን የቢዝነስ ሐሳብ መጥቶልህ ነው?
  • አዎን ግን እንዴት ተግባራዊ እንደምናደርገው ግራ አጋብቶኝ ነው?
  • ቢዝነሱ አሪፍ ከሆነማ ቶሎ ፈቃድ አውጥተን ወደ ሥራ መግባት ነዋ፡፡
  • እኔ እሱ አይደል እንዴ የጨነቀኝ?
  • ምኑ ነው የጨነቀህ?
  • እኛ ሕጋዊ ፈቃድ አውጥተን ቢዝነስ ሠርተን ስለማናውቅ፣ አዲሱ የቢዝነስ ሐሳቤን እንዴት ተግባራዊ እናደርገዋለን ብዬ ነዋ?
  • ስማ እሱ በጣም ቀላል ነው፡፡
  • ለቢዝነሱ እኮ ጠቀም ያለ ገንዘብ ያስፈልገናል፡፡
  • ስለዚህ የቢዝነስ ሐሳቡን ለባለሀብቶች አቅርበን በሽርክና እንሠራለና፡፡
  • እስከ ዛሬ ከእኔ ጋር ቢዝነስ መሥራት የቻለው ያ ደላላ ብቻ እንደሆነ ታውቂያለሽ እሱም ከእርስዎ ጋር ቢዝነስ ከመሥራት ከሰይጣን ጋር መሥራት ቀላል ነው እንዳለኝ መቼም ታስታውሻለሽ፡፡
  • ካልሆነ ደግሞ አክሲዮን መሸጥ ነዋ፡፡
  • ከእኔ ጋር ቢዝነስ መሥራት ማንም አይፈልግም አልኩሽ እኮ?
  • ታዲያ ለምን ከባንክ አንበደርም?
  • ከባንክ ለመበደር ደግሞ ኮላተራል ያስፈልገናል፡፡
  • ከዚህ ሁሉ ቤት በአንዱ እንበደርበታ?
  • ምን ነካሽ ሀብታችንማ መታወቅ የለበትም፡፡
  • ምን ይሻላል ታዲያ?
  • እኔማ አንድ ሐሳብ መጥቶልኛል፡፡
  • ምን ዓይነት ሐሳብ?
  • አንድ ፕሮግራም ማዘጋጀት ፈልጌያለሁ፡፡
  • ምን ዓይነት ፕሮግራም?
  • ገቢ ማሰባሰቢያ!

[ለክቡር ሚኒስትሩ አንድ ኢንቨስተር ይደውልላቸዋል]

