Skip to main content
x
ክቡር ሚኒስትሩ ከሌላ ሚኒስትር ጋር እያወሩ ነው

ክቡር ሚኒስትሩ ከሌላ ሚኒስትር ጋር እያወሩ ነው

[ክቡር ሚኒስትር ተራማጅ አመለካከት ካለው ወጣት ጋር እያወሩ ነው]

  • እንዴት ነህ ወጣቱ?
  • እንዴት ነዎት ክቡር ሚኒስትር?
  • ሰሞኑን ደግሞ አልተቻልክም፡፡
  • እንዴት ክቡር ሚኒስትር?
  • ሚዲያውን በአጠቃላይ ተቆጣጥረኸዋል እኮ፡፡
  • ክቡር ሚኒስትር ጊዜው የእኛ እኮ ነው፡፡
  • የእኛ ስትል?
  • አገሪቱ በለውጥ ጎዳና ላይ አይደለች እንዴ?
  • ብትሆንስ ታዲያ?
  • ለውጡን እየመራ ያለው ወጣቱ ትውልድ ነዋ፡፡
  • ልጅ ያቦካው ለእራት አይበቃም ሲባል አልሰማህም?
  • ምን ማለት ነው?
  • ይኸው የእናንተ ለውጥማ አገሪቱን ሊያፈራርሳት ነው፡፡
  • ክቡር ሚኒስትር አገሪቱን ልታፈራርሷት የነበራችሁትማ እናንተ ናችሁ፡፡
  • ሰሞኑን በመላ አገሪቷ ውስጥ እየተካሄደ ያለውን ነገር እየተከታተልክ ነው ለመሆኑ?
  • ክቡር ሚኒስትር ሁልጊዜ ሊነጋ ሲል ይጨልማል ሲባል አልሰሙም?
  • እኔ የምፈራው በዚያው ጨልሞብን እንዳይቀር ነው፡፡
  • ለምንድነው ሁሌ ጨለምተኛ የምትሆኑት?
  • አሁን የምናየው ነገር ጨለማ ብቻ ስለሆነ ነዋ፡፡
  • ክቡር ሚኒስትር አገሪቱ እኮ የሚገርም ለውጥ ላይ ናት፡፡
  • የምን ለውጥ ነው?
  • አፋኝ፣ ጨቋኝና አምባገነን የነበረ ሥርዓት እየተለወጠ ነው፡፡
  • ወደ ምንድነው የተለወጠው?
  • ይኸው ሁላችንም በአንፃራዊነት ነፃነት አግኝተን የፈለግነውን እየተናገርን ለአገራችን የበኩላችንን እያበረከትን ነው፡፡
  • ስማ በእኔ ዕይታ አገሪቱ እልም ወዳለ ሥርዓተ አልበኝነት ነው እየተቀየረች ያለችው፡፡
  • ክቡር ሚኒስትር ታፍኖ የነበረው ወጣት ድምፁን ማሰማት ሲጀምር አነስተኛ ችግሮች ሊፈጠሩ ይችላሉ፡፡
  • ችግሩ አነስተኛ ነው ብለህ ነው?
  • እናንተ አገሩን ሙሉ እስር ቤት አድርጋችሁት ስለነበር በአንዴ ሕዝቡ ሁሉ ሲፈታ የተለያዩ ችግሮች ሊኖሩ ይችላሉ፡፡
  • ምንም ብትለኝ አገሪቱ ውስጥ እየታየ ያለው ሥርዓተ አልበኝነት ተቀባይነት የለውም፡፡
  • ክቡር ሚኒስትር በእናንተ ዘመን የነበረውን ሥርዓተ አልበኝነት ዘነጉት እንዴ?
  • የምን ሥርዓተ አልበኝነት?
  • በሥልጣናችሁ ሕዝብን ከማገልገል ይልቅ ራሳችሁን በማገልገል ስንትና ስንት ገንዘብ ስትዘርፉ አልነበር እንዴ?
  • እ. . .
  • ከዚያም በላይ ለእናንተ ሥጋት የሚመስላችሁን ማንኛውንም ግለሰብና ሐሳብ ስታጠቁ ነበር፡፡
  • እዚህ ላይ እንዳትሳሳት፡፡
  • ምን እያሉ ነው ክቡር ሚኒስትር?
  • እኛ የገነባው ሥርዓት ልማት፣ ዴሞክራሲና ሰላምን በአገሪቱ ላይ ያሰፈነ ነበር፡፡
  • የትኛዋ አገር ላይ?
  • ኢትዮጵያ ላይ ነዋ፡፡
  • ክቡር ሚኒስትር ለአፍዎ ትንሽ አይከብድዎትም?
  • ምኑ ነው የሚከብደኝ?
  • ሕዝቡ ላለፉት ሦስት ዓመታት አምፆ ለውጥ ያመጣው ልማት፣ ዴሞክራሲና ሰላም አስክሮት ነው?
  • ጥቂቶች አመፁ ብለህ አመፁን የሕዝብ አታድርገው፡፡
  • ክቡር ሚኒስትር ይህች አገር እኮ እርስዎ በሚሉት መንገድ ቀጥላ ቢሆን ኖሮ መጨረሻዋ መፈራረስ ብቻ ነበር፡፡
  • ስማ እኛ ከሕዝቡ ቀድመን በማሰብ አመራር የምንሰጥ እንጂ በሕዝብ የምንመራ አይደለንም፡፡
  • እናንተማ እንደተባለው ሕዝቡን መንዳት እንጂ መምራት መቼ ታውቁበታላችሁ?
  • ብንነዳውም እኮ ምርጫ አሸንፈን በሕጋዊ መንጃ ፈቃድ ነው የነዳነው፡፡
  • ክቡር ሚኒስትር የሚያሳዝነው እሱ አይደል እንዴ?
  • ምኑ ነው የሚያሳዝነው?
  • ያለመንጃ ፈቃድ ነበር የምትነዱት፡፡
  • ምን ለማለት ነው?
  • መንጃ ፈቃዳችሁ ምን እንደሆነ ተደርሶበታል፡፡
  • ምንድነው?
  • ፎርጅድ!

