Skip to main content
x

ጠቅላይ ሚኒስትሩ የዳያስፖራ ትረስት ፈንድ አማካሪ ምክር ቤት አቋቋሙ

ጠቅላይ ሚኒስትር ዓብይ አሀመድ (ዶ/ር) የዳያስፖራ ትረስት ፈንድን በተመለከተ የሚያማክር 15 አባላት ያሉት የአማካሪ ምክር ቤት አቋቋሙ፡፡

የጠቅላይ ሚኒስትር ልዩ ጽሕፈት ቤት ኃላፊ አቶ ፍጹም አረጋ በትዊተር ገጻቸው ላይ ያሰፈሩት ደብዳቤ፣ ‹‹የአማካሪ ምክር ቤቱ ከፍተኛ ተጠያቂነትና ግልጽነት የሰፈነበት አሠራር እንዲኖር፣ ፈንዱ የሚውልባቸውን ፕሮጀክቶች ልየታ ማድረግና ፈንዱ ከዓለም አቀፉ የዳያስፖራ ማኅበረሰብ ሰፊ የሕዝብ ድጋፍ እንዲኖረው ማድረግን ጨምሮ አጠቃላይ የሆነ ዕቅድ ዝግጅት የሚያደርግ እንዲሆን ይጠበቃል፤›› ይላል፡፡

ይኼ ምክር ቤት በጠቅላይ ሚኒስትሩ የተቋቋመ ሁለተኛው ምክር ቤት ሲሆን፣ የመጀመርያው የመንግሥት የልማት ድርጅቶችን ሙሉ በሙሉ ወይም በከፊል ወደ ግል ለማስተላለፍ በተወሰነው ውሳኔ መሠረት አፈጻጸሙ ላይ የሚያማክር ነው፡፡

ጠቅላይ ሚኒስትሩ የዳያስፖራው ማኅበረሰብ በቀን አንድ ዶላር ለአገሩ ልማት እንዲያበረክት ባቀረቡት ጥያቄ መሠረት የዳያስፖራ ትረስት ፈንድ የማቋቋም እንቅስቃሴ እየተደረገ ሲሆን፣ ባለፈው ወር በአሜሪካ በነበራቸው የስድስት ቀናት ቆይታም ከዳያስፖራው ጋር በመወያየት ፈንዱ ሰፊ ድጋፍ እንዲያገኝ ቅስቀሳ አድርገዋል፡፡