  • ክቡር ሚኒስትር ምን እየተካሄደ ነው ያለው?
  • ምን ሆንክ?
  • እኔ በዚች አገር ብዙ ተስፋ ነበረኝ፡፡
  • አገሪቱማ ለዓለም ሳይቀር ተስፋ ናት፡፡
  • አሁንማ በጣም ተስፋ እያስቆረጠችኝ ነው፡፡
  • በምን ምክንያት?
  • እየሄድንበት ያለው ጎዳና በጣም እያስፈራኝ ነው፡፡
  • ምን እያልከኝ ነው?
  • ክቡር ሚኒስትር አገሪቱ እኮ ከድጡ ወደ ማጡ እየሄደች ነው፡፡
  • ምነው እንደዚህ ጨለምተኛ ሆንክ?
  • በምድሪቷ ላይ እየተፈጸመ ያለውን ግፍ ስመለከት እንዴት ጨለምተኛ አልሆን?
  • አልተደመርክም ማለት ነው?
  • እኔማ ከጠቅላይ ሚኒስትሩ በፊት ነው የተደመርኩት፡፡
  • ምን አልክ?
  • ክቡር ሚኒስትር እኔ እኮ ዕድሜዬን ሙሉ በውጭ አገር ያፈራሁትን ጥሪት አገሬ ካፈሰስኩ በርካታ ዓመታት ሆነውኛል፡፡
  • እሱን ማድረግህማ ጥሩ ነው፡፡
  • ይኸው አገሬን ለማልማት ፋብሪካ ከፍቼ ከአንድ ሺሕ በላይ ሠራተኞችን ቀጥሬ ማሠራት ከጀመርኩ ዓመታት ተቆጥረዋል፡፡
  • ታዲያ ለምንድን ነው የምትማረረው?
  • ክቡር ሚኒስትር አሁን ግን ምንም ሥራ መሥራት አልቻልኩም፡፡
  • የዶላር እጥረት ገጥሞህ ነው?
  • ከዶላሩ ይልቅ ያስቸገሩኝ የአካባቢው ወጣቶች ናቸው፡፡
  • እነሱ ደግሞ ምን አደረጉህ?
  • ክቡር ሚኒስትር በየጊዜው እየመጡ ሥራ እንድሰጣቸው ይጠይቁኛል፡፡
  • ታዲያ ለምን አትሰጣቸውም?
  • አንድ ሺሕ ሰው መቅጠር ቀላል ነገር ነው ክቡር ሚኒስትር?
  • እሱማ አይደለም፡፡
  • ከዚህ በላይ ታዲያ እኔ ምን ላድርግ?
  • ቦታ የለኝም ስትላቸው ምን ይሉሃል?
  • ባንሠራም ክፈለን ይሉኛል፡፡
  • እነዚህማ ወጣት ጡረተኞች ናቸው፡፡
  • ክቡር ሚኒስትር ችግሩን ለአካባቢው አስተዳደር ባሳውቅም መፍትሔ ላገኝ አልቻልኩም፡፡
  • እንደ አንተ ዓይነት ኢንቨስተርማ ሊደናቀፍ አይገባም፡፡
  • ክቡር ሚኒስትር እንደዚህ የምቸገረው እኔ ብቻ ሳልሆን በርካቶች ናቸው፡፡
  • ይኼማ ተቀባይነት የለውም፡፡
  • ክቡር ሚኒስትር መደመርና ፍቅር ወደ ሥራ ካልተቀየረ ዋጋ የለውም፡፡
  • ምን እያልክ ነው?
  • እንደመር ሲባል ሁሉም ባለው አቅምና ዕውቀት አገሩን ማገልገል ካልቻለ ወደፊት መሄድ አንችልም፡፡
  • እሱስ ልክ ነህ፡፡
  • ስለዚህ ለችግሩ አፋጣኝ መፍትሔ ያስፈልገዋል፡፡
  • ለአንተማ አፋጣኝ መፍትሔ እንዲሰጥህ አደርጋለሁ፡፡
  • ክቡር ሚኒስትር መፍትሔው ጊዜያዊ ሳይሆን ዘለቄታዊ መሆን ይገባዋል፡፡
  • ምን ዓይነት ዘለቄታዊ መፍትሔ?
  • በአገሪቱ ውስጥ የሰፈነው ሥርዓተ አልበኝነት የሚወገደው አሠራራችን መቀየር ስንችል ነው፡፡
  • ወደ ምን?
  • ወደ ተቋማዊ አሠራር፡፡
  • በሚገባ እስማማለሁ፡፡
  • ያበለዚያ ባለሀብቱ ከመደመር ይልቅ የሚመርጠው ሌላ ነው፡፡
  • ምን?
  • መደንበር!

[ክቡር ሚኒስትሩ ከደላላ ወዳጃቸው ጋር እያወሩ ነው]