[ክቡር ሚኒስትሩ ወደ አገሩ በቅርቡ ከተመለሰ ዳያስፖራ ጋር እያወሩ ነው]

  • ለበዓል ነው ወደ ኢትዮጵያ የመጣኸው?
  • ከዚህ በኋላማ መኖሪያዬ ኢትዮጵያ ናት ክቡር ሚኒስትር፡፡
  • ምን ተገኘና?
  • ባለፈው ጠቅላይ ሚኒስትሩ ወደ አገራችሁ ግቡ አሉን አይደል እንዴ?
  • የእሳቸውን ጥሪ ተቀብለህ ነው የመጣኸው?
  • ምን ጥያቄ አለው ክቡር ሚኒስትር?
  • እኛ ስንቴ ነበር አገራችሁ ግቡ እያልን ጥሪ ያቀረብንላችሁ?
  • ለእናንተ ጥያቄማ ጥሪ አንቀበልም ነበር መልሳችን፡፡
  • ታዲያ አሁን ምን ተወለጠ?
  • አሁንማ አገራችን የእኛን ድጋፍ የምትፈልግበት ወቅት ነው፡፡
  • በፊትስ ማን ከለከለህ?
  • በፊትማ ሀብታችንን እንጂ መቼ እኛን ትፈልጉ ነበር?
  • ደግሞ ምን ሀብት አላችሁ?
  • አዩ ክቡር ሚኒስትር፣ ሀብት ገንዘብ ብቻ ሳይሆን ዜጎች በራሳቸው የአገር ሀብት ናቸው፡፡
  • ይኼን ስብከትህን ለተደመሩት ንገራቸው፡፡
  • ክቡር ሚኒስትር ካልተደመሩ እየተደናበሩ ነው ማለት ነው?
  • አሁን ወሬውን ተወውና ምን ልትሠራ አሰብክ?
  • እኔማ በሰው አገር ሳህን አጥቤና ታክሲ ነድቼ ያፈራሁትን ሀብት አገሬ ላይ ለማፍሰስ ተዘጋጅቻለሁ፡፡
  • እንደዚያ ከሆነማ  እኔ ላማክርህ እችላለሁ፡፡
  • ክቡር ሚኒስትር ኮንሰልታንት ሆነዋል እንዴ?
  • እዚህ አገር ላይ ስኬታማ የሆነ ቢዝነስ ሁሉ እኔ ያማከርኩት ነው፡፡
  • እርስዎ ግን ኮንሰልታንት ነኝ ሲሉ አያፍሩም?
  • ምን ያሳፍረኛል?
  • በፊት ዓይን አውጥታችሁ ነበር የምትዘርፉት፣ አሁን ደግሞ ሌላ ባርኔጣ አድርጋችሁ ሕዝብ ልትዘርፉ ትፈልጋላችሁ?
  • ምን እያልክ ነው?
  • ክቡር ሚኒስትር እናንተ እኮ ስኳር ሳይሆን የስኳር ፋብሪካ የምትቅሙ፣ እሱ አልበቃ ብሏችሁ ባቡር፣ ኮንዶሚኒየምና መንገድ ሳይቀር የምትቅሙ ናችሁ፡፡
  • አንተ ግን ከቤትህ ቅመህ ነው የወጣኸው መሰለኝ?
  • ከዚያም በላይ ሕዝቡን ቃሚ አድርጋችሁ ይህ ሁሉ ይቅርታና ምሕረት ይገባችኋል ብዬ አላስብም፡፡
  • እና እንድታሰር ነበር የምትፈልገው?
  • ከሠራችሁት አንፃርማ እስር ቤት ለእናንተ ሽልማት ነው፡፡
  • ምን ይላል ይኼ?
  • ክቡር ሚኒስትር አገሪቱ እኮ በእናንተ ምክንያት ከገደል አፋፍ ላይ ልትፈጠፈጥ ብላ ለጥቂት ነው የተረፈችው፡፡
  • ይኼ ሁሉ ልማትና ዕድገት በእኛ መምጣቱን እንዳትረሳው?
  • ለማንኛውም ክቡር ሚኒስትር አሁን ድምፃችሁን አጥፍታችሁ በሰላም ብትኖሩ ይሻላችኋል፡፡
  • ስማ መርሳት የሌለብህ እኮ ለእኔም አገሬ ናት፡፡
  • ስለዚህ አርፈው ቢቀመጡ ይሻልዎታል፡፡
  • ምን ታስፈራራኛለህ እኔ እኮ በሀብትም ቢሆን አለ የተባልኩ ሚሊየነር ነኝ፡፡
  • መቼም ሚሊየነር እንዴት እንደሆኑ ያውቃሉ፡፡
  • እንዴት ነው የሆንኩት?
  • በአንድ ጀምበር ነዋ፡፡
  • ምን ችግር አለው ታዲያ?
  • አሁን ደግሞ በአንድ ጀምበር መግባትዎ አይቀርም፡፡
  • ወደ ምን?
  • ወደ ዜሮ!

[ክቡር ሚኒስትሩ ከደላላ ወዳጃቸው ጋር ተገናኝተው እያወሩ ነው]

  • ምነው ጠፋህ?
  • ምን ላድርግ ክቡር ሚኒስትር?
  • ማለት?
  • ከግራ መጋባት እኮ ወደ ተስፋ መቁረጥ ተሸጋግሬ ነው፡፡
  • ለምንድነው ተስፋ የቆረጥከው?
  • ክቡር ሚኒስትር የእኛ ጉዳይ ያበቃለት ይመስለኛል፡፡
  • አበቃለት ስትል?
  • እኔማ ተስፋ ያደረግኩት እናንተን ነበር፣ እናንተም ግን ያበቃላችሁ መሰለኝ፡፡
  • ማነው ያለው?
  • ክቡር ሚኒስትር እኔማ እንደለመዳችሁት አፈር ልሳችሁ ትነሳላችሁ ብዬ ነበር፣ አሁን ግን ያበቃላችሁ ትመስላላችሁ፡፡
  • ስማ እኛማ አንድ ጥይት እስክትቀር ድረስ መታገላችን አይቀርም፡፡
  • እኔማ ያስጀመርኳቸውን ፕሮጀክቶች ኮሚሽኖች እንኳን እስካስጨርስ ዕድሜ አላችሁ ብዬ ነበር፣ ግን አልመሰለኝም፡፡
  • እንደዚህማ ተስፋ አትቁረጥ፡፡
  • ክቡር ሚኒስትር እርስዎ ለእኔ አማካሪዬ፣ አስተማሪዬና የሌብነትን መንገድ ጥርት አድርገው ያሳዩኝ ነበሩ፡፡
  • አልገባኝም?
  • ክቡር ሚኒስትር በጣም ያስጨነቀኝ ነገር አለ፡፡
  • ምንድነው የሚያስጨንቅህ?
  • ይህች ምሕረት ምናምን ያሏት ነገር ምንም አላምር ብላኛለች፡፡
  • እ. . .
  • ይኸው ሕዝብ በየቦታው የራሱን ፍርድ እየሰጠ ያለው መንግሥት በሌቦቹ ላይ ፍርድ አልሰጠም ብሎ ስለሆነ፣ በኋላ ላይ እነሱም ሲረጋጉ ሒሳብ የሚያወራርዱብን እየመሰለኝ ነው፡፡
  • ምነው እንደዚህ ተሸብረህ ታሸብረኛለህ?
  • ክቡር ሚኒስትር ነገሩ ምንም አላምር ስላለኝ ለመጥፋት እያሰብኩ ነው፡፡
  • ወዴት ነው የምትጠፋው?
  • ነገሮች ከተረጋጉ እንገናኛለን ብዬ አስባለሁ፡፡
  • ተው እንጂ ወዳጄ?
  • ሁሌም ግን የሚቆጨኝ አንድ ነገር ነበር፡፡
  • ምንድነው እሱ?
  • ያንን ነገር ላስፈጽም ደፋ ቀና እያልኩ ይኼ ለውጥ በመምጣቱ በጣም ነው የቆጨኝ፡፡
  • ምንድነው እሱ?
  • ክቡር ሚኒስትር እርስዎ ለእኔም ሆነ ለአገር ላበረከቱ አስተዋጽኦ አንድ ሽልማት ይገባዎታል ብዬ ደፋ ቀና እያልኩ ነበር፡፡
  • ለእኔ ሽልማት?
  • አዎን ክቡር ሚኒስትር፣ ሽልማቱ ከግራሚም፣ ከኦስካርም ሆነ ከኖቤል የተሻለ ሽልማት ይሆናል ብዬ አስቤ ነበር፡፡
  • ምን ተብዬ ነው ደግሞ የምሸለመው?
  • የክፍለ ዘመናችን ባለራዕይ ሌባ!