  • ክቡር ሚኒስትር ያለንበት ወቅት በጣም አደገኛ ነው፡፡
  • ምን እያልክ ነው?
  • በቅርቡ አሰሳ እንደሚጀመር አልሰሙም?
  • የምን አሰሳ ነው?
  • በሕገወጥ ገንዘብ ላይ ፍተሻ ይካሄዳል፡፡
  • ገንዘብህን ለምን ወደ ዶላር አትቀይረውም?
  • ክቡር ሚኒስትር ዶላርም ይዞ መገኘት እኮ ሕገወጥ ነው፣ በዚያ ላይ ዶላር አሁን ስለወረደ እስኪወጣ እየጠበቅኩ ነው፡፡
  • ከዚህ በኋላማ እንደ ድሮው ዶላር ይሰቀላል ብለህ አትጠብቅ፡፡
  • እኔ ተስፋ አልቆርጥም ክቡር ሚኒስትር፡፡
  • ላም አለኝ በሰማይ እንዳይሆንብህ?
  • ለማንኛውም በርካታ ሰዎች ይህ ጉዳይ እያሳሰባቸው ነው፡፡
  • ምኑ ነው ያሳሰባቸው?
  • ገንዘባችንን የት እናድርገው የሚለው ጉዳይ ነዋ፡፡
  • ባንክ ቤት ነዋ፡፡
  • ክቡር ሚኒስትር ይህን ሁሉ ሚሊዮን ብር ባንክ ከሚከቱ በቀጥታ እጃቸውን ለፖሊስ ቢሰጡ አይቀልም?
  • ምን እያልክ ነው?
  • ክቡር ሚኒስትር ይህን ያህል ገንዘብ ባንክ ዝም ብሎ አይቀበልም፡፡
  • ለምን ሲባል?
  • ገንዘቡ የቆሸሸ ነዋ፡፡
  • ታዲያ ገንዘቡን ማጠብ ነዋ፡፡
  • ለዚያ አይደል እንዴ እኛን የሚፈልጉን፡፡
  • ገንዘቡን እንድናጥብላቸው?
  • እህሳ ክቡር ሚኒስትር፡፡
  • አሁን ያን ሁሉ ሚሊዮን ብር ማን ነው የሚያጥብልን?
  • ካሰብንበትማ ገንዘቡን ማጠብ ቀላል ነው፡፡
  • ምንድነው የምታወራው ሰውዬ?
  • ምነው ክቡር ሚኒስትር?
  • ያን ሁሉ ገንዘብ ለማጠብ ምን ያህል ኦሞ እንደሚፈጅ ታውቃለህ?
  • እ. . .
  • እና ይኼን ሁሉ ገንዘብ ማጠብ ከባድ ሥራ ነው፡፡
  • ክቡር ሚኒስትር እኔ እኮ ስለ Money Laundering ነው የማወራዎት፡፡
  • ገብቶኛል፡፡
  • አሪፍ ጥቅም እናገኝበታለን እኮ፡፡
  • እንዲያ ካልክማ በአፋጣኝ እናቋቁማ፡፡
  • ምን?
  • ላውንድሪ ቤት!

[ለክቡር ሚኒስትሩ አንድ እስራት ፈርቶ የተደበቀ ጓደኛቸው ደወለላቸው]

  • ሄሎ ክቡር ሚኒስትር፡፡
  • ማን ልበል?
  • በድምፄ እንኳን አላስታወሱኝም?
  • ይቅርታ አላወቅኩህም፡፡
  • ወዳጅዎ ነኝ፡፡
  • ስልክህን ቀየርክ እንዴ?
  • የበፊቱን ስልኬንማ ቆረጡብኝ፡፡
  • ለመሆኑ ከአገር ወጥተህ ነው የጠፋኸው?
  • ተሳክቶልኝ ብወጣማ ተገላግለዬ ነበር፡፡
  • ታዲያ የት ጠፍተህ ነው?
  • ክቡር ሚኒስትር ይኸው ፈርቼ ከተደበቅኩ እኮ ወራት ተቆጠሩ፡፡
  • ለምንድነው የምትፈራው?
  • ካሁን አሁን ወይ እታሰራለሁ ወይ ጥቃት ይደርስብኛል ብዬ ፈርቼ ነው ያለሁት፡፡
  • በዚህ የምሕረትና የይቅርታ ዘመን እንደዚህ ለምን ታስባለህ?
  • ክቡር ሚኒስትር እኔ ከፍተኛ ወንጀል በመሥራቴ ማንም ይቅርታ አያደርግልኝም፡፡
  • ቆይ ተገናኝተን ለምን ሻይ እየጠጣን አናወራም?
  • ኧረ እኔ የትም መንቀሳቀስ አልችልም፡፡
  • ራስህን የቁም እስረኛ አድርገሃል ማለት ነው?
  • ምን አማራጭ አለኝ?
  • አማራጩማ መደመር ነው፡፡
  • ክቡር ሚኒስትር እኔ ምን እንደሚጠብቀኝ አውቀዋለሁ፡፡
  • ምንድን ነው የሚጠብቅህ?
  • በቅርቡ ሙዚየም የሆነ ቦታ ነዋ፡፡
  • የት ነው?
  • ማዕከላዊ!