[ክቡር ሚኒስትሩ ከሌላ ሚኒስትር ጋር እያወሩ ነው]

  • ምንድነው እየሰማሁ ያለሁት?
  • ምን ሰሙ ክቡር ሚኒስትር?
  • ሚኒስቴር መሥሪያ ቤቶች ሊታጠፉ ነው የሚባለው?
  • ባለፈው ጠቅላይ ሚኒስትሩ ሲናገሩ አልሰሙም እንዴ?
  • እኔማ ዝም ብሎ የተወራ ወሬ መስሎኝ ነው፡፡
  • እንዲያውም የእርስዎ ሚኒስቴር መሥሪያ ቤት ከሚታጠፉት መካከል አንዱ ነው፡፡
  • እ. . .
  • በአዲሱ ካቢኔ አይካተቱም፡፡
  • አንተ እንዴት አወቅክ?
  • የሚኒስቴር መሥሪያ ቤቶቹን ሽግሽግ የሚያጠናው ኮሚቴ ውስጥ አለሁበት፡፡
  • ትልቅ ስህተት እየሠራችሁ ነዋ፡፡
  • እንዴት ክቡር ሚኒስትር?
  • ይህች አገር እኮ ያለችው በእኔ ሚኒስትር መሥሪያ ቤት ነው፡፡
  • ምን አሉኝ?
  • ተደመር አላችሁኝ ተደመርኩ፣ አሁን በምን ሥሌት ነው እኔን የምትቀንሱኝ?
  • ክቡር ሚኒስትር ባለፈው መደመር ውስጥ መቀነስ እንዳለ አልሰሙም ነበር?
  • ታዲያ የእኔን መሥሪያ ቤት ከምትቀንሱት አገሪቱን እናፍርሳት ብትሉኝ አይሻልም?
  • ምን እያሉ ነው?
  • አገሪቱ ያለ እኔ ሚኒስቴር መሥሪያ ቤት እንዴት ትቀጥላለች?
  • እንዲያውም ለአገሪቱ ፀር የእርስዎ ሚኒስቴር መሥሪያ ቤት መሆኑ ተደርሶበታል፡፡
  • ስለዚህ እኔን አውላላ ሜዳ ላይ ልትጥሉኝ?
  • ክቡር ሚኒስትር ምን ይደረግ እያሉ ነው?
  • እኔ ያለኝ ልምድ ለአገሪቱ ጠቃሚ ነው፡፡
  • ከፍተኛ የሆነ ልምድ እንዳለዎትማ እኛም ደርሰንበታል፡፡
  • ታዲያ እንዴት ሚኒስቴር መሥሪያ ቤቴን ታፈርሱታላችሁ?
  • ሌላ እንዲቋቋምልዎት ነዋ፡፡
  • የምን ሚኒስቴር መሥሪያ ቤት?
  • የሸርና የተንኮል!